‘Ti khomeni lezaku mu zi kota ku khongela’

1, 2. (a) Hikuyini zi nga za lisima ‘a ku ti khoma lezaku hi zi kota ku khongela’? (b) Ziwutiso muni xungetano hi mukhongelo lezi hi faneleko ku ti maha?

“A XIKHATI xo karata ka zontlhe xa kuva munhu a tshama na a hanyanya hi laha gi yako kuceni,” ku wula wanuna wo kari loyi a kale a nga tira ni wusiku. Handle ko kanakana, ni wihi a tirako ni wusiku a nga na ku kaneta a mhaka leyi. A maKristu nyamutlha ma yimisana ni xikarato lexi hakuva a wusiku go leha ga tiko ga Satani makunu gi laha kusuhani ni ku mbhela. (Rom. 13:12) Gi wa tava khombo ga hombe loku hi wo tshuka hi khudzehela ka hora leyi gi yaku kuceni! Hikwalaho, xikurumeta lezaku ‘hi va ni kupima ku nene’ hi tlhela hi lanzela a xitlharihiso xa Biblia xa lezaku ‘hi ti khoma kasi hi zi kota ku khongela.’ — 1 Ped. 4:7.

² Kota lezi hi hanyako tichokeni ta xikhati lexi xo gumesa, wutlhari a ku ti wutisa lezi: ‘Xana nzi tshama na nzi tlharihile, nzi khongela xontlhe xikhati? Nza maha mikhongelo ya tixaka tontlhe, nzi simamisa nzi nga tsiki? Nza tolovela ku khongelela vanwani kutani a mikhongelo ya mina yi talela ntsena ka lezi nzi zi lavako ni lezi nzi zi ranzako ke? Niku xana a mukhongelo wu na ni lisima muni kuhanyisweni ka mina?’

MAHA TIXAKA TONTLHE TA MIKHONGELO

3. Hi tihi a tixaka to kari ta mikhongelo?

³ Ka papilo gakwe ka va le Efesusi, mupostoli Paule i wulawulile hi tixaka tontlhe ta mikhongelo. (Efe. 6:18) Mikhongelweni ya hina, hi nga tshuka hi tolovela ku kombela Jehova lezaku a hi vuna ku kuma lezi hi zi lavako ni ku hlula zikarato. A Muzwi wa mikhongelo i demba ndleve a ingisela zikombelo lezo hi liranzo kasi a hi vuna. (Tis. 65:2) Hambulezo, hi fanele ku ti karatela ku maha mikhongelo ya tixaka tinwani. A mikhongelo leyo yi patsa leyi ya ku mu dumisa, ku mu bonga, ni ku mu khongotela.

4. Hikuyini hi faneleko ku dumisa Jehova hi kukhanzakanya mikhongelweni ya hina?

⁴ Ku na ni zigelo zo tala zi mahako lezaku a mikhongelo ya hina ka Jehova yi patsa a magezu ya ku mu dumisa. Hi xikombiso, a xikhati lexi hi ehleketako hi “mitiro yakwe ya hombe” ni “wukulu ga kungangamela kakwe” ha susumeteka a ku mu dumisa. (Gonza Tisimu 150:1-6.) Hi nga wona lezaku a ntlhanu wa mavesi ni ginwe ya Lisimu 150 ma hi kuca lezaku hi dumisa Jehova a 13 wa makhati! Hi kota ya xichawo xo eta lexi a nga hi naxo ha Nungungulu, a mutsali wa linwani lisimu i te ngalo: “Nza ku dumisa ntlhanu wa makhati ni mambiri hi siku, hi kota ya kulamula ka wena ku lulamileko.” (Tis. 119:164) Handle ko kanakana, Jehova i fanele ku dumiswa. Makunu-ke, xana a hi faneli ku mu dumisa mikhongelweni ya hina “ntlhanu wa makhati ni mambiri hi siku,” kutani ku, hi kukhanzakanya ke?

