Mahungu ma thepilweko — u nga ma tirisisa kuyini?

1. Ahandle ka mabhuku yo gandliwa, i lulamiselo muni ga gi nene hi nga nago?

¹ A vanhu vo tala va zi ranza ku tirisa jw.org kutani mahungu ma thepilweko kasi ku gonza a magezu yo nanziha ya lisine. (Mutsh. 12:10) Kanilezi, wa ma tirisa a mahungu ma thepilweko? A mahungu lawo ma hi vuna kuzwa timhaka to tala leti ti nga ka saite ya hina. Ma nga hi vunisa kuyini?

2. Hi nga ma tirisisa kuyini a mahungu ma thepilweko ka xigonzo xa hina kutani xa ngango?

² Ka xigonzo xa hina wutsumbu kutani xa ngango: A ku ingisela mahungu ma thepilweko ya Biblia, marevista, kutani bhuku go kari na hi kari hi enza kutani ku maha mitiro ya hina ya siku ni siku zi nga hi vuna ku tirisa khwatsi a xikhati xa hina. (Efe. 5:15, 16) Hi nga ha cicacica wukhozeli ga hina ga ngango hi ku ingisela mahungu ma thepilweko na hi kari hi lanzela lomu ka bhuku ga hina. A ku tirisa a mahungu ma thepilweko xigonzweni xa hina wutsumbu zi vuna nguvu loku hi lava ku chukwatisa a malerela ya hina kutani loku hi kari hi gonza lirimi lelo.

3. Hi vamani va nga vunekako hi mahungu ma thepilweko lomu xipanzeni xa hina?

³ Wutirelini: Xipanzeni xa hina, a vanhu lava va ti wonako na va nga hi na xikhati xa ku tshama va lera va nga ha vumela ku ingisela a mahungu ma thepilweko. Kutani hi nga ha kuma munhu a wulawulako lirimi linwani loyi kuzilava a nga wa ta tsaka hi kuzwa mahungu yo saseka “hi lirimi leli . . . a pswalelweko ka lona.” (Miti. 2:6-8) Ka midawuko yo kari, a ku ingisela za lisima nguvu. Hi xikombiso, a vaHmong va tolovela ku hlawutela matimu yabye ka vana vabye hi nomu niku va zi kota nguvu ku hlayisa mahungu va ma zwako hi tindleve. Ka matshamu yo tala ya Afrika, a vanhu va zi ranza nguvu ku gonza hi ku hlawutelwa matimu.

4. Ziwutiso muni hi nga ti mahako xungetano hi ku vuna vanhu xipanzeni xa hina?

⁴ Xana a vanhu xipanzeni xa wena va nga vuneka loku wo bisa mahungu yo kari ma thepilweko hi lirimi labye? I kona waku a nga vuneka loku ho mu rumelela bhuku gi thepilweko hi email kutani hi tinwani tindlela ke? Xana hi nga chisa bhuku gi thepilweko ka internet hi chela ka disko hi nyika munhu a tsakelako, kuzilava hi tlhela hi mu nyika go gandliwa ke? Kani i bhuku, broxura, revista, kutani xiphephana xi thepilweko hi nyikako munhu wutirelini, zontlhe hi nga zi hlaya kota mabhuku hi nyikeleko. A mahungu ma thepilweko ma mahelwe kuva hi ma tirisa ka xigonzo xa hina wutsumbu ni ku byala hi wona a mbewu ya lisine la Mufumo.— 1 Kor. 3:6.