Legi wutshamu ga hina ga ku khozela

1, 2. a) Matshamu muni ya wukhozeli lawa a malanza ya Jehova ma ma tirisileko xikhatini xi hunzileko? b) Jesu i wa ti zwisa kuyini hi tempeli ya Nungungulu le Jerusalema? c) Hi gihi a kungo ga nzima leyi?

KUSUKELA kale, a vanhu va Nungungulu va na ni wutshamu gi yimisilweko ga wukhozeli gi basileko. Kuzilava Abeli i tirisile alati a xikhati a nga nyikela miphahlelo yakwe ka Nungungulu. (Gen. 4:3, 4) Noa, na Abrahama, na Isaka, na Jakobe, na Mosi vontlhe va wa ti akele maalati. (Gen. 8:20; 12:7; 26:25; 35:1; Ekso. 17:15) Na va rangelwa hi Jehova, a vaIsraeli va lo aka tabernakeli. (Ekso. 25:8) Hi kufamba ka xikhati, va lo aka a tempeli kasi ku khozela Jehova. (1 Tih. 8:27, 29) Anzako ka kuva va wuyile hi wukhumbini le Babuloni, a vaJuda va wa tlhangana hi kukhanzakanya masinagogeni. (Mar. 6:2; Joh. 18:20; Miti. 15:21) A maKristu yo sangula ma wa tlhangana mitini ya ziro za bandla. (Miti. 12:12; 1 Kor. 16:19) Inyamutlha, a vanhu va Jehova misaveni yontlhe va tlhangana ka makume ya makume ya mazana ya tiSalawu ta Mufumo kasi ku gonza ni ku khozela.

² Jesu i wa hi ni xichawo xa hombe ni liranzo la hombe hi tempeli ya Jehova le Jerusalema laha ka kuza a mutsali wo kari wa Ivangeli a wona kutatiseka ka magezu lawa ya wuprofeti laha kakwe, yaku: “A ku pangamela a yindlu ya wena ku nzi mitile.” (Tis. 69:9; Joh. 2:17) A ku na Salawu ya Mufumo yi nga vitaniwako hi kufaneleko lezaku i ‘yindlu ya Jehova’ a ku fana ni lezi a magezu lawa ma nga tirisiswa zona ka tempeli ya le Jerusalema. (2 Kro. 5:13; 33:4) Hambulezo, a Biblia gi hi na ni matshinya ya milayo ma hi kombako lezi a matshamu ya hina ya wukhozeli nyamutlha ma faneleko ku tirisiswa zona ni ku kombisiswa xichawo. A kungo ga nzima leyi ku hi komba a matshinya yo kari ya milayo ni lezi ma hi vunisako zona ku kombisa xichawo tiSalawini ta Mufumo ni ku tiva ku ti seketela ni ku ti hlayisa.a

KOMBISA XICHAWO HI WUKHOZELI GI BASILEKO

3-5. A Salawu ya Mufumo yi tirela yini, niku lezo zi fanele ku khumbisa kuyini a ndlela leyi hi yi wonako hi yona a mitlhangano ya hina?

³ A Salawu ya Mufumo i tsinza ga wukhozeli gi basileko lomu xipanzeni. A ginwe ga malulamiselo lawa Jehova a ma mahako kasi ku hi gisa hi tlhelo ga moya mitlhangano ya viki ni viki Salawini ya Mufumo. Hi kwalaha hi tiyiswako kona ni ku kuma wurangeli ga hlengeletano yakwe. Vontlhe lava va tako mitlhanganweni leyo, hi ndlela yo kari, va rambiwa hi Jehova ni N’wana wakwe. Hambu lezi hi nga ni xirambo xo tiya xa kuva hi gela “mezeni ya [Jehova],” hi nga tshuki hi rivala a lisima la xirambo lexo. — 1 Kor. 10:21.

⁴ Jehova i nyika nguvu lisima a xikhati lexo xa ku khozela ni ku tiyisana laha koza a pimisela mupostoli Paule lezaku a hi kuca ku nga tshuki hi tsika ku tlhangana. (Gonza Maheberu 10:24, 25.) Hi wa ta ngha hi kombisa xichawo hi Jehova loku ho lova mitlhangano na ku na hi na xigelo xo zwala ke? Kunene, hi nga kombisa lezaku ha mu bonga Jehova ni malulamiselo yakwe hi ku longisela mitlhangano leyo ni ku hlengela ka yona hi mbilu yontlhe. — Tis. 22:22.

