U WA ZI TIVA?

Zikhatini za kutsaliwa ka Biblia, zi wa wula yini a kuva munhu a hanzula tinguwo takwe hi kuziranza?

A MITSALO yi tlhamusela a ziyimo zo hlaya lezi a vanhu va nga hanzula tinguwo tabye. A ximaho lexo xi nga ha wonekisa ku khwatsi a xa ha tiveki ka vagonzi masikwini ya hina, hambulezo, xikari ka vaJuda xi wa hi xikombiso xa kutizwa ko kari ku vangiwako hi ku nga ha tivi xo maha, kubayiseka, ku poyileka, ku swireka, kutani hlomulo.

Hi xikombiso, Rubeni “i lo hanzula tinguwo takwe” laha a nga wona lezaku a kungo gakwe ga ku ponisa makabye wakwe Josefa gi wa nga ta ha tira hakuva Josefa va wa mu xavisile wukhumbini. A raru wabye Jakobe, “i lo hanzula tinguwo takwe” laha a nga alakanya lezaku Josefa i gilwe hi xivanza. (Gen. 37:18-35) Joba i lo “hanzula tinguwo takwe” a xikhati lexi a nga byeliwa lezaku a vana vakwe vontlhe va delwe. (Joba 1:18-20) A ntsumi wo kari wu lo woneka mahlweni ka Eli, a Mupristi wa Hombe, “a tinguwo takwe na ti hanzulelwe” kasi ku ya mu tivisa lezaku a vaIsraeli va hlulilwe yimpini, ku dawa vafana vambiri va Eli, ni lezaku a arke ga xivumelwano gi tekilwe. (1 Sam. 4:12-17) A xikhati lexi Josia a nga gonzelwa timhaka ta Nayo a tlhela a pola a zihoxo za vanhu vakwe, ‘i lo hanzula a tinguwo takwe.’ — 2 Tih. 22:8-13.

Laha Jesu a nga xuxisiwa, a Mupristi wa Hombe Kayafasi “i lo hanzula a tinguwo takwe” a xikhati lexi a ngazwa lezi yena a nga zi wona kota nzhukano. (Mat. 26:59-66) A nayo wa vaRabi wu wa laya lezaku ni wihi loyi a zwako a vito ga nungungulu na gi rukatelwa i fanele ku hanzula tinguwo takwe. Hambulezo, a mawonela manwani ya vaRabi ya nzhako ka kuloviswa ka tempeli ya Jerusalema ma wa wula lezaku “loyi a zwako a Vito ga Nungungulu na gi rukatelwa masikwini ya hina a nga faneli ku hanzula tinguwo takwe hakuva ti wa ta maha micangala.”

Kunene, a ku hanzula a tinguwo zi wa nga hi na lisima mahlweni ka Nungungulu ahandle ka loku a kubayiseka loko ku huma mbilwini. Hikwalaho, Jehova i lo byela vanhu vakwe lezaku va ‘hanzula a timbilu tabye, na ku nga hi tinguwo tabye, va wuya ka yena.’ — Joe. 2:13.