A kuva ciwiri a zvi ndzi vhaleli ku gondzisa van’wani

LOMU ka va 1910, a vapswali va mina va rurile Tbilisi, le Georgia, vaya Canadá. Va yile va ya hanya ka yindlu ya lomu masin’wini, kusuhani ni Pelly, Saskatchewan, le mupela gambo wa Canadá. Mina ndzi pswalilwe hi 1928, niku ndzi cigumandzeni laha ka ntlhanu wa vana ni mun’we. A papai wa mina i file na ku kiyela ntlhanu wa tihweti ni yin’we kasi ndzi pswaliwa, mamani afa na ndza ha hi cihlangi. Cikhatanyana ndzhako ka lezvo, ku file nhondzo ya mina Lucy, na a hi ni 17 wa malembe. Hikwalaho, hi tekilwe hi tio wa hina Nick hi ya tshama naye.

Ka siku go kari na ndza ha hi ku sangula ku famba, a va laha kaya va ndzi wonile na ndzi khomile a mudhoza wa gin’we ga mahaxi ya hina. Va wa chava lezvaku gi ndzi khava, hikwalaho va bangulukile vaku ndzi wa tsike mudhoza wa haxi lego. Kanilezvi, ndzi wa va fularele niku a ndzi ku zwangi a kubanguluka kabye. Ca ci nene hi ku a ndzi bayisiwangi. Hambulezvo, lego give siku legi a maxaka ya mina ma nga pola lezvaku ndzi ciwiri.

A munghana wo kari wa laha kaya i wulile ku i chukwana ndzi ya gondza cikola ni zviwiri-kulori. Hikwalaho, Tio Nick i ndzi rumele ka cikola co kari ca zviwiri le Saskatoon, Saskatchewan. A cikola leco ci wa hi kule ni laha kaya, niku lezvi ndzi nga hi ni ntlhanu wa malembe basi, ndzi karatekile nguvhu. A maxaka ya mina ndzi wo ma endzela ntsena ka mavhiki ya tiferiadho ni loku hi kuma maferiya cikhatini ca cimumu. Hi magumo, ndzi gondzile a lirimi la mawoko, ndzi sangula ku hlakana ni vanana-kulori.

LEZVI NDZI NGA GONDZISA ZVONA A LISINE LA BHIBLIA

Hi 1939, mana Marion i chadhile na Bill Danylchuck, va sangula ku hi hlayisa mina ni makabye wa mina Frances. Vave vo sangula ku gondza ni Timboni ta Jehovha cikari ka maxaka ya mina. Ka maferiya ya mina ya cimumu, va wa maha zvontlhe va nga zvi kota kasi ku ndzi bhulela lezvi va nga gondza lomu ka Bhiblia. Kanilezvi zvi wa nga olovi hakuva va wa nga li tivi a lirimi la mawoko. Hambulezvo va wa zvi wona ku zva ndzi tsakisa lezvi ndzi zvi gondzako ha Jehovha. Ndzi wa zvi zwisisa ku lezvi va nga kari va maha zvi yelana ni lezvi a Bhiblia gi wulako, hikwalaho ndzi wa famba navo loku vaya kuchumayeleni. Cikhatanyana ndzhako ka lezvo, ndzi lavile ku bhabhatiswa, niku hi 5 ka Setembro wa 1941, Bill i ndzi bhabhatisile lomu ka thangi ga simbi gi nga tatilwe hi mati ma khilweko lomu hloweni. A mati lawo ma wa titimela zvaku he wena!

Hi 1946, a cikhati ndzi nga tlhela kaya hi maferiya ya cimumu, hi yile ka gotsovanyano wo kari le Cleveland, Ohio, Estados Unidos. Ka siku go sangula, a vamakabye va mina va wa ndzi tsalela manota kasi ndzi vhunekawo hi gotsovanyano lowo. Kanilezvi ka siku ga wumbiri, ndzive ni litsako la ku tiva lezvaku ku na ni ntlawa wa zviwiri kwalaho gotsovanyanweni zvi nga ni muhundzuluseli wa lirimi la mawoko. Hi laho ndzi nga sangula kona kuzwa a kunandziha ka gotsovanyano, niku zvi wa tsakisa nguvhu makunu a ku zwisisa khwatsi lezvi a Bhiblia gi zvi gondzisako!