⁵ A ndlela leyi hi hlayisako hi yona a Salawu ya Mufumo ni lezi hi ti khomisako zona loku hi hi lomo zi fanele zi kombisa xichawo xi faneleko. Xana a hi lisine lezaku a ndlela leyi hi ti khomako hi yona mhakeni leyi ya yelana ni lezi hi ti zwisako zona hi vito ga Nungungulu, legi a kutala ka zikhati gi kumekako ka mutsalo wa Salawu ya Mufumo ke?— Ringanisa ni 1 Tihosi 8:17.

6. Zini lezi a vokari va wulako xungetano hi tiSalawu ta Mufumo ni lava va tlhanganako lomo ke? (Wona mufota kusanguleni ka nzima.)

⁶ A kutala ka zikhati a xichawo lexi hi xi kombisako hi wutshamu ga hina ga wukhozeli xa woniwa hi vanhu va nga hiko Timboni. Hi xikombiso, a wanuna wo kari le Turkia i te ngalo: “A kubasa ni kutshamiseka ka zilo loku nzi ku wonileko Salawini ya Mufumo ku nzi hlamalisile. A vanhu va kona va wa ambele khwatsi, va wa nwayitela, niku va lo nzi losa hi matsenya. Lezo zi nzi hlamalisile nguvu.” A wanuna loyi i lo sangula kuya mitlhanganweni hi kukhanzakanya, niku anzhako ka xikhatanyana i lo bapatizwa. Ka doropa go kari le Indonésia, a bandla gi lo ramba a tihosi ta mufumo ni vaakelane kasi ku ya wona a Salawu ya Mufumo na yi nga se hendleletwa. A hosi ya kona yi lo famba. I lo hlamaliswa hi kutiya ka muako lowo, ni matirela ya wona, ni simu ga zitsangi ni byanyi go saseka mareveni ya yona. I te ngalo: “A kubasa ka salawu leyi ku komba lezaku mu na ni kukholwa ka lisine.”

7, 8. Zilo muni za lisima lezi lava va tako mitlhanganweni ya wuKristu va faneleko ku tshama na va zi alakanya?

⁷ A xichawo xa hina hi Nungungulu loyi a hi rambako lezaku hiya mitlhanganweni ya wuKristu xi fanele ku woneka ka wunene ga hina, ni maambalela, ni kutisasekisa. A xichawo xi lava kambe lezaku hi potsa ku hunzeleta. Zi wonekisa ku khwatsi a vokari va tshuka va karatisa nguvu zilo mayelano ni lezi zi amukelekako mitlhanganweni ya wuKristu, kasi a vanwani va tshuka va ziba hi makatla vaku khwatsi hi loku va hi le kaya. Hi lisine, Jehova i lava lezaku a malanza yakwe ni vapfhumba va tizwa na va tshamisekile loku va hi mitlhanganweni. Hi tlhelo ginwani, lava va tako mitlhanganweni a va faneli ku hungula lisima la mitlhangano leyo hi ku bohisa ku khwatsi va famba va hlakana, ku tsalelana timesaje, ku bhula na wu kari wu famba mutlhangano, kuga ni kunwa, ni zinwani. A vapswali va fanele ku gonzisa vana vabye lezaku a Salawu ya Mufumo a hi wutshamu go tsutsuma-tsutsuma kutani ku hlakana. — Mutsh. 3:1.

⁸ Laha a nga wona vanhu na va teka tempeli ya Nungungulu va yi maha bazari, Jesu i lo zangara nguvu, a va hlongola. (Joh. 2:13-17) A tiSalawu ta hina ta Mufumo tonawu matshamu ya wukhozeli gi basileko ni gonziselelo ya moya. Hikwalaho, ni wahi mabhinzu ma kalako ma nga yelani ni zilaveko za moya ma fanele ku mahiwa ka wutshamu ginwani.— Ringanisa Nehemia 13:7, 8.

LEZI A TISALAWU TA MUFUMO TI SEKETELISWAKO ZONA

9, 10. a) A tiSalawu tiswa ta Mufumo ti akiswa kuyini, niku hi wahi mabhinzu ya kona? b) I lulamiselo muni ga liranzo gi vunileko nguvu a mabandla ma nga hava a mali ya ku ti akela tiSalawu ta Mufumo?

⁹ A hlengeletano ya Jehova yi tira nguvu kasi ku aka ni ku seketela a tiSalawu ta Mufumo. A ntiro wa ku tsala, ku aka, ni ku lungisa a tiSalawu leto wu mahiwa hi vatiri va kuziranza, na va nga holi. Hi yihi mihanzu ya kona? Kusukela 1 ka Novembro wa 1999, a mabandla misaveni yontlhe ma akelwe matshamu maswa ya wukhozeli yo hunza 28.000 wa wona. Lezo zi wula lezaku ka 15 wa malembe lawa ma ha hi ku hunzako, hi xiringaniso, ku wa akiwa ntlhanu wa tiSalawu ta Mufumo hi siku.

