‘I tata a timbilu ta hina hi kutsaka’

Xana Jehova wa khatala hi hina hakunene, kutani a nga cheli kota hi zikarato za vanhu misaveni leyi? A hlamulo wa Biblia ka xiwutiso lexi wa hi chavelela nguvu. Nungungulu wa khatala futsi hi vanhu niku i lava lezaku hi hanya hi kutsaka. Siku ni siku, i tsika vanhu va vuneka hi wunene gakwe ga hombe — hambu lava va kalako va nga bongi. Wona a magezu ya mupostoli Paule. — Gonza Mitiro 14:16, 17.

Na a wulawula ni vanhu va le doropeni ga le Listra, lava va nga kala va nga hi vakhozeli va Nungungulu, Paule i te ngalo: ‘Hi zizukulwana zi hunzileko, Nungungulu i lo tsika matiko wontlhe lezaku ma famba tindleleni ta wona. Hambulezo a nga vumalangi wukustumunyu ka wona, hakuva i lo maha kusaseka, a mu nyika vula hi le tilweni ni tinguva ta mihanzu, a mu anzisela zakuga, a tatisa timbilu ta nwina hi kutsaka.’ Ma wa wula yini magezu lawo ka vaingiseli va Paule?

Ka vahanyi va Listra, zi wa nga lavi kuza vaya kule kasi ku zwisisa a magezu ya Paule. Va wa hi varimi niku va wa hanya ka xipanze xo nona ni xa nzhongo. Kanilezi, khwatsi hi lezi Paule a nga va alakanyisa, Nungungulu hi yena a nisako tivula niku hi yena a vekileko a tinguva ta mihanzu. Hikwalaho, khati ni khati va nga pfuna va tlhela vaga zakuga zo nanziha, va wo vuneka hi wunene ga Nungungulu.

A magezu ya Paule ka vahanyi va le Listra ma hi gonzisa zilo zo tala za lisima xungetano hi Jehova Nungungulu.

Jehova wa hi nyika kutlhatlheka lezaku hi ti hlawulela. Wona lezaku Jehova i tsikile matiko wontlhe “ma famba tindleleni ta wona.” A bhuku go kari ga ku vuna vahunzuluseli va Biblia gi ngalo a magezu lawa ma nga wula “ku fambisa lezi va zi lavisako zona” kutani “ku maha lezi va zi wonako na zi hi zi nene.” Jehova a nga kurumeti munhu lezaku a mu khozela. I hi nyikile kutlhatlheka ka kutihlawulela — ku nga wuzikoti ga ku hlawula hi hoce lezi hi lavako ku hanyisa zona. — Deuteronome 30:19.

Jehova i lava lezaku hi mu tiva. Paule i te ngalo Nungungulu “a nga vumalangi wukustumunyu.” A bhuku legi gi kumbukilweko laha hehla gi ngalo a magezu lawa ma nga ha hunzuluselwa lezaku “i kombile vanhu lezaku yena Nungungulu wo tshamisa kuyini.” A zivangwa za Nungungulu zi nyika wukustumunyu ga ntamu ga “matshamela yakwe ma nga wonekiko,” yo kota a wunene, wutlhari, ntamu ni liranzo. (Va Le Roma 1:20) Jehova i ti tivekisa nguvu kambe hi ku tirisa a Biblia. (2 Timote 3:16, 17) Xana a zi laha kubaseni ku i lava lezaku hi mu tiva?

Jehova i lava lezaku hi tsaka. Paule i te ngalo Nungungulu ‘i tata a timbilu ta hina hi kutsaka.’ Hambu muonhi loyi a nga kholwiko ka Jehova a nga haga zakuga kala a mbilu yakwe yi xalala a tlhela a kuma litsako lo kari wutomini. Kanilezi Nungungulu i lava lezaku hi kuma litsako la lisine ni la simasima. Lezo zi to koteka ntsena loku hi gonza a lisine xungetano hi yena hi tlhela hi hanya hi lona. — Tisimu 144:15; Mateu 5:3.

Hontlheni ha vuneka hi wunene ga Jehova siku ni siku. Zi ngo yini loku wo ti nyika xikhati u gonza tindlela ta ku kombisa kubonga ka Nungungulu loyi ‘a tatako mbilu ya wena hi kutsaka’ ke?