Kwadru Ga Ziwutiso

◼ Xana a munwe ni munwani a nga maha yini lezaku kuva ni matshamela ma vumelelako kugonza mitlhanganweni ya bandla? (Deut. 31:12)

Hi kota ya xichawo xo eta ka Jehova ni ka lulamiselo gakwe ga mitlhangano ya bandla, vontlhe va kuciwa lezaku va chikela na ka ha hi ni xikhati kasi va ti longisela a ku gonziswa hi yena. Zi nene a ku ya tshama zitshanwini za le mahlweni, ku siyelwa a zitshamu za le nzhako lava va nga ni vanana ni lava va to tshuka va chikela na va celwe. Na mutlhangano wu nga se sangula, a titelefone selulari ni zinwani zi zi kotako a ku colopetela vanwani zi fanele ku vekiswa hi ndlela yi nga hambukisiko a kupima ka vaingiseli. A zilo zi hambukisako a kupima zi ta hunguka nguvu loku vontlhe lava va nga kona va kombisa xichawo xo eta mutlhanganweni wontlhe. — Mutsh. 5:1; Fil. 2:4.

A xikhati lexi a vanhu va vaswa va sangulako kuta mitlhanganweni, a wokari bandleni loyi a tivanako navo a nga ha tshama navo hi kuziranza. Lezo zi wa tava zi nene nguvu loku va hi ni vanana lava va faneleko ku gonzisiwa a ku tshama na va rulile. Za koteka ku ngha ku hi khati go sangula legi a ngango lowo wu tako mitlhanganweni. Loku zi hi tano, za koteka a ku va tsakela a ku tshama zitshanwini za le nzhako laha va to kala va nga colopeteli nguvu vanwani loku a vapswali va tshuka vava ni xilaveko xa ku humanyana kasi ku khatalela a zilaveko za vanana vabye. (Mav. 22:6, 15) A mingango yi nga ni vanana yi maha khwatsi hi ku ngayi yi ya tshama yoce le Sala B, lomu a vanana va to tizwa na va tlhatlhekile lezaku va vanga guwa. A kutala ka zikhati zi chukwana nguvu lezaku a mupswali a laya a vanana kutani ku khatalela a zilaveko zinwani zabye na a hi lehandle ka salawu a tlhela a wuya ni vanana lomu nzeni ka salawu.

A vakombeteli va yimiselwe ku hlayisa a moya wu nene lomu ndlwini ya wukhozeli. Va vuna a mingango ni lava va tshukako va chikela na va celwe lezaku va kuma ko tshama kona. A vakombeteli va chela nguvu kota hi kuva ni wukheta a xikhati lexi va vunako vanwani a ku kuma wutshamu gi nene na va nga colopeteli vanwani handle ka xigelo. Va tirisa wutlhari loku va yimisana ni zikarato zi nga rinzelwangiko. Loku a nwanana a colopetela vanwani, a vakombeteli va nga ha nyika xivuno xo kari hi ndlela yi nene.

Vontlhe lava va nga kona mitlhanganweni lezaku va khozela va zi kota ku maha xo kari kasi kuva ni matshamela ma vumelelako a ku gonza ha Jehova ni makungo ya misava yiswa yo rula ni yo lulama. — Maheb. 10:24, 25.