“Nzi wa zi wona, kanilezi nzi wa nga zi pimi”

Na nza ha hi nwanana, a vapswali va mina va lo tlhatlha wukati. Mamani i lo kurumeteka ku hi wundla yece, mina ni vamakabye va mina va tinhonzwa — vavanuna vambiri ni wasati munwe. Lezi a vanana va ziwiri le França va nga gonzisiswa zona xikhatini lexo a zi fani ni lezi va gonzisiswako zona nyamutlha, niku a tindlela ti nga tirisiwa ti wa va maha va xaniseka. Hambulezo, kusukela wunwananeni ga mina nzi’ve ni lungelo legi a ziwiri zo tala zi kalako zi nga hi nago. Nza ha tlhamusela.

Hi xikhati xo kari, a vagonzisi vo tala va wa alakanya lezaku a vanana va ziwiri va fanele ku gonza ku wulawula hi ku lanzelela a kuninganinga ka milomu. Hi lisine, le França, ku nga lomu nzi nga kulela kona, zi wa beletelwa nguvu a ku wulawula hi mawoko xikoleni. A vanana vo kari va ziwiri va wa bohiwa ni mawoko le nzhako loku va hi lomu saleni.

Ka malembe matsongwani yo sangula wutomini ga mina, nzi wa mbheta tihora to tala viki ni viki ni dokodela wa ku gonzisa kuwulawula. Va wa nzi khoma tihlaya kutani hloko va nzi kurumeta ku phindelela ku humesa magezu yaku mina nzi wa nga mazwi. Nzi wa nga zi koti ku bhula ni vanana-kulori. Lawo ma’ve malembe ya mina ya kuxaniseka.

Zonake, a xikhati nzi nga hi ni 6 wa malembe, va nzi yisile ka xikola xa vanana va ziwiri. Xi’ve xikhati xo sangula a ku tlhangana ni vanwani vanana va ziwiri. Ni kwaseyo, konawu zi wa beletelwa ku tirisa a lirimi la mawoko. Loku hi wulawula lirimi la mawoko lomu saleni, hi wa ti veka mhangweni ya ku biwa lomu ka madingu ya titiho kutani ku kokiwa misisi. Hambulezo, hi wa wulawula lomu xihundleni, hi ku tirisa a lirimi la mawoko hi nga li tsambile. Hi magumo nzi wa zi kota ku bhula ni vanana-kulori. Hi ndlela leyo, ku lo sangula mune wa malembe yo tsakisa.

Kanilezi, a xikhati nzi nga hi ni 10 wa malembe, nzi rurisilwe nzi yiswa ka xikola xinwani xa ku ya gonza ni vanana va ingisako. Nzi lo mbhela ntamu! Nzi wa alakanya lezaku a vanana vontlhe va ziwiri va wa file ku sala mina nzoce misaveni. Hi ku chava ku nzi luza lezi nzi nga gonzile ka dokodela wa ku gonzisa ku wulawula, a va ngango wa mina va lo lanzela a wusungukati ga vadokodela ga ku nga gonzi a lirimi la mawoko ni ku nga nzi vumeleli ku hlakana ni vanana vanwani va ziwiri. Nza ha gi alakanya ni nyamutlha a siku hi nga enzela a tlhari ya mababyi ya wuwiri. Yona yi wa hi ni bhuku ga lirimi la mawoko laha mezeni. A xikhati nzi nga wona a mifota laha ka kapa, nzi lo gi xungeta nziku: “Nzi lava a bhuku legi!” A tlhari leyo yi lo tekela ku gi susa yi fihla.a

KUSANGULA KA MINA KU GONZA LISINE

Mamani i zamile ku hi kulisa hi milayo ya wuKristu. I wa hi teka hiya mitlhanganweni ka Bandla ga Timboni ta Jehova le Mérignac, kusuhani ni Bordéus. Kota nwanana, zi tsongwani nguvu nzi nga zi zwisisa mitlhanganweni. Kanilezi, a vamakabye vo hambanahambana va wa tshama kusuhani na mina kasi ku tsala lezi zi nga wulawuliwa mitlhanganweni. Nzi khumbilwe nguvu hi liranzo labye ni kukhatala kabye. Le kaya, mamani i wa gonza Biblia na mina, kanilezi a nzi zangi nzi zi zwisisile khwatsi lezi a nga nzi gonzisa. Nzi wa ti zwisa ku khwatsi hi muprofeti Danieli, loyi anzhako ka ku amukela wuprofeti hi ka ngelosi, a ngaku ngalo: “Nzi lo zizwa, kanilezi a nzi zi pimangi.” (Danieli 12:8) Ka mina yi wa hi mhaka yaku: “Nzi wa zi wona, kanilezi nzi wa nga zi pimi.”

