Wa kholwa lezaku u li kumile lisine ke? Hikuyini?

1. Zini lezi a vafundisa va wuKristu ga mawunwa va nga zi maha xikhatini xa yimpi?

KURANZA ka Nungungulu lezaku a maKristu ya lisine maya yimpini ma ya daya vanhu va matiko manwani ke? Ka 100 wa malembe lawa ma ha hi kuhunzako, a vanhu vo tala va nga ti wula lezaku maKristu va mahile lezo. A vafundisa va Katolika va wa katekisa masochwa ni zibhamu zabye kasi ku yalwa ni vaKatolika va tiko ginwani. A vafundisa va vaProtestante vonawu va wa maha zalezo. A Yimpi ya Wumbiri ya Misava xikombiso xa hombe xa kudayana loko.

2, 3. Ti yimile kwihi a Timboni ta Jehova xikhatini xa Yimpi ya Wumbiri ya Misava ni ka tinwani, niku hikuyini?

² Zini lezi a Timboni ta Jehova ti zi mahileko xikhatini lexo xa yimpi ke? A matimu ma komba lezaku ti simamile ti nga ti ngheniseli kulweni loko. Xini xi nga va maha va nga ti ngheniseli ka tiyimpi leto ke? A xo sangula xikombiso xa Jesu ni tigonzo takwe. I te ngalo: “Loku mu ranzana, a vanhu vontlhe va ta zi tiva lezaku mu vapizani va mina.” (Joh. 13:35) Va lo ehleketa kambe hi matshinya ya milayo ma nga ka magezu lawa Paule a nga tsalela maKristu ya le Korinte va tlhela va ma tirisa ka xiyimo xabye. — Gonza 2 Va Le Korinte 10:3, 4.

³ Hikwalaho, a maKristu ya lisine lawa a tivalo tabye ti gonzisilweko hi Biblia, a ma gonzi kulwa ge hambu kuya yimpini. Hi kota ya ku khomelela ka xiyimo xabye xa wuKristu, a makume ya mazana ya Timboni, vaswa ni vakhosaheleko, vavanuna ni vavasati, va lo xanisiwa. A kutala ka Timboni ti xanisilwe tivaleni ta xanisa, ti maha mitiro ya xibhalo ni ku valelwa mapaxweni. A vokari va delwe xikhatini xa vaNazi le Alemanya. Na ku nga khataliseki a tixanisa to tshisa leti va kumeneko nato le Europa, a Timboni ta Jehova a ti tshukangi ti rivala a ntiro wa tona wa ku xumayela a mahungu yo saseka ya Mufumo wa Jehova.a Anzhako ka lezo, hi 1994 a Timboni ti lo ala ku ti nghenisela kuhihiriteni ka lixaka la vanhu le Ruanda. A Timboni ti lo simama ku nga ti ngheniseli kuhalatweni ka nkhata ku humeleleko ka malembana ma ha hi ku hunzako le Bálcãs a xikhati ku nga fuvisiwa a tiko ga Iugoslávia.

4. A kuva a Timboni ta Jehova ti nga ti ngheniseli tiyimpini zi va khumbisile kuyini vanhu?

⁴ A kuva a Timboni ta Jehova ti nga ti ngeniseli tiyimpini ta matiko zi kholwisile makhume ya mazana ya vanhu misaveni yontlhe lezaku tona ti na ni liranzo lo mbhelela hi Nungungulu ni vaakelani. Hi magezu manwani, a Timboni maKristu ya lisine. Hambulezo, ku na ni zilo zinwani wukhozelini ga hina lezi zi kholwisileko vo tala lezaku loku va wona Timboni ta Jehova, va wona maKristu ya lisine.

NTIRO WA KUGONZISA WA HOMBE KA YONTLHE

5. Kucica muni loku a valanzeli vo sangula va Kristu va ku mahileko?

⁵ Kusukela kusanguleni ka wutireli gakwe, Jesu i kombisile a lisima la ku xumayela a mahungu yo saseka ya Mufumo wa Nungungulu. I lo hlawula 12 wa vapizani lezaku va hlengela kuyimiseni ka xiseketelo xa ntiro wa misava yontlhe; hi kulanzela, i lo gonzisa ntlawa wa 70 wa vapizani. (Luka 6:13; 10:1) I lo va longisela kasi va yisa mahungu yo saseka ka vanwani, a vaJuda kuranga. Hi kufamba ka xikhati, va lo kuma mahungu ya maswa! A vapizani va Jesu va wa fanele ku yisa mahungu lawo ka vanhu va matiko. Loko kuve kucica ka hombe ka vapizani lavo vo hiseka va vaJuda! — Miti. 1:8.

