Kubayisa ka kufa

A kufa i mhaka yo bayisa. A vanhu vo tala a va zi ranzi ku wulawula hi yona. Kanilezi, hontlheni hi ta tshuka hi kumana nayo. Niku a kufa ku vanga kubayisa ka hombe nguvu.

A ku na nchumu wa ku wu nga hi maha hi tizwa na hi longile ku felwa hi mupswali, munghana wa wukati, kutani n’wana. A munhu a nga hafa hi xitshuketi kutani ku ranga hi ku babya hi xikhati xo leha. Kanilezi, na ku nga khataliseki a mafela ya kona, a kubayisa ku tiswako hi kufa a ku na ku potsiwa, niku ku neha zikarato zo tala.

Antonio, loyi a nga felwa hi papai wakwe ka mhango yi nga maheka laha ruweni, i ngalo: “Zi fana ni loku a munhu wo kari a khotsa a livati la yindlu ya wena, a famba ni tipfhungulo. A wu na ku nghena lomu ndlwini, hambu hi xikhatanyana. Wo sala u alakanyela ntsena. Hi xalexo a xiyimo xa wena ka lexi xikhati. Hambu loku u zama ku ala xiyimo lexo — kota lezi xi wonekako na xi nga tsakisi — a wu na ku maha nchumu.”

Laha Dorothy a nga felwa hi nuna wakwe, a sala a hi noni na a hi ni 47 wa malembe, i lo boha ku lavetela mihlamulo ya ziwutiso zo kari. Kota mugonzisi wa Escola Dominical, cima i wa nga tshukangi a alakanya lezaku loku munhu afa i fela magumo. Hambulezo, i wa nga hi na mihlamulo yo dlunyateka. I lo wutisa lezi ka paderi wakwe wa Anglicano: “Zini zi hi humelelako loku hifa?” Yena aku: “A nga kona a zi tivako. Hi ko ku rinzela hi ta wona hi zona.”

Xana hi konelwe ku ‘rinzela kala hi wona hi zona’? Xana ku na ni ndlela yinwani ya ku tiva lezaku loku munhu afa i fela magumo ke?