5. Xana a moya wa kubonga mikhongelweni wu hi vikelisa kuyini?

⁵ A ku bonga lixaka linwani la lisima la mukhongelo. Paule i lo kuca maKristu doropeni ga Filipi aku: “Mu nga karateki ha nchumu; kanilezi a timhakeni tontlhe tivisani a mixuvo ya nwina ka Nungungulu hi kukombela ni kukhongotela, na mu kari mu bonga.” (Fil. 4:6, Tradução do Novo Mundo) A ku khongela ka Jehova hi mbilu yontlhe na hi kombisa kubonga za hi vikela. Nguvunguvu kota lezi hi hanyako masikwini yo gumesa laha a vanhu vo tala “va nga bongiko.” (2 Tim. 3:1, 2) Hakunene, a tiko gi fumelwa hi moya wa ku nga bongi. Loku hi nga ti woneli, a moya lowo wu nga hi thapela hi kuolova. A ku bonga Nungungulu mikhongelweni ya hina zi neha litsako zi tlhela zi hi vikela ka khombo ga ku tshamela ku ngurangura ni ku khala hi kota ya xiyimo xa wutomi ga hina. (Juda 16) Tlhatakumbiri, loku a tihloko ta mingango ti patsa magezu ya kubonga a xikhati lexi ti khongelako na ti hi ni ziro za mingango ya tona, ti kuca a vasati ni vana vabye lezaku vava ni moya wa kubonga.

6, 7. Xini a ku khongotela, niku zini lezi hi nga khongotelako Jehova lezaku a maha?

⁶ A ku khongotela ku khongela hi ku ti tsitsirita, na u kari u wula a kutizwa ka wena kontlhe. Zini lezi kuzilava hi nga ha kombelako ka Jehova hi mukhongelo lowu wa kukhongotela ke? Handle ko kanakana hi nga maha mukhongelo wa lixaka leli a xikhati lexi hi xaniswako kutani loku hilwa ni mababyi ya hombe. Ka zikhati lezo, a mikhongelo leyi hi yi mahako na hi kombela xivuno ka Nungungulu yi hunzuka yiva mikhongelo yo khongotela. Kanilezi, xana hi ka ziyimo lezi ntsena hi faneleko ku khongotela Jehova?

⁷ Ehleketa hi mukhongelo wa Jesu wa xikombiso, u wona lezi a nga wula xungetano hi vito ga Nungungulu, Mufumo Wakwe, ni kuranza Kakwe. (Gonza Mateu 6:9, 10.) A tiko legi gi pelile hi hloko ka zilo za kubiha, niku a mifumo ya vanhu a yi zikoti ne ni ku khatalela a zilaveko-tshinya za vanhu va yona. Hikwalaho, hi fanele ku khongelela lezaku a vito ga Dadani wa hina wa tilweni gi basiswa, ni lezaku a Mufumo wakwe wu tlhatlhisa a misava ka wufumeli ga Satani. Lexi xonawu xikhati xa ku khongotela Jehova lezaku a kuranza kakwe ku mahiwa laha misaveni kota lezi ku mahiwako le tilweni. Hikwalaho, a hi tshameni na hi tlharihile, na hi longile ku maha tixaka tontlhe ta mikhongelo.

‘KHONGELA U NGA TSIKI’

8, 9. Hikuyini hi nga faneliko ku tsutsumela ku lamula Pedro ni vapostoli lava vanwani hi lezi va nga khomiwa hi wurongo le sinwini ga Getsemane?

⁸ Hambu lezi mupostoli Pedro a nga kuca maKristu lezaku ‘ma ti khoma kasi ma zi kota ku khongela,’ yena wutsumbu i wa tsanzekile ku maha lezo khati ginwe hi kutsongwani ka kona. I’ve munwe wa vapizani lava va nga khomiwa hi wurongo a xikhati lexi Jesu a nga kari a khongela sinwini ga Getsemane. Hambu nzhako ka loku Jesu a va byelile lezaku ‘tshamani na mu rinzele, mu khongela mu nga tsiki,’ a va mahangi. — Gonza Mateu 26:40-45.