NDZI GONDZISA LISINE

Ka cikhati leco, a Yimpi ya Wumbiri ya Misava yi wa ha hi ku mbhela, niku a vanhu va wa lava ku komba lezvaku va gi randza tiko gabye. Kanilezvi a cikhati ndzi nga wuya hi gotsovanyanweni, ndzi hundza ndziya cikoleni, ndzi wa ti yimisele ku simama ndzi tsumbekile ka Jehovha. Hikwalaho, ndzi nyimile ku khuzela bhandera, ku yimbelela hino nacional, ni kuya ka mibuzo ya tiferiadho. Ndzi tlhelile ndzi nyima kuya chichini ni zvigondzani-kulori. A vatiri va laha cikoleni a va tsakangi hi zvona, niku va zamile ku ndzi dzukisela va tlhela va ndzi hembela kasi ku ndzi cica maalakanyo. A zvigondzani-kulori zvi wa zvi wona lezvi zvi nga kari zvi maheka, niku lezvo zvi ndzi vhululele malungelo yo tala ya ku zvi chumayela. A zvigondzani zvo kari, a ku patsa na Larry Androsoff, na Norman Dittrick, na Emil Schneider, hi magumo va vhumele lisine niku va ha tirela Jehovha ni nyamutlha.

Loku ndzi endzela madhoropa man’wani, contlhe cikhati ndzi wa ti karatela ku chumayela zviwiri. Hi cikombiso, le Montreal ndzi yile ka wutshamu ku nga tlhangene a zviwiri zva cipandze leco. Laho ndzi yile ndzi ya chumayela jaha gaku hi Eddie Tager gi nga lumba ntlawa wa zvigevenga. Ive ka bandla ga lirimi la mawoko le Laval, Quebec, kala kufeni kakwe lembe gi nga hundza. Ndzi tlhelile ndzi tivana ni jaha gaku hi Juan Ardanez. A ku fana ni vanhu va le Berea, Juan i mahile mikambisiso kasi ku tiyiseka ku lezvi a nga zvi gondza zvi seketelwa ka Bhiblia hakunene. (Mitiro 17:10, 11) Yenawu i nghenile lisineni a tlhela a tira kota dhota le Ottawa, Ontario, kala a yafa.

Hi 1950, ndzi rurile ndziya Vancouver. Hambu lezvi ndzi zvi randzako ku chumayela zviwiri, cima ndzi nga ta rivala a siku ndzi nga chumayela wasati a ingisako waku hi Chris Spicer, na ndzi chumayela laha ruweni. I vhumele ku ti tsalela kasi ku amukela revhista a tlhela a lava lezvaku ndzi ya wonana ni nuna wakwe, Gary. A cikhati ndzi ngaya kaya kabye, hi vile ni bhulo go leha ga kuya hi ku tsalelana. Andzhako ka lezvo, ku hundzile malembanyana na hi nga se wonana kambe kala laha ndzi nga hlamala hi ku va wona na vata va ta ndzi losa ka gotsovanyano wo kari le Toronto, Ontario. Gary i wa lava ku bhabhatiswa ka siku galego. A cimaho leco ci ndzi alakanyisile a lisima la ku simama hi chumayela, hakuva a hi na ku zvi tiva ku himani a to gumesa hi ku nghena lisineni loku hi mu chumayela.

Hi kufamba ka cikhati, ndzi rurile ndzi tlhela Saskatoon. Kwaleyo a wasati wo kari i ndzi kombele ku gondza Bhiblia ni vanhanyana vakwe va mahahla, Jean na Joan Rothenberger. Va wa gondza ka cikola caleci ca cin’we ca zviwiri ndzi nga gondzile ka cona. Ndzeni ka masikwana, a vanhanyana lavo va sangulile ku bhula ni zvigondzani-kulobye xungetano hi lezvi va nga zvi gondza. Hi kufamba ka cikhati a ntlhanu wa zvigondzani ka sala yakwe zvi mahile Timboni ta Jehovha. A cin’we ca zvona ku wa hi Eunice Colin. Ndzi wa rangile ndzi tivana na Eunice ka lembe go gumesa ndzi nga gondza ka cikola leco ca zviwiri. Ka khati lego, i ndzi nyikile kofeti a tlhela a ndzi wutisa ku hi ngava vanghana ke. Hi kugumesa i mahile cipandze ca hombe wutomini ga mina. I mahile sati wa mina!

