Zikarato Mutini Wa Davida

ANZHAKO ka loku Davida a sangulile ku fuma le Jerusalema, Jehova i nyika butho gakwe a kuhlula ko tala mahlweni ka valala vabye. Jehova i wa tsumbisile ku nyika a tiko ga Kanani ka vaIsraeli. Makunu, hi xivuno xa Jehova, gontlhe a tiko legi gi nga wa tsumbisilwe vona gi maha gabye hi magumo ya kona.

Davida mufumeli wa mu nene. Yena i ranza Jehova. Kasike xinwe xa zilo zo sangula lezi a zi mahako anzhako ka kuva a khozisile Jerusalema ku tisa a nghaxa ya xivumelwano kwalaho. Niku i xuva ku aka a tempeli kasi ku yi veka kona.

Ka xikhati xo kari xa wutomi gakwe anzhako ka lezo, Davida i maha xihoxo xa hombe. Davida wa zi tiva ku ngalo zi bihile ku teka nchumu wu lumbako munwani munhu. Kanilezi, ka gambo go kari, loku yena a hi le hehla ka langwa la yindlu yakwe ya wuhosi, i cuwuka lahasi a wona a wasati wo saseka nguvu. A vito gakwe hi Batexeba, ni nuna wakwe munwe wa masochwa yakwe a vitwako Uria.

Davida i mu lava nguvu Batexeba laha ka kuza a mu vitanisa ata le ndlwini yakwe ya wuhosi. A nuna wakwe i hava i le kulweni. Zalezo, Davida i etlela naye zonake hi nzhako ka xikhati Batexeba i tiva lezaku i ta pswala nwanana. Davida i karateka nguvu a tlhela a rumela gezu ka Joabe a nduna ya butho gakwe lezaku a rangisela Uria le kulweni kasi a fela ku dawa. Loku Uria a file, Davida i tekana na Batexeba.

Jehova i zangarela nguvu Davida. Hikwalaho i rumela nanza gakwe Natani a ku ya mu byela zionho zakwe. Wa zi kota ku wona Natani kwalaho na a wulawula na Davida. Davida i ti sola nguvu hi lezi a mahileko, hikwalaho Jehova a nga mu dayi. Kanilezi Jehova i ngalo: ‘Kota lezi u mahileko zilo lezi zo biha, u tava ni zikarato zo tala mutini wa wena.’ Davida i na ni zikarato zo tala hakunene!

Hi kusangula, kufa a n’wana wa Batexeba. Makunu Amnoni a n’wana wa Davida wa matewula i lulamisa matshamela kasi ku Tamara a makabye wakwe wa xisati a kumeka a hi yece zonake a mu pfinya a etlela naye. Absalome n’wana Davida i zangara nguvu hi lezo laha ko kala a daya Amnoni. Anzhako, Absalome i kuma thomo mahlweni ka vanhu vo tala, zonake a ti maha hosi. Hi kugumesa, Davida i hlula Absalome le yimpini, laha Absalome a dawako. Ina, Davida i na ni zikarato zo tala.

Laha zontlhe zilo lezo zi mahekako, Batexeba i pswala n’wana a vitwako Solomoni. Loku Davida a khosahele na a babya, a n’wana wakwe Adonija i ringeta ku ti maha hosi. Hizalezo Davida i leletela mupristi a vitwako Zadoki lezaku a ya chulula mafura hlokweni ya Solomoni kasi ku komba lezaku Solomoni i tava hosi. Xikhatanyana nzhako ka lezo Davida ifa na hi ni tanga ya 70 wa malembe. Yena i fumile a 40 wa malembe, kanilezi Solomoni hi yena hosi ya Israeli makunu.