Nzi wa ti hanyela ga mina ntsena

KALE KA MINA:

Ka malembe yo sangula ya wutomi ga mina, a ngango wa hina wu wa hanya le Leipzig, Mutsuwuka-gambo wa Alemanha, kusuhani ni mbhingano wa tiko ga Tcheca ni ga Polônia. Laha nzi nga hi ni 6 wa malembe, a ngango wa hina wu lo rura wuya ka matiko manwani hi kota ya ntiro wa papai — a kusangula hi yile Brazil zonake hiya Equador.

Laha nzi nga hi ni 14 wa malembe, nzi lo rumelwa nzi ya gonza le Alemanha na nzi tshama mayeni. Kota lezi a vapswali va mina va nga tshama kule, le Amerika Dzonga, nzi wa fanele ku ti hlayisa ha nzoce. Nzi lo sangula ku ti tsumba nguvu. Nzi wa nga hi na mhaka ni lezi a mitiro ya mina yi nga va khumbisa zona vanwani.

A xikhati lexi nzi nga hi ni 17 wa malembe, a vapswali va mina va lo wuya le Alemanha. Kusanguleni, nzi wa tshama navo. Kanilezi a moya lowu nzi nga hi nawo wa kutifuma wu mahile lezaku nzi nga zi koti a ku hanya na nzi rangelwa hi vapswali va mina. Laha nzi nga hi ni 18 wa malembe, nzi lo suka laha kaya.

Nzi wa karateka nguvu hi ku lava ku tiva lezaku kasi hi hanyela yini ke. Anzhako ka kuva nzi hlolile mahanyela, mitlawa ni tihlengeletano to hambanahambana, nzi lo wona lezaku a ndlela ya yi nene ya ku tirisa wutomi ga mina ku wa hi ku ti buza hi ku wona a kusaseka ka misava ya hina na vanhu va nga se yi hahlula.

Nzi lo xava mota, zonake nzi suka le Alemanha, nziya Afrika. Hambulezo, na ku nga se hunza xikhati xo leha, nzi lo kurumeteka ku tlhela Europa kasi ku ya longisisa a mota wa mina. Ka siku go kari, anzhako ka xikhatanyana, nzi wa hi pswhani le Portugal. Kuve kwalaho nzi nga maha xiboho xa ku nyima ku enza hi mota zonake nzi sangula ku enza hi ngalava.

Nzi lo ti patsa ni ntlawa wo kari wa majaha ma nga kari ma ti longisela ku tlhatuka a Bimbi ga Atlântico. Xikari kabye nzi lo tivana na Laurie, loyi a nga wa tava sati wa mina. Kusanguleni, hi loya ka tiko ga Caribe gi nga xikari ka bimbi. Anzhako ka xikhatanyana na hi hi le Porto Rico, hi lo tlhela Europa. Hi wa lava ku kuma ngalava hi nga wa ta yi cica yi maha ngalava leyi zi kotekako ku a munhu a hanya ka yona. Kanilezi, anzhako ka tihweti tinharu ntsena na hi hlota, a makungo ya hina ma lowa hasi hi xitshuketi. Nzi lo khonwa hi masochwa ya Alemanha.

Nzi lo mbheta 15 wa tihweti na nzi tira ni masochwa yo tira lomu matini ya Alemanha. Nzeni ka xikhati lexo, mina na Laurie hi lo chada zonake hi ti longisela ku simama ni wutomi ga hina ga kufambafamba. Xikhatanyana mahlweni ka ntiro wa wusochwa, hi wa xavile a xipanze xo kari xa ngalava yo ponisa wutomi. A xikhati nzi nga hi ntirweni wa wusochwa, nzi lo lulamisela a xipanze lexo xa ngalava lezaku xiva xingalavana xa tanga. Hi lo maha xiboho xa ku hanya ka xingalavana lexo hi simama ku ti buza hi ku wonetela a kusaseka ka misava ya hina. Ku vile ka xikhati lexi — anzhako ka ntiro wa mina wa wusochwa kanilezi na nzi nga se mbheta a ngalava — ​nzi nga kumana ni Timboni ta Jehova zonake nzi sangula ku gonza Biblia.

LEZI A BIBLIA GI NGA CICISA ZONA A WUTOMI GA MINA:

Kusanguleni, nzi wa nga xi woni a xilaveko xa kuva nzi cica zotala wutomi ga mina. Nzi wa tsalisile a muchado ni wasati loyi nzi nga tshama naye, niku nzi wa sina nzi tsikile ku dzaha. (Va Le Efesusi 5:5) Xungetano hi makungo ya hina ya ku renzelekela misava yontlhe, nzi wa alakanya lezaku a kuva nzi tirisa wutomi ga mina kasi nzi wona a kusaseka ka zivangwa za Nungungulu, ku wa hi nchumu wa wu nene.

