Xana Jesu i xi tsumbisile wutomi ga le tilweni a xigevenga lexi xi delweko reveni gakwe?

A xiwutiso lexi xi vuka hi kuva Jesu a tsumbisile wutomi Paradiseni a xigevenga lexi xi delweko reveni gakwe. Jesu i te ngalo: ‘Hizinene nziku ka wena nyamutlha, u tava na mina Paradiseni.’ (Luka 23:43, Tradução do Novo Mundo) Wona lezaku Jesu a nga wulangi ku a Paradise lego gi wa tava kwihi. Makunu, xana Jesu i wa wula lezaku a xigevenga lexo xi wa ta ya hanya naye le tilweni?

A kuranga, a hi woneni lezaku a xigevanga lexo xi wa ringanelwa hi ku ya hanya le tilweni ke. A vanhu lava va nga ni kutsumba ka ku ya hanya tilweni va bapatizilwe hi mati ni moya wa ku basa va maha vapizani va Jesu va totilweko hi moya. (Johani 3:3, 5) A xinwani xi lavekako ku va hanya hi kuyelana ni matsinya ya milayo ya mahanyela ya Nungungulu va tlhela vava ni matshamela yo kota ku wulawula lisine, kutsumbeka ni tipswalo. (1 Va Le Korinte 6:9-11) Ku laveka kambe lezaku va simama va tsumbekile ka Nungungulu ni ka Kristu kala magumo ya wutomi gabye ga laha misaveni. (Luka 22:28-30; 2 Timote 2:12) Ntsena loku va maha zilo zontlhe lezi, hi kona va to komba lezaku va ringanelwa hi ku vuxiwa va amukela a wutihlamuleli ga hombe legi gi va rinzelako le tilweni, ku nga ku tira kota vapristi ni tihosi zinwe na Kristu, va fumela vanhu hi 1.000 wa malembe. — Kuvululelwa 20:6.

A kuhambana ni lezo, a xigevenga lexi xi nga dawa reveni ga Jesu xi hanyile kota xigevenga kala xi yafa. (Luka 23:32, 39-41) Lisine lezaku xi kombisile xichawo a xikhati lexi xi nga byela Jesu xiku: “Nzi alakanye loku u chikele mufunweni wa wena.” (Luka 23:42) Hambulezo, xi wa nga se bapatizwa, xi maha mupizani wa Jesu a totilweko hi moya, ge hambu ku hanya kota munhu wo lulama ni wo tsumbeka. Makunu, u alakanya lezaku Jesu i wa ta xi tsumbisa wuhosi ga le tilweni reveni ga valanzeli vakwe lava va hanyileko hi kutsumbeka? — Va Le Roma 2:6, 7.

Kasi ku kombisa: Loku munhu a ku yiveleko mali a kombela ku tsetselelwa, u nga ha boha ku nga mu hakhelisi. Kanilezi xana u wa ta mu nyika ntiro wa ku wonelela mabhinzu ya wena kutani ku hlayisa a ngango wa wena? A wutihlamuleli lego u ngo gi nyikela ntsena ka munhu u mu tsumbako khwatsi. Hi kufanana, lava va nyikiwako a kutsumba ka ku ya hanya tilweni va fanele ku nyika xiseketelo xo tiya xa ku tsumba lezaku va ta ya khomelela ka matshinya ya milayo yo lulama ya Nungungulu a xikhati lexi va to fumela vanhu. (Kuvululelwa 2:10) A xigevenga lexiyani a xi nyikangi xiseketelo lexo hambu lezi xi kombisileko kuva ni mbilu yi nene kufeni ka xona.

A vanhu vo tala va alakanya lezaku Jesu i tsumbisile a xigevenga lexiyani lezaku va wa tava zinwe tilweni ka siku galegiyani. Kanilezi, a zi nge mahi, hakuva hambu Jesu wutsumbu a nga yangi tilweni a siku legiyani. Wutshanwini ga lezo, yena i wa hi “nzeni ka misava” — ku nga xilahla — hi masiku manharu. (Mateu 12:40; Marku 10:34) Hambu anzhako ka kuvuka kakwe hi ka vafileko, Jesu i simamile laha misaveni hi 40 wa masiku na a nga se tlakukela tilweni. (Mitiro 1:3, 9) Hikwalaho, ku wa nga hi na ndlela ya ku a xigevenga lexiyani xi ya va na Jesu tilweni ka galego siku.

Makunu i Paradise muni legi a xigevenga lexo xi nga wa ta nghena ka gona? Anzhako ka kuvuka kakwe, i tava ka Paradise ga laha misaveni, legi Jesu a to gi fumela. (Mitiro 24:15; Kuvululelwa 21:3, 4) Kasi ku gonza zinwani xungetano hi Paradise lego ni lezi Nungungulu a zi lavako kasi ku munhu a hanya ka gona, bhula ni yihi a Mboni ya Jehova u yi tivako.