‘Basisa a ndlela ya mikonzo ya wena’ kasi u kula hi tlhelo ga moya

A XIKHATI lexi a vanhu va Nungungulu va nga huma le Babuloni hi 537 Mahlweni ka Nguva ya Hina, Jehova i lo khatalela a ndlela yabye ya kuya Jerusalema. I lo va byela lezi: ‘Lulamisani a ndlela ya tiko! Bhoxani ndlela, ecanyetani a gonzo, susani maribye.’ (Isa. 62:10) Hi nga alakanyela a vaJuda na va kari va maha ntiro lowo. Kuzilava lava va nga hi mahlweni va wa bhoxa a ndlela, va bambatela a zikhele ni ku susa zibho. A ku maha lezo zi wa ta vuna vamakabye vabye lava va ngata hi nzhako kabye na vaya tikweni gabye ga mabeleko.

Hi nga ha wona a xikombiso lexi kota mufananiso wa ndlela yi hi yisako ka mixuvo ya moya. Jehova i lava lezaku a malanza yakwe wontlhe ma famba ndleleni leyo na ma nga kumani ni zibho zi nga lavekiko. A Mhaka yakwe ya hi luleka yiku: “Lulametani a tindlela ta mikonzo ya nwina, lezaku lexi xi khwitako xi nga khuyuki.” (Maheb. 12:13) Kani u muswa kani u munhu wa hombana, u nga kuma wutlhari ka wusungukati legi.

LONGISELA NDLELA HI KU MAHA ZIBOHO ZA ZI NENE

Kuzilava wa tshuka uzwa vanhu na va wula lezi hi muswa wo kari: ‘Manyani i katekile’ kutani, ‘I ta humelela wutomini.’ A kutala ka zikhati, a vaswa va na ni lihanyo li nene, va hatlisa ku zwisisa, niku va xuva ku humelela wutomini. A Biblia gi wula hi kona giku: “A wudzunzo ga majaha hi ntamu wabye.” (Mav. 20:29) A muswa a tirisako ntamu wakwe ni wutlhari gakwe kasi ku tirela Jehova a nga tatisa mixuvo ya moya a tlhela a kuma litsako la lisine.

Kanilezi, kota lezi u zi tivako, a tiko gi nyika nguvu lisima a wutlhari legi a vaswa va hina va nga nago. Loku a Mboni yo kari ya ha hiko muswa yi tiva nguvu xikoleni, a mugonzisi wo kari kutani xigonzani-kulobye va nga ha mu kucetela ku nghenela a tigonzo to tlakuka kota ndlela ya ku humelela tikweni legi. Kutani a makabye wo kari a ha hiko muswa, loyi a nga ni ntamu wa ku tsutsuma kutani wutlhari ga ku bela, a nga ha kucetelwa ku nghenela ntiro wa kutsutsuma kutani kubela. Xana u tshuka uva ka xiyimo lexo, kutani wa tiva wokari a kumanako ni tshikelelo lowo? Xini xi to vuna a muKristu lezaku a maha xiboho xa wutlhari?

A tigonzo ta Biblia ti nga hi vuna ku famba ndleleni ya yi nene nguvu ka tontlhe wutomini. Mutshawuteli 12:1 i ngalo: “Alakanya Muvangi wa wena masikwini ya wuswa ga wena.” Xana wena kutani muswa u mu tivako mu nga alakanyisa kuyini a ‘Muvangi wa nwina’ ke?

Ehleketa hi lezi zi nga humelela Ernestoa le mupela-gambo wa Afrika. I wa ranza ku bela bhola. A xikhati a nga tlhanganyisa 15 wa malembe, Ernesto i lo hlawuliwa kasi ku bela ka ntlawa wa hombe wa tiko gakwe. Lezo zi wa komba lezaku nzeni ka xikhatanyana, a nga ha rumelwa Europa kasi ku ya kuma gonziselelo yo engeteleka, laha kuzilava a nga ta suka na a hi mubeli wa hombe wa bhola. Makunu, a wusungukati ga ku ‘alakanya Muvangi wakwe’ gi wa ta nghena hi kwihi ke? Niku xini lexi wena kutani munghana wa wena a ha hiko muswa mu nga xi gonzako ka xikombiso lexi?

