Vaswa, simamani ku kula hi tlhelo ga moya andzhako ka ku bhabhatiswa

1. Zvilo muni zva zvi nene lezvi a vaswa va sinako va zvi mahile?

LEMBE ni lembe, ku bhabhatisiwa a makume ya mazana ya vaswa va maKristu. Wenawu u muswa a bhabhatisilweko ke? Loku zvi hi lezvo, a vamakabye va wena bandleni va tsaka hi wena niku Jehovha yenawu wa tsaka! (Mav. 27:11) Hi nga ehleketa hi zvilo zvo tala zva zvinene lezvi u sinako u zvi mahile. U gondzile Bhibhiliya hi kutikarata, kuzvilava hi malembe yo tala. Lezvi u nga gondza zvi ku kholwisile lezvaku a Bhibhiliya i Mhaka ya Nungungulu. A ku tsika lezvo, u tivile a Mutumbuluxi wa Bhibhiliya u tlhela u mu randza. A lirandzo la wena ha Jehovha li no kula nguvhu laha ka kuza u ti nyikela kakwe, u bhabhatiswa kota nandza gakwe. Hi nga wona a ku saseka ka lezvo!

2. Zvini hi to bhula hi zvona ka ndzima leyi?

² Handle ko kanakana a kukholwa ka wena ku ringilwe hi tindlela to tala laha u nga kari uba mazambo kasi u ringanelwa hi ku bhabhatiswa. Kanilezvi laha u yako u kula, u ta kumana ni zviringo zva zviswa. Sathani i ta zama ku ku tsikisa ku randza Jehovha ni ku mu tirela. (Efe. 4:14) U nga zvi vhumeleli. Cini ci to ku vhuna a ku simama u tsumbeka ka Jehovha ni ku tatisa a citsumbiso ca wena ca ku mu tirela? Simama ku kula hi tlhelo ga moya, u ti ‘karatela kuya phambeni’ kasi uva muKristu wo buvha. (Mah. 6:1) Kanilezvi, u nga zvi mahisa kuyini?

ZVINI U NGA MAHAKO KASI UVA MUKRISTU WO BUVHA?

3. Zvini lezvi a maKristu wontlhe ma faneleko ku maha andzhako ka ku bhabhatiswa?

³ Andzhako ka ku bhabhatiswa, hontlheni hi fanele ku landzela a wusungukati legi mupostoli Pawule a nyikileko a maKristu-kulobye ya le Efesusi. I ma kucile lezvaku mava maKristu yo “buvha”. (Efe. 4:13) Hi mawulela man’wani, va wa fanele ku ‘simama va kula hi tlhelo ga moya’. Lezvi Pawule a nga wula a cikhati leci a nga fananisa a kukula hi tlhelo ga moya ni kukula ka n’wanana hi tlhelo ga miri zva zwisiseka. A vapswali va ci randza nguvhu a cin’wanana cabye ca ha hi ku pswaliwako va tlhela va tizwa matshandza hi cona. Kanilezvi a ci faneli ku tshama laha ka wun’wanana basi. Hi kufamba ka cikhati, ci fanele ku ‘tsika mitiro ya wun’wanana’. (1 Kor. 13:11) Lezvo zva fanana na hinawu maKristu. Andzhako ka ku bhabhatiswa, hi fanele ku simama hi kula hi tlhelo ga moya. A hi woneni a mawonela yo kari ma to hi vhuna ku maha lezvo.

4. I tshamela muni gi nga ku vhunako ku simama u kula hi tlhelo ga moya? Tlhamusela. (Va Le Filipi 1:9)

⁴ Engetela ku mu randza nguvhu Jehovha. U sina u mu randza nguvhu Jehovha. Kanilezvi a lirandzo la wena hi yena li nga engetela ku kula. Hi ndlela muni? Mupostoli Pawule i kombile a yin’we ya tindlela, kota lezvi zvi tsalilweko ka Va Le Filipi 1:9. (Lera.) Pawule i khongelele lezvaku a lirandzo la va le Filipi “li simama ku andza”. Hikwalaho, hi fanele ku engetela a lirandzo la hina hi Jehovha. Hi nga maha lezvo hi ku engetela a ‘kutiva ka hina ni kupimisisa kontlhe’. Laha hi yako hi mu tiva khwatsi Jehovha, hi mu randza nguvhu hi tlhela hi randza matshamela yakwe ni ndlela leyi a mahako hi yona zvilo. Hiya hi zvi lava nguvhu a ku mu tsakisa ni ku nga tshuki hi maha zvilo lezvi zvi nga wa ta mu kwatisa. Hi ti karatela ku tiva kurandza kakwe ni lezvi hi nga ku mahisako zvona.

