“A mahanyela ya mina ma wa hi ya tihanyi”

KALE KA MINA:

Nzi kulele doropeni ga Turku, laha a kutala ka vanhu va nga zisiwana. A raru wa mina i wa hi mulwi wa hombe wa bhoksi, niku mina ni nzisana ya mina, hinawu hi walwa bhoksi. Ka malembe lawa nzi nga gonza xikola, nzi wa tala ku ringwa kulwa niku nzi wa nga tshuki nzi kanakana ku tirisa zibhakela za mina. A xikhati nzi nga hi tangeni yo rama, nzi patsene ni ntlawa wa zigevenga wa ndhuma, lowu wu nga nzi maha nzi nghena ka kulwisana ka hombe nguvu. Nzi tlhelile kambe nzi pola a wucenje ga heavy metal, zonake nzi sangula ku xuva kuva muchayi wa hombe wa rock.

Nzi lo xava tingoma, nzi wumba a ntlawa wa wuchayi, nzi tlhela hi xikhatanyana, nzi maha mina muyimbeleli wa hombe ntlaweni wa hina. Nzi wa ranza ku tlulatlula a ku khwatsi a ti teki loku nzi hi laha palko. Lezi a ntlawa wa hina wu nga hi wa tihanyi wu tlhela wu hi ni tshamela ga wukhwati, hi loya hi tiveka nguvu hi kutsongwani-kutsongwani. Hi sangulile kuva ni vahlaleli vo tala loku hi maha maxipetakulo, hi tlhela hi gravara a madisko yo kari. A disko go gumesa, loku gi yile gi ya hloliwa, gi wonekile lezaku ga ringana ku humesiwa. Kumbheleni ka va 1980, hi enzile hi ya Estados Unidos kasi kuya vuvumisa a ntlawa wa hina. Hi mahile a maxipetakulo yo kari le Nova York ni le Los Angeles, hi tlhela hi bhulisana ni titlhari to kari ta wucenje na hi nga se tlhela Finlândia.

Hambu lezi zi nga nzi xalalisa a ku chaya ni ntlawa wa mina, nzi wa ti wona na nzi kiyelelwa hi xokari wutomini ga mina. Nzi xukuvalisilwe nguvu hi mapalisana ni matshamela ya tihanyi lawa ma wonekako mhakeni ya wucenje. A xinwani xi nga nzi xukuvalisa ma wa hi mahanyela ya mina yo kala ma nga nyawuli. Nzi wa ti wona na nzi hi munhu wo biha nzi tlhela nzi chava kuswa tilweni. Nzi zamile ku kuma mihlamulo yo kari ka tixaka tontlhe ta mabhuku ya wukhongeli, nzi tlhela nzi khongela ka Nungungulu nzi kombela xivuno xakwe, hambu lezi nzi nga alakanya ku nzi nga ta tshuka nzi mu tsakisa.

LEZI A BIBLIA GI NGA CICISA ZONA A WUTOMI GA MINA:

Kasi ku ti hanyisa, nzi wa tira makoreyu. A siku go kari, nzi polile lezaku a munwe wa vatiri-kulori i wa hi Mboni ya Jehova. Nzi lo mu maha ziwutiso zo tala. A mihlamulo yakwe yi seketelwako ka Mitsalo yi nzi khumbile nguvu, hikwalaho nzi lo vumela ku gonza a Biblia naye. Anzhako ka maviki yo kari na nzi sangulile ku gonza, a ntlawa wa mina wu lo nyikwa lungelo ga ku gravara wucenje, ni ku tlhela hi humesa a disko ga kona le Estados Unidos. Lezo nzi wa zi wona na zi hi lungelo ga hombe nguvu wutomini ga mina.

Nzi lo byela a Mboni leyi yi nga gonza a Biblia na mina lezaku hakunene nzi wa zi lava ku gravara a disko ginwani, hi kona nzi nga wa ta wuya nzi ta hanya hi matshinya ya milayo ya Biblia. A nga nyikangi mawonela yakwe; i lo nzi kombela ntsena lezaku nzi gonza a magezu ya Jesu ma nga ka Mateu 6:24. A vesi legi gi ngalo: “A ku na munhu a zi kotako ku tirela tihosi timbiri.” Nzi hlamalile nguvu a xikhati nzi nga zwisisa a magezu ya Jesu. Kanilezi anzhako ka masikwana yo kari, ku lo chikela a khati ga ku a mugonzisi wa mina wa Biblia a hlamalawo! Nzi lo mu byela lezaku nzi lava ku lanzela Jesu, hikwalaho nzi tsikile a ntlawa wa mina!

A Biblia gi wa fana ni woni gi nga nzi komba zihoxo za mina. (Jakobe 1:22-25) Nzi wonile lezaku a mahanyela ya mina ma wa hi ya tihanyi: Nzi wa hi ni matshanza, na nzi tele hi kunavela. Nzi wa hi ni mawulawulela yo biha, nzi wa ranza kulwa, nzi wa dzaha, niku nzi wa hi xidakwa. A xikhati lexi nzi nga wona lezaku a mahanyela ya mina ma wa nga zwanani ni matshinya ya milayo ya Biblia, nzi ti solile nguvu. Hambu lezi zi nga karata, nzi wa ti yimisele ku ma cica. — Va Le Efesusi 4:22-24.

Nguvunguvu kusanguleni, nzi wa tizwa nanzu hi zihoxo za mina za kale. Kanilezi a Mboni leyi nzi nga gonza nayo yi nzi vunile nguvu. Yi nzi kombile lezi a Biblia gi zi wulako ka Isaya 1:18: “Hambu loku zionho za nwina zi pswhukile, zi nga basa khwatsi i gapongo.” A vesi legi ni manwani mavesi ya Biblia ma nzi tiyisekisile lezaku a Dadani wa hina wa le tilweni i na ni wuxinji, niku i lava ku chuma a zilonza za lava va ti solako ka zigoho zabye.

A xikhati lexi nzi nga tiva Jehova nzi tlhela nzi mu ranza, nzi lavile ku hendleleta a wutomi ga mina ka yena. (Tisimu 40:8) Nzi bapatizilwe hi 1992 ka gotsovanyano wa matiko wontlhe wa Timboni ta Jehova wu mahilweko le São Petersburgo, Rússia.

LEZI NZI NGA VUNEKISA ZONA:

Nzi kumile vanghana vo tala va va nene xikari ka vakhozeli va Jehova. Hi tala ku tlhangana hi chaya wucenje gi basileko hi tlhela hi ti buza hi xinyikiwo lexi xa Nungungulu. (Jakobe 1:17) A kutekana ka mina na Kristina kuve makatekwa ya hombe nguvu. Nzi hlengela naye a zilo zo tala wutomini — a zo biha ni zo saseka, zinwe ni kutizwa ka mina ka mbillu.

Loku nzi wa nga mahangi Mboni ya Jehova, nyamutlha na nzi nga ha hanyi. A kale, a wutomi ga mina gi wa hi ga timhaka ni zikarato xikhati xontlhe. Nyamutlha nza xi tiva lexi nzi hanyelako xona, niku nzi alakanya lezaku zontlhe zi lulamile.