6. Xini xi nga maha Pedro a wona lezaku Nungungulu a nga na xihlawulela?

⁶ Mupostoli Pedro i lo rumelwa mutini wa Korneliu, loyi a nga hi khuna ga vaMatiko. Pedro i lo zi wona lezaku Nungungulu a nga na xihlawulela. Korneliu ni va ngango wakwe va lo bapatizwa. Makunu a wuKristu gi wa kari gi enzeleka; a vanhu va matiko wontlhe va wa zi kota kuzwa lisine ni ku li amukela. (Miti. 10:9-48) Makunu a xipanze xa ku xumayela ka xona yi wa hi misava yontlhe.

7, 8. Zini lezi a hlengeletano ya Jehova yi zi mahako kasi ku vuna vanhu lezaku vazwa mahungu yo saseka? (Wona mufota kusanguleni ka nzima.)

⁷ Kusukela kusanguleni ka matimu ya Timboni ta Jehova masikwini ya hina, lava va rangelako va vuvumisa a ntiro wa kuxumayela ni ku gonzisa mahungu yo saseka hi kuhiseka misaveni yontlhe. Inyamutlha, ku na ni xipimo xa 8 wa timiliyoni ta Timboni to hiseka ti mahako mizamo yontlhe kasi ku hangalasa mahungu ya Kristu hi tirimi ta ku hunza 600, niku a hlayo yiya yi engeteleka! A Timboni ta Jehova ta tiviwa nguvu hi wutireli ga tona ga muti ni muti ni kuxumayela ka tona lomu maruweni, lomu zikhati zinwani ti tirisako timeza ni zikarinyana za mabhuku.

⁸ Ku na ni vahunzuluseli va ku hunza 2.900 va nyikilweko gonziselelo yo hlawuleka kasi ku hunzulusela a Biblia ni mabhuku ma seketelweko ka gona. A ntiro wabye a wu mahiwi ntsena ka tirimi leti ti woniwako kota tirimi ta hombe. Wu patsa mazanazana ya tirimi ti kalako ti nga tiveki nguvu, hambulezo na ti wulawulwa hi timiliyoni ta vanhu. Hi xikombiso, le Espanya ku na ni timiliyoni ta vaKatalunya va wulawulako lirimi la vona la mabeleko, li nga xiKatalawu, wutomini gabye ga siku ni siku. Ka malembana lawa, a xiKatalawu xi kari xi vuka zinwe ni maravi ya xona le Andorra, Alicante, zihlaleni za Baleares, ni le Valência. Inyamutlha, a Timboni ta Jehova ti humesa mabhuku ma seketelwako ka Biblia hi xiKatalawu, niku a mitlhangano ya wuKristu ya fambisiwa hi lirimi leli li khumbako timbilu ta vawulawuli va xiKatalawu.

9, 10. Xini xi kombako lezaku a hlengeletano ya Nungungulu ya khatala hi xilaveko xa moya xa vanhu vontlhe?

⁹ A ntiro lowu wa ku hunzulusela ni ku gonzisa wa mahiwa ka matshamu yo tala. A México i tiko ku wulawuliwako xiPanyoli kanilezi ku na ni ntsengo wo woneka wa zisumbulwa za tiko lego zi wulawulako tirimi tinwani. A vaMaya va wumba wunwe wa mitlawa leyo. A hofisa ya ravi ya le México yi rurisile a ntlawa wa wuhunzuluseli wa xiMaya wuya ka wutshamu legi va nga wa ta wulawula ni kuzwa lirimi la xiMaya siku ni siku. A xikombiso xinwani xiNepali, li nga linwe la tirimi ti wulawuliwako le Nepali. A tiko ga Nepali gi na ni vahanyi va ku hunza 29 wa timiliyoni niku gi na ni xipimo xa 120 wa tirimi. Kanilezi a xiNepali xi wulawulwa hi vanhu va ku hunza 10 wa timiliyoni niku a vanwani vo tala va xi tirisa kota lirimi la wumbiri. A mabhuku ya hina ma hunzuluselwa kambe hi lirimi leli.

¹⁰ A hlengeletano ya Jehova yi nyika nguvu lisima a ntiro wa ku xumayela a mahungu yo saseka ya Mufumo misaveni yontlhe, kota lezi hi zi wonako hi ntiro wu mahiwako hi mitlawa yo tala ya wuhunzuluseli yi nga kona misaveni. Ku avelwa timiliyoni ni timiliyoni ta ziphephana, mabroxura, ni marevista hi mahala ka matsima ma mahiwako misaveni yontlhe. A ntiro wabye wu seketelwa hi minyikelo ya kuziranza ya Timboni ta Jehova, leti ti lanzelako xileletelo xa Jesu xaku: “Mu amukele hi matsenya, nyikani hi matsenya.” — Mat. 10:8.

11, 12. A ntiro wa kuxumayela wu mahiwako misaveni yontlhe hi Timboni ta Jehova wu va khumbisa kuyini vanwani?

