“Nzi kalile nzi kuma a kutlhatlheka ka lisine”

KALE KA MINA:

Nzi pswalilwe le Moundsville, ku nga doropa go rula gi nga mbhirini ya Congo wa Ohio le nwalungu wa Mupela-gambo wa Virginia, Estados Unidos. Nzi wa hi wa wumbiri xikari ka mune wa vana, a vanharu va kona na va hi vafana, hikwalaho a muti wa hina wu wa tsakisa. A vapswali va mina va wa hi vanhu vo tsumbeka, vo tira nguvu na va ranza vanwani. Hi wa nga hi ziganyi, kanilezi hi wa nga kiyelelwi hi nchumu kambe. Kota Timboni ta Jehova, a vapswali va mina va ti karatile nguvu a ku hi gonzisa a milayo ya Biblia na ha ha hi vanana.

Kanilezi, a xikhati lexi nzi nga chikela tangeni yo rama a mbilu ya mina yi wa sangulile ku navela zo hambana ni lezi nzi nga gonzisilwe. Nzi lo sangula ku ti wutisa lezaku xana a ku hanya hi kuyelana ni milayo ya Biblia zi wa ta nyawula ni ku nzi xalalisa ke. Nzi lo alakanya lezaku a ku tlhatlheka kuva nzi maha ni xihi nzi xi lavako hi zona zi nga wa ta nzi tisela litsako la lisine. A nzi hlwelangi ku nyima kuya mitlhanganweni ya wuKristu. A nhonzo ya hina ni nzisana ya mina ya xisati va lo nzi lanzela kuhluwukeni loko. A vapswali va hina va mahile ni xihi va nga xi kota lezaku va hi vuna, kanilezi hi lo ala ku vuniwa.

Nzi wa nga zi woni lezaku lezi va nge kutlhatlheka loku nzi nga ku lava zi wa ta nzi yisa wukhumbini. Ka siku go kari na nzi wuya hi xikoleni nzi lo nyikwa a sigari hi munghana. Nzi lo gi amukela. Kusukela kwalaho, nzi lo sangula ku vumela mahanyela yo tala ya hava. Hi kufamba ka xikhati, nzi lo ti wona na nzi dzaha timbangi, na nzi hi xidakwa nzi tlhela nzi hanya hi wurembi. Ka malembe yo tala lawa ma nga lanzela, nzi loya nzi ringa a timbangi ta ntamu nguvu nzi tlhela nziva khumbi ya to tala. Lezi nzi ngaya nzi etisa nguvu kudzaheni ka mina a timbangi, nzi lo sangula ku xavisa a timbangi leto kasi ku kuma mali ya ku daya a bhabhalaza ni dakara ga mina.

Hambu lezi nzi nga kari nzi zama a ku kanyisa a livalo la mina, lona li wa nzi alakanyisa hi kukhanzakanya lezaku a mahanyela ya mina ma wa bihile. Kanilezi nzi lo alakanya lezaku nzi wa onhile zo tala niku ku wa nga ha hi na ndlela ya ku zi lulamisa. Niku, hambu lezi nzi nga ranzelwe hi vanhu mibuzweni ni ka maxipetakulo, nzi wazwa xiwunza ni gome. A xinwani xikhati nzi wa ehleketa hi lezi a vapswali va mina va nga va nene ha zona nzi tlhela nzi ti wutisa a ku nzi zile nzi pengisa leziyani hikuyini.

LEZI A BIBLIA GI NGA CICISA ZONA A WUTOMI GA MINA:

Hambu lezi nzi nga kala nzi nga ha tsumbi lezaku nzi ta chukwatisa a mahanyela ya mina, a vanwani a va nzi tsikangi. Hi lembe ga 2000, a vapswali va mina va nzi rambile kuya gotsovanyanweni wa muganga wa Timboni ta Jehova. Nzi lo famba na nzi nga zi lavi khwatsi. Kanilezi nzi hlamalile hi ku wona a vamakabye va mina lava va nga dhukile na vonawu, na va hi kona kwaseyo.

