“Nzi wa xuva ku maha paderi”

KALE KA MINA:

Nzi pswalilwe ka xidoropana xa le Texcoco. Ka xikhati lexo, a kutala ka maruwa ma wa nga se cheliwa likatarawu niku ma wa tele hi lithuri. Zi wa tolovelekile a ku wona vanhu va zidoropana za wuakelwani na vata ni timbongola tabye ti rweleko a zilo kasi ku ta xavisa. Hi wa hi zisiwana nguvu laha ngangweni wa hina wa ntlhanu wa vanana ni mune, laha mina nzi nga hi wa wuntlhanu ni vambiri. Papai i wa runga zilato kasi a zi kota ku hlayisa a ngango wa hina. Kanilezi i lofa na nzi hi ni ntlhanu wa malembe ni mambiri. Kusukela kwalaho, mamani i ti karatile nguvu kasi ku hi hlayisa.

A kokwani wa mina i wa chaya violino niku i wa wonelela a ntlawa wo kari wa ku yimbelela tisimu ta chechi. Vatsongwani laha ngangweni wa hina va nga kala va nga zi koti ku chaya. A mamani wa mina i wa yimbelela chechini, niku a tio wa mina i wa yimbelela a tlhela a chaya piano. Hi wa hi vaKatolika vo hiseka — mina nzi wa hi muvuneteli wa paderi (acólito) niku nzi wa xuva ku maha murumiwa. Hambulezo, nzi wa ranza a mafilimu ya zibhakela. Khati ni khati nzi nga hlalela a mafilimu lawo, nzi waya nzi engetela kuva munhu wa tihanyi.

Nzi nghenile ka xikola xa chechi xi nga gonzisa a wupaderi, le Puebla. A kungo ga mina ku wa hi ku maha Paderi. Kanilezi, ka lembe go gumesa, a chechi ya Katolika yi lo sangula ku nzi swira. A nhanyana wo kari a nga hi muvuneteli wa paderi (freira) i mahile zilo za ku lava ku nzi vuxela manyawunyawu ya masango. Nzi ti khomile ka xiringo lexo, kanilezi xi nzi mahile nzi navela ku chada. Ahandle ka lezo, nzi polile lezaku a vapaderi vo tala va wa hi ni mahanyela ya wufarisi. Hi kugumesa, nzi lo tsukula a mixuvo ya mina ya ku lava a ku maha paderi.

Nzi lo boha a ku gonza ku yimbelela ka Conservatória Nacional de Música Doropeni ga México. A xikhati nzi nga mbheta, nzi lo chada, niku mina ni sati wa mina hi lo pswala mune wa vana. Nzi wa hlayisa a ngango wa hina hi ku yimbelela tisimu Chechini ya Katolika.

Kusukela kusanguleni, a wukati ga hina gi vile ga zikarato. Mina ni sati wa mina hi wa tshama hi ku holovisana, nguvunguvu hi kota ya xiluse. Kusanguleni hi wa holovisana hi magezu ntsena, hi guma hi sangula ku banana. Hi magumo, loku ku hunzile a 13 wa malembe, hi lo boha ku hambana niku loku ku hunzile xikhati xo kari hi lo tlhatlha wukati.

LEZI A BIBLIA GI NGA CICISA ZONA A WUTOMI GA MINA:

A khati go sangula nzi nga tivana ni Timboni, nzi wa nga se hambana ni sati wa mina. Ku tile Timboni timbiri laha kaya ti ta lava ku gonza a Biblia na mina. Nzi wa alakanya lezaku nzi wa hi ni wutivi go tala hi za wukhongeli, hikwalaho nzi wa lava ku ti komba lezaku ti wulawula mawunwa. Nzi lo ti maha ziwutiso zo karata nzi nga alakanya lezaku a zi na mihlamulo. Lexi xi nzi hlamalisileko hi lezaku ti lo nzi hlamula zontlhe hi ku tirisa a Biblia. Nzi wonile lezaku zitsongwani nzi nga zi tiva xungetano hi Biblia. Kanilezi, a sati wa mina i wa ti nyenya nguvu a Timboni, niku mina nzi wa khomekile nguvu, hikwalaho ti lo nyima kuta.

Ntlhanu wa malembe nzhako, nzi wa hanya ni wasati munwani, Elvira, laha nzi nga sangula kambe ku gonza a Biblia ni Timboni ta Jehova. Elvira i wa nga ti vengi a Timboni, hikwalaho zi nzi hehukele nguvu a ku gonza Biblia hi kukhanzakanya. Hambulezo, nzi hlwelile nguvu a ku cica mahanyela ya mina.

Nzi wonile lezaku kasi nzi khozela Jehova hi mbilu yontlhe, nzi wa fanele ku cica za hombe. A xo ranga, nzi wa fanele ku cica ntiro wa mina wa ku yimbelela le chechini ya Katolika. Lezo zi wula ku nzi wa fanele ku lava zinwani za ku maha kasi ku ti hanyisa. (Kuvululelwa 18:4) Nzi wa fanele kambe a ku tsalisa a muchado wa mina na Elvira.

Hambulezo, a xinwe xa zilo zo karata nguvu nzi nga fanele ku cica, ku wa hi ku gonza ku ti khoma loku nzi zangarile. Ku na ni mavesi mambiri ya Biblia ma nga nzi vuna nguvu, ku nga bhuku ga Tisimu 11:5, gi kombako lezaku Jehova wa venga tihanyi, ni 1 Pedro 3:7 legi gi nga nzi gonzisa lezaku loku nzi lava ku Jehova azwa mikhongelo ya mina, nzi fanele ku kombisa xichawo ka sati wa mina. Hi ku ehleketa hi mavesi lawo nzi tlhela nzi kombela xivuno ka Jehova, hi kutsongwani-kutsongwani nzi zi kotile a ku ti khoma loku nzi zangarisiwa.

LEZI NZI NGA VUNEKISA ZONA:

Nyamutlha a ngango wa mina wu na ni litsako. Nzi ti karatela ku chukwatisa a kuzwanana ka mina ni vana va mina lava nzi nga pswala ni sati wa mina wo ranga nzi tlhela nzi vuna a ngango wa mina wa wuswa lezaku wu tshama wu tiyile kukholweni.

A xikhati nzi nga hi nwanana, nzi wa xuva ku maha paderi ni ku vuna vanhu. Makunu nzi wona lezaku a wutomi ga mina gi na ni xikongomelo xa lisine. Nzi hlayisa a ngango wa mina hi ku gonzisa a ku chaya. Nza mu bonga nguvu Jehova hi kuva a nzi timisele, a nzi nyika lungelo ga kuva nzi cica a wutomi ga mina nziva munhu wa mu nene!