“Famba lisineni”

1. Hi vhunekisa kuyini hi ku bhula hi lezvi hi nga nghenisa zvona “lisineni”?

“U NGHENISILE kuyini lisineni?” A zvi kanakanisi ku u hlamulile ciwutiso leci makhati yo tala. Leci cin’we ca zviwutiso zvo sangula lezvi a makholwa-kuloni ma mahako kasi ku tiva khwatsi a makabye wo kari. Zva hi tsakisa nguvhu a kuzwa vamakabye na va hlawutela lezvi va mu tivisileko zvona Jehovha va tlhela va mu randza niku hinawu zva hi tsakisa a ku va byela ku hikuyini zvi hi tsakisako kuva Vakustumunyu va Jehovha. (Rom. 1:11) A mabhulo lawo ma hi vhuna ku alakanya lezvi a lisine li nga la lisima ha zvona ka hina. Niku hi tlhela hi ti yimisela nguvhu a ku “famba lisineni” — ku nga ku hanya hi ndlela yi to maha ku Jehovha a hi tsakela a tlhela a hi katekisa. — 3 Joh. 4.

2. Zvini hi to bhula hi zvona ka ndzima leyi?

² Ka ndzima leyi, hi ta vhuxeta zvigelo zvo kari zvi hi mahako hi randza lisine. Hi kulandzela, hi ta wona lezvi hi nga simamisako zvona hi kombisa lirandzo la hina hi cinyikiwo leci ca lisima. A zvi kanakanisi lezvaku a kuvhuxeta loko ku ta engetela lezvi hi mu bongisako zvona Jehovha hi kota ya lezvi a zvi mahako kasi ku hi koka hita lisineni. (Joh. 6:44) A kuvhuxeta loko ku ta tlhela ku tiyisa a kuxuva ka hina ka ku lava ku bhulela van’wani a lisine.

HIKUYINI HI RANDZAKO ‘LISINE’?

3. Hi cihi cigelo ca hombe ci hi mahako hi randza lisine?

³ Hi randza lisine hi zvigelo zvo tala. A ca lisima nguvhu, hi randza Jehovha Nungungulu, a Cibuka ca lisine. Hi kota ya Mhaka yakwe, a Bhibhiliya, hi mu tiva kota Papayi wa hina wa lirandzo wa le tilweni, loyi a khatalako nguvhu hi hina na ku nga hi ku mu tiva basi kota munhu wa ntamu, loyi a vangileko a tilo ni misava. (1 Ped. 5:7) Ha zvi tiva lezvaku a Nungungulu wa hina i na ni ‘wuxinji ni tipswalo, wa nonokako ku zangara, i tele hi wuxinji ni kutsumbeka’. (Ekso. 34:6) Jehovha i randza kululama. (Isa. 61:8) Zva mu pandza mbilu a ku hi wona na hi xaniseka niku i longile — ina, wa zvi xuva nguvhu a ku mbheta a kuxaniseka kontlhe hi cikhati ci yimisilweko. (Jer. 29:11) A hi ku tsakisa ka zvona! Leco cin’we ca zvigelo zvi hi mahako hi mu randza nguvhu Jehovha!

4-5. Hikuyini mupostoli Pawule a nga fananisa a kutsumba ka hina ni fero?

⁴ Hi cihi cin’wani cigelo ci hi mahako hi randza lisine? A lisine la hi vhuna nguvhu. Wona cikombiso. A lisine li patsa a kutsumba loku hi nga nako xungetano hi cikhatini ci tako. Kasi ku komba lisima la kutsumba loko, mupostoli Pawule i tsalile lezvi: “A kutsumba loku hi nga nako ku fana ni fero ka muhefemulo; kutsumba ka lisine ni ko tiya”. (Mah. 6:19) A ku khwatsi hi lezvi a fero yi yimisako a ngalava, a kutsumba ka hina ku seketelwako ka Bhibhiliya ku nga hi yimisa hi tiya hi ku nde a cikhati leci hi kumanako ni zvikarato wutomini.

⁵ Mhakeni leyi, Pawule i wa wulawula hi kutsumba ka le tilweni, loku a maKristu ma totilweko ma nga nako. Kanilezvi, lezvi a nga zvi wula zva tira kambe ni ka maKristu ma nga ni kutsumba ka ku hanya kala kupindzuka kwalaha misaveni. (Joh. 3:16) Handle ko kanakana, a ku gondza xungetano hi kutsumba ka ku hanya kala kupindzuka zvi hi maha hi hanyela co ci tiva.

