“Kugumesa” — Kasi Ku Wuliwa Yini?

Loku uzwa a magezu yaku: “A kugumesa ku laha kusuhani!” zini zi taku ka maalakanyo ya wena? U alakanya a mufundisa a yimileko laha ka xiluvelo xa chechi na a wulawula hi gezu ga hombe na a khanyisa lezi a zi wulako hi miri, lezo na a hi ni Biblia lomu mandleni? Kutani u alakanya a wanuna wa malevu, a yimileko laha ka mahanzakanya ya tindlela, a bohileko a nghanju yo leha na a yi tiyisile hi lingoti lomu xiwunwini, na a hi ni nchumu xi nga tsaliwa mahungu yo tshisa xungetano hi kugumesa ka tiko? A ku alakanyela a zilo lezo na zi maheka zi maha vo kari va karateka, kanilezi a vanwani zi va vangela kukanakana hambu ku va hlekisa futsi.

A Biblia gi ngalo: ‘A kugumesa ku ta chikela.’ (Mateu 24:14) A ximaho lexo xi tlhela xi vitaniwa ku i ‘siku ga hombe ga Nungungulu’ ni “Har-Magedoni.” (Kuvululelwa 16:14, 16) Hi lisine, ku na ni pfilupfilu ya hombe xikari ka wukhongeli go tala hi mhaka leyi, ni kuhulumetela ko kala magumo. Hambulezo, a Biblia ha goce gi nyika tlhamuselo wo dlunyateka xungetano hi kugumesa — gi komba lezaku xini a kugumesa, gi tlhela gi komba lezi zi nga hiko kugumesa. A Mhaka ya Nungungulu kambe ya hi vuna ku zi wona laha kubaseni lezaku xana a kugumesa ku laha kusuhani ke. Lexi xi tsakisako nguvu, hi lezaku yi hi gonzisa ku hi nga maha yini kasi hi pona! Hambulezo, hi ta sangula hi ku dlunyatisa zilo, hi tlhamusela a ku xini a kugumesa. Makunu, hi kuya hi Biblia, xini a “kugumesa”?

LEZI ZI NGA HIKO KUGUMESA

1. A HI KULOVISWA KA MISAVA.

   A Biblia gi ngalo: ‘Nungungulu i yimisile misava ziseketelweni za yona, yi nga ta tsekatseka kala kupinzuka.’ (Tisimu 104:5) A mutsalo lowu ni yinwani yi hi tiyisekisa lezaku Nungungulu a nga ta tshuka a fuvisa misava, ge hambu ku vumelela lezaku yi loviswa! — Mutshawuteli 1:4; Isaya 45:18.

2. A HI XIMAHO XI TO HALAHALA XI HUMELELA.

   A Biblia gi wula lezaku a kugumesa ku vekelwe xikhati — Nungungulu i vekile xikhati xo kongoma xa kugumesa. A Biblia gi ngalo: “Xungetano hi siku lego kutani xikhati lexo, a nga kona ni munwe a zi tivako, hambu ni tingelosi ta le tilweni, hambu ni N’wana, sine Dadani yece. Tlharihani, mu rinzela; hakuva a mu xi tivi a xikhati xi yimisilweko.” (Marku 13:32, 33, NM) Nungungulu (“Dadani”) i vekile a “xikhati xi yimisilweko” ku nga xikhati lexi a kugumesa ku to sangula.

3. A KUGUMESA KU NGA TA TISIWA HI VANHU KUTANI HI NCHUMU WO KARI WU TOWA HI LE TILWENI WU LOVISA MISAVA.

   Zini zi to nehiwa hi kugumesa? A bhuku ga Kuvululelwa 19:11 gi ngalo: “Nzi lo wona tilo na gi vululekile, ku woneka a haxi go basa, ni loyi a nga khilele ka gona i vitanwa Kutsumbeka,” ni Lisine. A vesi 19 giya mahlweni giku: “Nzi lo wona xihari ni tihosi ta misava, ni mabutho ya tona, na va tsombene a kulwa ni loyi a khileleko haxini ni yimpi yakwe.” (Kuvululelwa 19:11-21) Hambu lezi a mawulawulela yo tala ma tirisiwako ka mavesi lawa ma nga yo fananisa, hi nga tekela a ku zwisisa lezi: Nungungulu i ta rumela a butho ga tingelosi lezaku ti ta lovisa a valala vakwe.

XINI A KUGUMESA?