Na nzi hi gotsovanyanweni lowo, nzi lo alakanya ku nzi wa tshukile nziya ka wutshamu lego lezaku nzi ya wona a xipetakulo xa vachayi va Roki nwecemu. A kuhambana ka ziyimo lezo ku nzi khumbile nguvu mbilu. A xikhati ku nga mahiwa a xipetakulo, a wutshamu lego gi wa tele hi chaka niku ku wa hefemuliwa a musi wa masigari. A kutala ka vahlaleli va xipetakulo lexo va wa hi vanhu va mona, niku a wucenje ga kona gi wa tinga. Kanilezi laha gotsovanyanweni, nzi wa ranzelwe hi vanhu vo tsaka hi kumbhelela — lava va nga nzi hoyozela hi matsenya, hambu lezi va nga kala va nga nzi woni hi malembe. A wutshamu lego gi wa basile makunu, a tikanelo ta kona ti wa wulawula hi wumanziko go tsakisa. A ku wona lezi a lisine la Biblia li khumbisako zona vanhu hi ka ku nene zi nzi mahile nzi lava ku tiva a xigelo xa kuva nzi li alile! — Isaya 48:17, 18.

Neti wu nga mbhela a gotsovanyano, nzi lo boha ku tlhelela bandleni ga wuKristu. A vamakabye va mina, hi ku kuciwa hi lezi va nga zi wona gotsovanyanweni, vonawu va lo boha ku tlhelela. Hi wunharu ga hina hi lo vumela ku gonza a Biblia.

A vesi ga Biblia gi nzi khumbileko nguvu kuve Jakobe 4:8, gi nge ngalo: “Tshinelani ka Nungungulu, na yena i ta tshinela ka nwina.” Nzi lo wona lezaku loku nzi lava ku tshinela ka Nungungulu, nzi fanele ku basisa a wutomi ga mina. Xikari ka lezi nzi nga fanele ku cica, nzi wa fanele ku nyima ku dzaha, ku delela timbangi ni byala. — 2 Va Le Korinte 7:1.

Nzi lo daya wunghana ga mina ni va le handle ka bandla nzi tlhela nzi lava vanwani xikari ka vakhozeli va Jehova. A dota ga wuKristu legi gi nga gonza na mina a Biblia gi nzi vunile nguvu. Gi wa tolovela ku nzi fonela gi tlhela gi hunza hi laha mutini gi nzi vuxela. Kala nyamutlha, yena munwe wa vanghana va mina va hombe.

Kumbheleni ka wuxika ga lembe ga 2001, nzi lo kombisa a kutihendleleta ka mina ka Nungungulu hi ku bapatizwa hi mati, zinwe ni vamakabye va mina lava va nga dhukile. A wu nge ku alakanyeli a kutsaka ka vapswali va mina ni nzisana ya mina yi nga kala yi nga mu tsikangi Jehova hi ku wona lezaku a ngango wa hina wu tlhelile wuva zinwe wukhozelini ga Jehova.

LEZI NZI NGA VUNEKISA ZONA:

Nzi wa alakanya lezaku a milayo ya Biblia ya binza nguvu, kanilezi nzi yi wona kota wuvikelo ga hombe makunu. A Biblia gi nzi nyikile ntamu wa ku tsika ku dzaha ni ku xavisa timbangi nzi tlhela nzi maha munhu wa chukwana.

Nzi na ni lungelo ga kuva xipanze xa wumakabye ga misava yontlhe ga vakhozeli va Jehova. A vanhu lavo va ranzana hakunene, niku va tirela Nungungulu hi wumunwe. (Johani 13:34, 35) Nzeni ka wumakabye lego nzi kumile makatekwa ya hombe — a sati wa mina, Adrianne, loyi nzi mu ranzako nguvu. Za tsakisa nguvu a ku tirela a Muvangi wa hina na hi hi zinwe.

A wutshanwini ga ku hanya wutomi ga makangwa, zalezi nzi ti nyiketele ku mbheta a 70 wa tihora hi hweti lezaku nzi gonzisa vanhu lezi vonawu va nga vunekisako zona hi Mhaka ya Nungungulu. A ntiro lowo wa nzi nehela litsako la hombe nguvu ka zontlhe. Nzi nga wula hi kutiyiseka ka hombe nguvu lezaku a Biblia gi cicile a wutomi ga mina. Nzi kalile nzi kuma a kutlhatlheka ka lisine.