ZIWUTISO ZA VAGONZI

Xana a ku hisa zirumbi za amukeleka ka maKristu?

A ku na wutshamu lomu ka Biblia laha a Mitsalo yi alako a mukhuwo wa ku hisa zirumbi.

Lomu ka Biblia ku na ni mahungu ma wulawulako hi kuhisiwa ka zirumbi kutani marambu ya vanhu va fileko. (Jox. 7:25; 2 Kro. 34:4, 5) Lezo zi nga ha wonekisa ku khwatsi a vanhu lavo va wo kala va nga ringanelwi hi ku lahliwa hi malahlela ma nene. Kanilezi a hi makhati wontlhe lawa ku nga hisiwa zirumbi zi nga wula lezaku a vanhu lavo a va ringanelwi hi ku lahliwa.

Lezi hi nga zi wona ka matimu ya kufa ka Hosi Saule ni vana vakwe va vanharu. Hi wumune gabye va file yimpini, na valwa ni vaFilistia. A munwe wa vana lavo ku wa hi Jonatani, a munghana ni museketeli wo tsumbeka wa Davida. Loku a tinhenha ta vaIsraeli ti nga hanya le Jebexe-Gileade ti tivile lezi zi nga humelela ti lo teka a zirumbi lezo za mune ti zi hisa, ti guma ti kelela marambu ya kona. Davida i lo dzunza a vaIsraeli lavo hi lezi va nga zi maha. — 1 Sam. 31:2, 8-13; 2 Sam. 2:4-6.

A Mitsalo yi tsumbisa lezaku lava va fileko va ta vuka — ku nga lezaku Nungungulu i ta va wuyisa wutomini. Kani a munhu a fileko wa hisiwa kani a nga hisiwi, Jehova a nga tsanzekiswi hi nchumu a ku tlhelisela munhu loye wutomini na a hi ni miri wuswa. A vaHeberu lava va vanharu va nga lava ku dawa lomu nzilweni hi kulaya ka Hosi Nebukadnezzare a va zangi va chavile a ku Nungungulu i ta tsanzeka ku va vuxa loku vaswa. (Dan. 3:16-18) A malanza yo tsumbeka ya Jehova lawa ma nga dawa ma tlhela ma hisiwa masinwini ya vaNazi, wonawu ma wa nga chavi. Ku na ni malanza yo tala yo tsumbeka ya Nungungulu ma fako hi kubuwuka ka zilo kutani hi tindlela tinwani ti kalako ti nga siyi ni xiheru xinwe xa miri wabye. Hambulezo, a zi kanakanisi lezaku va ta vuxiwa. — Kuv. 20:13.

Jehova a nga na xilaveko xa ku hlengeleta a ziro za miri wa kale wa munhu kasi ku mu vuxa. Lezo za woneka ka kuvuxiwa ka maKristu ma totilweko kasi ma ya hanya tilweni. A ku fana na Jesu, loyi a nga “hanyiswa hi ka moya,” a maKristu ma totilweko ma vuxiwa kota munhu yaloyi wa munwe kanilezi ni miri wa moya. A ku na xipanze ni xinwe xa miri wabye wa kale wa nyama xi fambako navo le tilweni. — 1 Ped. 3:18; 1 Kor. 15:42-53; 1 Joh. 3:2.

A kutsumba ka hina ka ku vuxiwa hi ka vafileko a ku khegeli ka lezi zi mahiwako hi xirumbi xa hina, kanilezi ka kukholwa lezaku Nungungulu i na ni ntamu niku wa zi lava ku tatisa zitsumbiso zakwe. (Miti. 24:15) Hakunene, a hi nge zi zwisisi khwatsi lezi Nungungulu a mahisileko zona a xihlamaliso xa ku vuxa vafileko masikwini ma hunzileko kutani lezi a to mahisa zona xikhatini xi tako. Hambulezo, ha mu tsumba Jehova. I tiyisile a “xitsumbiso” xakwe hi ku vuxa Jesu. — Miti. 17:31; Luka 24:2, 3.

A maKristu ma fanele ku alakanyela a mahanyela, kutizwa ka vanhu va lomu xipanzeni, ni lezi zi yimisilweko xungetano hi kulahla vafileko. (2 Kor. 6:3, 4) Hikwalaho, a ku hisa kutani ku nga hisi a xirumbi xa munhu a fileko zi le ka munhu wutsumbu kutani xiboho xa ngango.