Matshamu ya wukhozeli

A VAKHOZELI va lisine va Jehova va layiwa ku tlhangana kasi va kuma gonziselelo ni ku tiyisana. (Maheb. 10:23-25) A wutshamu go sangula go khozela kona gi akilweko hi vaIsraeli, a vanhu va nga hlawulilwe hi Nungungulu, kuve tabernakeli kutani “tenda ga mutlhangano.” (Ekso. 39:32, 40) Anzhako ka lezo, Solomoni a n’wana wa Davida i lo aka yindlu, yi nga vitaniwa ku i tempeli, kasi ku dumisa Nungungulu. (1 Tih. 9:3) Anzhako ka kuhohlolwa ka tempeli leyo hi 607 Nguveni ya Hina, a vaJuda va lo sangula ku aka tiyindlu ti nga vitaniwa ku masinagoga kasi ku khozela Nungungulu. Hi kufamba ka xikhati, a tempeli yi lo aketwa niku yi lo tlhela yiva tsinza ga wukhozeli ga lisine. Jesu i wa gonzisa lomu masinagogeni ni lomu tempeleni. (Luka 4:16; Joh. 18:20) I mahile mutlhangano kambe le xitsungeni. — Mat. 5:1–7:29.

² Anzhako ka kufa ka Jesu, a maKristu ma wa tlhangana ka matshamu ya laha kubaseni kutani lomu mitini ya maKristu-kulobye kasi ku gonzisa Mitsalo ni ku ti buza hi wumakabye ni makholwa-kulori. (Miti. 19:8, 9; Rom. 16:3, 5; Kol. 4:15; Filem. 2) Ka zikhati zo kari a maKristu lawa ma wa tlhangana ka matshamu yo fihlala kasi ma nga kumiwi hi valala. Handle ko kanakana, a malanza yo tsumbeka ya Nungungulu ya xikhatini xi hunzileko ma wa zi ranza nguvu ku tlhangana ka matshamu ya kukhozela kasi ma “gonzisiwa hi Jehova.” — Isa. 54:13, NM.

³ Nyamutlha konawu, ku na ni matshamu ya laha kubaseni ni miti ya vamakabye yi tiriselwako ku mahela kona mitlhangano. A mutlhangano wa ntiro wa simu wu tala ku mahiwa mitini ya vamakabye. Lava va hendleletako miti yabye kasi ku maha lezo va zi wona na gi hi lungelo ga hombe. A vamakabye vo tala va wula lezaku va vuneka nguvu hi tlhelo ga moya hi kota ya lezi va hendleletileko miti yabye kasi ku mahela kona mitlhangano.

SALAWU YA MUFUMO

⁴ A wutshamu go tiveka nguvu legi gi tirisiwako hi Timboni ta Jehova kasi ku khozela tiSalawu ta Mufumo. Kasi a bandla giva ni wutshamu gi faneleko, hi tolovelo ku xaviwa wutshamu zonake ku akiwa Salawu yiswa ya Mufumo kutani ku aketa yindlu yi sinako yi hi wutshanwini legi gi xavilweko. Kasi ku nga xakeli mali leyi yi tirisiwako kuakiweni ka tiSalawu ta Mufumo, ni ku lonzowota khwatsi taleti ti akilweko, a mabandla yo hlaya ma nga ha hlengela a Salawu ya Mufumo loku a xiyimo xi vumela. Ka matshamu yo kari, a vamakabye voya hi ku lugara a wutshamu go mahela kona mitlhangano. Loku ku akiwa tiSalawu tiswa ta Mufumo ni loku ku aketwa leti ti nga onhekile nguvu, a zi bihangi a ku ti hendleleta ka Jehova. Hambulezo, loku ku tshuka ku lungisiwa zilwana zitsongwani, a ku na xilaveko xa ku ti hendleleta kambe.

⁵ A Salawu ya Mufumo a hi wutshamu gi mahelweko ku hlamalisa vanwani. Hambu lezi a maakelwa ya tona ma hambanako hi kuya hi wutshamu, a kungo ku khozela ka tona. (Miti. 17:24) Hi kuya hi xiyimo xa wutshamu ga kona, tona ti fanele kuva wutshamu ga gi nene ni gi fanelekako ku mahela kona mitlhangano.

