Zikhumbuxeto Za Gotsovanyano Wa Muganga

◼ Zikhati Za Longoloko: Ka masiku wontlhe ya manharu, a longoloko wu ta sangula hi 8:20. A tivati ti ta vululiwa hi 7:00. Loku a wucenje go vulula gi sangula, hontlheni hi fanele ku tshama kasi a longoloko wu sangula hi ndlela yi nene. Hi wa Wuntlhanu ni Mulongiso, a longoloko wu ta gumesa hi 15:55. Hi Sonto wu ta gumesa hi 14:40.

◼ Wutshamu Go Veka Mimova: Ka matshamu wontlhe ya gotsovanyano lawa hi nga ni wutshamu ga hina go veka mimova, ku nga ta hakhelwa nchumu. A mimova, mimota, kutani mibhasikeni, yi ta vekiwa hi xaxameto hi kuya hi loyi a rangako a chikela na ku lanzelwa a zileletelo za vakombeteli va wutshamu go veka mimova. Kota lezi a wutshamu gi nga gi tsongwani, zi wa tava chukwana a ku a vanhu va hlengela a mova munwe hi laha zi kotekako ha kona.

◼ Ku Vekisa Wutshamu: A wutshamu gi nga ha vekiselwa a vanhu lava u fambako navo moveni munwe kutani lava u tshamako navo mutini munwe zinwe ni lava u gonzako navo a Biblia ka xikhati lexi. — 1 Kor. 13:5.

◼ Zifihlulo: Mahani wuxinji mu neha a zifihlulo hi kaya kasi mu nga suki wutshanwini ga gotsovanyano mu ya xava kutani ku ya teka zakuga hi xikhati xa kuhumula ka ni hlikanhi. Mu nga tirisa minzhava yi tsongwani yo hlayisa zilo na zi titimela leyi yi enelako lahasi ka xitulo. A minzhava ya hombe nguvu ni zibya za vidro a zi vumelelwi wutshanwini ga gotsovanyano. A ku na munhu a vumelelwako ku xavisa zakuga laha wutshanwini ga gotsovanyano.

◼ Minyikelo: Hi nga kombisa ku bonga a malulamiselo ya gotsovanyano hi ku maha a minyikelo ya kutiranzela yi yako ka ntiro wa misava yontlhe laha Salawu ya hina ya Mufumo kutani le gotsovanyweni. A minyikelo yontlhe yi mahiwako hi xeke yi fanele ku tsaliwa lezaku yiya ka “Associação das Testemunhas de Jeová de Moçambique.”

◼ Timhango Ni Timhaka Ta Xihatla: Loku ku humelela mababyi ya xitshuketi wutshanwini ga gotsovanyano, maha wuxinji u byela a mukombeteli a nga laha kusuhani. Yena i ta tivisa a Xipanze Xa Ku Lamulela Timhango kasi lava va tirako ka xona va tiva wuhombe ga xikarato lexo lezaku va nyika xivuno.

◼ Zilato: I chukwana a ku boha zilato zo toloveleka zi ku tshamako khwatsi lezi zi to ku vumelela a ku famba khwatsi lomu zikadeni, ni kunwani.

◼ Ku Gravara: A zitiro zontlhe zo gravara a zi faneli ku tlhomekiwa ka tiwayela ta gezi kutani ka ta muchini wa pfumawulo lowu wu tirisiwako laha wutshanwini ga gotsovanyano. A zilo lezo zi nga ha tiriswa ntsena hi ndlela ya ku nga kamanyeti vanwani.

◼ Maformulario Queira Visitar: Ku fanele ku tiriswa a maformulario Queira Visitar (S-43) kasi ku nyika mahungu xungetano hi munhu wihi ni wihi a kombisako kutsakela kota wuyelo ga kuxumayela ka hina ka xitshuketi hi xikhati xa gotsovanyano. A vahuweleli va fanele kuta ni formulario ginwe kutani mambiri Queira Visitar a gotsovanyweni. A maformulario lawa ma tatisilweko ma fanele ku yiswa ka Xipanze Xa Mabhuku kutani ka matsalani wa bandla ga wena loku mu wuyile hi gotsovanyweni. — Wona a Wutireli Ga Hina Ga Mufumo ga Novembro wa 2009, phajina 4.

