ZIWUTISO ZA VAGONZI

Xana a magezu ya Davida ma nga ka Tisimu 37:25 ni magezu ya Jesu ka Mateu 6:33 ma wula lezaku Jehova a nga ta tshuka a tsika muKristu a vumala zakuga ke?

Davida i tsalile lezaku i wa nga se “wona a wakululama a tsikiwa, ge hambu ku wona a vanana vakwe va kombela zakuga.” Hi magezu lawo, Davida i wa komba zilo a nga zi wonile hi kuhanya ka yena wutsumbu. I wa ku tiva khwatsi a kukhatala ka Nungungulu. (Tis. 37:25) Kanilezi, a magezu ya Davida a ma wuli lezaku a ku na mukhozeli wa Nungungulu a tshukileko ava ni ndlala kutani a to tshuka ava nayo.

Kuve ni zikhati zo kari lezi Davida wutsumbu a ngava ka ziyimo zo binza. A ginwe ga makhati lawo kuve ka xikhati lexi a nga tsutsuma Saule. Davida i lo mbhelelwa hi zakuga, a kombela zibaba kasi aga yena ni lava a nga hi navo. (1 Sam. 21:1-6) Ka xikhati lexo, Davida i wo “kombela zakuga.” Hambulezo, ka xiyimo lexo xo binza, i wa zi tiva lezaku Jehova a nga mu tsikangi. A mhaka hi lezaku a ku na wutshamu ni ginwe laha hi gonzako lezaku Davida i kombele zomola kasi ku kuma zakuga.

Ka Mateu 6:33, hi kuma magezu ya Jesu ma hi tiyisako lezaku Nungungulu i ta tatisa zilaveko za malanza yo tsumbeka lawa ma rangisako zilaveko za Mufumo wutomini. Jesu i te ngalo: “A kuranga lavani mufumo wakwe, ni kululama kakwe, zonake ku ta engetelwa ka nwina zontlhe lezi zilo,” zi patsako zakuga, zakunwa, ni tinguwo. Hambulezo, Jesu i tlhelile a komba lezaku hi kota ya tixanisa a “vamakabye” vakwe va wa ta tshuka vava ni ndlala. (Mat. 25:35, 37, 40) Lezo zi mu humelele Paule. Kuve ni zikhati a ngava ni ndlala ni tora. — 2 Kor. 11:27.

Jehova i hi byela lezaku hi ta xanisiwa hi tindlela to tsalangana. A nga ha hi tsika hiva ni kuvumala ko kari a xikhati lexi hi vunetelako ku hlamula a kulumbeta ka Diabolus. (Joba 2:3-5) Hi xikombiso, a maKristu-kulori, yo kota lawa ma nga yisilwe tivaleni ta xanisa hi vaNazi, mave ka ziyimo zo nonoha nguvu hi kota ya tixanisa. A yinwe ya tindlela ti nga tirisiwa ka mizamo ya ku tshova kutsumbeka ka Timboni ku wa hi ku ti tsona zakuga zi faneleko. A Timboni to tsumbeka ti lo simama ku ingisa Jehova, hikwalaho a nga va tsikangi. I lo va tsika va kumana ni nzhingo lowo, a ku fana ni lezi a tsikako maKristu wontlhe ma kumana ni minzhingo yo tsalangana. Hambulezo, a ku na kukanakana ka lezaku Jehova wa va vunetela vontlhe lava va xanisekako hi kota ya vito gakwe. (1 Kor. 10:13) Hi nga tshama na hi alakanya a magezu ma nga ka Va Le Filipi 1:29: “Hi kota ya Kristu mu nyikilwe a thomo a kuva mu kholwa, naku nga hi lezi ntsena, kanilezi mu nyikilwe a thomo ga ku xaniseka hi kota ya yena.”

Jehova i tsumbisa kuva zinwe ni malanza yakwe. Hi xikombiso, ka Isaya 54:17 i ngalo: “A gi kona tlhari gi fulelweko ku vukela wena gi ta nga humelela.” A xitsumbiso lexi ni zinwani xitiyisekiso xa kutshamiseka ka vanhu va Nungungulu kota ntlawa. Kanilezi a muKristu munwe ni munwani a nga ha kumana ni minzhingo, hambu ku dawa.