1. KUGUMESA KA MIFUMO YA VANHU YI KALAKO YI NGA ZI KOTI A KU LULAMISA A ZIKARATO ZA VANHU.

   A Biblia gi tlhamusela lezi: “Nungungulu wa le tilweni i ta vuxa a mufumo wu to kala wu nga lobyiswi, ni wuhosi ga wona cima gi nga ta nyikelwa ka ginwani tiko. Wu ta panza wu lovisa yontlhe mifumo leyi, wona wu ku tsonzoma kala kupinzuka.” (Danieli 2:44) Kota lezi zi wulilweko kusanguleni, ka xidokho xa wu 3, ku tava ni kuloviswa ka “tihosi ta misava, ni mabutho ya tona,” leti ti to ‘tsombana kasi a kulwa ni loyi a khileleko haxini ni yimpi yakwe.’ — Kuvululelwa 19:19.

2. KUGUMESA KA TIYIMPI, WUGEVENGA, NI WUBIHI.

   ‘Nungungulu i fuvisa tiyimpi kala magumelweni ya misava.’ (Tisimu 46:9) ‘Ntsena a valulamileko hi vona va to aka tikweni, ni lava va mbheleleko va ta sala ka gona. Kanilezi a vakubiha va ta susiwa laha misaveni, ni vakanganyisi va ta tsuwulwa ka yona.’ (Mavingu 2:21, 22) “Langutani nzi maha zilo zontlhe ziva ziswa.” — Kuvululelwa 21:4, 5.

3. KULOVISWA KA WUKHONGELI LEGI GI KANGANYISAKO VANHU GI TLHELA GI NGA MAHI LEZI NUNGUNGULU A ZI LAVAKO.

   ‘A vaprofeti va profeta mawunwa, ni vapristi va fumela hi mintamu ya vona wutsumbu. Kanilezi mu ta maha yini loku a kugumesa ku chikela?’ (Jeremia 5:31) “A vanyingi va taku ka mina hi lego siku: Hosi, Hosi, a hi profetangi hi vito ga wena ke; hi vito ga wena a hi hlongolangi madimoni ke; a hi mahangi zirewukiso zo tala hi vito ga wena ke? Zonake nzi taku ka vona: Cima nzi wa nga mu tivi; sukani ka mina, nwina vaonhi”! — Mateu 7:21-23.

4. KULOVISWA KA VANHU VA VANGAKO NI KU SEKETELA A MATSHAMELA YA TIKO, LAWA HI MA WONAKO INYAMUTLHA.

   Jesu Kristu i te ngalo: A xiseketelo xa kulamula hi “lezaku a kuwonekela ku tile misaveni, kanilezi vanhu va ranzile munyama ku hunza kuwonekela; hakuva mitiro yabye yi wa bihile.” (Johani 3:19) A Biblia gi wulawula hi kuloviswa ku mahekileko misaveni yontlhe xikhatini xa wanuna wa kukholwa, Noa. ‘A misava leyi yi nga hi kona ka xikhati lexo yi lo khulungelwa hi mati, yi lova. Kanilezi a matilo laya ma nga kona makunu, ni misava, zi hlayiselwe nzilo hi gezu galego, zi vekelwe a siku ga kulamulwa ni ga kulobyiswa ka vanhu lava va nga chaviko Nungungulu.’ — 2Pedro 3:5-7.

Wona lezaku “a siku ga kulamulwa ni ga kulobyiswa” legi gi tako, gi fananiswa ni kuloviswa ka “misava” ya xikhatini xa Noa. Misava muni yi nga lovisiwa? A misava ya hina leyi hi hanyako ka yona a yi lovisiwangi. Kanilezi lava va nga ‘lovisiwa’ “vanhu lava va nga chaviko Nungungulu” — ku nga valala va Nungungulu. Nzeni ka ‘siku ga Nungungulu ga kulamula,’ lava va hlawulako a ku ti maha valala va Nungungulu vonawu va ta lovisiwa. Kanilezi, a vanghana va Nungungulu va nga ta lovisiwa, a ku fana ni lezi Noa ni ngango wakwe va nga kala ku lovisiwa. — Mateu 24:37-42.

Hi nga alakanyela lezi a misava leyi yi to sasekisa zona anzhako ka kuva Nungungulu a lovisile a kubiha kontlhe! Zi laha kubaseni lezaku lezi a Biblia gi zi wulako xungetano hi kugumesa mahungu yo saseka na ku ga hi ya kubiha. Kanilezi u nga ha ti wutisa lezi: ‘A Biblia ga hi byela a ku hi rini a kugumesa ku to chikela? Ku ngava lezaku ku laha kusuhani ni ku chikela? Nzi nga ponisa kuyini ka siku lego?’