Xigonzo 11

Ala Wukhongeli Ga Mawunwa!

Satani ni madimoni yakwe a va zi lavi lezaku wena u tirela Nungungulu. Va lava a ku hambukisa vontlhe ka Nungungulu loku va zi kota. Hi ndlela muni va hlotako ku maha lezo? A ndlela yinwe hi wukhongeli ga mawunwa. ( 2 Va Le Korinte 11:13-15) A wukhongeli, ga mawunwa loku gona gi nga gonzisi zinene za Biblia. A wukhongeli ga mawunwa gi kota mali ya mawunwa — ga zi kota ku khwatsi ga lisine, kanilezi a gi vuni nchumu. Ga zi kota ku ku vangela zikarato zinyingi.

A wunwa ga wukhongeli a gi zi koti ku xalalisa Jehova, Nungungulu wa zinene. Laha Jesu a nga hi Misaveni, ku wa hi kona ntlawa wa wukhongeli wu nga lava ku mu daya. Lava va nga lumba wona a va alakanya lezaku makhozelela yabye ma wa lulamile. Va te ngalo: “Hi na ni Dadani munwe, yena Nungungulu.” I zi vumelile lezo Jesu ke? Ahihi! Yena i te ngalo kabye: “Nwina mu vana va raru wa nwina a nga Satani.” (Johani 8:41, 44) Nyamutlha, vanyingi va alakanya lezaku va khozela Nungungulu, kanilezi hi lisine va tirela Diyabu ni madimoni yakwe. — 1 Va Le Korinte 10:20.

Kota lezi a sinya yo biha yi pswalako mihanzu ya kubiha, a wukhongeli ga mawunwa gi pswala vanhu va mahako zilo zo biha. A tiko gi tele hi zikarato hi kota ya zilo zo biha zi mahiwako hi vanhu. Gi kona wuhava, kulwa, kuyiva, khinyavezo, kudaya ni kupfinya. Vanyingi va mahako zilo lezo va na ni wukhongeli, kanilezi a gi va kuci ku maha zi nene. A va zi koti kuva vanghana va Nungungulu ahandle ka ku tsika ku maha zilo zo biha. — Mateu 7:17, 18.

Wukhongeli ga mawunwa gi gonzisa vanhu ku khongela ka zifananiso. Nungungulu i leletela lezaku ku nga khongelwi zifananiso. Lezo za zwala. U wa ta alakanya yini loku wo kari cima a nga wulawuli na wena, kanilezi a wulawula ntsena ni mifoto ya wena? Munhu loye i wa ta zi kota kuva munghana wa wena wa lisine ke? Ahihi, i wa nga ta zi kota. Jehova i lava lezaku vanhu va wulawula ka yena, na ku nga hi ka xifananiso kutani ka kwadru gi nga hiko na wutomi. — Eksodusi 20:4, 5.

Wukhongeli ga mawunwa gi gonzisa lezaku za koteka ku daya vanwani zikhatini za yimpi. Jesu i te ngalo vanghana va Nungungulu va wa ta ranzana. Hina a hi dayi lava hi va ranzako. (Johani 13:35) Hambu ku daya vanhu vobiha ku wa tava xihoxo. Laha valala va Jesu va nga ya mu khoma, yena a nga vumelangi lezaku vapizani vakwe va lwela ku mu vikela. — Mateu 26:51, 52.

A wukhongeli ga mawunwa gi gonzisa lezaku a va kubiha va ta xaniseka gehena. Kanilezi a Biblia gi gonzisa lezaku a mbhanzu wa kuonha hi kufa. (Va Le Roma 6:23) Jehova i Nungungulu wa liranzo. Xana Nungungulu wa liranzo i wa ta vanga hlomulo ka vanhu kala kupinzuka? Ahihi! Paradiseni ku tava ni wukhongeli ginwe ntsena, legi Jehova a gi amukelako. (Kuvululelwa 15:4) Gontlhe wukhongeli legi gi ti seketelako mawunweni ya Satani gi ta ngha gi nyamalele.