Xinyikiwo Xo Hlawuleka Le Japani

KA mutlhangano wo hlawuleka wu mahilweko le Nagoya, Japani, hi 28 ka Abril wa 2013, Anthony Morris wa Hubye yi Fumako i lo maha xitiviso xo tsakisa xi nga hlamalisa a vaingiseli — ku nga kuhumeswa ka bhuku giswa hi xiJapani gi nga ni hloko ya mhaka The Bible — The Gospel According to Matthew. (A Biblia — A Ivangeli ya Mateu) A vanhu vo hunza 210.000 lava va nga wona mutlhangano lowo, na va hi kwalaho kutani hi internet, va loba mandla va hlwela.

A wugandli legi ga 128 wa maphajina ga Ivangeli ya Mateu gi susilweko ka Tradução do Novo Mundo hi xiJapani, gi wa hi go hlawuleka. Makabye Morris i lo tlhamusela lezaku gi mahelwe “ku khatalela zilaveko za simu ga Japani.” Gi tshamisile kuyini? Hikuyini gi longiselweko? Gi amukeliswa kuyini?

GI TSHAMISILE KUYINI?

A tshamela ga Mateu gi hlamalisile vaingiseli. A maletela ya xiJapani u nga ma tsala maya xineneni hambu kuya hasi, niku a mabhuku yo kari — a ku patsa ni mabhuku ya hina ya zezana — ma tsaliwa ma cuwuka xineneni. Hambulezo, a magezu ya bhuku legi ga giswa ma tsalilwe ma cuwuka hasi, ku nga matsalela ma tolovelekileko ka maphepha-hungu ni ka mabhuku ya nduma ya xiJapani. A vagonzi vo tala va xiJapani va ma wona ma hi matsalela yo hehuka ku lera. Tlhatakumbiri, a tihloko ta mhaka ta maphajina ti rurisilwe ti maha zihlokwana za mhaka, kasi zi olovela vagonzi a ku wona a timhaka-tshinya.

A vamakabye le Japani va lo tekela ku wona mabhinzu ya matshamela ya Mateu. A makabye wo kari wa xisati a nga kwalomo ka 80 wa malembe i te ngalo: “Nzi wa gonzile makhati yo tala a bhuku ga Mateu, kanilezi a matsalela lawa yaku a maletela ma cuwuka hasi ni zihlokwana za mhaka zi nzi vunile ku zwisisa khwatsi a Kanelo ya le Xitsungeni.” A makabye wo kari wa xisati a ha hiko muswa i lo tsala lezi: “Nzi gonzile Mateu yentlhe hi khati ginwe. Nzi tolovele maletela yo cuwuka xineneni, kanilezi a vaJapani vo tala va tsakela maletela yo cuwuka hasi.”

GI MAHELWE SIMU GA JAPANI

Hikuyini a bhukwana legi ga ginwe ga Biblia gi nga wa ta khatalela khwatsi a zilaveko za simu ga Japani? Hambu lezi a vaJapani vo tala va kalako va nga gi tivi a Biblia, va ti yimisele ku lera bhuku legi. A wugandli legi ga Ivangeli ya Mateu gi ta vuna lava va kalako va nga se tshuka va wona Biblia lezaku vava ni lungelo ga ku kuma xipanzana xa bhuku legi go basa ni ku xi lera.

Hikuyini ku hlawulilweko a bhuku ga Mateu? A vaJapani vo tala loku vazwa a gezu “Biblia” va wona Jesu Kristu. Hikwalaho ku hlawulilwe bhuku ga Mateu hakuva gi na ni matimu ya lixaka ni kupswaliwa ka Jesu, a Kanelo yakwe ya nduma le Xitsungeni, ni xiprofeto xakwe xo hlamalisa xungetano hi masiku yo gumesa — ku nga timhaka ti to tsakelwa hi vanhu vo tala va le Japani.

A vahuweleli va Mufumo le Japani va lo sangula ku nyikela a bhuku legi ga giswa hi kuhiseka hi muti ni muti ni ka maenzo yo wuyela. A makabye wo kari wa xisati i lo tsala lezi: “Zalezi nzi na ni malungelo yo tala ya ku nyikela a Mhaka ya Nungungulu xipanzeni xa hina. Hi lisine nzi zi kotile ku nyikela bhuku ginwe ga Mateu ni gambo ga siku galego ga mutlhangano lowo wo hlawuleka!”

GI AMUKELISWA KUYINI?

A vahuweleli va gi nyikelisa kuyini a bhuku legi ga Mateu? A vanhu vo tala le Japani va ma tiva a magezu yo kota “nyangwa yo hlongana,” “ku hoxa maperola . . . ka makhumba,” ni ku “nga karatekeli za manziko.” (Mat. 6:34; 7:6, 13) Va hlamala loku vazwa lezaku a magezu lawa ma wulilwe hi Jesu Kristu. Loku va wona a magezu lawa ka Ivangeli ya Mateu, a vo tala ve ngalo: “Kale na nzi xuva ku lera Biblia khati ginwe hi wutsongwani ga kona.”

Loku a vahuweleli va maha maenzo yo wuyela ka lava va amukeleko Mateu, a kutala ka vanhu va wula lezaku va tekele ku lera xipanzana xo kari kutani gontlhe. A wanuna wo kari wa kwalomo ka 60 wa malembe i lo byela muhuweleli aku: “Nzi gi lerile makhati yo tala gi tlhela gi nzi chavelela. Nzi kombela u nzi gonzisa zinwani hi Biblia.”

Mateu i kari a kombisiwa ka wukustumunyu ga laha kubaseni. Na yi hi ntirweni lowu, a Mboni yo kari yi lo nyikela e-mail ya yona ka nhwana wo kari a vumeleko ku teka Mateu. Anzhako ka hora yinwe, a nhwana loye i lo tsalela mahungu a makabye loye, aku i lerile xipanze xa bhuku legi ga Biblia niku i lava ku tiva zinwani. Anzhako ka viki ginwe, i lo sangula xigonzo xa Biblia, niku hi xikhati xi tsongwani i lo sangula kuya mitlhanganweni.

Ku rumelwe 1.600.000 wa tikopiya ta bhuku legi ga Ivangeli ya Mateu mabandleni ya Japani, niku hweti ni hweti a Timboni ti nyikela makume ni makume ya mazana ya gona. A xingheniso xa bhuku legi xi kombisa a kuxuva ka vahumesi va gona hi magezu lawa: “Hi tsumba hi mbilu yontlhe lezaku a ku lera a bhuku legi zi ta engetela a kutsakela ka wena a Biblia.”