Mahungu ya Mufumo No. 37

Mahungu Ma Yako Misaveni Yontlhe

A Kumbhela Ka Wukhongeli Ga Mawunwa Ku Laha Kusuhani!

▪ Xini a wukhongeli ga mawunwa?

▪ Gi ta mbhelisa kuyini?

▪ Xana u ta khumbiswa kuyini?

Xini a wukhongeli ga mawunwa?

Xana wa karateka hi kota ya wugevenga legi gi mahiwako vitweni ga wukhongeli? Xana a kutizwa ka wena xungetano hi kululama ka khunguvanyiswa hi kota ya tiyimpi, terrorismo, ni kukanganyisa lezi zi mahiwako hi lava va ti wulako a ku va tirela Nungungulu? Hikuyini a wukhongeli gi wonekako ku khwatsi hi gona a mutsu wa zikarato zo tala nguvu?

A nanzu a wu le ka wukhongeli gontlhe, kanilezi wu le ka wukhongeli ga mawunwa. A mukhongeli loyi a chavekako nguvu misaveni yontlhe, Jesu Kristu, i kombile lezaku a wukhongeli ga mawunwa gi pswala mitiro yo biha, a ku fana ni lezi a ‘sinya yo biha yi pswalako mihanzu ya kubiha.’ (Mateu 7:15-17) Mihanzu muni leyi a wukhongeli ga mawunwa gi yi pswalako?

A Wukhongeli Ga Mawunwa . . .

◼ GI TI NGHENISA TIYIMPINI NI KA POLITIKA: A revista Asiaweek gi ngalo: “Le Asia zinwe ni ka manwani matiko a varangeli va lwelako a ku kuma zikhundla zo tlakuka hi makangwa va fumela a kutizwa ka vanhu xungetano hi wukhongeli kasi ku tsakisa a kuranza ka vona wutsumbu.” Kota hanzu wa kona, a revista ga tlharihisa: “A tiko gi dzukisa lezaku gi ta mbombomela kuhungukeni.” A murangeli wa hombe wa wukhongeli le Estados Unidos i te ngalo: “Mu fanele ku daya a vaterrorista kasi va nga ha dayi kambe.” Hi wahi a magumo ya mhaka yakwe? “Dayani vontlhe vitweni ga Hosi.” A kuhambana ni lezo, a Biblia gi ngalo: “Loku munhu a wula aku: Nza mu ranza Nungungulu, na a venga makabye wakwe, wa hemba.” (1 Johani 4:20) Jesu i tlhelile a ku ngalo: “Ranzani valala va nwina.” (Mateu 5:44) Wukhongeli gingani u alakanyako lezaku a ziro za gona za nghena tiyimpini?

◼ GI HANGALASA TIGONZO TA MAWUNWA: A wunyingi ga wukhongeli gi gonzisa lezaku a muhefemulo kutani moya xipanze xi nga wonekiko xa munhu lexi xi ponako kufeni ka miri. Hi ku tirisa a gonzo leyi, a kutala ka wukhongeli gi kalavela a ziro za gona, gi zi hakhelisa mali kasi ku khongelela a mihefemulo yi fileko. Kanilezi, a Biblia gi gonzisa zo hambana ni lezo. “A muhefemulo lowu wu onhako wu tafa.” (Ezekieli 18:4) “A vahanyako va zi tiva lezaku va tafa, kanilezi a vafileko a va tivi nchumu.” (Mutshawuteli 9:5) Jesu i gonzisile lezaku a vafileko va ta vuxiwa — nchumu lowu wu nga lavekiko loku ku hi lezaku a vanhu va wa hi ni muhefemulo wu nga fiko. (Johani 11:11-25) Xana a wukhongeli ga wena gi gonzisa lezaku a muhefemulo a wufi?

