Nzi kumile kurula na Nungungulu ni kurula na mamani

MANANI i lo nzi wutisa lezi: “Hikuyini u alako ku khozela vakokwani va wena va fileko? A wu zi woni lezaku u kuma wutomi hi kota ya vona? A wu lavi ku va bonga? U nga tsikisa kuyini mikhuwo hi tako nayo hi ka zizukulwana ni zizukulwana? A ku ala ku dzunza tinguluve ta hina zi fana ni ku wula lezaku a wukhozeli ga hina a hi ga nchumu.” I lo sangula ku rila.

Mamani i wa nga toloveli ku wulawula hi ndlela leyo. Ahandle ka lezo, hi yena a nga mahile lulamiselo lezaku nzi gonza a Biblia, hambu lezi a nga zi maha kota ndlela yi nene ya ku gonza yena wutsumbu. Xikhati xontlhe nzi wa mu ingisa, niku makunu zi wa nzi karatela ku ala zileletelo zakwe. Kanilezi, ka khati legi nzi wa fanele ku ala ku mu ingisa kasi ku tsakisa Jehova. Loku nzi wa nga nyikwangi ntamu hi yena Jehova, na nzi nga zi kotangi.

NZI LO MAHA MUKRISTU

A ku fana ni vanhu vo tala va le Japani, hi wa hi vaBhuda. Kanilezi hi tihweti timbiri ntsena na nzi gonza ni Timboni ta Jehova, nzi lo kholwa lezaku a Biblia gi wulawula lisine. Hi ku tiva lezaku nzi na ni Dadani le tilweni, nzi wa xuva ku mu tiva khwatsi. Mina na mamani hi wa bhula hi kutsaka xungetano hi lezi nzi nga kari nzi gonza. Nzi lo sangula kuya mitlhanganweni hi tiSonto Salawini ya Mufumo. Laha a wutivi ga mina ga lisine gi ngaya gi kula, nzi lo byela mamani lezaku nzi wa nga ta ha hlengela naye ka tinkhozo ta xiBhuda. I lo cica hi xitshuketi, aku: “A ku hanya ni munhu wo kala a nga ranzi tinguluve ta hina i hlomulo.” I lo nzi byela lezaku nzi fanele ku nyima ku gonza Biblia ni kuya mitlhanganweni. Nzi wa nga alakanyi lezaku mamani wa mina a nga tshuka a wula lezo! I wa ku khwatsi munhu munwani.

Ka Va Le Efesusi xipimo 6, nzi wa gonzile lezaku Jehova i lava ku nzi ingisa vapswali va mina. Papai i yima na mamani. Kusanguleni, nzi lo alakanya lezaku loku nzi va ingisa, va wa ta nzi ingisawo kasi hi wuyisa kurula ngangweni. Ahandle ka lezo, xi wa kari xi tshinela xikhati xa zikambelo kasi ku nghena xikoleni xo tlakuka, hikwalaho nzi wa fanele ku ti longisela. Hi xigelo lexo, nzi lo vumela ku maha lezi va nga zi lava hi tihweti tinharu, kanilezi nzi lo tsumbisa Jehova lezaku nzi wa ta sangulisa kuya mitlhanganweni loku a xikhati lexo xi mbhelile.

A xiboho xa mina xi lo ti komba xi nga vuni hi tindlela timbiri. Xo ranga, nzi wa alakanya ku lezi nzi nga ti zwisa zona zi wa nga ta cica hi tihweti tinharu basi. Kanilezi, a nzi hlwelangi ku sangula kuva ni ndlala ya moya, nzi tsawukana nguvu na Jehova. Xa wumbiri, wutshanwini ga ku nzi beletela kuya mitlhanganweni ntsena, mamani na papai va lo tlhela va zama ku nzi tsikisa zontlhe zi nga yelana ni wukhozeli ga lisine.

XIVUNO NI KUVUKELWA

Salawini ya Mufumo, nzi wa tivene ni votala va nga vukelwa mingangweni yabye. Va wa nzi tiyisile lezaku Jehova i wa ta nzi nyika ntamu. (Mat. 10:34-37) Va lo nzi vuna ku wona lezaku hi mina nzi nga laha tshinyeni kasi ku vuna ngango wa mina lezaku wu hanyiswa. Hikwalaho nzi lo sangula ku khongela hi kuhiseka, na nzi zama ku gonza ku tsumba Jehova.

