“A nza ha ti rwexi nzhwalo wa ku zama ku cica tiko”

KALE KA MINA:

Nzi wa ranza ntumbuluko kusukela wunwananeni ga mina. A ngango wa hina wu wa ranza ku enzela makhwati ni mativa yo saseka kusuhani ni doropa ga hina ga mabeleko, ku nga Jyväskylä, lomu xikari ka Finlândia. A zihari zonawu nzi zi ranza nguvu. Na nza ha hi nwanana, nzi wa angarela ni xihi ximanga kutani mbyana nzi nga yi wona! Laha nzi ngaya nzi kula, nzi wa swireka hi ku wona vanhu na va xanisa a zihari. Hi kufamba ka xikhati, nzi lo sangula ku tira ni hlengeletano ya ku lwela tifanelo ta zihari, laha nzi nga tivana ni vanhu va kupima ko fana ni loku ka mina.

Hi wa maha matsima ya ku wulawula hi tifanelo ta zihari. Hi wa hangalasa mahungu hi tlhela hi veka masiku ya ku famba hi sola zitolo za ku tirisa mawoya ya zihari ni matshamu lawa ku mahiwako mikambisiso hi zihari. Hi lo wumba hlengeletano yiswa ya ku vikela zihari. Kota lezi hi nga maha zilo zo hunza mpimo kasi ku tatisa a mixuvo ya hina, hi wa tala ku ti vangela timhaka ni maphoyisa. Nzi khomilwe makhati yo tala nzi ya xuxisiwa.

Ahandle ka ku karatekela zihari, nzi wa karatiwa kambe hi zi zikarato zinwani za tiko. Hi magumo, nzi lo sangula ku tirisana ni tihlengeletano to tala, a ku patsa ni Anistia Internacional zinwe ni Greenpeace. Nzi wa seketela a mitiro yabye hi ntamu wa mina wontlhe. Nzi wa yimelela a zisiwana, vanhu va ku xaniseka hi ndlala, ni vanhu vanwani va nyalidede.

Kanilezi, hi kutsongwani-kutsongwani nzi lo wona lezaku nzi nga ta zi kota ku cica tiko. Hambu lezi a tihlengeletano leto ti nga zi kota ku lulamisa zikarato zo kari za zi tsongwani, a zikarato za hombe zi woya zi tshinga. Zi wa ku khwatsi a tiko gontlhe gi wo thapelwa hi wubihi na ku nga hi na munhu a khatalako hi zona. Nzi lo mbhela ntamu.

LEZI A BIBLIA GI NGA CICISA ZONA A WUTOMI GA MINA:

Lezi nzi nga kala nzi nga ha tivi xo maha, nzi lo sangula ku veka kupima ka Nungungulu ni Biblia. Nzi wa tshukile nzi gonza a Biblia ni Timboni ta Jehova. Hambu lezi nzi nga tsakiswa hi wunene ni kukhatala ka Timboni, nzi wa nga ti yimiselangi ku cica a mahanyela ya mina. Ka khati legi, zi wa nga ha tshamisangi lezo.

Nzi lo teka a Biblia ga mina nzi sangula ku lera. Gi lo kanzetela a zilonza za mina. Nzi wonile matshamu yo tala laha a Biblia gi hi gonzisako ku hlayisa khwatsi a zihari. Hi xikombiso, Mavingu 12:10 i ngalo “a munhu wo lulama wa chela kota hi wutomi ga xifuyo xakwe.” Nzi tlhelile nzi wona lezaku Nungungulu a hi yena a vangako a zikarato zi nga kona lomu tikweni. Wutshanwini ga lezo, a zikarato za hina zi ya zi engetela hi lezi a vanhu vo tala va kalako va nga lanzeli a zileletelo zakwe. Nzi khumbekile nguvu a xikhati nzi nga tiva lezaku Jehova i na ni liranzo niku wa zwela wusiwana. — Tisimu 103:8-14.

Ka xikhati xalexo, nzi lo kuma xiphephana xo kombela hi xona a bhuku Zini Lezi A Biblia Gi Zi Gonzisako Hakunene? nzi xi rumela. Na ku nga hunzangi xikhati xo leha, nzi lo enzelwa hi patswa wo kari wu ta nzi komba xigonzo xa Biblia. Nzi lo vumela nzi tlhela nzi sangula kuya mitlhanganweni Salawini ya Mufumo. Kota wuyelo ga lezo, a lisine la Biblia li lo sangula ku zima mitsu mbilwini ya mina.

A Biblia gi nzi vunile ku cica zo tala nguvu. Nzi tsikile a kudzaha ni wudakwa; nzi cica maambalela ni mawulawulela; nzi tlhela nzi cica a mawonela ya mina mayelano ni wuhosi ga tiko. (Va Le Roma 13:1) Nzi lo tsika kambe a mahanyela ya mina ya manyala, laha nzi nga kala nzi nga hi na kutikhoma ni ka kutsongwani.

A kucica ka hombe nguvu loku nzi nga fanele ku ku maha ku wa hi ku wona a tihlengeletano ta ku lwela tifanelo ta zihari ni vanhu kota lezi hakunene ti nga zona. A zi vangi za ku etlela nzi lora na zi mahekile. Kusanguleni nzi wa alakanya lezaku a ku tsika tihlengeletano leto ku wa tava kungatsumbeki. Kanilezi, nzi lo tiva lezaku a Mufumo wa Nungungulu hi wona woce wu to zi kota ku mbheta a zikarato za tiko legi. Nzi lo boha ku tirisa a ntamu wa mina wontlhe kasi ku seketela a Mufumo lowo ni ku vuna vanwani lezaku va gonza xungetano hi wona. — Mateu 6:33.

LEZI NZI NGA VUNEKISA ZONA:

Na nza ha zama ku cica tiko, nzi wa tala ku avanyisa vanhu hi mitlawa yimbiri — va va nene ni va ku biha — niku nzi wa vukela ni wihi loyi nzi nga mu wona kota wo biha. Kanilezi hi ku vuniwa hi Biblia, a nza ha vengi munhu. Wutshanwini ga lezo, nzi ti karatela ku kombisa liranzo la wuKristu hi vanhu vontlhe. (Mateu 5:44) A yinwe ya tindlela nzi kombisako hi tona liranzo lelo ku xumayela mahungu yo saseka ya Mufumo wa Nungungulu. Nza tsaka hi ku tiva lezaku a ntiro lowu wo saseka wa vuvumisa a kurula ni litsako wu tlhela wu nyika a kutsumba ka lisine.

Nzi kumile kurula ka maalakanyo hi ku tsika a mhaka leyi mandleni ya Jehova. Nza kholwa lezaku yena kota Muvangi, a nga ta tsika zihari ni vanhu va xaniswa kala kupinzuka, ge hambu ku tsika misava ya hina yo saseka yi lovisiwa. Kanilezi, lokuloku i ta tirisa Mufumo wakwe kasi ku lulamisa zontlhe lezi zi onhetelweko. (Isaya 11:1-9) A ku tiva lisine la Biblia ni ku vuna vanwani kasi vava ni kukholwa ka zitsumbiso lezo, zi nzi nyika litsako la hombe. A nza ha ti rwexi nzhwalo wa ku zama ku cica tiko.