Ntiro wa kuaka wu dzunzako Jehova

1, 2. a) Zini lezi a malanza ya Jehova ma tako na ma zi maha hi kale? b) Zini lezi Jehova a zi nyikako nguvu lisima?

A MALANZA yo tsumbeka ya Jehova mata na ma aka hi kale a miako yi dzunzako a vito ga Nungungulu. Hi xikombiso, a vaIsraeli va hlengele hi kutsaka kuakeni ka tabernakeli va tlhela va maha minyikelo ya materiali ya kona hi matsenya. — Ekso. 35:30-35; 36:1, 4-7.

² Jehova a nga woni a materiali ya kuaka ha woce kota zilo lezi zi mu nehelako wudzunzo, ge hambu kuva wona a ma nyikako nguvu lisima ku hunza zontlhe. (Mat. 23:16, 17) Lezi Jehova a zi nyikako nguvu lisima, a xinyikiwo lexi xi mu dzunzako nguvu ku hunza zontlhe, wukhozeli legi a mahelwako hi malanza yakwe, a ku patsa ni moya wabye wa kutinyiketela zinwe ni ntiro wabye wo hiseka. (Ekso. 35:21; Mar. 12:41-44; 1 Tim. 6:17-19) A mhaka leyo nja lisima nguvu. Hikuyini? Hakuva a miako ya fuva. Hi xikombiso, a tabernakeli ni tempeli a za ha hi kona. Hambu lezi a miako leyo yi fuvileko, Jehova a nga rivalangi a wuhana ni kutikarata ka malanza yakwe yo tsumbeka lawa ma nga seketela a kuakiwa ka yona. — Gonza 1 Va Le Korinte 15:58; Maheberu 6:10.

3. Zini hi to zi alakanya ka xipimo lexi?

³ A malanza ya Jehova ya masikwini ya hina wonawu ma tira hi kutikarata kasi ku aka miako ya wukhozeli. Niku a zilo lezi hi zi mahileko na hi rangelwa hi Hosi ya hina Jesu Kristu hakunene za hlamalisa! Zi te dlunya lezaku Jehova wa katekisa a kutikarata ka hina. (Tis. 127:1) Ka xipimo lexi, hi ta alakanya a ntiro wo kari wa lixaka lelo lowu wu mahiwako ni lezi wu nehisako zona wudzunzo ka Jehova. Hi ta tlhela hizwa magezu ya vokari va patsekileko ntirweni lowo.

Ntiro wa ku aka a tiSalawu ta Mufumo

4. a) Hikuyini hi nga ni xilaveko xa matshamu yo tala ya wukhozeli? b) Hikuyini a tihofisa to tala ta maravi ti patsiwako? (Wona kambe a kwadru “Kuakiwa ka maravi — Ndlela ya ku ti zwananisa ni kucica ka zilaveko.”)

⁴ Kota lezi hi wulawulileko hi zona ka xipimo 16, Jehova i lava lezaku hi tlhangana kasi ku khozela. (Maheb. 10:25) A mitlhangano ya hina a yi tiyisi ntsena a kukholwa ka hina, kanilezi yi tlhela yi engetela a kutsakela ka hina a ntiro wa kuxumayela. Kota lezi a masiku yo gumesa ma yako kumbheleni, Jehova i simama ku hatlisisa a ntiro lowo. Kota wuyelo ga kona, lembe ni lembe a vanhu va mazana ya makume ya mazana va nghena hlengeletanweni. (Isa. 60:22) Kota lezi a hlayo ya vafumelwi va Mufumo yi yako yi anza nguvu, ku engeteleka a xilaveko xa kuakiwa ka miako ya ku gandlela kona a mabhuku ma seketelwako ka Biblia. Niku a xilaveko xa kuva ni miako yo khozela kona xa engetelawu.