Laha ngangweni nzi wa vukelwa hi tindlela to hambanahambana. Mamani i wa teka le’go nzi khongotela, a tlhela a zama ku nzi kholwisa ku lezi a wulako hi zona za zi nene. A kutala ka zikhati, nzi wo miyela. Loku nzi hlamula, a kutala ka zikhati hi wa gumesa hi ku zangarelana, hakuva munhu ni munhu i wa ti karatela ku yimela tlhelo gakwe. Nzi wa fanele ku ngha nzi chelile nguvu kota hi lezi a nga ti zwisa zona hi lezi a nga zi kholwa, lezi zi nga wa ta hungula guwa. A vapswali va mina va lo nzi tatela mitiro na va zama ku nzi maha nzi nga suki laha kaya. A zikhati zinwani va wa khotsetela tivati nzi tshama lahandle kutani ku nga nzi siyeli zakuga.

Mamani i lo kombela xivuno ka vanwani. I lo wulawula ni mugonzisi wa mina wa xikola, kanilezi a nga vumelangi ku ti nghenisela. Mamani i lo nzi teka a famba na mina ka murangeli wakwe ntirweni kasi a ya zama ku nzi kholwisa lezaku a tixaka tontlhe ta wukhongeli a ti vuni nchumu. Laha kaya, mamani i lo fonela maxaka yo tala, a ma kombela xivuno na a kari a rila. Lezo zi wa nzi swira, kanilezi le mitlhanganweni a madota ma lo nzi kuca ku ehleketa hi vanhu vontlhe lava mamani a nga va nyika wukustumunyu na a nga zi tivi.

Hi kulanzela ku lota mhaka ya kuya universidade. A vapswali va mina va wa lava ku nzi nyika lezi vona va nga zi wona kota masangulo ma nene ya wutomi. Va wa tsumba lezaku nzi ta kuma ntiro wa wu nene. Kota lezi hi nga kala hi nga zwanani, hi wa nga ta zi kota ku xuxa mhaka leyo hi kurula. Hikwalaho, nzi lo tsala papilo nzi tlhamusela mixuvo ya mina ka papai na mamani. Hi kukwata, papai i lo nzi dzukisela aku: “Loku uku u ta wu kuma ntiro, wu kume manziko; loku u nga wu kumi, u ta suka laha ka muti lowu.” Nzi lo hendleleta mhaka ka Jehova. Na nzi hi wutirelini hi manziko wa kona, a vamakabye vambiri va xisati vo kala va nga bhulangi nchumu va lo nzi kombela ku gonzisa vana vabye. Lezo a zi mu tsakisangi papai, hikwalaho i lo nyima ku wulawula na mina; hi lisine i lo sangula ku nzi potsoloka. Mamani i wa wula lezaku ka yena, zi wa tava chukwana loku nzi wo maha xigevenga ku hunza kuva Mboni ya Jehova.

A zikhati zinwani nzi wa ti wutisa lezaku Jehova wa zi lava ku nzi ala mixuvo ya vapswali va mina kala laho ke. Kanilezi hi kuya mahlweni nzi khongela ni ku ehleketa hi mitsalo ya Biblia yi wulawulako hi liranzo la Jehova, nzi lo zi kota ku wona kuvukelwa loko hi tlhelo gi nene nzi tlhela nzi zwisisa lezaku hi ndlela yo kari, va maha lezo hi ku nzi ranza. Jehova i lo nzi vuna ku lulamisa maalakanyo ya mina ni ku wona a ndlela yo famba hi yona. Laha nzi ngaya nzi engetela wutireli ga mina, nzi loya nzi engetela ku gi ranza. Nzi lo sangula ku navela wuphayona.

NTIRO WA WUPHAYONA

Laha va nga tiva lezaku nzi lava ku teka wuphayona, a vamakabye vo kari va lo nzi kuca ku rinzela kala a vapswali va mina va bohla. Nzi lo khongela nzi kombela wutlhari, nzi maha mikambisiso, nzi hlola lezi zi nga nzi kuca ku teka wuphayona, nzi tlhela nzi bhula ni vamakabye vo buva. Nzi lo chikelela magumo ya lezaku nzi lava ku tsakisa Jehova. Tlhatakumbiri, a ku thinda wuphayona xi wa nga hi xitiyisekiso xa lezaku a vapswali va mina va ta cica.

Nzi lo sangula ntiro wa wuphayona ka lembe go gumesa ga xikola. Anzhako ka xikhati xo kari na nzi tira kota phayona, nzi lo xuva ku ya tira lomu ku nga ni xilaveko. Kanilezi mamani na papai va wa nga lavi lezaku nzi suka laha kaya. Hikwalaho, nzi lo rinzela kala nzi maha 20 wa malembe. Hi kulanzela, kasi ku hungula kukarateka ka mamani, nzi lo kombela hofisa ya ravi lezaku yi nzi nyika xiavelo xa le dzongeni wa Japani, lomu ku nga hi ni maxaka ya hina.