⁶ Wontlhe a mabandla ya Timboni ta Jehova ma maha minyikelo kasi ku seketela kutiriswa ni kuhlayiswa ka tiSalawu ta Mufumo. A ku mahiwi mihlengo; ge hambu ku kombela mali. Lava va tako mitlhanganweni va na ni lungelo ga ku maha minyikelo ka makaxa ma nga kona kasi ku hakhelela a zilaveko za yona. Va maha lezo hi ku zi ranza na zi sukela timbilwini tabye. — 2 Kor. 9:7.

⁷ Zontlhe a ziro za bandla zi na ni lungelo ga ku seketela hi mali a zilaveko za Salawu ni ku hlengela ku yi basiseni ni ku yi hlayiseni. A dota kutani nanza ga wutireli gi nga yimisiwa kasi ku wonelela a ntiro wa ku basisa. Hi tolovelo, a ntiro wa ku basisa wu mahiwa hi mitlawa. A muwoneleli wa ntlawa kutani muvuneteli wakwe hi yena a rangelako. Lomu nzeni ni lahandle ka Salawu ya Mufumo, ku fanele ku yimela Jehova ni hlengeletano yakwe.

⁸ Lomu ku nga ni mabandla yo tala ma hlengelako a Salawu yinwe, a madota ya mabandla lawo ma yimisa a Kometi ya Kuhlayisa a Salawu ya Mufumo kasi yi rangela timhaka ti yelanako ni ku hlayiseka ka yona. A hubye ya madota yi hlawula makabye munwe kasi a rangela ka kometi leyi. Na yi tira hasi ka wurangeli ga tihubye ta madota, a kometi ya kuhlayisa yi wonelela a kubasiswa ka Salawu yi tlhela yi tiyiseka lezaku zontlhe zi lavekako kasi ku basisa zi kona. A mabandla lawa ma hlengelako a Salawu ma fanele ku tirisana khwatsi.

⁹ Loku a mabandla yo tala ma hlengela a Salawu ya Mufumo, a xikhati xa mitlhangano xi nga ha cicacica. A madota ma fanele ku maha a longoloko wa xikhati xa mitlhangano hi moya wa liranzo ma tlhela ma zwelana. (Fil. 2:2-4; 1 Ped. 3:8) Hambu lezi a Salawu ya Mufumo yi tsalelwako hi mavito ya bandla ginwe, a ku na bandla gi faneleko ku mahela ziboho a mabandla manwani. Loku a muwoneleli wa xipanze a enzela a ginwe ga mabandla lawa ma tirisako a Salawu yaleyi ya yinwe, a mabandla lawa manwani ma ta cica a xikhati xa mitlhangano ka viki lego.

¹⁰ Loku a Kometi ya Ntiro ya Bandla yi vumela, a Salawu ya Mufumo yi nga ha tirisiwa kasi ku ingisela a kanelo ya muchado kutani ya marilo. A madota lawa ma kambisisa hi wukheta a xikombelo lexo niku ma seketela a xiboho xa wona ka wurangeli gi nyikiwako hi hofisa ya ravi.

¹¹ Ku rinzelwa lezaku lava va tirisako a Salawu ya Mufumo vava ni mahanyela ma faneleko a maKristu ya lisine. A ku na nchumu xi faneleko ku mahiwa laha Salawini ya Mufumo lexi xi nga wa ta zangarisa bandla kutani ku ruka Jehova ni ku chakisa vito gi nene ga bandla. (Fil. 2:14, 15) Hi kuya hi zileletelo za hofisa ya ravi, a Salawu ya Mufumo yi nga ha tirisiwa kasi ku maha mitiro yinwani yo kota Xikola xa Wutireli ga Mufumo ni Xikola xa Ntiro wa Wuphayona.