5. Hikuyini a vito Salawu ya Mufumo gi ringanako khwatsi a muako lowo? (Wona a kwadru “Chechi ya kuwonekela kuswa.”)

⁵ Kusanguleni ka matimu ya vanhu va Jehova masikwini ya hina, a Zigonzani za Biblia zi lo sangula ku wona a xilaveko xa kuva ni matshamu ya zona ya wukhozeli. Zi wonekisa ku khwatsi a ginwe ga matshamu yo sangula ya wukhozeli gi akilwe le Virgínia wa le Mupela-gambo, EUA, hi 1890. Hi va 1930, a vanhu va Jehova va wa akile ni kuaketa a tisalawu to hlaya, kanilezi a matshamu lawo yo mahela kona mitlhangano ma wa nga se nyikiwa vito. Kanilezi hi 1935, makabye Rutherford i lo enzela Havaí, lomu ku nga kari ku akiwa a salawu ni hofisa yiswa ya ravi. Loku va mu wutisile ku i vito muni va nga wa ta chula a salawu leyo, makabye Rutherford i hlamulisile lezi: “A mu alakanyi ku yi fanele ku vitanwa ku i ‘Salawu ya Mufumo,’ kota lezi zi nga zona hi mahako, a ku xumayela mahungu yo saseka ya Mufumo ke?” (Mat. 24:14) A vito lego gi ringanako khwatsi gi wa nga ta nyikiwa ntsena a salawu leyo kanilezi gi wa ta chuliwa a matshamu wontlhe ma tiriswako hi mabandla ya vanhu va Jehova misaveni lezaku va khozela kona.

6, 7. Xana a maakela ya xihatla ya tiSalawu ta Mufumo ma kumekisile yini?

⁶ Lomu ka va 1970, a xilaveko xa tiSalawu ta Mufumo xi waya xi engetela nguvu. Kasi ku tatisa a xilaveko lexo, a vamakabye va le Estados Unidos va lo sangula a ku maha miako ya yi nene ni yo tiya hi masiku matsongwani ntsena. Hi 1983, le Estados Unidos ni Canadá ku wa akilwe a xipimo xa 200 wa tiSalawu ta Mufumo ta lixaka lelo. Kasi ku maha ntiro lowo, a vamakabye va lo sangula ku yimisa a tikometi ta zipanze ta ku aka. A malulamiselo lawa ma tirile khwatsi laha ka kuza hi 1986, a Hubye yi Fumako yi pasisa a lulamiselo legi, niku hi 1987, ku wa yimisilwe a 60 wa Tikometi ta Zipanze ta ku Aka le Estados Unidos.a Hi 1992, a Tikometi leto ti lo yimisiwa kambe le Alemanha, Argentina, Austrália, Djoni, Espanha, França, Japão, ni México. Hi lisine, a vamakabye vo ti karata lava va tirako tikometini leto va fanele ku seketelwa hi hina hakuva a ntiro lowu va wu mahako wu maha xipanze xa ntiro wo basa.

⁷ A tiSalawu leto ta Mufumo to akiwa hi xihatla ti nyikile wukustumunyu go hlamalisa lomu ti akilweko kona. Hi xikombiso, a phepha-hungu go kari le Espanha gi wa hi ni magezu lawa ka phajina ga gona go sangula “A kukholwa ka kunula zitsunga.” Na gi wulawula hi kuakiwa ka Salawu ya Mufumo le doropeni ga Martos, a phepha lego gi wutisile lezi: “Xana za koteka ku a misaveni leyi yi fambisiwako hi makangwa, ku humelela vanhu va matlhelo yo hambanahambana [ya Espanha] lezaku va enza hi kuziranza vaya Martos kasi ku ya aka a muako wa xihatla nguvu, wo mahiwa khwatsi, ni hi ndlela yo lulama a ku hunza miako yontlhe yinwani ke?” A nzima leyo yi hlamulile a xiwutiso lexo hi ku tshaha magezu ya yinwe ya Timboni ti nga ti nyiketele ntirweni lowo: “Zontlhe lezi zi maheka hakuva hi vanhu va gonzisiwako hi Jehova.”

