Ni kwihi nzi ngaya kona, nzi wa famba ni xibhamu xa mina

KALE KA MINA:

Nzi pswalilwe nzi tlhela nzi wundliwa lomu tlhaveni le Roma, ka wutshamu ku hanyako vanhu vo tira nguvu va zisiwana. A wutomi gi wa nonoha. A nzi zangi nzi mu tiva a mamani wa mina wa ku nzi pswala, niku nzi wa nga zwanani ni papai wa mina. Nzi kulele nzi tlhela nzi gonza ku hanya lomu maruweni.

Nzi tlhanganyisile a 10 wa malembe, na nzi sangulile ku yiva. Laha nzi nga hi ni 12 wa malembe nzi lo suka laha kaya hi khati go sangula. Khati ginwe ni ku hunza, papai i lo ta nzi teka tsinza ka maphoyisa a tlhela na mina kaya. Nzi wa tshama hi ku holovisana ni vanhu — nzi wa hi wa tiholova ni wa ku zangara ni vontlhe. Laha nzi nga hi ni 14 wa malembe nzi lo sukela magumo laha kaya. Nzi lo sangula ku tirisa mimuri yo lahlisa mapimo nzi tlhela nzi hanya lomu maruweni. Nzi wa nga hi na ko etlela, nzi wo panza mova nzi etlela lomo kala laha gi yako ku ceni. Zonake nzi wa lava a wutshamu gi nga hi ni mati kasi nzi hlamba.

Nzi lova muyivi wa hombe nguvu. Nzi wa yiva zontlhe — ku wutla tipaxta, ku yiva lomu zitolo ni lomu tindlwini ni wusiku. Nzi lo sangula ku kuma vito go biha niku zalezo nzi lo rambiwa ku ta patsana ni ntlawa wa vayivi va ndhuma, lezo zi nzi nyikile “lungelo” ga ku ya yiva ka mabako. Hi kota ya lezi nzi nga hi munhu wa tiholova, zalezo nzi lova wo chaveka ka ntlawa wa hina wa zigevenga. Ni kwihi nzi ngaya kona, nzi wa famba ni xibhamu xa mina, hi lisine, nzi wa etlela naxo lahasi ka ximasi. A tihanyi, mimuri yo lahlisa mapimo, ku yiva, ku rukatela, ni wubhayi zi lova mahanyela ya mina. A maphoyisa ma wa tshama hi ku nzi hlota. Nzi lo khonwa hi zikhati zo tala, niku nzi mbhetile malembe yo tala na nzi huma ni ku nghena lomu paxweni.

LEZI A BIBLIA GI NGA CICISA ZONA A WUTOMI GA MINA:

Ka khati go kari na nzi wuya hi paxweni, nzi lo vuxela a titia wa mina. Ka xikhati lexo, nzi wa nga zi tivi lezaku a titia wa mina ni vana vakwe va vambiri va wa mahile Timboni ta Jehova. Va lo nzi ramba ku ya wona a mutlhangano wo kari wa Timboni ta Jehova. Nzi lo vumela ku famba hi ku lava ku ya zi wona. Loku hi chikele Salawini ya Mufumo, nzi lavile ku tshama hi le nzhako kusuhani ni nyangwa kasi nzi va wona khwatsi lava va nga nghena ni lava va nga huma. Niku kota tolovelo, nzi wa ni xibhamu xa mina.

A mutlhangano lowo wu lo cica a wutomi ga mina. Nza alakanya kuva nzi ti wonile na nzi hi ka tiko ginwani. Nzi lo losiwa hi ndlela ya liranzo, ya wunghana na vanhu va kona va kari va nwayitela. Nza ha gi alakanya khwatsi a wunene, ni liranzo leli nzi li wonileko ka Timboni. Lezo zi wa hambene nguvu ni mahanyela lawa nzi nga ma tolovele!

Nzi lo sangula ku gonza a Biblia ni Timboni ta Jehova. Laha nzi ngaya mahlweni hi ku gonza, nzi waya nzi zi wona khwatsi lezaku nzi wa fanele ku cica mahanyela ya mina hi ku mbhelela. Nzi lo lanzela a wusungukati gi nga ka Mavingu 13:20: “Hlengela ni tlhari, u tava tlhariwo; kanilezi loyi a mahako wunghana ni zipumbu i ta lobyiswa.” Nzi lo wona lezaku nzi wa fanele ku ti hambanyisa ni ntlawa wa zigevenga lowu nzi nga hi ka wona. Zi wa nga olovi a ku maha lezo, kanilezi hi ku vuniwa hi Jehova, nzi zi kotile.

Nzi lo ti basisa kambe hi tlhelo ga nyama. Nzi lolwa yimpi nzi tsika ku dzaha masigari ni timbangi. Nzi tsema misisi, nzi susa zipherana, nzi tlhela nzi tsika mawulawulela yo biha. Kusukela nzi pswaliwa, ku wa hi kona nzi nga sangula ku tiva ku ti khoma ka mitiro ya mina.

A nzi tshukangi nzi zi ranza ku lera ni ku gonza, hikwalaho ku wa hi xikarato xa hombe a kuva nzi veka kupima loku nzi kari nzi gonza a Biblia. Hambulezo, laha nzi nga kari nzi ti karata, nzi lo zi kota ku ranza Jehova, niku nzi lo sangula kuzwa kucica ko kari — a livalo la mina li lo sangula ku nzi karata. Nzi wa tala kuva ni mawonela ya hava hi mina wutsumbu, nzi ti wutisa lezaku xana Jehova a nga tshuka a nzi tsetselela a zilo zontlhe za kubiha nzi nga zi mahile ke. Ka zikhati lezo, nzi wa chavelelwa nguvu hi ku gonza xungetano hi Jehova laha a nga tsetselela Hosi Davida anzhako ka kuva a mahile zionho za hombe. — 2 Samueli 11:1–12:13.

A xikarato xinwani nzi nga hi naxo ku wa hi ku xumayela hi muti ni muti. (Mateu 28:19, 20) Nzi wa chava ku tshuka nzi kumana ni wokari nzi nga mu mahele kubiha xikhatini xi hunzileko! Kanilezi hi kutsongwani-kutsongwani nzi lo zi kota ku hlula kuchava ka mina. Nzi lo sangula ku kuma litsako la lisine hi ku vuna vanwani a kugonza hi Dadani wa hina wo tsakisa wa le tilweni, loyi a tsetselelako nguvu.

LEZI NZI NGA VUNEKISA ZONA:

A ku tiva Jehova zi vikele wutomi ga mina! A kutala ka lava nzi nga hlakana navo, va file, a vanwani va lomu paxweni. Kanilezi mina nzi hanya wutomi go tsakisa nguvu niku nzi na ni wumanziko nzi gi rinzelako. Nzi gonzile kutikoramisa, kuingisa ni kutikhoma ka mahanyela ya mina ya tihanyi. Kota mbhanzu wa kona, nzi hanya hi kurula ni vanhu. Nzi na ni wutomi ga ngango go tsakisa ni sati wa mina wo saseka Carmen. Hina vambiri hi tsaka nguvu hi ku vuna vanwani lezaku va gonza Biblia.

Mina na Oh, hi maha ntiro wa wu nene  —  lowu a zikhati zinwani wu patsako ku tira lomu bako, kanilezi wutshanwini ga ku yiva, nzo basisa!