Na a ha gonza xikola, Ernesto i lo sangula ku gonza a Biblia ni Timboni ta Jehova. I lo tiva lezaku a Muvangi wakwe i ta mbheta a zikarato za vanhu kala kupinzuka. Ernesto i lo zwisisa a lisima la ku tirisa a xikhati ni ntamu wakwe kasi ku maha kuranza ka Nungungulu. Hikwalaho, i lo boha ku tsika ku lanzela a ntiro wa kubela. Wutshanwini ga lezo, i lo bapatizwa a tlhela a hiseka hi tlhelo ga moya. Hi kufamba ka xikhati, i lova nanza ga wutireli niku anzhako ka lezo i lo rambiwa lezaku aya ka Xikola xa Biblia xa Vamakabye va Magwenza.

Loku i wa no lanzela a ntiro wa ku bela bhola, Ernesto na a kumile nduma ni titshomba. Kanilezi i lo wona a lisine la tshinya legi ga nayo ga Biblia: “A wukosi ga munhu a fumileko hi khokhola gakwe; kualakanyeni kakwe i khurisi gi tlakukileko.” (Mav. 18:11) Kunene, a munhu a nga ha alakanya lezaku a titshomba ta mu vikela, kanilezi o ti khohlisa. Tlhatakumbiri, lava va hlongoliselako titshomba a kutala ka zikhati ‘va ti phoroketa hi kuxaniseka kunyingi.’ — 1 Tim. 6:9, 10.

Lexi xi tsakisako hi lezaku a vaswa vo tala va kuma litsako ni kutshamiseka ka lisine hi ku nghenela a ntiro wa xikhati xontlhe. Ernesto i ngalo: “Nzi nghenile ka ‘ntlawa’ wa hombe wa malanza ya Jehova ya xikhati xontlhe. Lowu hi wona a ntlawa wa wu nene ka yontlhe, niku nzi bonga Jehova hi ku nzi komba a ndlela yinwe leyi yi yisako kutsakeni ni kuhumeleleni ka lisine wutomini.”

Wena ke? Wutshanwini ga ku lanzela a mixuvo ya tiko, a hi chukwana u tiyisa a “tindlela ta mikonzo ya wena” mahlweni ka Jehova hi ku nghenela a ntiro wa wuphayona ke? — Wona a kwadru “Nzi kuma makatekwa ma nga hava le universidade.”

SUSA ZIBHO NDLELENI YA WENA

Laha va nga enzela a hofisa ya ravi ya le Estados Unidos, a patswa wo kari wu lo wona litsako leli a ziro za Beteli zi nga hi nalo hi ku tirela Jehova. Loku va tlhelile, a makabye wa xisati i lo tsala lezi: “Hi wa nga karateki hi nchumu wutomini ga hina.” A patswa lowo wu lo boha ku tirisa xikhati ni ntamu wabye ka malungelo ya hombe ya ntiro.

Ka xikhati xo kari, zi wa wonekisa ku khwatsi a patswa lowu wu wa nga ta zi kota ku olovisa a wutomi ga wona. Kanilezi ka siku go kari, va lo ehleketisisa hi Mutsalo wa siku lego. Wu wa seketelwe ka Johani 8:31, laha hi gonzako magezu lawa ya Jesu: “Loku mu simamisa kugonziseni ka mina, zonake mu vapizani va mina hakunene.” Va lo ti byela lezi: “Ni xihi hi to xi maha kasi ku olovisa wutomi hi nga ta tshuka hi ti laya hi xona.” Va lo xavisa muti wabye wa hombe, va ti hungulela minzhwalo yinwani, zonake va rura vaya ka bandla gi nga hi ni xilaveko. Zalezi maphayona, kanilezi va vunetela kambe kuakeni ka tiSalawu ta Mufumo va tlhela va ti nyiketela ku maha mitiro migotsovanyanweni. Va ti zwisa kuyini? Ve ngalo: “Za hlamalisa a ku wona litsako hi li kumako hi ku hanya wutomi go olova, ku nga zalezi a hlengeletano ya Jehova yi hi kucako ku maha.”

SIMAMA NDLELENI YA KU KULA HI TLHELO GA MOYA

Solomoni i tsalile lezi: “A mahlo ya wena ngha ma cuwuka hi kutshonometa, ni tisiyi ta wena ti kongoma mahlweni ka wena.” (Mav. 4:25) A ku fana ni mufambisi wa mova a cuwukako lomu a yako kona, hi fanele ku potsa a zilo zi nga wa ta hi colopetela ku ti vekela mixuvo ya moya ni ku yi tatisa.