⁹ Hambulezo, wutshanwini ga ku tsutsumela ku lamula Pedro ni vapostoli lava vanwani hi lezi va nga tsanzeka ku tshama na va hanyanya, hi wa ta maha khwatsi hi ku alakanya lezaku a siku lego gi’ve go nonoha nguvu laha ka kuza va karala nyameni yabye yi nga hi ni gome. Va wa longisele Pasika va tlhela va gi maha ka wusiku lego. Hi kulanzela, Jesu i lo yimisa a Xilalelo xa Hosi, a va nyika xikombiso xa kuva va xi lanzela kasi ku maha a Xialakanyiso xa kufa kakwe ka xikhati xi nga hata. (1 Kor. 11:23-25) “Laha na va yimbelele lisimu, va lo huma vaya xitsungeni xa maOliva,” va famba pfhuka wo kari hi maruwa yo hlongana ya Jerusalema. (Mat. 26:30, 36) Ka xikhati lexo, za koteka ku ngha a dina ga wusiku na gi hunzile nguvu. Loku hi wa hi sinwini ga Getsemane a wusiku lego, hinawu ngha hi khomilwe hi wurongo. Wutshanwini ga ku sola a vapostoli lavo va nga rerekile, Jesu hi kota ya liranzo i zi wonile lezaku “a moya wa vumela, kanilezi a nyama yi na ni gome.”

10, 11. (a) Xigonzo muni lexi Pedro a nga xi kuma xungetano hi lezi zi nga mu humelela sinwini ga Getsemane? (b) Lezi zi nga mahekela Pedro zi ku khumbisa kuyini wena ke?

¹⁰ Pedro i susile xigonzo xa lisima ka lezi zi nga mu mahekela sinwini ga Getsemane. A ku tsanzeka ku tshama na a hanyanya wu’ve nchumu wo bayisa, hambulezo i gonzile xokari. Mahlweni ka lezo, Jesu i wa wulile lezi: ‘Nwina nwentlhe mu ta khuveka ha mina wusiku legi.’ Laha a ngazwa lezo, Pedro i lo wula lezi: ‘Hambu loku vontlhe va khuveka ha wena, mina cima nzi nga ta khuveka.’ Jesu i lo hlamula hi ku wula lezaku Pedro i wa ta mu kaneta kunharu. Pedro i lo tiyisa aku: “Hambu loku nzi ngafa na wena, nzi nga ta ku kaneta.” (Mat. 26:31-35) Hambulezo, Pedro i lo khuveka, khwatsi hi lezi Jesu a nga sina a wulile. Hi kota ya ku binziwa hi ximaho lexi xa ku mu kaneta, Pedro “i lo . . . rila hi xiviti.” — Luka 22:60-62.

¹¹ Kunene, Pedro i gonzile a mhaka ya lisima ka ximaho lexi a tlhela a hlula kubyekelela kakwe ka kutitsumba. Handle ko kanakana, lexi xi nga vuna Pedro ka mhaka leyi ku’ve mukhongelo. Kunene, zi na ni xigelo lezi a wusungukati legi ga kuva ‘hi ti khoma kasi hi zi kota ku khongela’ gi tako hi ka Pedro. Xana ha ingisa a wusungukati lego gi pimisilweko? Tlhatakumbiri, xana ha ‘khongela hi nga tsiki,’ hi ku maha loko hi komba lezaku ha tsumba Jehova zilweni zontlhe ke? A xinwani kambe, ngha hi nga rivali a xitlharihiso xa Paule xaku: “Loyi a alakanyako lezaku i yimile, a ti wonele, a nga dzuka awa.” — 1 Kor. 10:12.

A MIKHONGELO YA NEHEMIA YI LO HLAMULIWA

12. Hikuyini Nehemia a nga xikombiso xi nene ka hina?

¹² Hi nga alakanya hi Nehemia, loyi a nga hi muweleli wa gombe wa Artaxerxesi, a Hosi ya Persia ka zana ga malembe ga wuntlhanu Mahlweni ka Nguva ya Hina. Nehemia xikombiso xi nene xa munhu wo khongela hi mbilu yontlhe. I lo mbheta masiku na a ‘yila ni ku kombela mahlweni ka Nungungulu a nga tsiki’ hi kota ya kuxaniseka ka vaJuda le Jerusalema. (Neh. 1:4) A xikhati lexi Artaxerxesi a nga mu wutisa a ku hikuyini a nghohe ya wena yi tsanwako, ‘zalezo Nehemia i lo kombela ka Nungungulu wa le tilweni.’ (Neh. 2:2-4) Ku’ve ni mbhanzu muni? Jehova i lo hlamula mikhongelo yakwe a tlhela a rangela timhaka hi ndlela yo vuna a vanhu vakwe. (Neh. 2:5, 6) Handle ko kanakana, lezo zi tiyisile nguvu a kukholwa ka Nehemia!