5-6. Cini ci nga hi vhunako a ku kulisa a lirandzo la hina hi Jehovha? Tlhamusela.

⁵ Hi nga kulisa a lirandzo la hina hi Jehovha hi ku mu tiva khwatsi a N’wana wakwe, loyi a kombisako hi kumbhelela a matshamela ya Papayi wakwe. (Mah. 1:3) A ndlela ya yinene ya ku tiva Jesu ku gondza a mune wa tiIvhangeli. Loku ku hi lezvaku a wu na tolovelo wa ku lera a Bhibhiliya siku ni siku, hikuyini u nga sanguliko zvezvi? Laha u lerako a matimu ya Jesu yisa nguvhu kupima ka matshamela yakwe. I wa hi munhu wa ku tshineleleka; hi lirandzo i no angarela vanana mawokweni yakwe. (Mar. 10:13-16) I wa maha vapizani vakwe va tlhatlheka; va wa nga chavi ku mu byela lezvi va nga ti zwisisa zvona. (Mat. 16:22) Ka mhaka leyi, Jesu i pimanyisile a Papayi wakwe wa le tilweni. Jehovha yenawu wa tshineleleka nguvhu. Hi nga tshinela kakwe hi mukhongelo. Laha hi khongelako hi nga chulula a mbilu ya hina ka yena na hi tsumba lezvaku a nga ta hi lamula. Wa hi randza niku wa hi khatalela.— 1 Ped. 5:7.

⁶ Jesu i wa va zwela wusiwana a vanhu. Mupostoli Matewu i tsalile lezvi: “Laha a nga wona citshungu, i no ci zwela wusiwana hakuva va wa xaniseka ni ku pepetseka a ku khwatsi tiyivhu to kala murisi.” (Mat. 9:36) Jehovha ke i ti zwisa kuyini? Jesu i te: “Papayi wa mina a nga le tilweni, a nga zvi lavi lezvaku ku lova ni mun’we wa lava vatsongwani.” (Mat. 18:14) A mhaka leyi ya khumba nguvhu! Laha hi yako hi mu tiva khwatsi Jesu, a lirandzo la hina hi Jehovha lo kula.

7. A ku tolovelana ni maKristu yo buvha zvi nga ku vhunisa kuyini?

⁷ A ndlela yin’wani ya ku yi nga ku vhuna a ku engetela kuva munhu wa lirandzo ni ku kula kota muKristu ku tolovelana ni vamakabye vo buvha va bandla ga wena. Wona lezvi va tsakisako zvona. A va ti layi ne ni kutsongwani hi lezvi va hlawulileko ku tirela Jehovha. Va kombele va ku hlawutela a matshango yo kari va vileko nawo ntirweni wa Jehovha. Loku u lava ku maha ciboho ca lisima, va kombele wusungukati hakuva “loku masungukati ma tele a kupona ku kona”. — Mav. 11:14.

8. Zvini u nga mahako loku u tshuka uva ni kukanakana xungetano hi lezvi a Bhibhiliya gi gondzisako?

⁸ Daya a kukanakana. Kota lezvi zvi kumbukilweko ka paragrafo 2, Sathani i ta zama ku ku tsandzekisa ku u simama u kula hi tlhelo ga moya. A yin’we ya tindlela a nga ti tirisako ku vhuxa kukanakana hlokweni ya wena xungetano hi tigondzo to kari ta Bhibhiliya. Hi cikombiso, u ta tshuka u gondzisiwa a gondzo leyi yi rukako Nungungulu ya ku a zvilo zvi no ti tumbulukela ha zvoce. Kuzvilava a cikhati leci u nga ha hi n’wanana u wa nga cheli nguvhu kota hi mhaka leyi, kanilezvi lezvi makunu u nga tlhamukwana kuzvilava wa sangula ku gondzisiwa a mhaka leyi cikoleni. Lezvi a vagondzi va wena va wulako kasi ku seketela a gondzo leyo ya ku a zvilo zvi no ti tumbulukela ha zvoce zvi nga wonekisa ku khwatsi zva zwala ni ku hi zvona. Hambulezvo, a vagondzisi va wena kuzvilava a va se tshuka va ehleketisisa khwatsi hi zvikombiso zva lezvaku ku na ni Muvangi. Alakanya a tshinya ga nayo legi gi kumekako ka Mavingu 18:17: ‘Loyi a rangako a hlamula hubyeni, ko khwatsi i lulamile; kanilezvi a mun’wani wata a ta mu ringa.’ Wutshan’wini ga ku khube u vhumela lezvaku lezvi u zvi zwako cikoleni lisine, hlola khwatsi a lisine li kumekako ka Mhaka ya Nungungulu, a Bhibhiliya. Kambisisa lomu ka mabhuku ya hina. Bhula ni vamakabye lava a kale va nga kholwa lezvaku a zvilo zvi no ti tumbulukela ha zvoce. Va wutise ku cini ci va kholwisileko lezvaku ku na ni Muvangi, loyi a hi randzako. A mabhulo lawo ma akako ma nga ku vhuna ku wona lezvaku hakunene ku na ni Muvangi.