¹¹ Kota vaxumayeli ni vagonzisi vo hiseka va maKristu, a Timboni ta Jehova ti kholwa hi kumbhelela lezaku ti li kumile lisine laha ka kuza ti maha mizamo ya hombe kasi ku chiketisa mahungu lawo ka vanhu va matiko manwani ni tixaka. A votala va olovisa wutomi gabye, va gonza lirimi limbe va tlhela va ti zwananisa ni mahanyela ya matshamu manwani kasi ku maha ntiro lowu wa lisima nguvu wa wuKristu. A ntiro lowu wa kuxumayela ni kugonzisa misaveni yontlhe wonawu wa kholwisa vanhu vo tala lezaku a Timboni ta Jehova valanzeli va lisine va Kristu Jesu.

¹² A Timboni ti maha zontlhe lezo hakuva ta kholwa lezaku ti li kumile lisine. Kanilezi xini xinwani xi kholwisako timiliyoni ta vanhu lezaku a Timboni ta Jehova ti li kumile lisine ke? — Gonza Va Le Roma 14:17, 18.

HIKUYINI VA KHOLWAKO?

13. A Timboni ti hlayisisa kuyini a kuhlazeka ka hlengeletano ya tona?

¹³ Hi nga vuneka hi magezu ya maKristu yo hiseka ya masikwini ya hina, lawa ma kholwako lezaku ma li kumile lisine. A nanza go kari ga Jehova gi nga ni malembe na gi mu tirela gi kombisa kutizwa ka gona hi ndlela leyi: “Ku mahiwa ni xihi kasi ku a hlengeletano ya Jehova yi tshama yi basile hi tlhelo ga mahanyela, na ku nga khataliseki lezaku hi mani a faneleko ku lulekwa kutani ku kawukiwa.” Va zi kotisa kuyini ku lanzela tshinya legi go tlakuka ga mahanyela ke? Hi ku lanzela matshinya ya milayo ma tsalilweko ka Mhaka ya Nungungulu ni xikombiso lexi Jesu ni vapizani vakwe va hi siyeleko. Hikwalaho, matinwini ya Timboni ta Jehova masikwini ya hina, va tsongwani va zako va susiwa ngangweni wa wuKristu hi ku nga lanzeli matshinya ya milayo ya Nungungulu. A wunyingi ga vanhu — a ku patsa ni lava kale va nga hanya hi ndlela yi nga tsakisiko Nungungulu kanilezi va cicileko — va hanya wutomi gi basileko. — Gonza 1 Va Le Korinte 6:9-11.

14. Zini lezi a vanhu vo tala va susilweko bandleni va zi mahako, niku hi gihi wuyelo ga kona?

¹⁴ Ahati lava va susilweko bandleni, kota lezi a Mitsalo yi leletelako ku zi maha loku munhu a ala ku hanya hi milayo ya Nungungulu ke? A makume ya mazana ya vona va ti sola va cica mahanyela yabye va tlhela va amukelwa lomu bandleni. (Gonza 2 Va Le Korinte 2:6-8.) A ku hanya hi matshinya ya milayo yo tlakuka ya Biblia zi maha lezaku a bandla ga wuKristu gi tshama gi basile gi tlhela gi tsumbeka. A kuva a Timboni ta Jehova ti khomelela ka matshinya ya milayo ya Nungungulu — a ku hambana ni tichechi to tala leti ti tsikako vanhu va ti mahela ni xihi — zonawu za kholwisa vanhu vo tala lezaku ti hanya hi lisine.

15. Xini xi nga kholwisa makabye wo kari lezaku i li kumile lisine?

¹⁵ Hikuyini a Timboni to buva ti kholwako lezaku ti li kumile lisine? A makabye wo kari a nga kwalomo ka 50 wa malembe i wula lezi: “Nza kholwa kusukela na nza ha hi jaha lezaku a kukholwa ka mina ku seketelwe ka zilo zinharu za tshinya: (1) lezaku Nungungulu i kona; (2) lezaku a Biblia gi pimisilwe hi yena; ni (3) lezaku i tirisa ni ku katekisa a bandla ga wuKristu ga Timboni ta Jehova nyamutlha. Kota lezi nzi zi gonzileko hi malembe, xontlhe xikhati nzi zama ku hlola zilo lezi za zinharu nzi tlhela nzi ti wutisa lezaku zi na ni xiseketelo xo tiya hakunene ke. Lembe ni lembe ziya zi tiya nguvu lezaku a zilo lezo zi na ni xiseketelo xo tiya, hi ndlela leyo zi tiyisa kukholwa ka mina zi tlhela zi nzi maha nzi kholwisisa lezaku hakunene hi li kumile lisine.”