6-7. Yvonne i vhunekisile kuyini hi ku gondza lisine xungetano hi wumandziko?

⁶ Wona cikombiso ca makabye wo kari wa ku hi Yvonne. A nga kulelangi lisineni niku a cikhati leci a nga hi n’wanana i wa ku chava kufa. Ka siku go kari i no lera magezu ma nga kala ku suka hlokweni yakwe. Ma wa wula lezvi: “A siku gin’we ku nga ta hava ni mandziko.” I wulile lezvi: “A magezu lawo ma ndzi tsonile ni wurongo laha ka kuza ndzi mbheta a wusiku gontlhe na ndzi ehleketa hi wumandziko ga mina. Ndzi wa ti wutisa ku: ‘Kasi ndzi hanyela yini? A ndzi alakanyi ku hi zvalezvi basi ndzi hanyelako zvona.’ Ndzi wa nga zvi lavi kufa!”

⁷ Hi ndzhako ka cikhati, laha a nga hi tangeni ya ku sangula ku ti tshotshota, Yvonne i no tivana ni Vakustumunyu va Jehovha. I wula lezvi: “Ndzi no sangula ku kholwa lezvaku ndzi ngava ni kutsumba ka ku hanya kala kupindzuka paradhiseni laha misaveni.” A ku gondza lisine zvi mu vhunisile kuyini a makabye wa hina? I engeta aku: “A ndza ha mahi ku pilapila na ndzi ehleketa hi wumandziko kutani kufa.” Kota lezvi kuzvilava u zvi alakanyelako, a lisine la lisima nguvhu ka Yvonne niku i kuma litsako la hombe laha a bhulelako van’wani a kutsumba kakwe ka cikhatini ci tako. — 1 Tim. 4:16.

8-9. a) Ka wun’we wa mifananiso ya Jesu, a wanuna wo kari i li nyikisile kuyini lisima a tshomba leli a li kumileko? b) Lisima muni leli a lisine li nga nalo wutomini ga wena?

⁸ A lisine la Bhibhiliya li tlhela li patsa a mahungu ya manene xungetano hi Mufumo wa Nungungulu. Jesu i fananisile a mahungu xungetano hi Mufumo ni tshomba yi fihlilweko. Kota lezvi zvi tsalilweko ka Matewu 13:44, Jesu i te: “A Mufumo wa matilo wu fana ni tshomba yi fihlilweko lomu sin’wini, leyi a munhu a nga yi kuma a yi fihla. Hi kota ya kutsaka i noya a ya xavisa zvontlhe a nga nazvo, a xava a simu lego.” Wona lezvaku a wanuna loye i wa nga hi lomu ka ku lavetela a tshomba leyo. Kanilezvi a cikhati leci a nga yi wona, i no kulula a n’watseka kasi a yi kuma. Hi lisine, i xavisile zvontlhe a nga hi nazvo. Hikuyini? Hi ku i wa yi tiva a lisima la tshomba leyo. Yi wa hi ya lisima nguvhu a ku hundza ni wihi nchumu lowu a nga wa ta wu luza.

⁹ U ti zwisa lezvo hi lisine? A zvi kanakanisi ku u ti zwisa lezvo. Ha zvi tiva lezvaku a ku na nchumu lowu a tiko legi gi nga hi nyikako wu nga fananisiwako ni litsako leli hi li kumako hi ku tirela Jehovha zvezvi, na hi hi ni kutsumba ka ku hanya kala kupindzuka cikhatini ci tako hasi ka Mufumo wa Nungungulu. A thomo legi hi nga nago ga kuva ni wunghana ga hombe na Jehovha ga lisima nguvhu a ku hundza ni kwihi a kutikarata loku hi nga ku mahako. Leci ci hi nyikako a litsako la hombe ku mu ‘tsakisa zvilweni zvontlhe’. — Kol. 1:10.

10-11. Cini ci vhunileko Michael a ku cica zva hombe wutomini gakwe?