Hambulezo, hi kutsongwani-kutsongwani nzi waya nzi gonza a tigonzo to sangula ta Biblia. Nzi wa zi nyika nguvu lisima lezi nzi nga zi zwisisa khwatsi nzi tlhela nzi zama ku zi tirisa ka wutomi ga mina. Nzi wa gonza kambe hi ku cuwuka a mahanyela ya vanwani. Hi xikombiso, a Biblia gi ngalo hi fanele ku timisela. (Jakobe 5:7, 8) Nzi wa nga zi zwisisi ku lezo zi lava ku wula yini. Hambulezo, hi ku wona vakhozeli-kulori na va kombisa tshamela legi, nzi zi kotile a ku gonza ku timisela. Kunene a bandla ga wuKristu gi nzi vunile nguvu.

XIKHUNGUVANYISO XO BAYISA NI KUHLAMALA KO TSAKISA

Ka siku go kari, na nzi hi tangeni yo rama, nzi lo wona vaswa vo kari va ziwiri laha ruweni na va bhula hi lirimi la mawoko. Nzi lo sangula ku ti tlhanganyisa navo xihundleni nzi gonza a Lirimi la Mawoko la França. Nzi wa simama kuya mitlhanganweni ya wuKristu, laha nzi nga khatalelwa nguvu hi Mboni yo kari ya muswa yi vitwako Stéphane. I wa ti karata nguvu kasi ku bhula na mina, hikwalaho nzi wa mu ranza nguvu. Kanilezi ku lo chikela xikhunguvanyiso xo bayisa nguvu. Stéphane i lo valelwa paxweni hi ku ala kuya wusochweni. A nzi no ku xukuvala! A xikhati lexi Stéphane a nga hi paxweni, nzi mbhelile nguvu ntamu nzi tlhela nzi nga hayi khwatsi mitlhanganweni.

Loku ku hunzile khume ga tihweti ni yinwe, Stéphane i lo huma paxweni a wuya kaya. Hi nga alakanya a kuhlamala ka mina a xikhati lexi Stéphane a nga sangula ku wulawula na mina hi ku tirisa lirimi la mawoko. Nzi wa nga kholwi ku hi zona nzi zi wonako! Kasi ku wa no humelela yini? Stéphane i yile a ya gonza lirimi la mawoko le paxweni. Laha nzi ngaya nzi cuwukela Stéphane na a wulawula na mina hi lirimi la mawoko nzi tlhela nzi wona a kutizwa loku a nga ku kombisa lomu nghoheni, a litsako la mina li lo engetela hi ku alakanyela lezi nzi nga wa ta vunekisa zona hi kota ya lezo.

NZI LO SANGULA KU ZWISISA A LISINE LA BIBLIA

Stéphane i lo sangula ku gonza a Biblia na mina. Hi kona makunu nzi nga sangula ku tlhanganyisela a zipanzana zo hambanahambana za lisine la Biblia lezi nzi nga hi nazo hlokweni. Kota nwanana, zi wa nzi xalalisa ku wona mifota yo saseka leyi yi kumekako mabhukwini ya hina, nzi fananisa vanhu va kona nzi tlhela nzi hlola mifota leyo hi matlhelo yo hambanahambana kasi ku zwisisa a ku yi wulawula hi yini. Nzi wa mu tiva Abrahama, “pswalo” wakwe, ni “xidlemo xa tsanza vahlayi,” kanilezi a xikhati lexi zi nga tlhamuselwa hi lirimi la mawoko hi kona nzi nga zi zwisisa khwatsi. (Genesisi 22:15-18; Kuvululelwa 7:9) Zi wa dlunyateka lezaku nzi wa kumile lirimi la mina la mabeleko, leli li nga yelana khwatsi ni mbilu ya mina.

Makunu nzi wa zi kota ku zwisisa lezi zi nga wuliwa mitlhanganweni, a mbilu ya mina yi khumbilwe niku makunu nzi wa lava ku tiva zinwani. Hi ku vuniwa hi Stéphane, a kuzwisisa ka mina a Biblia ku simamile ku anza, niku hi 1992, nzi hendleletile a wutomi ga mina ka Jehova Nungungulu nzi tlhela nzi bapatizwa. Kanilezi, hambu lezi nzi nga kulile hi tlhelo ga moya, nzi wa ha simama ku chava niku zi wa nzi karatela ku bhula ni vanwani vanhu hi lezi kaleloko na nza ha hi nwanana nzi nga kala nzi nga zi koti ku bhula ni vanwani.

