MIHLAMULO YA BIBLIA

Hikuyini hi faneleko ku maha mukhongelo?

Jehova Nungungulu i lava lezaku hi tizwa na hi tlhatlhekile a kuva hi wulawula naye hi kukhanzakanya hi zikarato za hina. (Luka 18:1-7) Wa hi ingisela hakuva wa hi khatalela. Kota lezi a Dadani wa hina wa le tilweni a hi rambako hi liranzo lezaku hi khongela, hi wa ta xi alela yini a xirambo xakwe? — Gonza Va Le Filipi 4:6.

A mukhongelo a hi ndlela yo kombela xivuno ntsena. A kuhambana ni lezo, a mukhongelo wu hi vuna a kutshinela ka Nungungulu. (Tisimu 8:3, 4) Loku hi kukhanzakanya hi phofula a kutizwa ka hina ka Nungungulu, hi tiyisa a wunghana ga hina naye. — Gonza Jakobe 4:8.

Hi fanele ku wu mahisa kuyini mukhongelo?

Loku hi maha mukhongelo, Nungungulu a nga lavi lezaku hi tirisa magezu ya kutikulisa kutani ku maha mikhongelo yi nga lomu hlokweni. Ge a ku na xilaveko xa ku hiva ka matshamela yo kari kasi hi maha mukhongelo. Jehova i hi ramba lezaku hi maha mukhongelo wo huma mbilwini. (Mateu 6:7) Hi xikombiso, le Israeli wa kale, Hana i lo khongela hi xikarato xa ngango. Hi nzhako ka xikhati, laha a hlomulo wakwe wu ngava litsako, i lo bonga Nungungulu hi mukhongelo wu humako mbilwini. — Gonza 1 Samueli 1:10, 12, 13, 26, 27; 2:1.

Hi nga wona a lungelo legi ga sasekela ga cima hi nga nago! Ha zi kota ku tshinelela a Muvangi ni zikarato za hina. Hi nga zi kota kambe ku mu dumisa ni ku mu bonga hi lezi a zi mahako. Hakunene, hi fanele ku chela kota hi lungelo legi go hlawuleka. — Gonza Tisimu 145:14-16.