9. Zvini u gondzako ka tshango ga Melissa?

⁹ A makabye wo kari wa ku hi Melissa i vhunekile nguvhu hi kuva a kambisisile a mhaka leyi yi wulawulako hi ku vanga.b I ngalo: “Le cikoleni, a evholusawu yi gondzisiwa hi ndlela ya ku u kholwa. Kusanguleni, ndzi wa nga lavi a ku hlola a kukanakana ka mina hakuva ndzi wa chava a ku pola lezvaku a gondzo ya evholusawu lisine. Kanilezvi ndzi no ehleketa lezvaku Jehovha a nga lavi lezvaku hi mu tirela lomu wukhun’wini. Hikwalaho, ndzi no hlola a kukanakana ka mina. Ndzi no lera a bhuku legi ga ku Existe um Criador Que Se Importa com Você? ndzi tlhela ndzi lera a broxura legi ga ku A Vida — Teve um Criador? ni legi ga ku A Origem da Vida — Cinco Perguntas Que Merecem Resposta. Hi zvalezvo futsi ndzi nga zvi lava. Mayo wako loku ndzi wa no hatlisa ku zvi maha.”

10-11. Zvini zvi nga ku vhuna ku simama ni mahanyela ma basileko? (1 Va Le Tesalonika 4:3, 4)

¹⁰ Ala a mahanyela ya hava. Tangeni ya ku sangula ku ti tshotshota a kunavela ka masango ku ngava ka hombe nguvhu niku kuzvilava u nga kucetelwa nguvhu a ku maha wubhayi. Sathani i lava ku u vhumela a kuxuva ka wena. Zvini zvi nga ku vhunako ku u simama ni mahanyela ma basileko? (Lera 1 Va Le Tesalonika 4:3, 4.) Ka mikhongelo ya wena, byela Jehovha lezvi hakunene u ti zwisako zvona u tlhela u mu kombela lezvaku a ku tiyisa. (Mat. 6:13) Alakanya lezvaku Jehovha i lava ku ku vhuna na ku nga hi ku ku tsayisa. (Lis. 103:13, 14) A Mhaka ya Nungungulu kambe yi nga ku vhuna. Melissa, loyi hi mu kumbukileko, i walwa ni maalakanyo ma nga hlazvekangiko. I te: “A ku lera Bhibhiliya siku ni siku zvi ndzi vhunile ku ndzi nga rereki. Zvi ndzi alakanyisile ku ndzi lumba Jehovha niku ndza mu lava wutomi ga mina.” — Lis. 119:9.

¹¹ U nga zami ku lwisana wece ni zvikarato zva wena. Bhula ni vapswali va wena hi zvikarato zva wena. Lisine lezvaku a zvi olovi ku maha lezvo kanilezvi a ku maha lezvo zva lisima. Melissa i te: “Ndzi no khongela ndzi kombela kutiya-hlanha ndzi gumesa ndzi bhula na papayi hi cikarato ca mina. Andzhako ka lezvo ndzi nozwa kupepa ka hombe. Ndzi wa zvi tiva ku Jehovha i wa tizwa matshandza hi mina.”