¹⁰ A kutala ka hina hi ti karata nguvhu kasi hi tsakelwa hi Jehovha. A vokari va tsikile mitiro ya timali tikweni legi. A van’wani va tsikile ku hlongolisela ku ganya. A van’wani va cica mahanyela yabye hi kumbhelela a cikhati leci va gondzako xungetano hi Jehovha. Hi zvalezvo zvi nga humelela Michael. A nga kulelangi lisineni. A cikhati leci a nga hi muswa, i no gondzisiwa kharati. I wulile lezvi: “Ndzi wa tizwa matshandza hi kuva ni mitsomo. Ka zvikhati zvin’wani ndzi wa ti wona na ndzi nga hi wo hluliwa hi munhu.” Kanilezvi, a cikhati leci a nga sangula ku gondza a Bhibhiliya, Michael i no gondza lezvi Jehovha a ti wonisako zvona a tihanyi. (Lis. 11:5) Xungetano hi vamakabye lava va nga mu fambisela cigondzo— va sati ni nuna — Michael i wulile lezvi: “A va tshukangi va ndzi byela ku ndzi fanele ku nyima kulwa. Va no simama ku ndzi gondzisa a lisine la Bhibhiliya basi.”

¹¹ Laha Michael a ngaya a gondza nguvhu xungetano hi Jehovha, a lirandzo lakwe hi yena li wo kula. I khumbilwe nguvhunguvhu hi tipswalo leti Jehovha a kombisako a vakhozeli vakwe. Hi kufamba ka cikhati, Michael i no pola lezvaku i wa fanele ku maha ciboho ci nga wa ta cica a wutomi gakwe. I wula lezvi: “Ndzi wa zvi tiva lezvaku a ku tsika kharati wu wa tava wona nchumu wo bindza nguvhu ka yontlhe ndzi tshukileko ndzi yi maha. Kanilezvi ndzi wa zvi tiva kambe lezvaku zvi wa ta tsakisa Jehovha niku ndzi wa zvi tiva lezvaku a ku tirela Jehovha zvi wahi zva lisima nguvhu a ku hundza ni kwihi kutikarata.” Michael i wa li nyika lisima a lisine leli a li kumileko niku lezvo zvi mu vhunile ku cica zva hombe wutomini gakwe. — Jak. 1:25.

12-13. A lisine la Bhibhiliya li mu vhunisile kuyini Mayli?

¹² Kasi ku khanyisa a lisima la lisine, a Bhibhiliya gi fananisa a lisine ni kandiya yi woningako lomu munyameni. (Lis. 119:105; Efe. 5:8) Mayli wa le Azerbaijão i ku bonga nguvhu a kuwonekela loku a ku kumako ka Mhaka ya Nungungulu. I kulele ka ngango wu nga hambene hi wukhongeli. A papayi wakwe i wa hi muMwinyi, a mamani wakwe i wa hi muJudha. I ngalo: “Hambu lezvi ka ku ndzi wa nga se tshuka ndzi ti wutisa ku Nungungulu i kona kutani ahihi, ndzi wa hi ni zviwutiso zvi nga ndzi juja kupima. Ndzi wa lava ku tiva lezvi: ‘Hikuyini Nungungulu a vangileko vanhu niku zvi wa tava ni bhindzu muni lezvaku a munhu a xaniseka a wutomi gakwe gontlhe a gumesa a yaswa tilweni ke?’ Kota lezvi a vanhu va nge zvontlhe zvi mahekako kurandza ka Nungungulu, ndzi wa ti wutisa ku: ‘Xana Nungungulu i va vangela zvikarato a vanhu a gumesa a xalala hi ku tshama a va cuwukisela na va xaniseka ke?’”

¹³ Mayli i no simama ku lavetela mihlamulo ya zviwutiso zvakwe. Hi kufamba ka cikhati i no vhumela a cigondzo ca Bhibhiliya a tlhela a nghena lisineni. I wula lezvi: “A ku zwisiseka ka Bhibhiliya ku cicile a wutomi ga mina giva ginene. A mitlhamuselo yo tsumbeka leyi ndzi yi kumileko lomu ka Mhaka ya Nungungulu yi ndzi nehela a litsako la hombe.” A ku fana na Mayli, hontlheni ha dhumisa Jehovha, loyi a hi humesileko ‘munyameni, hita kuwonekeleni kakwe ko saseka’. — 1 Ped. 2:9.