Ntiro wa kuaka matikweni ma nga wusiwaneni

8. I longoloko muni wu yimisilweko hi Hubye yi Fumako hi 1999, niku hikuyini?

⁸ Laha a zana ga malembe ga wu 20 gi ngaya gi mbhela, a vanhu va matiko ma nga wusiwaneni va lo sangula ku nghena hlengeletanweni ya Jehova. A mabandla ya kwalomo matikweni lawo ma lo maha lezi ma nga zi kota kasi ku ti akela a matshamu yo tlhanganela kona. Kanilezi ka matiko yo kari, va wa tseketselwa ni ku khomiwa hi xihlawulela hi kota ya lezi a tiSalawu tabye ta Mufumo ti nga kala ti nga cuwukeki khwatsi loku ti ringaniswa ni manwani matshamu ya wukhozeli. Kanilezi, kusukela 1999 a Hubye yi Fumako yi lo yimisa a longoloko wa ku hatlisisa a kuakiwa ka tiSalawu ta Mufumo matikweni ma nga wusiwaneni. A matiko lawo ma lo rumelelwa a mali ya matiko yo ganya lezaku “ku ecanyiswa” a makotela ya kuaka. (Gonza 2 Va Le Korinte 8:13-15.) Niku a vamakabye va xinuna ni va xisati va manwani matiko va lo ti nyiketela lezaku va ya vunetela kuakeni matikweni lawo.

9. I ntiro muni lowu wu nga ku khwatsi a wu koteki, kanilezi zini lezi zi kotekileko ku mahiwa?

⁹ Kusanguleni, a ntiro wu wa ku khwatsi wu binzile nguvu.A mubiko wo kari wa 2001 wu kombile lezaku ka 88 wa matiko ma nga wusiwaneni ku wa laveka a ku hunza 18.300 wa tiSalawu ta Mufumo. Kanilezi, hi ku vuniwa hi moya wa Nungungulu ni Hosi ya hina Jesu Kristu, a ku na ntiro wu nga kotekiko. (Mat. 19:26) Nzeni ka 15 wa malembe, kusukela 1999 kala 2013, a vanhu va Nungungulu va wa akile 26.849 wa tiSalawu ta Mufumo kota xipanze xa longoloko lowu.b Jehova wa simama ku katekisa a ntiro wa kuxumayela, hikwalaho ka ha hi ni xilaveko xa xipimo xa 6.500 wa tiSalawu ta Mufumo matikweni lawo, niku zezi, ku laveka a ku hunza 890 wa tona lembe ni lembe.

10-12. Xana a kuakiwa ka tiSalawu ta Mufumo ku nehisa kuyini wudzunzo vitweni ga Jehova?

¹⁰ Xana a kuakiwa ka tiSalawu leto ta tiswa ta Mufumo ku nehisa kuyini wudzunzo ka vito ga Jehova? A mubiko wo kari wa hofisa ya ravi ya le Zimbabwe wu te ngalo: “Nzeni ka hweti yinwe ya kuakiwa ka Salawu yiswa ya Mufumo, a hlayo ya lava va tako mitlhanganweni yi tala ku engetela laha ka kuza yi wuyetwa kumbiri.” Ka matiko yo tala, zi wonekisa ku khwatsi a vanhu va kanakana ku hlengela na hina na hi nga se kuma wutshamu gi faneleko ga ku khozela kona. Kanilezi, neti ku akiwa a Salawu ya Mufumo, yi tekela ku tala hi vanhu laha ka kuza ku laveka yinwani. Hambulezo, a hi kusaseka ka muako wa kona ntsena ku kokelako vanhu ka Jehova. A liranzo lo mbhelela la wuKristu leli li kombiswako hi lava va akako a miako leyo lonawu la khumba lezi a vanhu va yi wonisako zona a hlengeletano yakwe. Wona a zikombiso zo kari ntsena.

¹¹ Indonésia. A xikhati lexi a wanuna wo kari loyi a nga kari a wona a kuakiwa ka Salawu ya Mufumo a nga tiva lezaku vontlhe lava va tirako laho va no ti nyiketela hi kuziranza, i te ngalo: “Ma nzi hlamalisa vanhu nzinwina! Nza zi wona lezi a munwe ni munwani wa nwina a tirisako zona hi mbilu yontlhe ni litsako, hambu lezi mu nga holelwiko. Nzi alakanya ku a ku na yinwani hlengeletano ya wukhongeli yi fanako ni ya nwina!”

