A mahanyela ma nene ma vulula ndlela ya ku byala timbewu ta lisine — A timhaka leti ti susiwa ka Anuário das Testemunhas de Jeová de 2015
Afrika
A mufundisa wa demba ndleve makunu
Phajina 49 nzimana 3, kala phajina 51 nzimana 3
“A nza ha lovi kambe Xialakanyisweni.” A magezu lawa ma wulilwe hi mufundisa wa chechi yo kari ya Protestante le Djoni. Xini xi nga kuca murangeli loye wa wukhongeli lezaku aya Xialakanyisweni hi Abril wa 2014? Zi sukele laha a vamakabye vambiri va hlonge yo hambana va nga ya gongonza livati lakwe na va tira zinwe wutirelini. Hi ku alakanya makhati ma hunzileko, va wa famba na va tiva lezaku a mufundisa loye i wa nga ta vumela ku wulawula navo. Adaine, a nga munwe wa vamakabye lavo, i tlhamusela lezi zi nga humelela: “Kanilezi i lo vulula livati aku nghenani. Hi lova ni mabhulo yo leha naye. I wa hlamaliswa hi ku wona mulungu na a xumayela valandi a tlhela a wulawula naye hi lirimi lakwe. A mufundisa i lo sangula ku gonza Biblia hi kukhanzakanya.”
Adaine i engeta aku: “A wanuna loye i wa hi ni 40 wa malembe ni ku hunza na a hi murumiwa tlhelo mufundisa, kanilezi hi kona a nga kuma mihlamulo ya ziwutiso zakwe zontlhe lezi a nga hi ni 80 wa malembe. I gi ranza nguvu a bhuku Pimanyisa kukholwa kabye. Loku hi gonza, i hlayisa timhaka tontlhe hlokweni a tlhela a ti tirisa ka tikanelo takwe ta chechi. I lo komba ziro za bandla gakwe a bhuku Zini lezi a Biblia gi zi gonzisako hakunene?, aku: ‘Loku a Timboni ta Jehova tita kaya ka nwina ni bhuku legi, ti amukeleni mu tlhela mu demba ndleve ka lezi ti wulako hakuva a bhuku legi gi tele hi titshomba ta moya.’”
A mufundisa loye i lo byela Adaine lezaku i wa kawukiwa nguvu hi varangeli va chechi yakwe a tlhela a byeliwa lezaku a nga wulawuli hi Timboni ta Jehova ka tikanelo ta takwe chechi. I wa nga zi tivi lezaku i ta ku yini. Adaine i lo alakanya matimu ya mufundisa wo kari le Mianmar ma hlawutelweko ka Anuário ga 2013 ga Timboni ta Jehova. Laha a mufundisa loye a ngazwa matimu lawo na ma gonziwa hi Adaine, i te ngalo: “Phela mahungu lawa ma wulawula hi mina! Nzi na ni xiboho xa lisima nzi faneleko ku xi maha, niku a za ha lavi kuza nzi teka xikhati.”
I loya Xialakanyisweni hi khati go sangula hi Abril wa 2014, a guma a wula lezaku a nga ha lavi ku lova kambe. I kari a kombisa kutiyimisela ka ku tsema wunghana gontlhe ni wukhongeli ga mawunwa.
Republika Dominicana
Ku lo akiwa tiSalawu ta Mufumo hi xihatla
Phajina 140 nzimana 3, kala phajina 141 nzimana 3
A kuengeteleka ka xihatla ka vapizani ku lo maha lezaku kuva ni xilaveko xa kuva ku akiwa tiSalawu tinwani ta Mufumo. Hi kota ya lezo, hi Novembro wa 2000, a vamakabye va Republika Dominicana va lo sangula ku aka a tiSalawu ta Mufumo na va vunetelwa hi longoloko wa ku vuna matiko ma nga wusiwaneni. Kota wuyelo ga kona, a bandla ga zi kota ku aka Salawu ya Mufumo yo saseka ni yo tshamiseka hi xipimo xa ntlhanu wa maviki ni manharu. Kala Setembro wa 2011, a mitlawa yimbiri ya kuaka yi wa akile ni ku vuxa a 145 wa tiSalawu ta Mufumo.
A miako leyo ni vatiri va kuziranza lava va yi akako va nyika wukustumunyu ga ntamu nguvu. Hi xikombiso, ka xidoropana xo kari le nwalungu wa mupela-gambo, a vamakabye va lo kuma wutshamu ga gi nene kasi ku aka Salawu yiswa ya Mufumo. A phayona go kari go hlawuleka gi lo kombela nwinyi wa wutshamu lego lezaku a va xavisela. A wanuna loye i lo mu hlamula aku: “U nga ti mbheteli xikhati. Nzi nga ta ku xavisela a wutshamu legi, nguvunguvu loku u gi lavela ku aka chechi.”
Xikhatanyana nzhako ka bhulo lego, a nwinyi wa wutshamu lego i loya Puerto Plata a ya vuxela nhonzo yakwe yi nga hi Mboni ya Jehova. Loku a chikele, i lo pola lezaku a ngango wo kari wa Timboni wu tekile makabye wakwe a babyako wu tshama naye kasi ku mu hlayisa. A ngango lowo wu wa famba naye xipitali, mitlhanganweni, ni ntirweni wa kuxumayela. A wanuna loye i lo wutisa makabye wakwe lezaku i mali muni a hakhelako kasi ku khatalelwa hi ndlela leyo. I lo mu hlamula aku: “A nzi hakheli nchumu. Vamakabye va mina lava.”
A wanuna loye i lo khumbeka nguvu hi wuxinji go hlamalisa ga Timboni laha ka kuza a fonela phayona go hlawuleka legi gi nga yile gi ya wulawula naye a gi byela lezaku i cicile maalakanyo; wa vumela ku va xavisela wutshamu lego. A vamakabye va lo xava wutshamu lego va sangula ku aka salawu. Kusanguleni, a sati wa wanuna loye i wa hi ni mawonela ya hava hi Timboni ta Jehova. Kanilezi laha a nga wona a ndlela leyi a vamakabye va nga tirisana hi yona kuakeni, i lo wula lezi: “A nzi se wona a vanhu va nga ni wumunwe ni wunene a ku fana ni lava.”