14. Hi nga engetelisa kuyini a lirandzo la hina hi lisine? (Wona kwadru “Mifananiso yin’wani.”)

¹⁴ Lezvi zvikombiso zvitsongwani zvi kombako a lisima la lisine. Handle ko kanakana wenawu u ehleketa hi zvin’wani zvo tala. Hikuyini u nga mahiko a programa ka cigondzo ca wena wutsumbu kasi ku hlota zvin’wani zvigelo zvi hi mahako hi randza lisine? Laha hi yako hi li randza nguvhu lisine, hi ta kuma tindlela to tala ta ku kombisa lirandzo la hina hi lona.

LEZVI HI KOMBISAKO ZVONA KU HA LI RANDZA LISINE

15. Hi yihi a yin’we ya tindlela hi nga kombisako hi tona lezvaku ha li randza lisine?

¹⁵ Hi nga komba lezvaku ha li randza lisine hi ku gondza Bhibhiliya ni mabhuku ma seketelwako ka gona hi kukhandzakanya. Hikwalaho, kani hi na ni cikhati muni na hi hi lisineni, contlhe cikhati hi na ni zvotala zva ku zvi gondza. A Murindzeli wo sangula hi ciNgiza, i wulile lezvi: “A lisine li fana ni citsangi ci fihleleko lomu cikari ka byanyi. Kasi ku kuma a citsangi co kota leco a munhu i fanele ku ci lavetela khwatsi. Ni loku a ci kumile a nga faneli ku xalaliswa hi ku kuma cin’we basi, i fanele ku simama a lavetela zvin’wani.” A ku gondza a zvi vevuki kanilezvi a mabhindzu ya kona ma hundza ni kwihi kutikarata hi nga ku mahako.

16. I gondzela muni legi u gi wonako na gi ku vhuna? (Mavingu 2:4-6)

¹⁶ A hi hontlheni hi zvi randzako a ku lera ni ku gondza. Kanilezvi Jehovha wa hi ramba lezvaku hi simama ku “hlota” ni ku “lavisisa” kasi hi li zwisisa khwatsi a lisine. (Lera Mavingu 2:4-6.) Loku hi ti karata, contlhe cikhati ha vhuneka. Na a wulawula hi cigondzo cakwe wutsumbu ca Bhibhiliya, Corey i wula lezvaku i veka kupima ka vhesi gin’we hi khati. I tlhamusela lezvi: “Ndzi lera a mitlhamuselo yontlhe ya lahasi, ndzi cuwuka a mitsalo yontlhe ya lomu matlhelweni ndzi tlhela ndzi hlota a mahungu man’wani. . . . Ndzi gondza zvilo zvo tala nguvhu hi mahela legi!” Kani hi tirisa a mahela legi kutani gin’wani, hi komba lezvaku a lisine la lisima ka hina laha hi ti nyikako cikhati hi tlhela hi ti karata kasi ku li gondza.— Lis. 1:1-3.

17. Zvi wula yini a ku hanya hi lisine? (Jakobe 1:25)

¹⁷ Kunene, ha zvi tiva lezvaku a ku gondza a lisine basi a zvi eneli. Kasi hi vhuneka khwatsi, hi fanele ku hanya hi lisine, zvi wulako ku hi fanele ku hanya hi lezvi hi zvi gondzako wutomini ga hina. Ntsena andzhako ka lezvo hi kona a lisine li to hi nehela litsako wutomini ga hina. (Lera Jakobe 1:25.) Hi nga zvi kombisa kuyini ku hi hanya hi lisine? A makabye wo kari i nyikile mawonela ya lezvaku hi hlola a wutomi ga hina kasi hi wona lezvaku ha hanya hi lezvi hi zvi gondzako niku hi kwihi hi faneleko ku chukwatisa. Mupostoli Pawule i zvi wulisile lezvi: “Kani hi buvhile kala kwihi, a hi simameni ku fambisa zvalezvo.” — Filp. 3:16.

18. Hikuyini hi ti karatelako ku “famba lisineni”?

¹⁸ Hi nga ehleketa hi makatekwa lawa hi ma kumako loku hi ti karatela ku maha zvontlhe hi zvi kotako kasi hi “famba lisineni”! A hi chukwatisi a mahanyela ya hina basi, kanilezvi hi tlhela hi tsakisa Jehovha ni makholwa-kulori. (Mav. 27:11; 3 Joh. 4) Kunene, lezvi zvigelo zva hombe zvi hi mahako hi randza lisine hi tlhela hi hanya hi lona.