I lo wona lezaku a liranzo hi lona li tirako laha kugeni

A KUGA zinwe mezeni ya Jehova i nchumu wu khanyiswako nguvu hi malanza yakwe xontlhe xikhati. A xikhati lexi a vanhu va Nungungulu va tlhanganako kasi ku maha mubuzo wa moya, a kuga zinwe zakuga za xiviri zi engetela litsako labye.

Hi Setembro wa 1919, a Zigonzani za Biblia zi lo maha gotsovanyano wa 8 wa masiku le Cedar Point, Ohio, Estados Unidos. A mahotela ma wa ta va nyika wutshamu go etlela ni zakuga a vatsombani, kanilezi ku lo chikela makume ya mazana ya vanhu ku hunza lava va nga rinzelwe. Hi ku wona xidlemo lexo, a vatiri va mahotela va lo zi chokola vontlhe hi khati ginwe. Na a nga ha tivi xo maha, a murangeli wa hotela i lo wutisa lezaku a ku na vaswa va ku va nga vunetela xikari ka vatsombani ke. Ku lo huma votala va nga ti yimisele ku vunetela. A munwe wabye hi Sadie Green. I ngalo: “Nzi wa nga se tshuka nzi tira kota muphameli wa zakuga, kanilezi zi tsakisile nguvu.”

Ka malembe ma nga lanzela, a malulamiselo ya zakuga gotsovanyanweni ma mahile lezaku a vatiri vo tala va kuziranza va kuma lungelo ga ku tirela vamakabye vabye. A ku tira zinwe ni makholwa-kulobye zi vunile vaswa vo tala kambe lezaku va ti vekela mixuvo ya moya. Gladys Bolton i mahile ntiro lowu gotsovanyanweni wa 1937. I lo hlawutela lezi: “Nzi tivene ni vanhu va matshamu manwani, nzi tlhela nzizwa lezi va nga hlulisa zona a zikarato zabye. Hi kwalaho nzi nga sangula kona kuva ni mixuvo ya kuva phayona.”

Beulah Covey, a nga munwe wa vatsombani, i ngalo: “A kuhiseka ka vatiri lavo ku maha lezaku zontlhe zi famba khwatsi a ku khwatsi i wachi.” Hambulezo, a ntiro lowu wu wa hi ni zikarato za wona. Hi 1969, Angelo Manera i lo ya zi tiva na a chikele Kampwini ya Dodger le Los Angeles, Califórnia, lezaku i yimisilwe kasi ku tira kota muphameli wa zakuga. I bikile lawa: “A mahungu lawo ma lova xinwe xa zilo zi nzi panzileko nguvu mbilu wutomini ga mina!” A ku longisela gotsovanyano zi wa patsa ku kela musele wa 400 wa timetro hi kuleha kasi ku fambisa phayiphi wa gás kala kozinyeni!

Le Serra Leoa hi 1982, a vatiri vo hiseka va kuziranza va wa fanele ku ranga hi ku basisa a wutshamu va guma va aka a wutshamu go gela kona hi ku tirisa materiali lawa va nga hi nawo laho basi. Hi 1951, le Frankfurt, Alemanya, a vamakabye vo tlhariha va lo lugara mova wa hombe wu nga hi ni wutshamu ga ku kungeta 40 wa makandarinya. A 30.000 wa vanhu va loga hi hora yinwe. Kasi ku hungula a ntiro wa lava va nga hi ka xipanze xa ku hlaza zibya, a vatsombani va wata ni mikwana yabye ni magarifu hi kaya. Le Yangon, Myanmar, a vabhiki va nga alakanyela vanwani va lo tirisa tikhanakhana ti tsongwani ntsena to fehla ka zakuga lezi va nga bhikela vatsombani va matiko manwani.

“VAGA NA VA YIMILE”

A ku yima laha munwini a folela zakuga gotsovanyanweni wa 1950 le Estados Unidos zive makatekwa ka Annie Poggensee. I lo wula lezi: “Nzi lova ni mabhulo yo eta ni yo tiyisa hlana ni vamakabye vambiri va xisati lava va nga tile hi Europa hi ngalava.” A munwe ni munwani vabye i lo hlawutela lezi Jehova a mu vunisileko zona kasi kuta laha gotsovanyanweni. Annie i bika lawa: “A ku na munhu a nga tsakile ku hunza vamakabye lavo. A xikhati xa ku rinzela laha bhixeni — ni mumu — zi wa nga hi nchumu ka vona.

Migotsovanyanweni yo tala ya hombe, ku wa gwimbiwa matenda ya hombe, ku folisiwa timeza to ringana kuga na u yimile, lezi zi nga kuca a vagi lezaku vaga hi kuhatlisa kasi ku siyela wutshamu vanwani. Xana yi kona ndlela yinwani yi nga hi kona ya ku gisa makume ya mazana ya vanhu xikhatini lexo? A wanuna wo kari a nga hiko Mboni i lo wula lezi: “A wukhongeli legi ga hlamalisa. Vaga na va yimile.”

A masochwa ni maphoyisa ma wa gi hlamala a wutlhari ni kuxaxametwa ku nene ka zilo loku va nga ku wona. Anzhako ka ku hlola a wutshamu legi hi nga gela ka gona Kapwini ya Yankee le Doropeni ga Nova York, a masochwa ya Butho ga Estados Unidos ma lo kuca Major Faulkner wa Xipanze xa Yimpi xa Bretanya lezaku a hlolawo. Hikwalaho, yena ni sati wakwe va lota Mutlhanganweni wa “Triumphant Kingdom” (Mufumo wu Humelelako) le Twickenham, Inglaterra. I lo wula lezaku wa zi wona ku a wutshamu lego ga ku gela gi rangelwa hi liranzo.

Hi makume ya malembe, a vatiri va kuziranza va lo phamela zakuga za zi nene na zi nga duri kasi ku vuna vatsombani. Kanilezi a kutala ka zikhati a ntiro lowu wa hombe wu wa lava lezaku a vatiri vo tala va kuziranza va mbheta tihora to tala na va tira va tlhela va luza zipanze zo kari za longoloko kutani longoloko wontlhe. A malulamiselo ya zakuga gotsovanyanweni ma lo oloviswa ka matshamu yo tala kumbheleni ka va 1970. Hi kulanzela, kusukela 1995, a vatsombani va lo kombelwa kuta ni zakuga za vona hi kaya. Lezo zi vunile lava va nga longisela ni ku phamela zakuga lezaku va vuneka hi longoloko wa moya ni mabhulo ni maKristu-kulobye.a

Jehova a ngo no ku tsaka hi lava va nga kulula va nwatseka kasi ku tirela makholwa-kulobye! A vokari va nga ha navela masiku lawo yo tsakisa ya ku tira kulongiseleni ka zakuga. Kanilezi a xo tiya hi lexi: A liranzo la ha simama kuva lona li lungako a migotsovanyano ya hina. — Joh. 13:34, 35.