¹⁰ Ku mahiwa mizamo kasi ku seketela a kuakiwa ka tiSalawu ta Mufumo ni kwihi lomu ti lavekako. A lulamiselo legi ga liranzo gi seketelwa ka tshinya ga nayo ga Mitsalo ga lezaku a pfuno wa vanwani wu tatisa a kuvumala ka vanwani, kasi kuva ni “kuringana.” (Gonza 2 Va Le Korinte 8:13-15.) Kota wuyelo ga kona, ku akilwe matshamu maswa yo saseka ya wukhozeli gi basileko na ma akelwa mabandla yaku ma wa nga ta tshuka ma kuma mali ya ku ti akela hi woce.

11. Zini lezi a vamakabye vo kari va wulako xungetano hi tiSalawu tiswa ta Mufumo, niku u ti zwisa kuyini hi lezo?

¹¹ A bandla go kari gi vunekileko hi lulamiselo legi le Costa Rica gi lo tsala lezi: “Loku hi yima mahlweni ka Salawu ya Mufumo, ko khwatsi ho lora! A hi kholwi. A Salawu ya hina yo saseka yi akilwe yi mbhela hi ntlhanu wa masiku ni manharu basi! Lezo zi kotekile hi kota ya makatekwa ya Jehova, malulamiselo ma mahilweko hi hlengeletano yakwe, ni xivuno xa vamakabye va hina vo ranzeka. A wutshamu legi ga wukhozeli hakunene xinyikiwo xo saseka; i tshomba hi nyikilweko hi Jehova. A ho ku tsaka hi kuva nayo.” Xana a kuzwa magezu lawo ya ku bonga a tiSalawu tiswa ta Mufumo ni ku tiva lezaku a vamakabye ka makume ya mazana ya matshamu misaveni yontlhe va ti zwisa zalezo a zi ku tati hi litsako ke? Lowu i ntiro wa Jehova hakunene, hakuva neti a tiSalawu tiswa ta Mufumo ti mbhela ku akiwa, a kutala ka zikhati ti tala hi vanhu va timbilu ti nene lava va xuvako ku tiva zo tala hi Muvangi wa hina wa liranzo. — Tis. 127:1.

12. U nga seketelisa kuyini a kuakiwa ka tiSalawu ta Mufumo?

¹² A vamakabye vo tala va kuma litsako la hombe hi ku vunetela kuakeni ka tiSalawu ta Mufumo. Kani ha zi kota ku vunetela kuakeni kutani ahihi, hontlheni hi na ni lungelo ga ku seketela a miako leyo hi minyikelo ya hina. Hi lanzela xikombiso xa vanhu va Nungungulu va xikhatini xa ku tsaliwa ka Biblia lava va nga seketela a kuakiwa ka matshamu yabye ya wukhozeli. — Ekso. 25:2; 2 Kor. 9:7.

KUBASISWA KA TISALAWU TA MUFUMO

13, 14. Matshinya muni ya Mitsalo ma tirako kubasiseni ni kusasekiseni ka Salawu ya hina ya Mufumo?

¹³ Neti a Salawu ya Mufumo yi mbhela ku akiwa, yi lava ku hlayisiwa kasi yi tshama yi basile ni kusaseka kasi yi kombisa a matshamela ya Nungungulu loyi hi mu khozelako— loyi a nga hiko Nungungulu wa woyonga. (Gonza 1 Va Le Korinte 14:33, 40.) A Biblia gi zwananisa a kubasa ni kuhlazeka ka moya ni ka miri. (Kuv. 19:8) Hikwalaho, loku a munhu a lava ku amukeleka ka Jehova, i fanele kuva ni basiselelo.

¹⁴ Hi kuyelana ni matshinya lawa ya nayo, xontlhe xikhati hi fanele ku tizwa na hi tlhatlhekile ku ramba vatsakeli lezaku vata mitlhanganweni ya hina, na hi tsumba lezaku a xiyimo xa salawu ya hina xi ta tatisa a mahungu yo saseka lawa hi va bhulelako. Va ta zi wona lezaku hi khozela a Nungungulu a basileko loyi lokuloku a to hunzula misava yiva paradise gi nga hiko na wubihi. — Isa. 6:1-3; Kuv. 11:18.

15, 16. a) Hikuyini zi nga vako xikarato a kuhlayisa kubasa ka Salawu ya Mufumo, kanilezi hikuyini zi lavekako? b) Malulamiselo muni ma nga kona laha bandleni kasi ku basisa a Salawu ya Mufumo, niku i lungelo muni legi munwe ni munwani wa hina a nga nago?

