“U zi wonekelisa ka lava va tsongwani”

Xana wa zi lava ku tiva a lisine xungetano hi Nungungulu — lezaku hi yena mani, lezi a zi ranzako ni lezi a zi vengako? Lomu ka Biblia, gi nga Mhaka yakwe, Jehova Nungungulu i hi byela a lisine lontlhe xungetano hi yena wutsumbu. Kanilezi a hi vontlhe va lerako a Biblia va zi kotako ku li zwisisa khwatsi a lisine lelo. Hikuyini? Hi lezaku a ku zwisisa a lisine lelo i lungelo, niku a hi vontlhe va gi kumako. A hi woneni lezi Jesu a zi wulileko hi mhaka leyi. — Gonza Mateu 11:25.

A vesi lego gi sangula hi magezu lawa: “Hi lexo xikhati Jesu i lo wulawula, aku.” Ko khwatsi lezi Jesu a lavako ku zi wula zi yelana ni zilo zi nga maheka lokuloku. Yena wa ha hi ku kawuka vanhu va madoropa manharu ya le Galilea va nga ala ku maha vapizani vakwe kuveni i wa mahile zihlamaliso za hombe kwalomo. (Mateu 11:20-24) Kuzilava u nga ha ti wutisa lezi, ‘Zi nga kotekisa kuyini kuva munhu a wona zihlamaliso za Jesu a tlhela a ala a lisine leli a nga kari a li gonzisa?’ A kuala ka vanhu lavo ku wa fambelana ni kunonoha ka timbilu tabye. — Mateu 13:10-15.

Jesu i wa zi tiva lezaku kasi ku zwisisa a lisine la moya li kumekako lomu ka Biblia, hi fanele kuva ni zilo zimbiri: xivuno xa Nungungulu ni mbilu yi nene. Jesu i zi tlhamusela hi ndlela leyi: “Nza ku khesa Dada, Hosi ya tilo ni misava, hi lezi u nga fihlela a titlhari ni vapimako a timhaka leti, kanilezi u zi wonekelisa ka lava va tsongwani.” Xana wa zi wona makunu lezaku hikuyini a kuzwisisa a lisine la moya li nga lomu ka Biblia zi nga lungelo? Jehova, a “Hosi ya tilo ni misava,” wa zi kota ku fihla kutani ku wonekelisa a lisine mayelano ni kuranza kakwe. Kanilezi lezo a zi wuli ku ngalo Nungungulu ova ni xihlawulela. Loku zi hi tano, hi xihi a xiseketelo a xi tirisako kasi ku wonekelisa a lisine la Biblia ka vokari zonake a fihlela vanwani?

Jehova i tsakela vanhu va kutikoramisa, a venga vamatshanza. (Jakobe 4:6) I fihlela lisine a ‘titlhari ni lava va tivako’ — va nga ni wutlhari ga za tiko ni va gonzileko nguvu, ku nga lava va nga woniko xilaveko xa ku vuniwa hi Nungungulu hi kota ya matshanza yabye ni kutitsumba. (1 Va Le Korinte 1:19-21) Kanilezi yena i wonekelisa a lisine ka “lava va tsongwani” — va tako kakwe hi timbilu ti nene, na va kombisa kutikoramisa ko fana ni ka vanana. (Mateu 18:1-4; 1 Va Le Korinte 1:26-28) Jesu, N’wana wa Nungungulu, i ku wonile hi mahlo a kuhambana loko ka vanhu. A kutala ka varangeli va wukhongeli va nga hi vamatshanza ni va gonzileko nguvu a va wu kumangi a mongo wa mhaka yi nga xumayelwa hi Jesu, kanilezi wu kumilwe hi vakukuti va kutikoramisa. (Mateu 4:18-22; 23:1-5; Mitiro 4:13) Hambulezo, ku humelele vokari va nga hi vanyatimali, ni va gonzileko nguvu lava va kombisileko kutikoramisa ka lisine zonake va maha vapizani va Jesu. — Luka 19:1, 2, 8; Mitiro 22:1-3.

A hi tlheleni ka xiwutiso xi mahilweko kusanguleni ka nzima leyi: Xana wa zi lava ku tiva lisine xungetano hi Nungungulu? Loku u zi lava, u ta tangala hi ku tiva lezaku Nungungulu a nga xalaliswi hi lava va ti byelako kuva titlhari hi mawonela ya tiko. Yena i kombisela tipswalo lava va kanyiswako hi titlhari ta tiko. Loku u gonza a Mhaka ya Nungungulu hi zigelo zi faneleko ni mbilu yi nene, u ta zi kota kuva xikari ka lava Jehova a va nyikako lungelo legi ga lisima nguvu — a ku zwisisa a lisine xungetano hi yena. A ku kuma a lisine lelo zi nyawulisa a wutomi ga wena zi tlhela zi ku yisa ‘wutomini legi gi nga wutomi hizinene’ — ku nga wutomi ga pinzukelwa misaveni yiswa yo lulama leyi yi tota lokuloku.a — 1 Timote 6:12, 19; 2 Pedro 3:13.