◼ GI VUMELELA A KUTIRISWA KA ZIRO ZA WUBELEKI HI NDLELA YO BIHA: Le matikweni ya le Mupela-gambo, a tichechi to kari ti vumelela a vavanuna va etlelako ni vavanuna-kulobye zinwe ni vavasati va hanyela galego lezaku vava vapristi ti tlhela ti kuca a mifumo akuva yi vumelela a kutekana ka vanhu va ziro za wubeleki zo fana. Hambu a tichechi leti ti konako a mahanyela ma nga hlazekangiko ta vumelela a varangeli va wukhongeli lava va xakelako vanana hi ku hlengela navo masango. Hambulezo, zini lezi a Biblia gi zi gonzisako xungetano hi kutiriswa ka ziro za wubeleki hi ndlela yo biha? Gona gi wula ziku dlunya giku: “Mu nga kohliswi: hakuva a zirembi, ni vakhozeli va zifananiso, ni zibhayi, ni lava va ti mahako vavasati, ni lava va ti bihisako ni vanwani vavanuna . . . va nga taga a tshomba ya mufumo wa Nungungulu.” (1 Va Le Korinte 6:9, 10) Xana wa gi tiva a wukhongeli legi gi vumelelako a kutiriswa ka ziro za wubeleki hi ndlela yo biha?

Xana gi tava gihi a wumanziko ga wukhongeli legi gi pswalako mihanzu yo biha? Jesu i tlharihisile: “A sinya yinwe ni yinwani leyi yi nga pswaliko mihanzu yo nanziha, yi tsemiwa, yi hoxiwa nzilweni.” (Mateu 7:19) Hakunene, a wukhongeli ga mawunwa gi ta tsemiwa gi loviswa! Kanilezi hi ndlela muni niku zi ta maheka rini? A muwoniso wa wuprofeti wu tsalilweko lomu bhukwini ga Biblia ga Kuvululelwa, zipimo  17 ni 18, wa nyika hlamulo.

Xana gi ta mbhelisa kuyini a wukhongeli ga mawunwa?

Alakanyela a muwoniso lowu. A xibhayi xi khilele a xihari xo tshisa nguvu. A xihari lexo xi na ni ntlhanu wa tihloko ni timbiri ni khume ga timhonzo. (Kuvululelwa 17:1-4, Tradução do Novo Mundo) Xana a xibhayi lexi xi yimela mani? Xona xi fuma “hehla ka tihosi ta misava.” Xi ambele xiwunguwungu, xi tirisa libani, niku xi ganyile nguvu. Tlhatakumbiri, ‘a matiko wontlhe ma khohliswa’ hi mitiro ya xona ya wuloyi. (Kuvululelwa 17:18; 18:12, 13, 23) A Biblia ga hi vuna a ku wona lezaku a xibhayi lexi i hlengeletano ya wukhongeli ga misava yontlhe. Xona xi yimela a wukhongeli gontlhe legi gi pswalako mihanzu yo biha, na ku nga hi wukhongeli ginwe ntsena.

A xihari lexi xi khilelweko hi xibhayi xi yimela a mifumo ya misava ya wupolitika.a (Kuvululelwa 17:10-13) A wukhongeli ga mawunwa gi khilele xihari lexi xa wupolitika, na gi zama a ku nyika mawonela ya gona ka ziboho za xihari ni ku fumela a wurangeli ga xona.

Hambulezo, lokuloku ku tava ni ximaho xo hlamalisa nguvu. A “khume ga timhonzo leti u nga ti wona, ni xihari, zi ta venga xibhayi, zi mu maha xisiwana ni ximbyiri, zi taga nyama yakwe, zi mu hisa hi nzilo.” (Kuvululelwa 17:16) Hi ximaho xa xitshuketi ni xa ku tshisa nguvu, a mifumo ya misava ya wupolitika yi ta vukela a wukhongeli ga mawunwa yi gi lovisa hi kumbhelela! Xini xi to kuca a ximaho lexo? A bhuku ga Biblia ga Kuvululelwa ga hlamula: “Nungungulu i vekile timbilwini tabye a ku maha kuranza kakwe.” (Kuvululelwa 17:17) Ina, Nungungulu i ta lamula a wukhongeli ga mawunwa hi kota ya mitiro ya gona ya manyala leyi gi yi mahako vitweni gakwe. Hi ku tirisa a kululama ko mbhelela, yena i ta tirisa a vanghana va gona va wupolitika kota xitiro xakwe xa kulovisa.

Xana u fanele ku maha yini loku u nga lavi a ku loviswa zinwe ni wukhongeli ga mawunwa? “Humani ka yena, nwina vanhu va mina,” ku tlharihisa a ntsumi wa Nungungulu. (Kuvululelwa 18:4) Hakunene, zalezi xikhati xa ku tsutsuma u huma ka wukhongeli ga mawunwa! Kanilezi u ta tsutsumela kwihi? U nga tsutsumeli ka lava va nga kholwiko a kuvakona ka Nungungulu, hakuva vonawo a va na kutsumba xungetano hi wumanziko. (2 Va Le Tesalonika 1:6-9) Laha ku nga ni wuchavelo hi lomu nzeni ka wukhongeli ga lisine koce. Xana u nga gi tivisa kuyini a wukhongeli ga lisine?