A cikhati leci a mamani wa Eunice a nga tiva lezvaku Eunice wa gondza Bhiblia, i kombele a dhiretori wa cikola lezvaku a kucetela Eunice ku tsika ku gondza. Hambu lezvi a nga zama a tlhela a mu tekela mabhuku yakwe, Eunice i wa ti yimisele ku simama a tsumbekile ka Jehovha. A cikhati a nga lava ku bhabhatiswa, a vapswali vakwe va te: “Loku wo maha Mboni ya Jehovha, u nga ta ku tshama laha ka muti lowu!” Hikwalaho a cikhati leci a nga hi ni 17 wa malembe, Eunice i sukile kaya kabye a ya tshama ni ngango wo kari wa Timboni. I simamile a gondza Bhiblia, hi magumo a bhabhatiswa. A cikhati hi nga chadha hi 1960, a vapswali vakwe a va tangi muchadhweni wa hina. Laha ku ngaya ku hundza malembe, va sangulile ku hi kombisa cichawo hi lezvi hi nga zvi kholwa ni lezvi hi nga wundlisa zvona vana va hina.

JEHOVHA WA NDZI HLAYISA

Kota vapswali va zviwiri, zvi wa hi karatela ku wundla a 7 wa majaha ma ingisako. Kanilezvi hi ti tsitsiritile hi va gondzisa a lirimi la mawoko kasi hi zvi kota ku bhulisana navo ni ku va gondzisa a lisine. A vamakabye lomu bandleni vonawu va hi vhunile nguvhu. Hi cikombiso, a mupswali wo kari i hi tsalele ciphephana a hi byela lezvaku a majaha ya hina ma wulawula zvilo zvo kala ku nyawula lomu Salawini ya Mufumo. Hi tekele ku khatalela mhaka leyo hi cihatla. A mune wa vana va mina — James, na Jerry, na Nicholas, na Steven — madhota zvezvi niku va tirela Jehovha hi kutsumbeka zvin’we ni vasati vabye. Nicholas ni sati wakwe, Deborah, va vhunetela ku hundzulusela a lirimi la mawoko hofiseni ya ravi ya Gra-Bretanya, niku Steven ni sati wakwe, Shannan, va ka ntlawa wa ku hundzulusela a lirimi la mawoko hofiseni ya ravi ya Estados Unidos.

Leci ci nga tsakisiko hi lezvaku Eunice i file hi kankro na ku kiyela hweti kasi hi tlhanganisa 40 wa malembe na hi chadhile. Ka cikhati leco co nonoha, a kukholwa kakwe ka lezvaku a vafileko va ta vhuka ku mu vhunile ku simama a tiyile. Ndzi rindzela hi mahlo yo pswhuka a siku legi ndzi to tlhela ndzi mu wona.

Hi Fevereiro wa 2012, ndzi wile ndzi khuyuka nyonga. Zvalezvo ndzi tekele ku zvi wona lezvaku ndzi ta lava ku vhuniwa, hikwalaho ndzi rurile ndzi ya tshama ni mun’we wa vana va mina ni sati wakwe. Zvalezvi hi ka Bandla ga Lirimi la Mawoko ga Calgary, laha ndzi simamako ndzi tira kota dhota. Hi lisine legi i khati go sangula ndzi nga ka bandla ga lirimi la mawoko! Makunu ndzi zvi kotisile kuyini ku simama ndzi hi ni wunghana go tiya na Jehovha ka malembe wontlhe lawo ndzi nga hi ka bandla ga ciNgiza? Ndzi no vhuniwa hi Jehovha. I tatisile a citsumbiso cakwe ca ku khatalela a zvisiwana. (Lisimu 10:14) Ndza va bonga vontlhe lava va nga vhumela ku ndzi tsalela manota, va gondza lirimi la mawoko, va tlhela va vhunetela ku ndzi hundzuluselela.

Ndzi wa tshuka ndzi nga zwisisi lezvi zvi wuliwako kutani ku zvi wonisa ku khwatsi a ku na munhu a zvi tivako ku vhuna ciwiri. Ka zvikhati zvo kota lezvo, laha ndzi nga mbhela ntamu ndzi navela ni ku zvi tsika, ndzi wa ehleketa hi magezu lawa Pedro a nga byela Jesu, yaku: ‘Hosi, hi taya ka mani ke? Wena u na ni timhaka ta wutomi ga pindzukelwa.’ (Johani 6:66-68) A ku fana ni vamakabye van’wani va zviwiri, lava va nga hi ni malembe yo tala lisineni, ndzi gondzile kuva ni lihlazva-mbilu. Ndzi gondzile ku tsumba Jehovha ni hlengeletano yakwe, niku lezvo zvi ndzi nehela makatekwa yo tala. Zvalezvi ku na ni mabhuku yo tala ya lirimi la mina, niku ndza tsaka hi lezvi ndzi zwisisako a mitlhangano ni migotsovanyano hi Lirimi la Mawoko la Amerika. Hakunene, ndzive ni wutomi go tsakisa ni go tala hi makatekwa hi ku tirela Jehovha, a Nungungulu wa hina wa hombe.