13, 14. Zini hi faneleko ku maha kasi hi tiyisa kukholwa ka hina hi tlhela hi ala a mizamo yontlhe ya Satani ya ku lava ku hi mbheta ntamu?

¹³ A ku khongela hi nga tsiki khwatsi hi lezi Nehemia a nga maha, za hi vuna ku tiyisa a kukholwa ka hina. Satani a nga na wuxinji niku a kutala ka zikhati i hi pfotlosa ka xikhati lexi hi nga ni gome. Hi xikombiso, loku hi babya kutani ku ngha hi karateka maalakanyweni ni moyeni, hi nga ha sangula ku alakanya lezaku a xikhati lexi hi xi mbhetako wutirelini hweti ni hweti a xi vuni nchumu ka Nungungulu. Za koteka ku ngha a vo kari xikari ka hina na va karateka maalakanyweni yabye kuzilava hi kota ya lezi va zi hanyileko. Satani i lava lezaku hi kholwa ku a hi vuni nchumu. A kutala ka zikhati, Satani ilwa ni kutizwa ka hina, hi ku maha loko a daya kukholwa ka hina. Hambulezo, loku ‘hi ti khoma lezaku hi khongela,’ hi nga simama ku hlayisa kukholwa ka hina na ku tiyile. Hakunene ‘a xitlhangu xa kukholwa xi ta hi hlomisa kasi hi zi kota ku tima a zijulu zontlhe za nzilo za loyi wa kubiha.’ — Efe. 6:16.

¹⁴ Loku ‘hi ti khoma lezaku hi zi kota ku khongela,’ hi nga ta jumiwa hi ziringo zonake hi hluliwa hi minzhingo ya kukholwa leyi hi kumanako nayo na hi nga zi rinzelangi. A xikhati lexi hi kumanako ni ziringo ni minzhingo, ngha hi alakanya a xikombiso xa Nehemia, niku zalezo, hi tsutsumela ka Nungungulu hi mukhongelo. Ntsena hi ku vuniwa hi Jehova, hi kona hi to zi kota ku hlula a ziringo hi tlhela hi timisela minzhingo leyi yi lwako ni kukholwa ka hina.

KHONGELELA VANWANI

15. Hi zihi a ziwutiso lezi hi faneleko ku ti maha xungetano hi ku khongelela vanwani?

¹⁵ Jesu i lo khongela, a khongotela Nungungulu lezaku a kukholwa ka Pedro ku nga rereki. (Luka 22:32) Epafrasi, a muKristu wo tsumbeka wa zana ga malembe go sangula, i lo pimanyisa Jesu mhakeni leyi hi ku ti tsitsirita a khongelela vamakabye vakwe va le Kolosi. Paule i lo va tsalela aku: ‘Epafrasi wa mu khongelela xontlhe xikhati lezaku mu fela ku yima, muva lava va mbheleleko, na mu tiva hi kutiyileko a kuranza kontlhe ka Nungungulu.’ (Kol. 4:12) I chukwana hi ti wutisa lezi: ‘Xana nza ti tsitsirita nzi khongelela vamakabye va mina misaveni yontlhe? Makhati mangani nzi khongelelako a maKristu-kulori lawa ma welweko hi makhombo ya ntumbuluko? Ku’ve gihi a khati go gumesa legi nzi nga chulula a mbilu ya mina na nzi khongelela lava va rweleko a wutihlamuleli go binza hlengeletanweni ya Jehova ke? Xana nza ha hi ku khongelela a vokari lomu bandleni lava va lwisanako ni ziyimo zo nonoha?’

