Kwadru Ga Ziwutiso

◼ Xana a Timboni ta Jehova ti fanele ku hunziselana a tikanelo ti gravarilweko kutani to tsaliwa?

Ha tiyiswa ni ku kuciwa hi tikanelo ti seketelwako ka Biblia. (Miti. 15:32) Hikwalaho, a zi hlamalisi a ku lava ku hlengela mahungu lawo ma tiyisako hlana ni lava va nga hi hava mutlhanganweni. Kota lezi a zitiro zo tsalangana za ku gravara zi yako zi tala nguvu, a kanelo wa zi kota ku gravariwa wu tlhela wu avelwa ka vanwani hi kucopeta ka tihlo. A vokari va hlengeletela a tikanelo ti gravarilweko, zinwe ni tikanelo ti vekilweko kaleloko, niku na va hi ni zigelo zi nene, va lombisa a tikanelo leto kutani ku ti kopiyarela a vanghana vabye. A vanwani va vululile a maphajina ka Internet kasi va cheletela kona a tikanelo leto lezaku mani na mani a ti kopiyara.

Kunene, a ku na nchumu wu beletelako loku ku hi lezaku hi gravara a tikanelo kasi hi ti tirisa hina wutsumbu kutani ziro za ngango wa hina. Tlhatakumbiri, a madota ma nga ha maha malulamiselo ya ku a tikanelo ti gravarelwa a ziro za bandla lezi zi babyako na zi nga zi koti a kuya mitlhanganweni. Hambu zi hi tano, ku na ni zigelo zo zwala za kuva hi nga faneli ku hunziselana a tikanelo to tsaliwa kutani to gravariwa.

Kota lezi a kutala ka zikhati a tikanelo ti vekiwako na ku alakanyelwa a zilaveko za bandla, zi wa ta hi olovela a ku nyika mitlhamuselo ya hava ka timhaka-tshinya hi ti kumileko ka kanelo wo gravariwa hi nga hunziselwa hi vanwani hakuva hi wa nga ta ma tiva a matshamela lawa a kanelo wu vekilweko ka wona. Ku nga hi lezo ntsena, zi wa ta hi karatela a ku tiva loyi a nga veka kanelo niku i wu vekile siku muni, kasi hi tiyiseka lezaku a timhaka leto ti kanelweko a ti hunzelwangi niku ta lisine ke. (Luka 1:1-4) Tlhatakumbiri, a ku hunziselana a tikanelo to tsaliwa kutani to gravariwa zi nga ringa a vokari lezaku va nyika kutani ku vumela a xichawo ni wudzunzo zi nga va faneliko. — 1 Kor. 3:5-7.

A nanza gi tsumbekileko ni go tlhariha gi tira nguvu kasi ku nyika zakuga za moya hi lipimo li faneleko hi “xikhati xa kona.” (Luka 12:42) Lezo zi patsa a malulamiselo ya ku veka tikanelo mabandleni ya Timboni ta Jehova ni mahungu ma gravarilweko ma zi kotako ku kopiyariwa ka Web site ya nayo jw.org. Ha zi kota ku tiyiseka lezaku a nanza gi tsumbekileko ni go tlhariha zinwe ni Hubye ya gona yi Fumako va ta hi nyika lezi hi zi lavako kasi hi tiya kukholweni. — Miti. 16:4, 5.