12. U nga zvi mahisa kuyini a zviboho zva zvinene?

¹² Rangelwa hi matshinya ya milayo ya Bhibhiliya. Hi kutsongwani-kutsongwani u taya u kuma kutlhatlheka ko engeteleka ka ku ti mahela zviboho zva wena wutsumbu. Kanilezvi ka ha ta simama kuva ni zvotala u nga zvi tiviko. U nga potsisa kuyini a ku maha zvihoxo lezvi zvi nga khumbako a wunghana ga wena na Jehovha? (Mav. 22:3) A makabye wo kari wa ku hi Carla i tlhamusele lezvi zvi mu vhunako a ku maha zviboho zva zvinene. I polile lezvaku a maKristu yo buvha a mazi ma lava nayo wa ku ma rangela ka zviyimo zvontlhe wutomini. I te: “Ndzi fanele ku zwisisa matshinya ya milayo ya Bhibhiliya wutshan’wini ga milayo basi.” A cikhati leci u lerako Bhibhiliya ti wutise lezvi: ‘Zvini lezvi a mahungu lawa ma ndzi byelako xungetano hi maalakanyo ya Jehovha? Ka mahungu lawa ku na ni tshinya ga nayo ndzi nga gi tirisako kasi gi ndzi vhuna ku maha zvazvinene? Loku ku hi ku gi kona, ndzi ta vhunekisa kuyini hi ku gi tirisa?’ (Lis. 19:7; Isa. 48:17, 18) Loku u lera Bhibhiliya ni ku ehleketa hi matshinya ya milayo ya gona zvi ta ku vevukela ku maha zviboho zvi tsakisako Jehovha. Laha u yako u kula u ta zvi zwisa lezvaku a ku laveki nayo wa ku ku rangela ka zviyimo zvontlhe hakuva u ta zwisisa maalakanyo ya Jehovha.

13. A vanghana va vanene va nga ku vhunisa kuyini? (Mavingu 13:20)

¹³ Hlawula vanghana va randzako Jehovha. Kota lezvi zvi kumbukilweko, a vanghana lava u va hlawulako va nga khumba nguvhu a ku kula ka wena hi tlhelo ga moya. (Lera Mavingu 13:20.) A makabye wo kari wa ku hi Sara i wa kari a mbhelelwa hi litsako. Andzhako ka lezvo ku no humelela nchumu wu nga mu vhuna ku a tlhela ava ni litsako la hombe. Sara i wulile lezvi: “Ndzi kumile vanghana va vanene hi cikhati ci nene. Ndzi wa vhuxeta a cigondzo ca Murindzeli vhiki ni vhiki ni makabye wo kari. A mun’wani munghana wa mina i ndzi vhunile ku ndzi sangula ku hlamula mitlhanganweni. Hi kota ya lezvi a vanghana va mina va ndzi vhunileko, ndzi no sangula kuva ni cigondzo ca mina wutsumbu ndzi tlhela ndzi khongela nguvhu. Ndzi no sangula ku hlakulela wunghana go tiya na Jehovha, ndzi sangula ku tlhela ndziva ni litsako.”

14. Júlio i chatisile kuyini a vanghana va vanene?

¹⁴ U nga chatisa kuyini wunghana ni vanhu lava va nga ku vhunako wutomini ga wena? Júlio, loyi zvezvi a tirako kota dhota, i wula lezvi: “A cikhati ndzi nga hi muswa, ndzi chatile a vanghana va vanene laha hi nga tira zvin’we kuchumayeleni. A vanghana lavo va wa hiseka nguvhu va tlhela va ndzi vhuna ku wona lezvi a ntiro wa kuchumayela wu nga tsakisisako zvona. Ndzi no sangula ku ti vekela mixuvo ya ku tira cikhati co tala kuchumayeleni. Ndzi no pola lezvaku ndzi wa luza a vanghana vo tala va vanene hi lezvi ndzi nga chata wunghana ntsena ni lava va nga hi va tanga ya mina. Hi ndzhako ka cikhati, ndzi no chata vanghana va vanene Bheteli. A cikombiso cabye ci ndzi vhunile a ku chukwatisa lezvi ndzi nga zvi hlawula kasi ku ti hungata hi zvona niku lezvo zvi ndzi tshinetile nguvhu ka Jehovha.”

15. Citlharihiso muni xungetano hi wunghana leci Pawule a nyikileko Timote? (2 Timote 2:20-22)

¹⁵ Ahati ke loku u pola lezvaku a wokari lomu bandleni a hi munghana wa munene ka wena? Pawule i wa zvi tiva lezvaku a vokari bandleni ga wuKristu ka zana ga malembe go sangula va wa nga hi na mahanyela ya wuKristu, hikwalaho i no tlharihisa Timote lezvaku a ti wonela kabye. (Lera 2 Timote 2:20-22.) A wunghana ga hina na Jehovha ga lisima nguvhu, hi wa nga ta lava ku a wokari a tsema a wunghana legi hi kululileko hi n’watseka kasi hiva nago ni Papayi wa hina wa le tilweni. — Lis. 26:4.

