Ku tatiseka zitsongwani, ku tsanzeka zotala

Xana wa tsakela ku tiva a wumanziko ga wena? Lowo i nchumu wu laviwako nguvu. Ku na ni vanhu vo tala va wulako zamanziko, kanilezi ko tatiseka zokari, a zinwani a zi tatiseki. Wona lezi zi lanzelako:

• A TITLHARI TA SIENSIA ti tirisa michini yo tlakuka nguvu ni timali to tala kasi ku wula lezi zi to humelela ka zilo zo hambanahambana, zo kota lezi a kuchakiswa ka misava ku to yi khumbisa zona niku xana ku tana vula manziko ke.

• A VAKAMBISISI VA ZILO va komba kucica ku tova kona ka mabhinzu ni ka politika. Warren Buffett, a nga munwe wa vanhu va ganyileko nguvu misaveni, i vitaniwa lezaku muprofeti hi kota ya lezi zi tolovelako ku maheka lezi a wulako xungetano hi mabhinzu. A mukambisisi munwani, Nate Silver, i hlola mahungu ya lezi zi humelelako kasi ku tiva zontlhe lezi zi to humelela xikhatini xi tako kusukela ka politika ya Estados Unidos kala ka tipremio ta mafilimu ya Hollywood.

• A MAHUNGU YA KALE ma tolovela ku woniwa kota ziprofeto. A vanhu vo kari va wona zilo zi tatisekako masikwini ya hina zi tsalilweko hi Michel de Notredame (Nostradamus) ka zana ga malembe ga wu 16. A kalendari ga vaMaia, gi mbhelileko hi 21 ka Dezembro wa 2012, gi wa woniwa hi vokari kota xikombiso xa makhombo ya hombe.

• A VARANGELI VA WUKHONGELI va tshuka va wulawula hi makhombo ya misava yontlhe kasi ku ti kokela makholwa. Harold Camping, muprofeti wa siku ga makhombo, zinwe ni vapizani vakwe va wa huwelela lezaku a misava yi wa ta loviswa hi 2011. A wa ha rinzeli ku byeliwa, a misava hi yaleyi u yi wonako.

• A VANGOMA va ti wula lezaku va na ni ntamu wo hlawulela wa ku tiva zamanziko. Edgar Cayce na Jeane Dixon va wulile zilo zo kari zi nga tatiseka xungetano hi zimaho zo kari za zana ga malembe ga wu 20. Hambulezo, munwe ni munwani wabye i wulile zotala zi nga kala ku tatiseka. Hi xikombiso, Dixon i wa wulile lezaku hi 1958 ku wa ta sangula Yimpi ya Wunharu ya Misava. Cayce i wa wulile lezaku a doropa ga Nova York gi wa ta wela bimbini xikari ka va 1970.

Xana ku na ni ndlela yo tsumbeka ya ku tiva zamanziko? Lexi xiwutiso xa lisima hakuva a ku tiva zilo za ha tako, zi nga khumba a wutomi ga wena ni ziboho za wena.