Nzi gonzile lezaku Jehova i na ni wuxinji niku wa tsetselela

KALE KA MINA:

Nzi kulele ka xipanze lexi a vanhu vo tala va nga hi zisiwana, doropeni ga Montreal. A xikhati lexi nzi nga hi ni ntlhanu wa tihweti ni yinwe, papai i lofa, zonake mamani a sala ni wutihlamuleli gontlhe ga ngango. Ku wa hi mina nzisana ka ntlhanu wa vana ni vanharu laha ngangweni.

Laha nzi nga kari nzi kula, a xa mina ku wa hi ku dzaha, ku kanganyisa, kulwa, ni ku tshama ni zigevenga. Laha nzi nga hi ni 10 wa malembe, nzi lo sangula ku tshama hi ku rumiwa hi zibhayi ni vanhu va nga lombisa mali. Nzi wa tolovela ku hemba nzi tlhela nzi tsaka hi ku kanganyisa vanhu hi tindlela tontlhe nzi nga ti kota. A wutomi lego gi wa hi lomu nkhateni.

A xikhati lexi nzi nga hi ni 14 wa malembe nzi lo engetela tindlela ta ku kanganyisa vanhu. Hi xikombiso, nzi wa xava mawachi yo tala yo pendiwa hi nzalama, mapulsera, ni tiphera, zonake nzi zi vekela xifungo xi nga komba lezaku za nzalama ya yi nene, nzi gumesa nzi zi xavisa lomu maruweni ni lomu ka maparki ma nga tele hi zitolo za hombe. Zi wa nga nzi karateli a ku kuma mali, niku lezo zi wa nzi tsakisa. Ka khati go kari nzi lo kuma mali yo ringana 10.000 wa madolari (270.000 hi mametikal) hi siku ginwe basi!

Laha nzi nga hi ni 15 wa malembe nzi lo vumala ko tshama kona, anzhako ka kuva nzi hlongolilwe ka xikola xo kari nzi nga tshama ka xona. Nzi wa etlela lomu maruweni, lomu maparki, kutani kaya ka ni wihi munghana nzi nga mu kuma laha ndleleni.

Hi kota ya mitiro ya mina yo kanganyisa, nzi wa tolovela ku xuxisiwa hi maphoyisa. Kota lezi nzi nga kala nzi nga xavisi a zilo zo yiviwa, a nzi tshukangi nzi nghena paxo. Hambulezo, nzi wa nyikela mali yo tala nguvu ya ku xavelela hi kota yo kanganyisa, kuva ni zilo zo kala zi nga hi za lisine, ni ku xavisa zilo na nzi nga vumelelwangi. Kota lezi nzi nga kala nzi nga chavi munhu, nzi wa famba nzi lonza a mali ya valombise va mali. Lezo zi wa hi ni mhango, niku ka zikhati zinwani nzi wa maha lezo na nzi hi ni xibhamu. Ka zikhati zinwani nzi wa tira ni ntlawa wa zigevenga.

LEZI A BIBLIA GI NGA CICISA ZONA A WUTOMI GA MINA:

Hi khati go sangula nzi lozwa zo kari xungetano hi Biblia a xikhati lexi nzi nga hi ni 17 wa malembe. Nzi wa tshama zinwe ni xigango xa mina a xikhati lexi xi nga sangula ku gonza a Biblia ni Timboni ta Jehova. Hambulezo, lezi a Biblia gi nga zi beletela zi wa nga nzi tsakisi, hikwalaho, nzi lo mu tsika zonake nzi ya tshama ni wasati munwani, loyi nzi nga kari nzi gangisana naye.

A zilo zi lo cica a xikhati lexi a xigango xa mina xa wumbiri xonawu xi nga sangula ku gonza ni Timboni ta Jehova! A wutomi gakwe gi lo cica, niku nzi lo hlamaliswa hi lezi a nga sangula kuva munhu wo rula ni wa lihlaza-mbilu. Nzi lo rambiwa kuya ka Salawu ya Mufumo ya Timboni ta Jehova zonake nzi vumela. Nzi lo amukelwa khwatsi hi vanhu va nga kombisa wunene. Zi wa hambene nguvu ni lezi nzi nga zi tiva lomu tikweni! Nzi wa nga se tshuka nzi tizwa na nzi ranziwa hi maxaka ya mina; a nzi zangi nzi khatalelwa ne ku kombisiwa liranzo kusukela wunwananeni ga mina. A liranzo leli nzi nga li wona xikari ka Timboni ta Jehova hi yaleyo nzi nga yi lava. A xikhati lexi a Mboni yo kari ya Jehova yi nga ti nyikela kasi ku nzi gonzisa a Biblia, nzi lo tekela ku vumela na nzi tsakile.