A KU TI VEKELA MIXUVO ZVI NGA KU VHUNISA KUYINI KU KULA HI TLHELO GA MOYA?

16. Mixuvo muni u nga ti vekelako?

¹⁶ Ti vekele mixuvo yi vhunako. Hlawula mixuvo yi to tiyisa a kukholwa ka wena yi tlhela yi ku vhuna kuva muKristu wo buvha. (Efe. 3:16) Hi cikombiso, u nga boha ku chukwatisa a programa ya wena ya cigondzo ca wena wutsumbu ni ku lera Bhibhiliya. (Lis. 1:2, 3) Kutani u nga zama ku engetela mikhongelo ya wena ni ku yi chukwatisa. Kuzvilava zvi lava ku u ti khoma nguvhu ni ku tirisa khwatsi a cikhati ca wena laha u hlawulako a zva ku ti hungata hi zvona. (Efe. 5:15, 16) A cikhati leci Jehovha a wonako a kutikarata ka wena kasi u engetela ku kula hi tlhelo ga moya, wa tsaka nguvhu.

17. Litsako muni hi li kumako hi ku vhuna van’wani?

¹⁷ A cikhati leci u ti karatelako ku vhuna van’wani u tava muKristu wo buvha. Jesu i te: “Loyi a nyikako wa tsaka nguvhu a ku hundza loyi a amukelako.” (Miti. 20:35) U nga vhuneka nguvhu loku u tirisa cikhati ca wena ni ntamu wa wena kasi ku vhuna van’wani. Hi cikombiso, u nga ti vekela mixuvo ya ku vhuna lava va khosaheleko ni lava va babyako va laha bandleni ga wena. Kuzvilava u nga va vhuna hi kuya va xavela zvokari kutani ku va vhuna ku tirisa michini yabye. Loku u hi makabye wa cinuna, ti vekele mixuvo ya kuva nandza go vhunetela na u hi ni mixuvo ya ku tirela vamakabye va wena. (Filp. 2:4) U nga tlhela u kombisa lirandzo hi lava va nga hiko vamakabye hi ku va bhulela mahungu ya manene ya Mufumo. (Mat. 9:36, 37) Loku zvi koteka ti vekele mixuvo ya ku tirela Jehovha ntirweni wa cikhati contlhe.

18. A kuva ntirweni wa cikhati contlhe zvi nga ku vhunisa kuyini ku kula hi tlhelo ga moya?

¹⁸ A ntiro wa cikhati contlhe wu nga ku vhulela tindlela to tala ta ku u kula hi tlhelo ga moya. A ku tira kota phayona zvi nga ku vhulela ndlela ya ku uya ka Cikola ca Vavhangeli va Mufumo. U nga tira Bheteli kutani kuakeni ka tiyindlu ta hlengeletano. A muswa wo kari wa phayona wa ku hi Calton i wulile lezvi: “A ku mbheta cikhati co tala ntirweni wa kuchumayela ni vamakabye va buvhileko wuve nchumu wa hombe wu ndzi vhunileko ku kula hi tlhelo ga moya andzhako ka loku ndzi bhabhatisilwe. A cikombiso cabye ci ndzi kucile ku ndzi engetela a wutivi ga mina ga Bhibhiliya ndzi tlhela ndzi chukwatisa a magondzisela ya mina.”

19. Makatekwa muni u to ti buza hi wona laha u simamako ku kula hi tlhelo ga moya?

¹⁹ Laha u toya u simama ku kula hi tlhelo ga moya, u ta ti buza hi makatekwa yo tala. U ta potsa ku xakela a ntamu wa wena ka ku hlongolisela a mixuvo yi nga vhuniko nchumu. (1 Joh. 2:17) U nga tazwa kubayisa loku ku vangiwako hi ku maha zviboho zva hava. Wutshan’wini ga lezvo, u ta humelela khwatsi u tlhela uva ni litsako la lisine. (Mav. 16:3) A cikombiso ca wena ca cinene ci ta kuca maKristu-kulori — a vaswa ni va kulileko. (1 Tim. 4:12) A ca lisima nguvhu, u tava ni kurula ni litsako li kumiwako hi ku tsakisa Jehovha ni kuva ni wunghana ga hombe zvin’we naye. — Mav. 23:15, 16.