¹² Xontlhe xikhati a bandla gi fanele kuva ni xichawo hi wutshamu ga mitlhangano. A maambalela, kutisasekisa ni mahanyela ya hina zi fanele ku komba lezaku ha nyika xichawo hi wutshamu ga kukhozela Jehova. (Mutsh. 5:1; 1 Tim. 2:9, 10) Loku hi maha lezi, hi komba lezaku ha yi nyika lisima a mitlhangano ya hina ya wuKristu.

¹³ Za lisima kambe a ku nga colopeteli vanwani a xikhati lexi a mitlhangano yi fambako. A vapswali va fanele ku tshama ni vana vabye. Lava va nga ni zivanana va fanele ku lava wutshamu gi to va vumelela ku hatla va huma va ya kawuka vana vabye kutani ku va khatalela ka zinwani.

¹⁴ Ka hlawuliwa a vamakabye va ringanelwako lezaku va tira kota vakombeteli ka mitlhangano. Va fanele ku kombisa xinghana ni wutlhari. A ntiro wabye ku hoyozela lava va gonzako kuta mitlhanganweni ni ku va maha va tizwa na va amukeleka, ku vuna lava vo celwa lezaku va kuma wutshamu, ku hlaya lava va nga kona mitlhanganweni, ni ku khatalela a michini (ar condicionado) ya ku buvetela moya wo hisa kutani wo titimela. Loku zi laveka a vakombeteli va nga alakanyisa vapswali lezaku va fanele ku wonelela khwatsi a vana vabye kasi va nga tsutsumatsutsumi na mitlhangano yi nga se sangula kutani loku yi mbhelile ge hambu ku hlakana laha tribuna. Loku ku hi ni nwanana a nga vumeliko ku kawukiwa, a mukombeteli a nga ha kombela mupswali wakwe hi ndlela yi nene lezaku a huma handle naye kasi a vaingiseli va nga lahli kupima. A ntiro wa vakombeteli wu vuna hontlheni lezaku hi vuneka khwatsi hi mitlhangano. Zi ngava zi nene nguvu a ku tirisa malanza ya wutireli, nguvunguvu lawa ma nga ni wutlhari ga ku lulamisa timhaka ta mingango. — 1 Tim. 3:12.

KUAKIWA KA TISALAWU TA MUFUMO

¹⁵ Ka zana ga malembe go sangula, a maKristu yo kari ma wa ganyile nguvu a ku hunza manwani, hikwalaho mupostoli Paule i lo ma tsalela aku: “Ku fela kuva ni ku ecanyiswa; lezaku ka khati legi a pfuno wa nwina wu vuna a kuvumala kabye, kasi a pfuno wabye wu fela ku vuna kuvumaleni ka nwina, lezo ku tava kona kuringana.” (2 Kor. 8:14, NM) Inyamutlha kambe a ku “ecanyiswa” loko ku kona. A minyikelo yi mahiwako lomu mabandleni ma nga misaveni yontlhe yi patsiwa kasi ku vunetela kuakiweni ni kuaketweni ka tiSalawu ta Mufumo. A hlengeletano ya Jehova zinwe ni mabandla lawa ma vunekako hi minyikelo leyi va ku bonga nguvu a kuhana loku ku kombisiwako hi vamakabye misaveni yontlhe.

¹⁶ Maringano ni wutshamu legi a tiSalawu ti kumekako kona, a hofisa ya ravi yi avela mabandla a Salawu leyi ma to nghenela kona mitlhangano. A ravi hi gona gi bohako lezaku hi rini niku hi kwihi ku to akiwa tiSalawu ta Mufumo kutani ku aketa leti ti nga onheka ka xipanze lexi xi wonelelwako hi gona. Loku ku humelela timhango ta ntumbuluko, ku mahiwa malulamiselo ya ku aketa leti ti onhekileko, niku ka zikhati zo kari ka aketwa ni tiyindlu ta vamakabye.

