ZIWUTISO ZA VAGONZI

Va wa hi vamani a “varisanyana” kutani vana “va Nungungulu” lava va kumbukiwako ka Genesisi 6:2, 4 lava va wuliwako ku va hanyile mahlweni ka Ntalo?

Ku na ni wukustumunyu ga lezaku a magezu lawa ma wula a vana va Nungungulu va moya. Xini xi kombako?

A vesi go ranga ga lawa ma wulawulako hi mhaka leyi, gi ngalo: “A varisanyana va Nungungulu va lo wona a vanhwana va vanhu lezaku va sasekile; va lo va teka a kuva vasati vabye ka vontlhe lava va nga va hlawula.” — Gen. 6:2.

Ka Mitsalo ya xiHeberu, a magezu lawa yaku “vana va Nungungulu” ma kumeka ka Genesisi 6:2, 4; Joba 1:6; 2:1; 38:7; ni ka Tisimu 89:6. Xana a mavesi lawa ma komba yini xungetano hi “vana va Nungungulu”?

Za dlunyateka lezaku “a vana va Nungungulu” lava va kumbukiwako ka Joba 1:6, ku wuliwa zivangwa za moya zi nga tsombene mahlweni ka Nungungulu. Xikari ka zona, ku wa hi na Satani, loyi a nga hi “kunzulanzuleni laha misaveni.” (Joba 1:7; 2:1, 2) Hi ku fanana, ka Joba 38:4-7, hi gonza xungetano hi “vana va Nungungulu” lava va nga “kanyuluka hi kutsaka” a xikhati lexi Nungungulu a nga ‘veka a ribye ga magumo’ ga misava. Handle ko kanakana, a vana lavo tingelosi, hakuva a vanhu va nyama va wa nga se vangiwa. A “vana va Nungungulu” lava va kumbukiwako ka Tisimu 89:6, zivangwa za moya zi nga mahlweni ka Nungungulu, a hi vanhu va nyama.

Ahati a “varisanyana” kutani vana “va Nungungulu” lava va kumbukiwako ka Genesisi 6:2, 4 ke? Maringano ni mitlhamuselo ya Biblia yo tsumbeka leyi yi nga laha hehla, za zwisiseka a ku wula lezaku a matimu lawa ma wula vana va Nungungulu va moya lava va tileko laha misaveni.

A vanwani za va karatela a ku kholwa lezaku a tingelosi ti nga tshuka ti navela ku hlengela masango. A magezu ya Jesu ma tsalilweko ka Mateu 22:30, ma komba lezaku a ku chada ni ku hlengela masango a zi kona le tilweni. Hambulezo, ka zikhati zo kari, a tingelosi ti wa tshuka ti ambala mimiri ya nyama, ti tlhela tiga ni kunwa ni vanhu. (Gen. 18:1-8; 19:1-3) Hikwalaho, za zwisiseka a ku wula lezaku ka xiyimo lexo, xa ku ngha ti ambele mimiri ya nyama, ti wa zi kota ku hlengela masango ni vavasati.

A Biblia gi hi nyika zigelo zo zwala za ku kholwa lezaku hakunene a tingelosi to kari ti zi mahile lezo futsi. Juda 6, 7 i fananisa a xionho xa vanhu va Sodoma, lava va tsikileko ntumbuluko va lanzela nyama ya hava, ni xa “tingelosi leti ti nga kala ku gonga a wuhosi ga tona, ti siya kaya ka tona.” Ka mhaka leyi, a vaSodoma va fana ni tingelosi hakuva vontlhe va ‘ti nyikele wubhayini, ni ku lanzela nyama ya hava.’ Ka matimu manwani yo fana ni lawa; ma nga ka 1 Pedro 3:19, 20, ma kumbuka tingelosi ti nga ingisiko zinwe ni ‘masiku ya Noa.’ (2 Ped. 2:4, 5) Hi kota ya lezo, a mahanyela ya tingelosi leti to kala ku ingisi ta le masikwini ya Noa, ma nga fananiswa ni xionho xa Sodoma ni Gomora.