Hambulezo, hi lisine, nzi wa fanele ku cica zokari — nguvunguvu a wumunhu ga mina. Kota lezi nzi nga hi munhu wa matshanza ni wa ku ti tsumba nguvu, a kupima ka mina nzi wa ku vekile ka wutlhari ga mina ni ka lezi nzi nga zi kota ku maha ntsena. Nzi wa ti hanyela ga mina ntsena.

Ka siku go kari, nzi lo lera a Kanelo ya Jesu ya le Xitsungeni. (Mateu zipimo 5-7) Kusanguleni, nzi wa nga zi zwisisi lezi Jesu a nga zi wula xungetano hi ku kuma litsako. Hi xikombiso, i wulile lezaku va tsaka la’va nga ni ndlala ni tora. (Mateu 5:6, Tradução do Novo Mundo) Nzi lo ti wutisa ku zi nga mahisa kuyini ku a munhu loyi a nga lomu kuvumaleni a tsaka ke. Laha nzi ngaya mahlweni nzi gonza, nzi lo wona lezaku hontlheni hi na ni xilaveko xa moya. Kanilezi, a kusangula ku laveka lezaku hi ti koramisa hi vumela lezaku hakunene hi naxo, hi kona hi to zi kota ku xi tatisa. Zi tano hi laha Jesu a nga wula ha kona: “Va tsaka lava va khatalako hi xilaveko xabye xa moya.” — Mateu 5:3, NM.

Anzhako ka kuva hi sangulile ku gonza a Biblia le Alemanha, mina na Laurie hi lo rura hiya França, hi nzhako ka xikhati hiya Italia. Ni kwihi hi ngaya kona, hi wa kuma Timboni ta Jehova. Nzi wa khumbiwa nguvu hi kuranzana ni kuzwanana ka tona. Nzi lo zi wona khwatsi lezaku a Timboni hakunene ti ranzana hi liranzo la wumakabye misaveni yontlhe. (Johani 13:34, 35) Hi kufamba ka xikhati, mina na Laurie hi lo bapatizwa kota Timboni ta Jehova.

Anzhako ka lezo, nzi lo simama ku cica zokari ka wumunhu ga mina. Mina na Laurie hi lo maha xiboho xa ku relela hi mbhiri ya Afrika hi tsemakanya a bimbi ga Atlântico hiya Estados Unidos. Kuve kwalomo bimbini — na ku hi hina vambirana basi hi nga hi ka xingalavana lexiya xa xitsongwani nguvu na hi ranzelwe hi mati yo tala nguvu — ​nzi nga zi zwisisa khwatsi lezaku a nzi wa nchumu loku nzi ti fananisa ni Muvangi wa hina wa Hombe nguvu. Kota lezi nzi nga hi lomu bimbini, na nzi nga hi na xo maha, nzi lo mbheta xikhati xo tala na nzi lera a Biblia. Nzi lo khumbiwa nguvu hi matimu ya wutomi ga Jesu laha misaveni. I wa hi munhu wo mbhelela wa wutlhari ga hombe ku hunza ni wihi nzi nga mu alakanyelako, hambulezo a nga ti lavelangi wudzunzo. I wa nga ti hanyeli gakwe ntsena, kanilezi i wa hanyela ku maha kuranza ka Nungungulu.

Laha nzi nga ehleketa hi xikombiso xa Jesu, nzi lo wona lezaku nzi wa fanele ku rangisa Mufumo wa Nungungulu wutomini ga mina wutshanwini ga ku rangisa zilo zo tala lezi nzi nga zi ranza ku maha. (Mateu 6:33) A xikhati lexi mina na Laurie hi nga chikela le Estados Unidos, hi lo maha xiboho xa ku tshama seyo zonake hi veka kupima ka hina ntirweni wa Nungungulu.

LEZI NZI NGA VUNEKISA ZONA:

A xikhati lexi nzi nga hanya wutomi ga ku ti tsumba nguvu, nzi wa tolovela ku nga tsumbi ziboho za mina. Kanilezi, zezi, nzi kumile xibuka xa wutlhari go tsumbeka kasi ku nzi rangela. (Isaya 48:17, 18) Nzi na ni wutomi go tsakisa kambe, legi nzi nga kala nzi nga hi nago — ku nga ku khozela Nungungulu ni ku vuna vanwani lezaku va mu tiva.

Hi ku tirisa matshinya ya milayo ya Biblia, mina na Laurie hi tiyisile nguvu a kuzwanana ka hina kota sati ni nuna. Hi tlhelile hi katekiswa nguvu hi kuva ni nhanyana wo saseka, loyi a kulileko na a tiva Jehova a tlhela a mu ranza.

Kanilezi ha kumana ni zikarato. Hambulezo, hi ku vuniwa hi Jehova, hi ti yimisele ku nga tshuki hi tsika ku mu tirela kutani ku tsika ku mu tsumba. — Mavingu 3:5, 6.