16. Xini xi khumbileko nguvu makabye wo kari wa xisati xungetano hi lisine?

¹⁶ A makabye wo kari wa xisati a chadileko, loyi a tirako tsinza wa misava yontlhe le Nova York i wulile lezi hi hlengeletano ya Jehova: “Hi yona yoce yi huwelelako a vito ga Jehova yi nga tsiki. Lezo a zo ku zwala khwatsi loku hi alakanya lezaku a vito ga Nungungulu gi kumeka xipimo xa 7.000 wa makhati lomu ka Biblia! Nzi tsakiswa hi magezu yo tiyisa hlana ma nga ka 2 Kronekele 16:9, yaku: ‘A mahlo ya Jehova ma languta misaveni yontlhe a ku tiyisa lava va nga vakwe hi timbilu tabye tontlhe.’” I engeta aku: “A lisine li nzi kombile ndlela ya kuva wa Jehova hi mbilu yontlhe kasi a nzi tiyisa. A kuzwanana ka mina na Jehova ka lisima nguvu ka mina. Niku nzi bonga nguvu a ntiro wa Jesu wa ku hi nyika wutivi go eta ga Nungungulu legi gi nzi tiyisako.

17. Zini lezi a wanuna wo kari loyi kale a nga kala a nga kholwi ka Nungungulu a kholwako, niku hikuyini?

¹⁷ A wanuna wo kari a nga kala a nga kholwi ka Nungungulu i te ngalo: “A zivangwa zi nzi kholwisa lezaku Nungungulu i lava lezaku a vanhu vava ni litsako wutomini niku hi kota ya lezo a nga ta tsika kuxaniseka ku simama kala kupinzuka. Ahandle ka lezo, laha a tiko gi yako gi mitiwa hi kubiha, a vanhu va Jehova vaya va engetela kukholwa, ni kuhiseka, ni liranzo. A moya wa Jehova hi wona woce wu nga mahako xihlamaliso lexo masikwini lawa.” — Gonza 1 Pedro 4:1-4.

18. Ku ku khumbisa kuyini a kutizwa loku ku kombisilweko hi vamakabye vambiri ke?

¹⁸ A Mboni yinwani ya kale yi lo nyika zigelo za yona za ku kholwa a lisine leli hi li xumayelako: “A xigonzo xa mina nzeni ka malembe lawa ma hunzako xi nzi kholwisile lezaku a Timboni ti mahile mizamo ya hombe kasi ku lanzela a xikombiso xa maKristu ya zana ga malembe go sangula. Nzi ku wonile hi mahlo ya mina a kuzwanana loku a Timboni ta Jehova ti nga nako misaveni yontlhe kota lezi nzi fambafambileko matikweni. A lisine la Biblia li nzi nyikile litsako.” Loku a makabye wo kari a nga ka ma 60 wa malembe a wutisilwe a ku hikuyini a kholwako lezaku i li kumile lisine, i lo veka kupima ka Jesu Kristu, aku: “Hi gonzile a wutomi ni wutireli ga Jesu hi wukheta, zonake hi tsakela a xikombiso xakwe. Hi lo cica zo kari wutomini ga hina lezaku hi tshinela ka Nungungulu ha Kristu Jesu. Hi lo wona a nzhiho wa kufa ka Kristu kota xiseketelo xa kuponiswa ka hina. Niku ha zi tiva kambe lezaku i vuxilwe hi ka vafileko. Hi na ni wukustumunyu go tsumbeka ga lava va mu wonileko hi mahlo.” — Gonza 1 Va Le Korinte 15:3-8.

BHULELA VANWANI A LISINE LA BIBLIA

19, 20. a) I ntiro muni lowu Paule a wu khanyisileko ka bandla ga le Roma? b) Kota maKristu ma ti hendleletileko, i lungelo muni hi nga nago?

¹⁹ Kota maKristu ma ranzako vaakelane, a hi nge miyeli ni wutivi ga hina ga lisima xungetano hi lisine. Paule i lo bhulisana ni vamakabye vakwe va bandla ga le Roma, aku: “Loku u vumela hi nomu wa wena lezaku Jesu i Hosi, u kholwa mbilwini ya wena lezaku Nungungulu i mu vuxile hi ka vafileko, wena u ta hanyiswa. Hakuva munhu wa hlayelwa kululama hi kota ya kukholwa ka mbilu, a hanyiswa hi kuvumela hi nomu.” — Rom. 10:9, 10.

²⁰ Kota Timboni ta Jehova ti ti hendleletileko, ha kholwa lezaku hi li kumile lisine ni lezaku hi na ni lungelo ga ku gonzisa vanwani a mahungu yo saseka ya Mufumo wa Nungungulu. Laha hi yako mahlweni ni ntiro wa hina wa kuxumayela, ngha vanhu va nga khumbiwi ntsena hi lezi hi gonzisako lomu ka Biblia, kanilezi va khumbiwa kambe hi kukholwa ka hina.