Hi nga zi kota ku mu tsakisa Nungungulu futsi?
Kuzilava wa tshuka u lera matimu ya vanhu ku wulawuliwako khwatsi hi vona lomu ka Biblia, zonake u ti byela lezi: ‘A nzi nge zi koti ku fana navo!’ U nga ha alakanya lezi: ‘A nzi lulamangi niku a hi xikhati xontlhe nzi mahako za zi nene.’
Joba i wa ‘hi munhu a nga mbhelele kululameni.’ — Joba 1:1
Joba i tlhamuselwa kota munhu “a nga wa mbhelele kululameni.” (Joba 1:1) Loti i lo wuliwa ku “munhu loyi a lulamileko.” (2 Pedro 2:8) Niku Davida i lo wuliwa lezaku i “maha zo lulama” mahlweni ka Nungungulu. (1 Tihosi 14:8) Hambulezo, a hi kambisise hi laha kusuhani a wutomi ga vanhu lava va lomu ka Biblia. Hi ta wona lezaku (1) va mahile zihoxo, (2) hi nga gonza zotala ka xikombiso xabye, ni lezaku (3) a vanhu vo kala kumbhelela va nga mu tsakisa Nungungulu.
VA MAHILE ZIHOXO
“[Nungungulu] “i lo hlanguta Loti loyi a lulamileko, loyi a nga xaniseka hi kota ya mahanyela ya wubhayi ga vakubiha.” — 2 Pedro 2:7
Joba i kumene ni tixanisa to tala ti nga woneka na ti nga lulamangi. I lo telwa hi maalakanyo ya hava, hi ku chikelela magumo ya ku Nungungulu a nga na mhaka ni lezaku Joba wa simama a kholwa Kakwe kutani a nga simami. (Joba 9:20-22) Joba i wa tiyiseka nguvu hi kululama kakwe laha ka kuza a vanwani va zi zwisa ku khwatsi hi loku a ti byela lezaku i wa lulamile ku hunza Nungungulu. — Joba 32:1, 2; 35:1, 2.
Loti i lo kanakana ku maha xiboho xi nga fanele kuva xo dlunyateka ni xo olova. I wa bayiseka nguvu hi kota ya mahanyela yo biha nguvu ya vanhu va nga hanya le Sodoma ni Gomora, a tlhela a “karateka moyeni wakwe wo lulama masiku wontlhe” hi kota ya mahanyela yabye. (2 Pedro 2:8) Nungungulu i lo wula lezaku i wa lava ku lovisa a madoropa lawo yo biha, zonake a vulula ndlela ya ku ponisa Loti ni ngango wakwe. Kuzilava u alakanya lezaku Loti loyi a nga karateka nguvu, ku wa tava yena wo sangula ku suka. Hambulezo, ka xikhati lexo xa lisima nguvu, Loti i lo ranga hi ku maha mihoni. A tingelosi leti ti nga rumelwe ku ya ponisa Loti ni ngango wakwe, ti lo khoma mawoko yabye ti va humesa le handle ka doropa na va hlayisekile. — Genesisi 19:15, 16.
Davida ‘i lo lanzela Nungungulu hi mbilu yakwe yontlhe, a maha zo lulama ntsena mahlweni ka Nungungulu.’ — 1 Tihosi 14:8
Davida ka khati go kari i lo tsanzeka kutikhoma zonake a maha wubhayi ni sati wa vambe. A ya kubiha nguvu, hi lezaku na a zama ku zi fihla, Davida i lo dayisa a nuna wa wasati loye. (2 Samueli, xipimo 11) A Biblia gi wula lezaku lezi Davida a nga zi mahile zi wa “bihile mahlweni ka Jehova.” —2 Samueli 11:27.
Joba, Loti, na Davida vontlhe va mahile zihoxo, niku a zokari zi wa hi za hombe nguvu. Kanilezi, kota lezi hi to zi wona, va wa xuva ku tirela Nungungulu ni ku mu ingisa hi timbilu tabye tontlhe. Va wa ti yimisele ku komba lezaku va ti sola ni ku tlhela va cica tindlela tabye loku zi laveka. Hikwalaho, Nungungulu i lo va mahela wuxinji, niku a Biblia gontlhe gi wulawula hi vona kota vavanuna va kukholwa.
HI NGA GONZA YINI?