¹² Ucrânia. A wasati wo kari loyi a nga hunzahunza siku ni siku hi laha ku nga akiwa a Salawu ya Mufumo i lo guma a alakanya lezaku a vatiri lavayani va wa hi Timboni ta Jehova ni lezaku a muako lowuyani wu wa hi Salawu ya Mufumo. I te ngalo: “Nzi wa zwile zokari xungetano hi Timboni ta Jehova ni nzisana ya mina ya xisati yi mahileko Mboni. Loku nzi wonile a ntiro lowu wa kuaka, nzi no khumbeka zonake nzi boha ku mahawu xipanze xa ngango lowu wa moya. Nzi wonile lezaku a liranzo la kombiswa khwatsi laha.” A wasati loyi i lo vumela a xigonzo xa Biblia a tlhela a bapatizwa hi 2010.

13, 14. a) Zini u zi gonzako xungetano hi lezi a patswa wo kari wa vatekani wu zi mahileko anzhako ka ku wona a mitiro ya hina kuakiweni ka Salawu ya Mufumo? b) U nga vunisa kuyini lezaku a wutshamu legi mu khozelako ka gona gi dzunza a vito ga Jehova?

¹³ Argentina. A patswa wo kari wa vatekani wu lo tshinelela a makabye loyi a nga wonelela a kuakiwa ka Salawu yo kari ya Mufumo. A nuna wa kona i te ngalo: “Hita na hi wona a ntiro wa nwina wa kuaka, niku . . . hi bohile lezaku hi ta gonza ha Nungungulu wutshanwini legi.” A guma aku, “Zini hi faneleko ku maha kasi hi ringanelwa hi ku khoma mitlhangano laha?” A patswa lowo wu vumelile ku fambiselwa a xigonzo xa Biblia, kanilezi ntsena loku xi fambiselwa a ngango wabye wontlhe. A vamakabye va lo maha lezo hi kutsaka.

¹⁴ Kuzilava a wu vangi ni lungelo ga ku vunetela kuakeni ka Salawu ya Mufumo leyi mu tlhanganelako kona, kanilezi u nga ha maha zotala lezaku a wutshamu ga nwina ga wukhozeli gi neha wudzunzo vitweni ga Jehova. Hi xikombiso, u nga ramba zigonzani za wena za Biblia, lava u va tlhelelako ntirweni wa simu, ni vanwani vanhu lezaku va ta khoma mitlhangano zinwe na wena Salawini ya Mufumo. U na ni lungelo kambe ga ku vunetela kuhlayiseni ka wutshamu ga nwina ga wukhozeli. Loku u xaxameta khwatsi a zilo za wena, u nga maha minyikelo ya kuziranza lezaku ku hlayisiwa a Salawu ya Mufumo leyi mu tlhanganako ka yona kutani ku akiwa manwani matshamu ya wukhozeli matshanwini manwani ya misava. (Gonza 1 Va Le Korinte 16:2.) A ntiro wontlhe lowo wu neha wudzunzo ka vito ga Jehova.

Vatiri va ti nyiketelako “hi litsako”

15-17. a) Hi vamani lava va mahako xipanze xa hombe ntirweni wa kuaka? b) Zini u zi gonzako ka magezu lawa ma wulilweko hi mipatswa ya vatekani lava va tirako kuakeni le handle ka matiko?

¹⁵ A kutala ka ntiro lowu wu mahiwako kuakiweni ka tiSalawu ta Mufumo, tiSalawu ta Mitlhangano ya Hombe, ni tihofisa ta maravi wu mahiwa hi vamakabye va xinuna ni va xisati va tiko lego. Hambulezo, va tala ku vuniwa hi vamakabye va xinuna ni va xisati va manwani matiko lava va nga ni wutlhari ga kuaka. A vokari va vatiri lavo va ti mahele malulamiselo ma va vumelelako ku tira matiko-wundle kuakeni hi maviki yo hlaya. A vanwani va ti hendleletile lezaku va tira hi malembe yo tala, na va tira ka miako yo hambanahambana.