Ka xiavelo lexo, nzi lova ni makatekwa ya ku wona vanhu vo tala nzi nga gonza navo na va bapatizwa. Ka xikhati xalexo, nzi lo gonza xiNgiza kasi ku engetela wutireli ga mina. Ka bandla legi nzi nga hi ka gona ku wa hi ni vamakabye vambiri va xinuna va maphayona yo hlawuleka. Nzi wa ku wona a kuhiseka kabye ni lezi va nga vunisa zona vanwani. Hi ndlela leyo, nzi lova ni mixuvo ya kuva phayona go hlawuleka. Nzeni ka xikhati lexo, mamani i lo babya nguvu makhati mambiri. Ka ginwe ga wona, nzi lo tlhela kaya kasi ku ya mu hlayisa. Lezo zi lo mu hlamalisa zi tlhela zi hungulanyana a zanga yakwe.

MAKATEKWA YO LANZELANA

Anzhako ka 7 wa malembe, nzi lo amukela papilo gi ngata hi ka Atsushi, a nga ginwe ga maphayona yo hlawuleka lawa nzi wulawulileko hi wona. I lo wula lezaku i tsakela ku chada niku i wa lava ku tiva a xiyimo xa mina ni lezi nzi ti zwisako zona hi mhaka leyo. Cima nzi wa nga se tshuka nzi alakanyela ku tekana na Atsushi, niku nzi wa nga alakanyi kambe ku yena a ngava ni maalakanyo lawo. Anzhako ka hweti, nzi lo hlamula lezaku nza vumela kuva hi tivana khwatsi. Hi lo pola lezaku ha fana ka zilo zo tala; hi wumbiri ga hina hi wa lava ntiro wa xikhati xontlhe niku hi wa ti yimisele ku tira ni ka xihi xiavelo. Hi kufamba ka xikhati hi lo chada. A nzi no ku tsaka a xikhati lexi mamani, na papai, ni maxaka manwani yo tala ma ngata muchadweni wa hina!

Anzhako ka xikhatanyana na hi tira kota maphayona ya xikhati xontlhe, Atsushi i lo nyikwa xiavelo xa kuva muwoneleli wa xipanze wa kuvaleta. Zalezo ku lota makatekwa manwani. Hi lo nyikwa xiavelo xa kuva maphayona yo hlawuleka hi guma hi nyikwa ntiro wa ku wonelela xipanze. Anzhako ka ku enzela khati ginwe a mabandla wontlhe ya xipanze lexo, hi lo fonelwa hi hofisa ya ravi. Yi wa lava ku tiva yini? ‘Ma vumela ku ya maha ntiro wa ku wonelela xipanze le Nepali ke?’

Nzi lo ti wutisa lezaku a vapswali va mina va ta ti zwisa kuyini hi kuva nziya ka wutshamu lego ga le kule. Hikwalaho nzi lo va fonela. Papai i lo hlamula, aku: “Muya ka wutshamu ga gi nene.” Ku wo hunza viki na a nyikilwe bhuku hi vanghana vakwe gi wulawulako hi Nepali, niku papai i wa ku alakanyela kuva wutshamu gi nene go ringana ku gi enzela.

Laha hi nga kari hi tira hi kutsaka ni vaNepali, lava va nga vanhu va xinghana, ku lota makatekwa manwani. A xipanze xa hina xi wa ta patsa Bangladesh, gi nga wutshamu ga laha kusuhani nguvu kanilezi na gi hi ni kuhambana ka hombe. A ntiro wa simu wu wa hi ni matshamela yo hambanahambana. Anzhako ka ntlhanu wa malembe, hi lo nyikwa xiavelo xa ku wuya Japani, laha hi nga kona zalezi ntirweni wa kuwonelela xipanze.

Japani, Nepali, Bangladesh — a ku tira ka matiko lawa zi nzi gonzisile zo tala ha Jehova! A ginwe ni ginwani ga wona gi na ni matshamela ya gona ni mikhuwo ya gona. Niku ka ginwe ni ginwani ga wona, a munhu ni munhu i na ni matshamela yakwe. Nzi wonile lezi Jehova a khatalelisako zona vanhu vakwe hi munwe munwe, a va amukela, a va vuna ni ku va katekisa.

Mina wutsumbu, Jehova i nzi katekisile hi ku nzi vuna ku mu tiva, a nzi nyika ntiro wa ku wu maha, ni nuna wa mu nene wa muKristu. Nungungulu i nzi rangele kumaheni ka ziboho zi nene, niku zalezi nzi na ni kuzwanana ku nene naye zinwe ni ngango wa mina. Hi ku vuniwa hi Jehova, mina na mamani hi tlhelile hi maha vanghana va hombe. Nzi tsaka nguvu hi lezi nzi kumileko kurula na Nungungulu ni kurula na mamani.