1. Timboni ta Jehova ti tirisako a wuswa gabye kasi ku tatisa mixuvo ya moya; 2. Ndlela yi tlhumisilweko hi zilo zo tala

Mixuvo muni ya moya leyi u nga ti vekelako u tlhela u yi tatisa ke? A ku nghenela ntiro wa xikhati xontlhe xinwe xa zilo za zi nene lezi u nga zi patsako ka mixuvo ya wena. A xinwani ku ngava ku tira ka bandla ga laha kusuhani gi nga ni xilaveko xa vahuweleli va buvileko kasi ku va vuna ku eneta a xipanze xabye xa hombe. Kutani ku ngava ni bandla gi nga ni vahuweleli vo buva, kanilezi na gi nga hi na madota ni malanza ya wutireli yo enela. Xana u nga vunetela ka xinwe xa zilaveko lezo? Hikuyini u nga bhuliko ni muwoneleli wa xipanze kasi u tiva lezaku u nga vunetela lomu ku nga ni xilaveko ke? Loku u tsakela ku ya tirela kule, u nga kombela mahungu xungetano hi mabandla ya le kule ma nga ni xilaveko.b

A hi tlheleni ka lezi zi tlhamuselwako ka Isaya 62:10. Kuzilava a vaJuda vo kari va wa kulula va nwatseka kasi ku bambatela ni ku basisa ndlela ya kuya tikweni gabye ga mabeleko kasi a vanhu va Nungungulu va chikela lomu va ngaya kona. Loku ku hi lezaku u kulula u nwatseka kasi ku tatisa mixuvo yo kari ntirweni wo basa, u nga tsukuli. Hi ku vuniwa hi Nungungulu, u nga zi kota ku tatisa mixuvo leyo. Simama ku kombela wutlhari ka Jehova a xikhati lexi u lwako ni ku susa zibho ndleleni ya wena. Hi xikhati xi faneleko, kuzilava u ta zi wona lezi a to ku vunisa zona ku ‘basisa a ndlela ya mikonzo ya wena.’ — Maheb. 12:13.

a A vito gi cicilwe.

b Wona Organizados para fazer a Vontade de Jeová, maphajina 111-112.

Nzi kuma makatekwa ma nga hava le universidade

A XIKHATI lexi Flavia a nga ha hi nwanana, a kokwani wakwe, loyi a nga hi Mboni ya Jehova i lo mu bhulela mahungu ya Biblia. Hambulezo, a papai wakwe i wa hi mugonzisi, niku i wa zama ku mu maha a tsakela ku gonza a ntumbuluko ni lezaku ava ni gonziselelo yo tlakuka. A vanwani va wa mu byela lezi: “Nwina mu nga ponisa a misava leyi lezaku yi nga lovi.” Hi ku vuniwa hi papai wakwe, i lo gonza ka universidade ya nduma, laha a nga sangula ku hlota tindlela ta ku maha mafura ya mova lawa ma nga chakisiko misava.

Zalezo Flavia i lo wona lezaku a zigonzani zo tala zi wa nga khatali hi ku lava ‘ponisa misava.’ Ahandle ka lezo, a milongoloko yo kari le universidade yi wa hi ya mabhinzu ya timali, hikwalaho a zigonzani zi wa byekelela ku hlawula mabhinzu lawo. Lezo zi wa mu karata Flavia. A siku a nga enzelwa hi Timboni ta Jehova, a kutsakela kakwe ka lezi a Biblia gi wulako xungetano hi Nungungulu ni wumanziko ku lo vuka.

Flavia i lo vumela a lisine la Biblia niku i lo bapatizwa. Kanilezi kota lezi a nga hi ka tigonzo to tlakuka, a xikhati xakwe xa ku xumayela a mahungu yo saseka xi wa hi xitsongwani. A siku go kari i lozwa muwoneleli wa xipanze na a tlhamusela Jakobe 4:17: “Loyi a tivako ku maha zinene, a nga zi mahi, i na ni xionho.” Lezo zi lo kuca Flavia lezaku a alakanyisisa hi xiyimo xakwe. I ngalo: “Nzi wa lava makatekwa ya Jehova, kanilezi nzi wa lava litsako kambe ntirweni wa mina. Nzi wa fanele ku hlawula.”

Flavia i lo boha ku tsika a universidade. Xana i ti layile hi lezo? I ngalo:

“A ku tirela Jehova zi nzi nehele makatekwa ya ku nzi wa nga ta ma kuma le universidade. Jehova i nzi mahela za zi nene nguvu. I nzi gonzisile wunene, a nzi gonzisa liranzo, ni ku vuna vanwani hi tlhelo ga moya. Nzi na ni wukati go tsakisa nguvu ni wumanziko ga gi nene nguvu ku hunza legi gi tsumbiswako hi siensia. Hi Jehova yece a to zi kota ku ponisa misava leyi. Nzi nga ta tshuka nzi mu fularela.” Flavia ni nuna wakwe va tira le tsinza wa Timboni ta Jehova, a Nova York.