¹⁶ Lava va nga ni lungelo ga ku tira kuakeni handle ka matiko va yimisana ni zikarato zo kari kanilezi va wuyelwa nguvu kambe. Hi xikombiso, Timo na Lina, va tirile matikweni ma nga le Ásia, Europa ni América Dzonga na va aka tiSalawu ta Mufumo, tiSalawu ta Mitlhangano ya Hombe, ni tihofisa ta maravi. Timo i ngalo: “Nzi wa fanele ku rurarura hi ka xiavelo xo kari nziya ka xinwani nzhako ka malembe mambiri ka 30 wa malembe lawa ma ha hi ku hunzako.” Lina, loyi a chadileko na Timo a 25 wa malembe nzhako, i ngalo: “Nzi tirile na Timo matikweni yo hambanahambana. Zi lava ntamu ni xikhati lezaku u tolovela a zakuga ziswa, moya wuswa, lirimi liswa, ni xipanze xiswa xa ku xumayela kona zinwe ni vanghana vaswa.”c Xana a kutikarata kabye ku bhinzulile? Lina wa simama: “A zikarato lezo zi hi nehele makatekwa ya hombe ka wontlhe. Hi kombiselwe liranzo la wuKristu ni moya wa ku rurela vapfhumba hi tlhela hi wona lezi Jehova a hi khatalelisako zona hi liranzo. Hi tlhelile hi wona kutatiseka ka xitsumbiso lexi Jesu a nyikileko vapizani vakwe, xi nga ka Marku 10:29, 30. Hi amukelisilwe hi ka zana a vamakabye va xinuna ni va xisati zinwe ni vamamani.” Timo i ngalo: “Za tsakisa nguvu a ku tirisa a wutlhari ga hina makungweni ya ma nene ka wontlhe, hi ku patseka kuengeteleni ka titshomba ta Hosi.”

¹⁷ Darren na Sarah, lava va vunileko mitirweni ya kuaka matikweni ya Afrika, Ásia, América Central, Europa, América Dzonga, ni zihlaleni za Pacífico wa le Dzongeni, va alakanya lezaku va amukele zo tala ku hunza lezi va nga ti karatisa zona. Na ku nga khataliseki a zikarato lezi va yimisanako nazo, Darren i ngalo: “I lungelo a ku tira ni vamakabye va matlhelo yo hambanahambana ya misava. Nzi wonile lezaku a liranzo leli hi nga nalo ha Jehova li fana ni lingoti leli li renzelekako misava li hi tlhanganyisa.” Sarah i ngalo: “Nzi gonzile zotala ka vamakabye va xinuna ni va xisati va midawuko yo hambanahambana! Loku nzi wona a kutikarata kabye ntirweni wa Jehova nzi kuceka ku simama nzi ti karata hi laha nzi zi kotako hi kona.”

18. Xi tatisekisa kuyini a xiprofeto lexi xi tsalilweko ka Tisimu 110:1-3?

¹⁸ Hosi Davida i profetile lezaku hambu lezi a vafumelwi va Mufumo wa Nungungulu va nga wa ta yimisana ni zikarato, vona va wa ta ti nyikela “hi litsako” kasi ku tirela a zilaveko za Mufumo. (Gonza Tisimu 110:1-3.) Vontlhe lava va patsekako ntirweni wu seketelako a Mufumo va hlengela kutatiseni ka magezu lawo ya wuprofeti. (1 Kor. 3:9) A tihofisa ta maravi to tala nguvu, a mazanazana ya tiSalawu ta Mitlhangano ya Hombe ni makume ya makume ya mazana ya tiSalawu ta Mufumo ti nga misaveni zi nyika xiseketelo xi wonekako xa lezaku a Mufumo wa Nungungulu ngwa lisine niku wa fuma zalezi. A hi gona lungelo hi nga nago ga ku mahela Hosi Jesu Kristu a ntiro wu nehako wudzunzo ga hombe ka Jehova legi gi mu faneleko!