Hikuyini hi faneleko ku kambisisa a Biblia?

A BIBLIA I BHUKU GA MATIMU YO TSUMBEKA

Ernesto: A nzi tivi zilo zo tala za wukhongeli. Hikwalaho, i chukwana hi nga wulawuli nguvu hi zona.

Bernardo: Nza tsaka hi ku nzi byela lezo. Kambe nzi wa nga se ku byela a vito ga mina, hi mina Bernardo. Wena ke?

Ernesto: Hi mina Ernesto.

Bernardo: Nzi tsakile nguvu hi ku ku tiva, Ernesto.

Ernesto: Minawu.

Bernardo: Nzi tsakela ku ku maha xiwutiso Ernesto, laha u nga kulela kona mu wa khongela?

Ernesto: Ina. Kanilezi a xikhati nzi nga suka laha kaya, nziya Universidade, nzi lo nyima kuya chechini.

Bernardo: Nzi bongile. U nga nzi byela lezi u gonzileko kwale Universidade?

Ernesto: Nzi gonzile zilo zi yelanako ni matiko, politika ni matimu. Kusukela kale, nzi zi ranza nguvu a ku tiva matimu. Phela a vanhu va mahile zilo za hombe nguvu hi kufamba ka xikhati.

Bernardo: A matimu ma tsakisa futsi. A Biblia, kota lezi kuzilava u zi tivako, i bhuku ga matimu. Wa tshuka u kambisisa zilo lomu ka Biblia?

Ernesto: Ahihi. Nza zi tiva ku i bhuku ga gi nene, kanilezi nzi wa nga se tshuka nzi alakanya lezaku a Biblia i bhuku ga matimu.

Bernardo: U ti komba na u hi munhu wo tlhariha, Ernesto. Loku u hi ni xikhatanyana, nzi wa tsakela ku ku komba zikombiso zitsongwani za matimu yo tsumbeka zi nga lomu ka Biblia.

Ernesto: Eyo. Kanilezi a nzi na Biblia.

Bernardo: U nga karateki. Nzi ta ku komba lomu ka Biblia ga mina. A xikombiso xo sangula xi lomu ka 1 Kronekele xipimo 29, mavesi ya 26 ni 27. Me ngalo: “Makunu Davida n’wana Jese i wa fumele vontlhe va ka Israeli. A xikhati lexo a nga fumela va ka Israeli ha xona ku wa hi 40 wa malembe; le Hebroni i lo fuma 7 wa malembe, le Jerusalema i lo fuma 33 wa malembe.”

Ernesto: Xana lexo xikombiso xa matimu yo tsumbeka hi ndlela muni?

Bernardo: Ka xikhati xo kari a vasoli vo kari va Biblia va tshukile va wula lezaku Hosi Davida a nga tshukangi ava kona.

Ernesto: Lisine lezo? Hikuyini va nga alakanya lezo?

Bernardo: Hi lezaku ahandle ka Biblia ku wa nga hi na wukustumunyu go tala legi gi nga komba lezaku i wa hi kona hakunene. Hambulezo, hi 1993, a ntlawa wa vavevuleli va zilo za kale va lo kuma a ribye gi nga hi ni magezu ma wulako ku: “Yindlu ya Davida.”

Ernesto: Za tsakisa.

Bernardo: A munhu munwani a kumbukiwako lomu ka Biblia loyi ku alakanyelweko lezaku a nga tshukangi ava kona hi Pontiu Pilatu, loyi a nga hi hosi masikwini ya Jesu. I kumbukiwa lomu ka bhuku ga Luka xipimo 3 vesi ga 1, xikari ka tihosana tinwani ta xikhati lexo.

Ernesto: Ina, nza zi wona. A vesi legi gi kumbuka Pilatu loku giku: “Pontiu Pilatu na hi mwamangulu le Judia, na Herodi a hi hosi le Galilea.”

Bernardo: Zi lulamile. Hi malembe yo tala, a titlhari to kari ti alakanyile lezaku kuzilava Pontiu Pilatu a nga tshukangi ava munhu wa lisine. Zonake, ka xipimo xa 50 wa malembe ma hunzileko, ku lo kumiwa a ribye gi nga tsalilwe vito gakwe hi ku kehliwa, le Oriente Médio.