YIMPI YA MINA KASI KU HLULA KUCHAVA

Hi kugumesa, a ntlawanyana wa vanhu va ziwiri nzi nga hi ka wona wu patsene ni bandla le Passic, handle ka doropa ga Bordéus. Lezo zi nzi vunile nguvu, niku nzi simamile nzi kula hi tlhelo ga moya. Hambu lezi nzi nga halwa ni xikarato xa mina xa ku nga zi koti ku bhula ni vanhu, a vanghana va mina va nga ingisa va wa ti karatela ku nzi vuna ku zwisisa zontlhe. A patswa wo kari, Gilles ni sati wakwe Elodie, va mahile mizamo ya hombe kasi ku bhulisana na mina. Va wa tala ku nzi ramba lezaku nzi yaga navo kutani kunwa navo kafi anzhako ka mitlhangano, hikwalaho hi mahile wunghana ga hombe nguvu. A hi ku tsakisa ka zona a kuva xikari ka vanhu va lanzelako a tindlela ta liranzo ta Nungungulu!

Ku’ve ka bandla legi nzi nga tivana kona na Vanessa wa mina wo saseka. Nzi kokilwe mbilu hi kuzwela kakwe wusiwana ni ku mu wona kuva munhu wo ranza kululama. Cima a nga zangi a wonile wuwiri ga mina kota xikarato, kanilezi kota ndlela ya kuva a gonza ku wulawula ni ziwiri. Nzi lo ranzana naye, hi chada hi 2005. Hambu lezi zi nzi karatelako ku bhula khwatsi ni vanghana, Vanessa wa nzi vuna ku lwisana ni kuchava ka mina nzi tlhela nzi gonza ku bhula ni vanwani hi kutlhatlheka. Nza xi bonga nguvu xivuno xakwe a xikhati lexi nzi khatelelako a wutihlamuleli ga mina.

XINYIKIWO XINWANI XI TILEKO HI KA JEHOVA

A lembe legi hi nga chada hi gona, a hofisa ya ravi ya França ya Timboni ta Jehova le Louviers yi nzi rambile lezaku nzi ya mbheta hweti na nzi gonza ntiro wa wuhunzuluseli. Hi malembana yo kari mahlweni ka lezo, a hofisa ya ravi yi wata na yi tira nguvu kasi ku humesa mabhuku hi Lirimi la Mawoko la França — hi ma DVD. Kanilezi hi kota ya ku engeteleka ka ntiro, a ntlawa wa wuhunzuluseli wu wa lava vatiri vanwani.

Hi wumbiri ga hina, mina na Vanessa hi wa zi wona kota lungelo tlhelo xinyikiwo xi tako hi ka Jehova Nungungulu a kuva nzi tira hofiseni ya ravi, kanilezi hi lisine hi wa chava. A ntlawa wa hina wa lirimi la mawoko wu wa ta sala wu ku yini? A muti wa hina ke? Xana Vanessa i wa ta ya kuma ntiro le Louviers? Jehova i lulamisile a zikarato zontlhe lezo hi ndlela yo hlamalisa. Lezi zi nzi mahile nzi wona lezaku hakunene Jehova wa nzi ranza nzi tlhela nzi wona liranzo lakwe hi ziwiri.

XIVUNO XI TILEKO HI KA VANHU VA NGA NI WUMUNWE

Hi kota ya kuva nzi patseka ka ntiro wa wuhunzuluseli, makunu nza zi zwisisa khwatsi zontlhe zi mahiwako kasi ku vuna a ziwiri hi tlhelo ga moya. Niku a zo ku nzi tsakisa a ku wona a vatiri-kulori na va ti karatela ku bhula na mina! A zilo zi tsongwani lezi va gonzako hi lirimi la mawoko va tlhela va ti karatela ku zi tirisa za nzi khumba mbilu. A nzi tizwi xiwunza. Zontlhe zikombiso lezo za liranzo zi komba a wumunwe ga hombe gi nga kona xikari ka vanhu va Jehova. — Tisimu 133:1.

Nzi bonga Jehova hi kuva a tirisile a bandla ga wuKristu kasi ku xikhati xontlhe kuva ni munhu wa ku nzi vuna. Nza bonga kambe a xipanzana lexi nzi nga naxo ntirweni wa ku vuna ziwiri-kulori lezaku zi tiva Muvangi wa hina wa liranzo zi tlhela zi tshinela ka yena. Nzi rinzela hi mahlo yo pswhuka a xikhati lexi ku to kala ku nga hi na zikarato za tirimi, laha a vanhu vontlhe va to wulawula ‘lirimi li basileko’ — ku nga lisine xungetano hi Jehova ni makungo yakwe — kota xipanze xa ngango wa vanhu wu nga ni wumunwe. — Zefania 3:9.