U WA ZI TIVA?

A maribye ya zigayo ma wa tirisiswa kuyini xikhatini xa kale?

A maribye ya zigayo ma wa tiriselwa ku gaya timbewu (mavele) lezaku tiva mapa yo maha zibaba. Ka mingango yo tala siku ni siku a vavasati kutani malanza hi vona va nga kari va gaya. A guwa ga ku gaya gi wa tolovelekile nguvu ka vanhu va xikhatini xa kale. — Eksodusi 11:5; Jeremia 25:10.

A zithombe za Gipite wa kale zi komba lezi zi nga tirisiswa zona a zigayo lezo. A timbewu ti wa cheliwa ka ribye go kari gi nga vekiwa lahasi. Ka zikhati zinwani a ribye lego gi wa vitaniwa ku i Moi- nho de sela. Loyi a nga kari a gaya i wa khizama laha mahlweni ka xigayo xi nga tiyisilwe lahasi, na a khomile ribye ga gi tsongwani ga ku gaya hi gona hi mandla mambiri, kasi a gaya hi gona timbewu. Hi kuya hi xibuka xo kari, a maribye lawo ma wa binza kwalomo ka 2 kuya ka 4 wa tikilo. Loku a ribye lego gi tirisiwa kota tlhari, gi wa daya. — Valamuli 9:50-54.

A ku gaya timbewu zi wa hi ni lisima nguvu kasi a ngango wu hlayiseka, laha ka kuza a nayo wa Biblia wu beletela lezaku a xigayo xi wa nga faneli ku khomiswa loku a munhu a pemba nchumu wo kari. A bhuku ga Deuteronome 24:6 gi ngalo: “A munhu ngha a nga teki maribye mambiri ya xigayo a zima seve ha wona, kutani i ribye ga le hehla, hakuva ku teka wutomi ga munhu a zima seve ha gona.”

Hikuyini a Biblia ka Johani 1:18 gi wulako lezaku Jesu i “xifuveni xa Dadani”?

A Biblia gi wula lezaku Jesu i “xifuveni xa Dadani.” (Johani 1:18) A magezu lawa ma wula a kuzwanana ka hombe loku Jesu a nga nako na Nungungulu. A magezu lawa ma tlhela ma komba lezi a vaJuda va nga tolovela ku maha loku va hi laha kugeni.

Masikwini ya Jesu, a vaJuda va wa khigela laha ka masofa ma nga vekiwa lomu mareveni ya meza yo gela. A tihloko tabye ti wa cuwuka mezeni, a milenge yabye yiya nzhako, na va khigele laha ka sofa hi zisungunu zabye za xibhabha. A matshamela lawo ma wa maha lezaku a woko ga xinene gi tshama gi tlhatlhekile. Kota lezi a vagi vontlhe va nga etlela hi tlhelo ga xibaba, munwe ni munwe tlhelweni ga munwani, a “hloko ya wanuna yi wa hi kusuhani ka xifuva xa wanuna loyi a nga etlela laha kusuhani kakwe, hikwalaho, zi wa wuliwa ku ku ‘etlela laha xifuveni’ xa munwani,” ku wula a xibuka xo kari.

A ku etlela laha xifuveni xa hloko ya ngango kutani nwinyi wa mubuzo zi wa woniwa kota wudzunzo ni lungelo ga hombe. Hikwalaho, ka Pasika ga Jesu go gumesa, loyi a nga hi xifuveni xa Jesu ku wa hi Johani, a mupizani “loyi Jesu a nga mu ranza.” Hikwalaho, Johani i lo tlhelanyana nzhako a “khigela laha xifuveni xa Jesu” lezaku a mu maha xiwutiso xo kari. — Johani 13:23-25; 21:20.