Ernesto: E! Nzo gonza a kuzwa mitlhamuselo yo kota leyi.

Bernardo: Nza tsaka hi lezi hi bhulako zinwe hi zilo lezi.

Ernesto: Kasi ku wula lisine, nzi na ni xichawo hi Biblia kota ginwe ga mabhuku, kanilezi nzi wa nga se tshuka nzi alakanya lezaku gi na ni lisima xikhatini xa hina. Za koteka ku ngha gi hi ni matimu yo tsumbeka, kanilezi, nzi alakanya lezaku a gi na zilo zi vunako masikwini ya hina.

BIBLIA — BHUKU GA KALE GI VUNAKO MASIKWINI YA HINA

Bernardo: A vanhu vo tala va nyima ni magezu lawa. Kanilezi, mina nzi kholwa zo hambana. Wona xigelo xa kona: Cima hi vangiwa, lezi zi lavekako kasi ku hina vanhu hi hanya a zi cici. Hi xikombiso, xontlhe xikhati hi lava zakuga, tinguwo ni ko etlela kona; hi lava ku bhula ni vanwani ni kuva ni ngango wo tsaka. A hi lisine lezaku hontlheni ha zi nyika lisima a zilo lezi?

Ernesto: Lisine, ha zi nyika.

Bernardo: A Biblia gi nga hi vuna ka zontlhe ziyimo lezi. Hi xigelo lexo hi nga wulako lezaku i bhuku ga kale gi vunako masikwini ya hina.

Ernesto: U lava ku wula yini?

Bernardo: Nza ha zi veka hi ndlela yinwani: A Biblia gi na ni matshinya ya milayo ya lisima nguvu inyamutlha a kufana ni xikhati lexi ma nga tsaliwa hi xona.

Ernesto: Hi zona. Kanilezi, ka ziyimo muni?

Bernardo: Loku zita ka zilo zo kota ku tirisa mali hi wutlhari kutani kuva ni litsako wutomini ga ngango kutani kuva ni vanghana va va nene, a matshinya ya milayo ya Biblia ma nga hi rangela timhakeni leto. A Biblia gi fana ni mapa lowu wu zi kotako ku komba munhu a ndlela. Hi xikombiso, xana a wu kholwi lezaku a kuva nuna ni murangeli mu nene wa ngango zi nga karata ka masiku lawa hi hanyako ka wona?

Ernesto: I mhaka yo tiya leyo. Mina ni sati wa mina hi na ni xipimo xa lembe na hi chadile, kanilezi ka zikhati zinwani a hi woni zilo hi ndlela yo fana.

Bernardo: Za zwala. Kanilezi a Biblia gi na ni matshinya ya milayo yo olova ma vunako. Kota xikombiso xa lezo, wona bhuku ga Va Le Efesusi xipimo 5. A hi gonze a mavesi 22, 23, ni 28. Loku u zi lava u nga gonza a mavesi lawa.

Ernesto: Nza zi lava. Me ngalo: “Vavasati, ingisani a vanuna va nwina, kota lezi mu ingisako Hosi. Hakuva a nuna i hloko ya sati wakwe, kota lezi Kristu a nga hloko ya bandla, yena loyi a nga Muhanyisi wa miri lowu wakwe.” A vesi 28 gi ngalo: “Hizalezo a vavanuna va fanele ku ranza a vasati vabye kota lezi va ranzako a mimiri yabye. Loyi a ranzako sati wakwe wa ti ranza wutsumbu.”

Bernardo: Nzi bongile. Xana a hi lisine lezaku, loku a nuna ni sati va wo ti karatela ku tirisa a wusungukati legi go olova, a wutomi laha ngangweni gi wa ta tsakisa?

Ernesto: Nzi alakanya lezo. Kanilezi, zo olova ku wula, a ku zi maha a zi olovi.

Bernardo: Lisine; a ku na munhu a mbheleleko. Ka xipimo xalexi ku na ni vesi gi hi kucako a kuva hi ringanisela.a Kasi ku a nuna ni sati va zwanana, ku laveka lezaku va ringanisela ni kuva a munwe ni munwani wabye a tshama na a ti yimisele a ku maha kuranza ka loyi munwani. Mina ni sati wa mina hi wonile lezaku a Biblia gi nga hi vuna a kuva ni kuringanisela loko.