A mhaka leyi yi zwisiseka khwatsi loku hi kholwa lezaku a ‘vana va Nungungulu’ lava va kumbukiwako ka Genesisi 6:2, 4 ku wuliwa tingelosi ti nga ambele mimiri ya nyama ti tlhela ti maha wubhayi ni vavasati.

A Biblia gi ngalo Jesu i lo “kanela ka mimoya leyi yi nga hi makhotsweni.” (1 Ped. 3:19) Xana lezo zi wula kuyini?

Mupostoli Pedro i wula lezaku a mimoya leyi hi “leyi a kale yi nga kala yi nga ingisi, laha Nungungulu a nga rinzela hi lihlaza-mbilu a masikwini ya Noa.” (1 Ped. 3:20) Zi la su dlunya lezaku Pedro i wa wula zivangwa za moya lezi zi ti patsileko na Satani. Juda i wulawula hi tingelosi “leti ti nga kala ku gonga a wuhosi ga tona, ti siya kaya ka tona” a tlhela aku Nungungulu “i ti hlayisile makhotsweni ya pinzukelwa ya munyama kala sikwini ga hombe ga kulamulwa.” — Juda 6.

Hikuyini ku wuliwako lezaku a zivangwa lezi za moya zi tsikile ku ingisa masikwini ya Noa ke? Mahlweni ka Ntalo, a mimoya leyi ya kubiha yi lo ambala mimiri ya nyama yi ti maha vanhu — ku nga nchumu lowu Nungungulu a nga kala a nga wu mahelangi makungo. (Gen. 6:2, 4) Tlhatakumbiri, a tingelosi leto ti hlengeleko masango ni vavasati ti wo maha zilo zi hambeneko ni ntumbuluko. Nungungulu a nga vangangi tingelosi lezaku ti hlengela masango ni vavasati. (Gen. 5:2) A tingelosi leti to biha ni ku kala ku ingisa, ti ta loviswa hi xikhati lexi Nungungulu a xi yimisileko. Ka xikhati lexi, kota kuwula ka Juda, ti le ‘munyameni’ — hi wulela ginwani, ti le paxweni hi tlhelo ga moya.

Xana Jesu i kanele rini ka “mimoya leyi yi nga hi makhotsweni” niku hi ndlela muni? Pedro i ngalo lezi zi mahekile anzhako ka loku Jesu a ‘hanyisilwe hi ka moya.’ (1 Ped. 3:18, 19) Wona kambe lezaku Pedro i ngalo Jesu i lo kanela. A kuva Pedro a te Jesu i kanele zi komba lezaku a kukanela loku ku mahekile Pedro na a nga se tsala a papilo gakwe go ranga. Hikwalaho, zi wonekisa ku khwatsi xikhatanyana nzhako ka kuvuxiwa kakwe, Jesu i lo kanela ka mimoya leyi ya kubiha xungetano hi kulamulwa ko mbhelela loku hakunene yi faneleko ku lamulwa ha kona. Ku wa nga hi kukanela ka ku yi nyika kutsumba ka kuhanyiswa, kanilezi ku wa hi kukanela ka kulamula. (Jona 1:1, 2) Kota lezi Jesu a nga kombisile kukholwa kakwe, a hanya hi kutsumbeka kala afa, a tlhela a vuxiwa hi ka vafileko — a komba lezaku Satani i wa nga hi na ntamu hehla kakwe — Jesu i wa hi ni xigelo xo zwala xa ku kanela a mahungu lawo ya kulamula. — Joh. 14:30; 16:8-11.

Xikhatini xi tako, Jesu i ta boha Satani ni tingelosi leto a va hoxa nkeleni wa lieswila. (Luka 8:30, 31; Kuv. 20:1-3) Na lezo zi nga se maheka, a tingelosi leti ti nga ingisiko ti munyameni hi tlhelo ga moya, niku a kulobyiswa ka tona ko gumesa ku nga ta thindeka. — Kuv. 20:7-10.