Zviwutiso Zva Vagondzi

A ku Dhavhidha, a muyimbeleli wa Tisimu, i wo hundzeleta zvilo kutani ku wula zvilo zvo kala zvi nga hi lisine a cikhati a ngaku ndzi ta dhumisa a vito ga Nungungulu “kala kupindzuka”, hi kuya hi Lisimu 61:8?

Ahihi. Lezvi Dhavhidha a nga tsala a hi mawunwa, lisine.

Ehleketa hi lezvi a nga tsala ka vhesi legi ni ka mavhesi man’wani yo fana. I te: ‘Ndzi ta dhumisa a vito ga wena kala kupindzuka, kasi ndza tatisa a zvifungo zva mina siku ni siku.’ ‘Hosi Nungungulu wa mina, ndzi ta ku dhumisa hi mbilu ya mina yontlhe, ndzi kulisa a vito ga wena kala kupindzuka.’ ‘Ndzi ta khesa vito ga wena kala kupindzuka.’ — Lis. 61:8; 86:12; 145:1, 2.

Dhavhidha i wa nga hundzeleti zvilo, a ti byela ku a nga tafa. I wa zvi tiva ku Jehovha i wa wulile ku a vanhu va tafa hi kota ya ciwonho, niku yena Dhavhidha futsi i ti wulele lisine aku muwonhi. (Gen. 3:3, 17-19; Lis. 51:4, 5) I wa zvi tiva ku hambu vanhu va nga tsakelwa hi Jehovha, vo kota Abrahama, na Isaka na Jakobe, va file. Makunu Dhavhidha i wa zvi tiva ku yenawu i tafa. (Lis. 37:25; 39:4) Kanilezvi, lezvi a nga wula ka Lisimu 61:8, zvi komba kutiyimisela kakwe ni kuxuva loku a nga hi nako ka ku dhumisa Nungungulu kala kupindzuka, ku nga ku mu dhumisa wutomini gakwe gontlhe. — 2 Sam. 7:12.

Ka zvikhati zvin’wani, lezvi Dhavhidha a nga tsala zvi wa yelana ni lezvi a nga zvi hanyile, kota lezvi hi zvi wonako ka magezu ya laha hehla ka cipimo, ka Lisimu 18, 51, ni 52. Ka Lisimu 23, Dhavhidha i wulawulile hi Jehovha kota murisi a nyikako wurangeli, kuchavelela ni kuvhikela. Dhavhidha i wa hi murisi wa tshamela lego, niku i wa lava ku tirela Nungungulu ka ‘masiku wontlhe ya kuhanya kakwe’. — Lis. 23:6.

A cin’wani zvi lavako ku hi ci alakanya, ku hi Jehovha a nga pimisela Dhavhidha lezvaku a tsala magezu lawo. Lezvi a nga tsala zvi patsa ciphrofeto ca zvilo zvi nga wa ta maheka cikhatini ci nga hata. Hi cikombiso, ka Lisimu 110, Dhavhidha i wulawulile hi cikhati leci a Hosi yakwe yi nga wa ta tshama ‘reveni ga [Nungungulu] ga cinene’ le tilweni yi tlhela yi nyikiwa ntamu wa hombe. Kasi yi maha yini? Kasi ku hlula valala va Nungungulu ni ku ‘lamula cikari ka matiko’ laha misaveni. Dhavhidha i wa hi wa lixaka la Hosi leyo, Mesiya, loyi a nga wa ta fuma na a hi le tilweni a tlhela ava “mupristi kala kupindzuka”. (Lis. 110:1-6) Jesu i tiyisile lezvaku a ciphrofeto ci nga ka Lisimu 110 ci wulawula hi yena niku ci wa ta tatiseka ka cikhati ci nga hata. — Mat. 22:41-45.

Kunene, Dhavhidha i pimiselwe ku tsala zvilo zva cikhatini cakwe ni zva cikhati ci tako laha a to vhuxiwa a ti buza hi ku dhumisa Jehovha kala kupindzuka. Lezvo zvi hi vhuna ku wona ku Lisimu 37:10, 11, 29 li wula zvilo zvi nga wa ta maheka le Izrayeli ka cikhati li nga tsaliwa hi cona ni lezvi zvi to maheka misaveni yontlhe cikhatini ci tako a cikhati leci Nungungulu a to tatisa zvitsumbiso zvakwe. — Wona a paragrafo 8 ya ndzima “U tava na mina Paradhiseni” ka Murindzeli yaloyi.

Hikwalaho, a Lisimu 61:8 ni mavhesi man’wani ma nga ni mongo wo fana ni vhesi legi ma komba lezvaku Dhavhidha i wa lava ku dhumisa Jehovha le Izrayeli kala afa. Niku ma komba a lisine la lezvi Dhavhidha a to maha cikhatini ci tako, a cikhati leci Jehovha a to mu vhuxa.