¹⁷ A hofisa ya ravi yi yimisa a vamakabye va kuziranza lava va to lavetela wutshamu, ku tsala lezi a Salawu ya Mufumo yi to mahiswa zona, ku lava lisensa, kuaka ni ku yi hlayisa. Kota lezi ku nga ni xilaveko xa ku aka tiSalawu ta Mufumo matikweni yo tala, ku na ni xilaveko kambe xa vamakabye va ku tira va kuziranza. Vontlhe a vahuweleli va bapatizilweko lava va ringanelwako na va zi lava ku vunetela, va kuciwa ku tatisa a xikombelo xa kona, zonake va xi nyikela ka Kometi ya Ntiro ya Bandla. Hambu a vahuweleli va nga bapatiziwangiko va nga vunetela kuakiweni kutani kuaketweni ka tiSalawu tabye ta Mufumo.

TISALAWU TA MITLHANGANO YA HOMBE

¹⁸ A maKristu yo sangula ma wa tlhangana hi mitlawana. Hambulezo, ka zikhati zo kari ma wa tlhangana na ma tele. (Miti. 11:26) Hi kufanana, a vanhu va Jehova nyamutlha va maha mitlhangano ya hombe ya xipanze ni migotsovanyano ya muganga. A kutala ka zikhati ku lugariwa matshamu yo mahela kona mitlhangano leyo, kanilezi lomu ku nga hava matshamu yo faneleka kutani zi nga kotekiko ku lugara, ku nga ha akiwa a Salawu ya Mitlhangano ya Hombe.

¹⁹ Ka zikhati zo kari, ku xaviwa yindlu yi aketwa kasi yi tirisiwa kota Salawu ya Mitlhangano ya Hombe. Hambulezo, a kutala ka zikhati ku xaviwa wutshamu kasi ku aka tiSalawu tiswa ta Mitlhangano ya Hombe. A wuhombe ni wutsongwani ga tona ga hambanahambana hi kuya hi zilaveko za lomu xipanzeni. A hofisa ya ravi yi maha xiboho xa ku xava kutani ku aka a salawu ya mitlhangano ya hombe ntsena anzhako ka ku tshama hasi yi hlola a mali yi nga kona.

²⁰ Hi kota ya kukula ka matshamu lawo ya mitlhangano, a hofisa ya ravi yi yimisa vamakabye vo kari va nga tirweni wa xikhati xontlhe lezaku va wonelela a kutiriswa ni kuhlayiswa ka Salawu ya Mitlhangano ya Hombe. Ku mahiwa malulamiselo yo khanzakanya ya ku basisa niku ka mahiwa basiselelo ya hombe makhati mambiri hi lembe ku tlhela ku lungisiwa lomu ku nga onheka kasi yi nga tshuki yi onheka nguvu. Zi chukwana ku a mitiro leyo yi mahiwa hi vamakabye va kuziranza. Hikwalaho, a mabandla ma kuciwa ku seketela a malulamiselo lawa hi mbilu yontlhe. — Tis. 110:3; Mala. 1:10.

²¹ Ka zikhati zo kari, a Salawu ya Mitlhangano ya Hombe yi nga ha tirisiwa ka zimaho zinwani za moya, zo kota Zikola za Biblia ni mitlhangano yo hlawuleka ya vawoneleli va zipanze. A ku fana ni Salawu ya Mufumo, a Salawu ya Mitlhangano ya Hombe wutshamu gi hendleletilweko ga ku khozela ka gona. Loku hi tlhangana ka Salawu ya Mitlhangano ya Hombe, a mahanyela ya hina, mabohela, ni ku ti sasekisa, zi fanele ku kombisa xichawo a ku fana ni loku hi tlhangene ka Salawu ya Mufumo kasi ku khozela.

²² Ka masiku lawa yo gumesa, a vanhu voya hi kuna lomu hlengeletanweni ya Jehova. Lexo xikombiso xa lezaku wa katekisa ntiro wakwe. (Isa. 60:8, 10, 11, 22) Hikwalaho, hi lava ku seketela a lulamiselo ga kuva ni matshamu ya ku khozela kona hi tlhela hi ma basisa kasi mava yo tsakisa. Loku hi maha lezo, hi komba lezaku ha bonga a ntiro wu mahiwako hi matshamu lawo kasi ku hi vuna ku tiyisana kota lezi a siku ga Jehova gi tshinelako kusuhani.