Xana u fanele ku karatekela ku tiva lezaku a ntiro wa wena wu woniwa hi mani?

BEZALELI na Oholiaba va wa wu tiva khwatsi a ntiro wa kuaka. Kota tikhumbi le Gipite, kuzilava va mahile zitini zo tala nguvu laha ko tlhela va nga ha lavi ni ku zi alakanya. Kanilezi a malembe lawo ma wa hunzile. Makunu va wa lava kuva vameseri va hombe laha va nga nyikwa a xiavelo xa ku rangela a kuakiwa ka tabernakeli. (Ekso. 31:1-11) Hambulezo, a mitiro yo kari yo hlamalisa leyi va nga wa ta yi maha yi wa ta woniwa hi vanhu vatsongwani ntsena. Xana lezo zi wa ta va susela litsako? Xana hakunene va wa fanele ku chela kota hi ku a ntiro wabye wa woniwa kutani ahihi? Xana u fanele ku chela kota hi ku a ntiro wa wena wa woniwa kutani ahihi?

MITIRO YO HLAMALISA YI NGA WONIWIKO HI VOTALA

A zibya zo kari za tabernakeli zi wa mahilwe hi wutlhari ga hombe. Hi xikombiso, ehleketa hi makerubima ya nzalama lawa ma nga hi le hehla ka arke ga xivumelwano. Mupostoli Paule i ma tlhamusele kota makerubima ya “kungangamela.” (Maheb. 9:5) Ehleketa hi kusaseka ka zifananiso lezo zi mahilweko hi nzalama! — Ekso. 37:7-9.

Nyamutlha, loku ko kumiwa a zibya lezi Bezaleli na Oholiaba va zi mahileko zi wa ta faneleka hi ku kombiswa ka timuzewu to chanza, laha zi nga wa ta tsakelwa hi votala. Kanilezi a xikhati va nga maha, vangani lava hakunene va nga ku wona a kusaseka ka zona? A makerubima ma wa hi ka Wutshamu go Basabasa; hikwalaho ma wa woniwa ntsena hi mupristi wa hombe loku a nghena khati ginwe ntsena hi lembe, hi Siku ga Nzhiho. (Maheb. 9:6, 7) Hikwalaho, vanhu va tsongwani nguvu va nga tshuka va ma wona.

KUMA LITSAKO HAMBU LOKU U NGA DZUNZIWI HI VANHU

Loku ku wa hi wena Bezaleli kutani Oholiaba na u tirile nguvu kasi ku maha mitiro leyo ya wumeseri, ngha u ti zwisile kuyini hi ku tiva lezaku va tsongwani va yi wonako? Inyamutlha, a vanhu va tizwa matshanza loku va dzunziwa va tlhela va hlamaliwa hi vanghana vabye. Va zi wona kota ndlela ya ku komba lisima la ntiro wabye. Kanilezi, a malanza ya Jehova a ma ti zwisi lezo. A ku fana na Bezaleli na Oholiaba, hi kuma litsako hi ku maha kuranza ka Jehova hi tlhela hi amukeleka kakwe.

Masikwini ya Jesu, a varangeli va wukhongeli va wa tolovela ku maha mikhongelo kasi ku hlamalisa vanwani. Hambulezo, Jesu i lo kuca ku tirisa mahela go hambana: Ku khongela zi huma mbilwini na u nga xuvi ku dzunziwa hi lava va ku wonako. Gi tava gihi wuyelo ga kona? A “Raru wa wena loyi a wonako xihundleni i ta ku tlhelisela.” (Mat. 6:5, 6) Zi te dlunya lezaku a xa lisima a hi lezi a vanwani va yi wonisako zona a mikhongelo ya hina, kanilezi hi lezi Jehova a yi wonisako zona. A mawonela yakwe ma maha mikhongelo ya hina yiva ya lisima nguvu. Hi zalezo kambe ka ni xihi hi xi mahako ntirweni wa hina wo basa. A wu mahi wa lisima hi loku wu dzunziwa hi vanwani; kanilezi wu tsakisa Jehova, “loyi a wonako xihundleni.”

A xikhati lexi a tabernakeli gi nga mbhela, “a refu gi lo fenengeta a tenda ga mutlhangano, . . . ni kuhatima ka Jehova ku tata a tabernakeli.” (Ekso. 40:34) Hi nga wona a xikombiso xo dlunyateka xa kuxalala ka Jehova! U alakanya ku Bezaleli na Oholiaba va ti zwisile kuyini ka xikhati lexo? Hambu lezi a mavito yabye ma nga kalile ku tsaliwa ka lezi va zi mahileko, va wa tsakile hi ku tiva lezaku Jehova i wa katekisile a kutikarata kabye kontlhe. (Mav. 10:22) Ka malembe ma nga lanzela, a ku wona lezaku a ntiro wa mandla yabye wu wa simama wu tiriswa ntirweni wa Jehova handle ko kanakana zi wa va nyika litsako. Zi te dlunya lezaku a xikhati lexi Bezaleli na Oholiaba va to vuka hi ka vafileko misaveni yiswa, va ta tsaka nguvu hi ku tiva lezaku a tabernakeli gi tirisilwe wukhozelini ga lisine hi xipimo xa 500 wa malembe!

Lomu hlengeletanweni ya Jehova nyamutlha, a vamahi va tividiyu ta zibhonekana, vatsali va zithombe, vachayi, vasusi va mifota, vahunzuluseli, ni vatsali va tira na va nga woniwi hi munhu. Hi ndlela leyo, a ku na munhu a “wonako” lezi va mahako. Ku nga ha wuliwa zalezo hi ntiro wa hombe lowu wu mahiwako ka mabandla yo hunza 110.000 misaveni yontlhe. Himani a wonako nanza ga timali a xikhati gi tatisako a maphepha ma lavekako kumbheleni ka hweti? Himani a wonelelako a matsalani a xikhati a longiselako mubiko wa ntiro wa simu wa bandla ke? Himani a mu wonako a makabye a lungisako nchumu wu onhekileko Salawini ya Mufumo?

Bezaleli na Oholiaba va zile va yafa na va nga hi na xikotela, medalha, kutani xapa ya ku va dzunza hi ntiro wo hlamalisa lowu va wu mahileko ni kutiya ka muako wabye. Kanilezi va kumile nchumu wa lisima nguvu — ku nga kuamukeleka ka Jehova. Hi nga tiyiseka lezaku Jehova i wu wonile a ntiro wabye. Ngha hi pimanyisa a xikombiso xabye xa kutikoramisa ni ku tira hi kuziranza.