Kota vanhu vo kala kumbhelela, a hi nge zi koti ku potsa ku maha zihoxo. (Va Le Roma 3:23) Kanilezi, loku hi maha xihoxo hi fanele ku komba lezaku ha ti sola zonake hi maha lezi zi lavekako kasi hi zi lulamisa.
Zini lezi Joba, Loti, na Davida va zamileko ku maha kasi ku lulamisa zihoxo zabye? Lomu mbilwini, Joba i wa hi wanuna wo tsumbeka. Anzhako ka kuva Nungungulu a bhulisene naye, Joba i lo lulamisa maalakanyo yakwe a ti sola hi lezi a nga wulile. (Joba 42:6) A mawonela ya Loti hi mahanyela ya manyala ya vanhu va Sodoma ni Gomora ma wa longoloka khwatsi ni matshinya ya milayo ya Nungungulu. A xikarato xakwe xive xa mihoni hi xikhati xo kari. Hi kugumesa i lo tsutsuma madoropa lawo ma nga lava ku loviswa zonake a pona a kulamula ka Nungungulu. I lo ingisa a nga cuwuki nzhako ka zilo lezi va nga zi siyile. Hambu lezi Davida a nga maha xihoxo xa hombe hi ku nga ingisi nayo wa Nungungulu, i lo komba lezi zi nga hi mbilwini yakwe hi ku ti sola hi mbilu yontlhe a tlhela a kombela ku mahelwa tipswalo hi Nungungulu. — Tisimu 51.
Hi wuxinji gakwe, Nungungulu i lo wona a vavanuna lava hi kuyelana ni lezi a zi rinzelako ka vanhu vo kala kumbhelela. Nungungulu “wa tiva lezi hi nga wumbiswa zona, wa alakanya lezaku hina hi ntshuri.” (Tisimu 103:14) Makunu, loku Nungungulu a zi tiva lezaku a hi nge potsi hi kumbhelela a ku maha zihoxo, zini a zi rinzelako ka hina?
Nungungulu “wa tiva lezi hi nga wumbiswa zona, wa alakanya lezaku hina hi ntshuri.”— Tisimu 103:14
A VANHU VA NGA MBHELELANGIKO VA NGA MU TSAKISISA KUYINI NUNGUNGULU?
A wusungukati legi Davida a nyikileko a n’wana wakwe Solomoni gi hi komba lezi hi nga mu tsakisisako zona Nungungulu. “Wena nwananga Solomoni, tiva Nungungulu wa dadani wa wena, u mu khozela hi mbilu [“yi mbheleleko,” NM].” (1 Kronekele 28:9) A magezu mbilu yi mbheleleko ma wula yini? Ma wula mbilu yi ranzako Nungungulu yi lavako ku tiva ni ku maha kuranza kakwe. A hi mbilu yi kalako yi nga mahi zihoxo, kanilezi i mbilu yi xuvako ku tirela Nungungulu hi kutsumbeka yi tlhela yi ti yimisela ku kawukiwa. Kota lezi va nga ranza Nungungulu ni ku xuva ku mu ingisa, Nungungulu i lo wona Joba kota munhu a nga “mbhelele kululameni,” Loti kota munhu wo “lulama,” na Davida kota loyi a nga “maha zo lulama ntsena mahlweni” ka Nungungulu. Hambu lezi va nga maha zihoxo, va wa zi kota ku mu tsakisa Nungungulu.
A mbilu yi mbheleleko ka Nungungulu yi navela nguvu a ku maha a kuranza kakwe niku yi kuciwa hi kuxuva ka hombe ka ku lava ku mu tirela hi kutsumbeka
Hikwalaho, loku hi tshuka hiva ni maalakanyo ya hava hi nga ma laviko kutani ku wula zilo zi hi mahako hiwa tingana, hambu ku maha zilo hi kugumesako hi wona ku zi bihile, ngha a zikombiso lezi hi wulawulileko hi zona zi hi tiya-hlana. Nungungulu wa zi tiva lezaku a zi koteki kuva vanhu vo mbhelela zezi. Hambulezo, i rinzela lezaku hi mu ranza hi tlhela hi ti karatela ku mu ingisa. Loku hi mu ranza hi mbilu yontlhe hi ndlela leyo, hi nga tiyiseka lezaku hinawu hi nga zi kota ku mu tsakisa Nungungulu.