◼ Kubapatizwa: Lava va yako kubapatizweni va fanele ku tshama wutshanwini legi gi vekiselweko vona na wu nga se sangula a longoloko wa Mulongiso ni mixo. Vontlhe lava va yako kubapatizweni va fanele ku famba ni thawula ni tinguwo to hlamba hi tona ti kombisako xichawo. Ka zikhati zi hunzileko a vo kari va bohile a tinguwo ti nga faneliko leti ti nga onha a wudzunzo ga ximaho lexo. A madota lawa ma kambisisako a ziwutiso zi nga ka bhuku Organizados ni lava va yako kubapatizweni ma fanele ku tiyiseka lezaku a munwe ni munwani wabye wa ti zwisisa a timhaka leti. A kubapatizwa kota xikombiso xa kutihendleleta i mhaka ya munhu wutsumbu leyi a yi mahako hi mbilu yontlhe xikari ka yena na Jehova.

◼ Malulamiselo Ya Wutshamu Go Etlela: Kasi a gotsovanyano wa muganga wu famba khwatsi, ka mahiwa mitiro yo tala. A wunwe wa yona wu yelana ni ku lulamiselela wutshamu a vamakabye lava va tako voce kutani lava va tako hi mingango. Hi lisine, a Xipanze Xa Ku Rurela Vapfhumba xi sangula ku tira a gotsovanyano na wa ha hi kule nguvu kasi ku maha malulamiselo ya ku rurela vontlhe lava va kombelako wutshamu go etlela. A malulamiselo lawo ma engetela a litsako la kuva zinwe kota maKristu. Hambulezo, kota lezi hi lavako lezaku a “zilo zontlhe zi mahiwa hi fanelo ni nayo,” ni lezi ku patsekako a kutshamiseka ka vanwani, ka laveka a zikhumbuxeto zo kari. Lava va ta ngava vapfhumba mitini ya vamakabye va fanele ku xalaliswa hi lezi va nyikwako va tlhela va maha lezi va kombeliwako. Kambe alakanya a ku siya yindlu na yi basile siku ni siku legi u yako gotsovanyweni zinwe ni siku go gumesa legi u ta nga suka laha mutini wa makabye. A kuva mupfhumba mutini wa makabye a zi suseli munhu a wutihlamuleli ga ku ti lavela a zakuga zakwe wutsumbu ni mali yo khilela hi yona mova. Hikwalaho, munwe ni munwani i fanele ku maha malulamiselo yakwe mhakeni leyi. A ku tirisana ni nwinyi wa muti mhakeni leyi zi ta maha lezaku a kombisa a kururela ka yena vapfhumba hi kuziranza, na ku nga hi hi kukurumetwa. Lezo zi maha lezaku a “zilo zontlhe zi mahiwa hi fanelo ni nayo.” A tshinya legi ga nayo gi tira ni ka lava va ta nga etlela laha wutshanwini ga gotsovanyano, vonawu va fanele ku tirisana ni vakombeteli lezaku va siya a wutshamu ga gotsovanyano na gi basile siku ni siku. — 1 Kor. 14:40.

◼ Ntiro Wa Kuziranza: A litsako leli hi li zwako hi kuva kona gotsovanyweni li tava la hombe nguvu loku hi ti nyikela hi kuziranza lezaku hi vunetela ka mitiro leyi yi lavekako. (Miti. 20:35) Ni wihi loyi a xuvako ku maha lezo i fanele ku bikela a Xipanze xa Ntiro wa Kuziranza laha gotsovanyweni. A vanana va nga chikeliko ka 16 wa malembe vonawu va nga nyikela xivuno xo saseka hi ku tira na va wonelelwa hi vapswali kutani munhu munwani wa hombe a vumelelweko hi munwe wa vona.