16. Xana zi na ni xigelo a kuva hi khongelela vanwani? Tlhamusela.

¹⁶ A mikhongelo ya hina ka Jehova Nungungulu leyi hi mahelako vanwani hakunene yi nga va vuna. (Gonza 2 Va Le Korinte 1:11.) Hambu lezi Jehova a nga kurumetekiko ku maha xokari hi lezi a malanza yakwe yo tala ma khongelelako a nchumu wo kari hi kuphindaphinda, yena wa ku wona a kukhatala loko va ku kombisako kota ntlawa zonake a chela kota hi kukarateka loko ko eta ku humako mbilwini a gumesa a hlamula a mikhongelo yabye. Hikwalaho, hi fanele ku chela nguvu kota ka lungelo ni wutihlamuleli ga hina ga ku khongelela vanwani. A ku fana na Epafrasi, hi fanele ku kombisa liranzo la hina lo eta ni ku karatekela vamakabye va hina va xinuna ni va xisati hi ku ti tsitsirita hi va khongelela. Loku hi maha lezo, hi ta engetela litsako la hina, hakuva “ku katekile ku nyika ku hunza ku nyikiwa.” — Miti. 20:35.

‘A KUHANYISWA KA HINA KU LE KUSUHI’

17, 18. Xana a ‘ku ti khoma lezaku hi zi kota ku khongela’ zi ta hi vunisa kuyini?

¹⁷ Xikhatanyana mahlweni ka ku wula lezaku “a wusiku gi hunzile, ni kuca ku tshinele,” Paule i lo tsala aku: “Ma zi tiva lezaku xikhati xa ku vuka wurongweni; hakuva inyamutlha lezi a kuhanyiswa ku le kusuhi na hina a ku hunza a xikhatini lexo hi nga sangula ku kholwa.” (Rom. 13:11, 12) A misava yiswa ya Nungungulu leyi yi tsumbisilweko yi laha kusuhani, ni lezaku a kuhanyiswa ka hina ku laha kusuhani nguvu a ku hunza lezi hi zi alakanyako. A hi faneli ku khudzehela hi tlhelo ga moya, niku hi nga tshuki hi tsika zilo za tiko zi hi gela xikhati xa hina xa kuva hi ti tshamela hoce na Jehova hi mukhongelo. Wutshanwini ga lezo, ‘a hi ti khomeni lezaku hi zi kota ku khongela.’ A ku maha lezo zi ta hi vuna ku tshama na hi khomekile ‘mahanyeleni yo basa ni mitirweni ya wukhozeli’ na hi kari hi rinzela a siku ga Jehova. (2 Ped. 3:11, 12) Hi ku maha loko, a mahanyela ya hina ma ta komba lezaku hi tshama na hi hanyanya hi tlhelo ga moya, ni lezaku hakunene ha kholwa a ku a kugumesa ka tiko legi ga kubiha ku kwalaha nyongeni. Hikwalaho, ngha hi ‘khongela hi nga tsiki.’ (1 Tes. 5:17) Ngha hi pimanyisa Jesu kambe, hi hlota xikhati xa ku ti tshamela hoce hi khongela. Loku hi mbheta xikhati xo leha laha hi ti mahelako mikhongelo ya hina wutsumbu ka Jehova, hi taya mahlweni hi tshinela nguvu ka yena. (Jak. 4:7, 8) Hi nga wona makatekwa lawo!

¹⁸ A Biblia gi ngalo: “Masikwini ya kuhanya kakwe nyameni, Jesu i lo khongela ni ku khongotela hi kurila ka hombe ni mihloti, ka loyi a nga zi kota ku mu hlanguta kufeni; yena i lo zwiwa hilezi a nga hi ni xichawo ka Nungungulu.” (Maheb. 5:7) Jesu i lo khongotela ni ku kombela ni ku simama na a tsumbekile ka Nungungulu kala magumo ya wutomi gakwe laha misaveni. Kota mbhanzu wa lezo, Jehova i lo hanyisa N’wana wakwe wo ranzeka hi kufeni a tlhela a mu chachazela hi wutomi ga kungafi le tilweni. Hinawu hi ngava vanhu vo tsumbeka ka Dadani wa hina wa le tilweni hambu loku ho kumana ni ziringo za tshamela muni xikhatini xi tako. Hakunene, ha zi kota ku kuma nchachazelo wa wutomi ga pinzukelwa  —  ntsena loku ‘hi ti khoma lezaku hi zi kota ku khongela.’