A zilo zo biha a zi no kutala!

Elisa,a a wasati wa 35 wa malembe wa le Daca, Bangladesh, i wa tiveka nguvu hi kuva munhu wa liranzo ni wa ku khatala hi vanwani. A vanhu va wa mu tiva kota sati a nga ranza ku tira ni wo tsaka loyi a nga lava ku vuna vanwani a ku tiva lezi a zi gonzileko xungetano hi Nungungulu. A maxaka ni vanghana vakwe a va no ku bayiseka laha Elisa a nga khomiwa hi mababyi hi xitshuketi zonake afa ne viki gi nga se hunza!

Jaime ni sati wakwe, va nga kwalomo ka 30 wa malembe, vonawu va wa tiviwa ku fana na Elisa. Kusanguleni ka ximumu, va lo enzela a vanghana vabye le mupela-gambo wa Estados Unidos. A va ha tlhelangi kaya kabye le Nova Iorque. Na va hi kwaseyo, va lofa hi mhango ya mova, leyi yi mahileko lezaku a maxaka yabye ni vatiri-kulobye va sala wusiwaneni ga hombe.

A zizi zi lava kuya kule kasi u wona lezaku a kubiha ni kuxaniseka zi tele inyamutlha. A tiyimpi ti daya xitshungo ni masochwa. A wugevenga ni tihanyi zi hlupha vanhu vo kala nanzu. A timhango ni mababyi ya ku onha ziro zi humelela vanhu, na ku nga khataliseki a tanga kutani xiyimo xa wutomi ga munhu. A timhango ta ntumbuluko ti humelela vanhu na ti nga hlawuli. A xihlawulela ni wubihi zi tele nguvu laha misaveni. Kuzilava wena wutsumbu u tshuka u xaniswa hi zilo lezo.

Za zwisiseka a ku maha ziwutiso zo fana ni lezi:

• Hikuyini a vanhu va va nene va humelelwako hi zilo za kubiha?

• Hi Nungungulu a nga ni nanzu wa zilo lezo?

• A makhombo ya ntumbuluko mo humelela halahala kutani ma vangiwa hi vanhu?

• Xana i nayo wa Carma, ku nga wuyelo ga lezi a munhu a zi mahileko kale, wu mahako munhu a xaniseka?

• Loku ku hi ni Nungungulu nyamintamu, hikuyini a nga vikeliko vanhu va va nene ka zo biha?

• Xana hi ta tshuka hi hanya wutomi go kala wubihi ni kuxaniseka?

Kasi ku kuma mihlamulo ya ziwutiso lezi, a ku ranga hi fanele ku zwisisa a mihlamulo ya ziwutiso-tshinya lezi za zimbiri: Hikuyini a za kubiha zi humelelako vanhu vontlhe? Xana Nungungulu i ta maha yini?