Nzi alakanya lezaku lezi nzi ga zi gonza lomu ka Biblia hi zona zi nga ponisa a wutomi ga mina. Nzi wa mahile makungo ya kuyiva zinwe ni vanghana va mina va vambiri kasi nzi hakhela a mangava ya mina ya tibedja, lawa ma nga ringana 50.000 wa madolari (1.350.000 hi mametikali). A nzi no ku tsaka hi lezi nzi nga kala ku zi maha! A vanghana va mina va kale va lo simama ni kuyiva. A munwe wabye i lo khonwa, loyi munwani i lo dawa.

Laha nzi nga simama ku gonza a Biblia, nzi lo wona lezaku ku wa hi ni zilo zo tala nzi nga fanele ku cica. Hi xikombiso, nzi lo gonza lezi a Biblia gi zi wulako ka 1 Va Le Korinte 6:10. Gi ngalo: A “makhamba, ni zinaveli, ni zidakwa, ni lava va rukatelako, ni vaphangi; a va kunghaho va nga taga a tshomba ya mufumo wa Nungungulu.” A xikhati lexi nzi nga gonza a vesi legi, nzi lo zwisisa lezi a xiyimo xa mina xi nga bihisile zona, zonake zi nzi rilisa. Nzi lo wona lezaku nzi wa fanele ku cica wutomi ga mina hi kumbhelela. (Va Le Roma 12:2) Nzi wa hi wa tiholova ni wa ku ranza kulwa. Niku nzi wa hanya hi kuhemba.

Kanilezi, nzi lo gonza kambe lomu ka Biblia lezaku Jehova i na ni wuxinji niku wa tsetselela. (Isaya 1:18) Nzi lo khongela hi mbilu yontlhe, nzi khongotela Jehova lezaku a nzi vuna a ku ti tlhatlhisa ka mahanyela lawa nzi nga hi nawo. Hi ku vuniwa hi Jehova, nzi lo zi kota ku cica a wutomi ga mina hi kutsongwani-kutsongwani. A zambo go sangula gi vile ka xikhati lexi mina ni xigango xa mina hi nga tsalisa muchado.

A xikhati lexi nzi nga chada, nzi wa hi ni 24 wa malembe, lezo na nzi hi ni vana vanharu. Makunu nzi wa fanele ku lava ntiro wa wu nene. Hambu lezi nzi nga kala nzi nga gonzangi nguvu lezo na nzi nga hi na certificado go kari. Nzi lo tlhela nzi khongela hi mbilu yontlhe ka Jehova. Zonake nzi famba nzi lava ntiro. Nzi lo byela a vatholi lezaku nzi lava a ku cica wutomi ga mina zonake nzi maha ntiro wo tsumbeka. Ka zikhati zo kari, nzi wa tlhamusela lezaku nzi gonza Biblia niku nzi xuva kuva munhu wa mahanyela ya ma nene. A vatholi vo tala va lo ala ku nzi thola. Hi kugumesa, laha nzi nga kari nzi bhulisana ni mutholi wo kari zonake nzi mu tlhamusela a zikarato lezi nzi nga zi hanyile, i lo nzi byela lezi: “A nzi zi tivi a ku hikuyini, kanilezi xi kona xi nzi byelako lezaku nzi fanele ku ku thola.” Nza kholwa lezaku lowo wuve hlamulo wa mikhongelo ya mina. Hi kufamba ka xikhati, mina ni sati wa mina hi lo bapatizwa hi maha Timboni ta Jehova.

LEZI NZI NGA VUNEKISA ZONA:

Nza ha hanya kala nyamutlha hi kota ya lezi nzi lanzelako a matshinya ya milayo ya Biblia ni ku hanya hi ndlela ya wuKristu. Nzi na ni ngango wa wu nene. Hi ku tiyiseka lezaku Jehova i nzi tsetselele, nzi na ni litsako hi kuva ni livalo li basileko.

Ka 14 wa malembe ma hunzileko kala zezi, nzi mbheta 70 wa tihora hweti ni hweti ntirweni wo xumayela, na nzi vuna vanwani lezaku va tiva lezi a Biblia gi zi gonzisako, niku zezanyana a sati wa mina yenawu i lo nghenela a ntiro lowu. Hi xipimo xa 30 wa malembe, nzi vile ni litsako la ku vuna 22 wa vatiri-kulori lezaku va sangula ku khozela Jehova. Nza ha simama ku famba lomu ka zitolo za hombe — kanilezi, na nzi nga yeli ku ya kanganyisa vanhu a ku fana ni kale. Zezi loku nziya nzi yela ku ya bhulela vanwani hi kukholwa ka mina. Nzi lava ku va nyika zilo zo kari: A kutsumba ka ku hanya misaveni yiswa yi tako leyi a ka yona ku to kala ku nga ha hi na vakanganyisi. — Tisimu 37:10, 11.