Lezi Nungungulu a to maha hi wubihi

A Biblia gi hi byela zi ku dlunya lezi Jehova ni N’wana wakwe, Jesu Kristu, va to maha hi kuxaniseka ku vangilweko hi Satani Diabolus. A Biblia gi wula lezi: “Kanilezi a N’wana wa Nungungulu i lo wonekeliswa lezaku a fela ku mbhetisa a mitiro ya Satani.” (1 Johani 3:8) A tiko legi gi fumelwako hi makangwa, livengo, ni mitiro yo biha gi ta loviswa. Xungetano hi “hosana ya legi tiko”  —  Satani Diabolus  —  Jesu i tsumbisile lezaku “yi ta hlongolwa.” (Johani 12:31) Laha a kucetelo wa Satani wu to kala wu nga ha hi kona, ku ta yimiswa misava yiswa yo lulama, zonake a misava leyi yi tava wutshamu go rula. — 2 Pedro 3:13.

Ahati la’va alako ku cica mahanyela yabye ni lava va simamako ku maha za kubiha ke? Ehleketa hi xitsumbiso lexi xo kongoma: “Hakuva a valulamileko va ta aka tikweni, ni lava va mbheleleko va ta sala ka gona. Kanilezi a vakubiha va ta susiwa laha misaveni, ni vakanganyisi va ta tsuwulwa ka yona.” (Mavingu 2:21, 22) Xikhatini lexo, a kucetelo wa vanhu va kubiha wu nga ta hava kona. Nzeni ka matshamela lawo ya kurula, a vanhu vo ingisa va ta tlhatlhiswa ka kungambheleli ka hina ka mabeleko. — Va Le Roma 6:17, 18; 8:21.

Misaveni leyo ya yiswa, xana Nungungulu i ta gi fuvisisa kuyini a wubihi? A nga ta fuvisa kubiha hi ku maha vanhu va fana ni michini yo maha ntsena lezi yi yimiselweko ku maha. A kuhambana ni lezo, la’va ingisako i ta va gonzisa tindlela takwe, a va vuna lezaku va tsika maalakanyo ni mitiro yo biha.

Xana Nungungulu i ta maha yini hi makhombo lawa ma tolovelako ku humelela hi xitshuketi? I tsumbisa lezaku lokuloku a Mufumo wakwe wu ta fumela misava. A Hosi ya Mufumo lowo leyi yi yimisilweko hi Nungungulu hi Jesu Kristu, loyi a nga ni ntamu wa ku chuma mababyi. (Mateu 14:14) Jesu kambe i na ni ntamu wa ku valela timhango ta ntumbuluko. (Marku 4:35-41) Hikwalaho, a kuxaniseka loku ku welako vanhu hi ku tshuka va hi ka wutshamu ga hava hi xikhati xa hava ku nga ta hava kona. (Mutshawuteli 9:11) Mufunweni wa Kristu, yi hava mhango yi to wela vanhu. — Mavingu 1:33.

Makunu, ku ta ku yini hi vanhu vo tala va nga hiko na nanzu la’va fileko hi timhango to tshisa? Xikhatanyana mahlweni ko vuxa munghana wakwe Lazaru hi ka vafileko, Jesu i te ngalo: “Mina nzi kuvuka ni wutomi.” (Johani 11:25) Kunene, Jesu i na ni ntamu wa ku vuxa vafileko, kutani wa ku wuyisela wutomini, lava va fileko!

Loku ku hi lezaku wa tsakela ku hanya misaveni leyi a zo biha zi to kala zi nga ha humeleli a vanhu va va nene, hikuyini u nga ti karateliko ku tiva zinwani xungetano hi Nungungulu wa lisine ni makungo yakwe hi ku gonza a Biblia? A Timboni ta Jehova ta lomu u hanyako kona ti ta tsaka nguvu hi ku ku vuna a ku kuma wutivi lego. Ha ku ramba hi matsenya lezaku u bhula nato kutani u tsalela a vahumesi va revista legi.