Xana gi kona wukhongeli go Tsumbeka?

Loku ku hi lezaku u khunguvanyisilwe hi wukhongeli go kari, kuzilava a wu kholwi ku gi kona go tsumbeka. Kanilezi tiyiseka lezaku gi kona. A xikhati lexi a nga hi laha misaveni, Jesu i hlengeletile ntlawa wa valanzeli vo tsumbeka a va gonzisa ku hanya hi matshinya ya milayo ya Nungungulu. A valanzeli va lisine va Jesu — va nga vanhu va timbilu ti nene va ti karatelako ku hanya hi milayo ya wuKristu — va kona ni nyamutlha. U nga va kuma kwihi?

Estelle, a kumbukilweko ka yinwe ya tinzima ti hunzileko, i ngalo: “Nzi sangulile ku tiva Biblia a xikhati nzi nga sangula ku gonza ni Timboni ta Jehova. A nzi hlwelangi ku zwisisa a bhuku ga Johani 8:32, gi nge ngalo: ‘Mu ta tiva lisine, ni lisine li ta mu tlhatlhisa.’”

Rui, loyi yenawu a kumbukilweko kusanguleni, i ngalo: “Hi ku gonza a Biblia ni Timboni ta Jehova, nzi gonzile lezaku Nungungulu a hi yena a mahako vanhu va xaniseka. Nzi tsakile nguvu hi ku tiva lezaku Nungungulu i na ni xigelo xo zwala xa ku tsika wubihi zezi, kanilezi i tsumbisa ku gi fuvisa lokuloku.”

Lisine lezaku za karata ku maha za zi nene laha a wunyingi ga vanhu va nga ni mahanyela ma nga nyawuliko. Kanilezi za koteka. A vanhu vo tala va zi lava ku vuniwa lezaku va zwisisa a Biblia va tlhela va hanya hi lezi va zi gonzako. Hi xigelo lexo, a Timboni ta Jehova ti fambisa zigonzo za Biblia za mahala ni vanhu va timiliyoni misaveni yontlhe. Viki ni viki, ku na ni vanhu vo tala va gonzako lezi a Biblia gi zi gonzisako. Kota wuyelo ga lezo, vona va tshinela ka Muvangi wabye, va tlhela vava ni litsako wutomini.a

Zi ngo yini loku wo wutisa a Timboni ta Jehova a ku hikuyini ti tsumbako a wukhongeli ga tona? Hlola a tigonzo ta tona ni matimu ya tona, u guma u boha ku gi kona wukhongeli go tsumbeka ke.