¹⁵ A vokari va nga nyika nguvu lisima a basiselelo ku hunza vanwani. Lezo zi nga ha humelela hi kota ya mawundlelwa yabye. A vokari va hanya ka wutshamu gi nga ni madhaka kutani ka zipanze lezi a maruwa ya kona ma nga ni lithuri. A vanwani a va na zilo zontlhe zi lavekako kubasiseni. Na ku nga khataliseki a xiyimo xa lomu hi tshamako kona, a Salawu ya hina ya Mufumo yi fanele ku nyika xikombiso xi nene loku zita mhakeni ya kuhlayiseka, kota lezi yi khomileko vito ga Jehova ni lezi yi nga wutshamu ga wukhozeli gi basileko. — Deut. 23:14.

¹⁶ A kubasiswa ka Salawu ya Mufumo a ku faneli ku mahelwa mihoni. A hubye yinwe ni yinwani ya madota yi fanele yi tiyiseka lezaku ku na ni longoloko wa basiselelo ni materiali lawa ma lavekako kasi a wutshamu ga wukhozeli ga bandla gi cuwukeka khwatsi. Kota lezi ku nga ni mitiro ya basiselelo yi lavako ku mahiwa anzhako ka mutlhangano wunwe ni wunwani ni mitiro yaku a yi lavi lezo, ku fanele kuva ni wurangeli gi nene kasi ku ngavi ni nchumu wu salako nzhako. A ziro zontlhe za bandla zi na ni lungelo ga ku seketela mizamo leyo.

KUHLAYISWA KA WUTSHAMU GA HINA GA KUKHOZELA

17, 18. a) Zikombiso muni za Mitsalo zi nga kona xungetano hi ku lungisa a matshamu ya hina ya wukhozeli gi basileko? b) Hikuyini a tiSalawu ta Mufumo ti faneleko ku hlayiswa khwatsi?

¹⁷ A malanza ya Jehova ma maha mizamo ya hombe kambe kasi a matshamu yabye ya wukhozeli ma tshama ma hlayisekile. Hosi Joaxi wa le Juda i lo laya vapristi lezaku va tirisa a minyikelo leyi yi nga mahilwe ndlwini ya Jehova kasi ku “lulamisa zontlhe lezi va . . . nga zi kuma na zi onhekile ka yona.” (2 Tih. 12:4, 5) Anzhako ka 200 wa malembe, Hosi Josia yenawu i lo tirisa minyikelo yi mahilweko tempeleni kasi ku lulamisa lezi zi nga laveka. — Gonza 2 Kronekele 34:9-11.

¹⁸ A tihofisa ta ravi ti bika lezaku matikweni yo kari, a vamakabye va tolovela ku maha mihoni ya ku lungisa a miako leyo kutani zibya za kona. Kuzilava vatsongwani matikweni lawo va zi tivako kutani va nga ni mali ya ku maha a ntiro lowo. Kanilezi a ku mahela mihoni a ntiro wa ku lulamisa a Salawu ya Mufumo zi nga maha lezaku yi hatlisa kufa yi tlhela yi nga nyiki wukustumunyu gi nene lomu xipanzeni. Hi tlhelo ginwani, loku a ziro za bandla zi maha zontlhe zi nga ntanwini wa zona kasi a Salawu ya Mufumo yi tshama yi hlayisekile, lezo zi neha wudzunzo ka Jehova zi tlhela zi hlayisa a minyikelo yi mahiwako hi makholwa-kulori.

19. Zini u ti yimiseleko ku maha xungetano hi miako leyi hi yi tirisako wukhozelini gi basileko?

¹⁹ A Salawu ya Mufumo i yindlu yi hendleletilweko ka Jehova. Hikwalaho, a yi na ku wuliwa lezaku yi lumba munhu wo kari kutani bandla, na ku nga khataliseki vito legi yi nga tsalelwa hi gona. A matshinya ya milayo ya wuKristu ma komba lezaku hi fanele ku tirisana khwatsi kasi a wutshamu legi gi ringanelwa khwatsi hi ku tatisa a kungo ga kuakiwa ka gona. Vontlhe lomu bandleni va nga hlengela mhakeni leyi hi ku kombisa xichawo xi faneleko hi wutshamu ga hina ga wukhozeli, ku maha minyikelo kasi kuseketela miako yiswa, ni ku tirisa xikhati xabye ni ntamu hi kuziranza kasi ku basisa ni ku hlayisa a tiSalawu ya Mufumo leti ti sinako ti hi kona. Loku hi seketela mizamo leyi, hi kombisa a kuhiseka ka hina hi wutshamu ga Jehova ga wukhozeli gi basileko, a ku fana na Jesu. — Joh. 2:17.