Ernesto: Lezo hakunene za zwala.

Bernardo: A Timboni ta Jehova ti na ni Web site yi nga ni mahungu ya ma nene ka vanhu va chadileko ni ka wutomi ga ngango. Loku u hi ni xikhatanyana nzi nga ku komba lezi yi nga nazo a site leyo.

Ernesto: Nzi naxo.

Bernardo: Zi sasekile. A khero ga kona hi legi: www.jw.org/pt. Legi i phajina go sangula.

Ernesto: A yi no ku saseka a mifota leyi.

Bernardo: A mifota leyi yi kombisa a ntiro wa hina wa kuxumayela lowu hi wu mahako misaveni yontlhe. Hi hina Timboni hi kombisiwako laha. A xipanze lexi xi na ni hloko ya mhaka: “Ajuda para Casais e Pais.” Lahasi ka hloko ya mhaka leyi, ku kombisiwa a tinzima to kari ti wulawulako hi ziyimo zo hambanahambana. Yi kona yi ku tsakisileko?

Ernesto: Ina. Hi leyi yi nge: “Como resolver problemas em seu casamento.” Mayiwako loku nzi wo zi kota a ku maha lezo!

Bernardo: A nzima leyi yi tlhamusela mune wa tindlela ta ku lulamisa zikarato. Wona nzimana leyi. U nga lera?

Ernesto: Ina. Yi ngalo: “Loku hi wula lezaku a kubhulisana i nkhata wa wukati, makunu a liranzo ni xichawo i mbilu ni mahahu ya kona kasi kuva ni kuzwanana, kutani ziro za lisima kasi kuva ni kubhulisana ku nene.” Um, nzi zi tsakele nguvu lezi va nga tlhamuselisa zona.

Bernardo: Nzi bongile a kulera ka wena. Ka nzimana leyi ku tshahilwe a vesi go kari ga Biblia. Hi nga vulula.

Ernesto: Ina, nzi gi kumile. I Va Le Efesusi 5:33. Gi ngalo: “Ngha na nwinawu munwe ni munwani a ranza sati wakwe kota lezi a ti ranzako wutsumbu; na yena wasati ngha ava ni xichawo ka nuna wakwe.”

Bernardo: U zi wonile lezaku ku khanyiswa nguvu ku nyika lezi a munwe ni munwani a rinzelako ku amukela?

Ernesto: A nzi zi zwisisi khwatsi lezi u zi wulako.

Bernardo: A hi lisine lezaku a wanuna i lava ku kombisiwa xichawo hi sati wakwe, ni lezaku hi tlhelo ginwani, a sati i lava ku ranziwa hi nuna wakwe?

Ernesto: Lisine.

Bernardo: Loku a nuna a tolovela a ku lava tindlela to komba lezaku wa ranza a sati wakwe, xana a sati zi nga ta mu olovela a ku mu kombisa xichawo a nuna wakwe?

Ernesto: Nzi alakanya lezo.

Bernardo: Hikwalaho, hambu lezi a vesi legi gi tsalilweko kwalomo ka 2.000 wa malembe ma hunzileko, gi wula lezi zi lavekako ka nuna ni sati, niku gi nyika wusungukati gi vunako nguvu loku gi tirisiwa. Kasi ku phinda a mufananiso lowu hi wu kumbukileko, a “mbilu ni mahahu” ya wukati zi ta simama zi hanya khwatsi.

Ernesto: E! . . . , kasi lomu ka Biblia ku na ni zilo zo tala nzi kalako nzi ga zi tivi!

Bernardo: Nza tsaka hi kuzwa lezo, Ernesto. Nzi tsakela ku ku enzela kambe kasi nzi ta tiva a mawonela ya wena ka xihlokwana xa mhaka xi nge: “Quatro passos para resolver problemas” xi lomu ka nzima yaleyi hi wulawulako hi yona lomu ka Web site ya hina.b

Ernesto: Eyo. Mina ni sati wa mina hi ta ti nyika xikhati kasi hi zi kambisisa.