Hi nga gi tivisa kuyini a wukhongeli ga lisine

Mihanzu muni yo saseka leyi yi faneleko ku pswaliwa hi wukhongeli ga lisine? — Mateu 7:17.

A Wukhongeli Ga Lisine . . .

◼ GI TIVEKA HI LIRANZO: A vakhozeli va lisine ‘a hi va tiko,’ a va ti hambanyisi hi mivala ya hlonge kutani midawuko, niku “va ranzana.” (Johani 13:35; 17:16; Mitiro 10:34, 35) A wutshanwini ga ku dayana, vona va ti yimisele kufa hi kota ya vanwani. — 1 Johani 3:16.

◼ GI TSUMBA A MHAKA YA NUNGUNGULU: A wutshanwini ga ku gonzisa “mahanyela” ya vanhu ni “zileletelo za vanhu,” a wukhongeli ga lisine gi seketela a tigonzo ta gona ka Mhaka ya Nungungulu, a Biblia. (Mateu 15:6-9) Hikuyini? Hilezaku “yontlhelele mitsalo yi pimisilweko vanhu hi Nungungulu ya vuna kugonziseni, ni kukawukeni, ni kululekeni.” — 2 Timote 3:16.

◼ GI TIYISA MINGANGO NI KU SEKETELA A MILAYO YO TLAKUKA YA MAHANYELA: A wukhongeli ga lisine gi gonzisa a vanuna a ku “ranza a vasati vabye kota lezi va ranzako a mimiri yabye,” gi vuna a vasati lezaku vava ni ‘xichawo xo eta ka vanuna vabye,’ gi tlhela gi gonzisa vanana kasi va ‘ingisa a vapswali vabye.’ (Efesusi 5:28, 33; 6:1) Ahandle ka lezo, lava va nyikwako a wutihlamuleli ga kurangela va fanele kuva xikombiso xi nene mahanyeleni. — 1 Timote 3:1-10.

Xana gi kona a wukhongeli go kari gi ti zwananisako ni milayo leyi ya mahanyela? A bhuku Holocaust Politics, gi humesilweko hi lembe ga 2001, gi ngalo: “Loku ku wo khwatsi a vanhu vo tala va wa hanya hi kuyelana ni lezi a Timboni ta Jehova ti zi xumayelako, a kuhihiritwa ka vanhu va timiliyoni hi vaNazi nzeni ka Yimpi ya Wumbiri ya Misava na ku potsilwe niku a kudayana ka vanhu va tixaka to hambana ku wa nga ta xanisa a misava kambe.”

Hakunene, lomu ka 235 wa matiko, a Timboni ta Jehova a ti xumayeli ntsena a milayo ya Biblia ya mahanyela — tona ti hanya hi yona. Ha ku kuca lezaku u kombela a Timboni ta Jehova lezaku ti ku vuna a ku gonza lezi Nungungulu a zi lavako ka wena kasi u zi kota a ku mu khozela hi ndlela leyi a yi amukelako. Lexi xikhati xa ku maha xo kari. U nga hlweli. A kumbhela ka wukhongeli ga mawunwa ku laha kusuhani! — Zefania 2:2, 3.

Loku u tsakela ku tiva zinwani xungetano hi mahungu ma seketelwako ka Biblia lawa a Timboni ta Jehova ti ma xumayelako, u nga kanakani a ku tsalela a Timboni ta Jehova hi ku tirisa a makhero lawa ma nga lahasi.

□ Na nzi nga lavi a ku fambiselwa xigonzo, nzi kombela a broxura Tshamani Na Mu Rinzele!

□ Hi wuxinji nzi enzeleni xungetano hi xigonzo xa Biblia xa laha mutini xa mahala.

[Mitlhamuselo ya lahasi]

[Magezu yo koka kupima ka phajina 3]

“Humani ka yena, nwina vanhu va mina”

[Magezu yo koka kupima ka phajina 3]

A wukhongeli ga mawunwa gi fuma “hehla ka tihosi ta misava”