A Ciwonho ca hosi Dhavhidha

A cikhati leci Sawule a ngafa, Dhavhidha i no maha hosi. Ka cikhati leco, i wa hi ni 30 wa malembe. Loku ku hundzile malembe yo kari na a hi hosi, ka wusiku go kari na a hi le hehla ka yindlu yakwe ya wuhosi, i no wona wasati wo saseka nguvhu. I no tiva lezvaku a vito gakwe hi Bhatexebha niku i wa hi sati wa musochwa wa ku hi Uriya. Dhavhidha i no vitanisa Bhatexebha le ndlwini yakwe ya wuhosi. I no hlengela masango naye, Bhatexebha a xura nyimba. Dhavhidha i no zama ku fihla lezvi a nga mahile. I no byela komandante wa masochwa yakwe lezvaku a rangisa Uriya le phambeni ka masochwa, va gumesa va hlehla kasi Uriya a dawa hi valala. Andzhako ka ku Uriya a delwe, Dhavhidha i no teka Bhatexebha a maha sati wakwe.

Hambulezvo, Jehovha i wa zvi wonile zvontlhe a zvilo zva kubiha lezvi zvi nga humelele. Zvini lezvi Jehovha a nga maha? I no ruma muphrofeti Natani lezvaku aya ka Dhavhidha. Loku a chikele, i no mu hlawutela lezvi: ‘Ku wa hi ni wanuna wo kari wo ganya a nga hi ni tiyivhu to tala, ni mun’wani wa cisiwana a nga hi ni ciyivhana cin’we basi a nga ci randza nguvhu. Loyi wo ganya i no mu tekela ciyivhana caleci ca cin’we a nga hi naco loyi wa cisiwana’. Dhavhidha i no zangara nguvhu, aku: ‘A wanuna loye wo ganya i ringanelwa hi ku dawa’! Natani i no gumesa a byela Dhavhidha, aku: ‘A wanuna loye wo ganya hi wena’! Dhavhidha i no bayiseka nguvhu, a gumesa a vhumela ciwonho cakwe ka Natani, aku: “Ndzi wonhele Jehovha.” Dhavhidha ni maxaka yakwe va no xaniseka nguvhu hi kota ya ciwonho leco. Jehovha i no tsayisa Dhavhidha kanilezvi i mu tsikile a hanya hakuva i wa hi munhu wo tsumbeka ni wa ku ti koramisa.

Dhavhidha i wa lava ku mu akela tempeli Jehovha. Hambulezvo, Jehovha i no hlawula n’wana wakwe Solomoni lezvaku a mu akela. Dhavhidha i no sangula ku longisela zvontlhe zvi nga laveka kasi Solomoni a aka, a gumesa aku: ‘A tempeli ya Jehovha yi fanele kuva yo saseka ni yo hlamalisa nguvhu. Solomoni wa ha hi n’wanana nguvhu, kanilezvi ndzi ta mu vhuna ku longisela lezvi zvi lavekako’. Dhavhidha i no humesa mali yo tala nguvhu a nyikela kasi yi seketela ntiro wa ku aka tempeli, a tlhela a lava vanhu va zvi kotako khwatsi ku tira. I no hlengeletela ouro, ni prata, ni tisinya ta misedhare ti ngata hi Tire ni Sidhoni. A  cikhati leci Dhavhidha a nga hi kusuhani ni kufa, i no nyika Solomoni a planta ya tempeli. I no mu byela lezvi: ‘Jehovha i ndzi rumile lezvaku ndzi tsala timhaka leti kasi ndzi ku nyika. Jehovha i ta ku vhuna. U nga chavi. Tiya u sangula ku tira’.