Migotsovanyano Ya Miganga — Xikhati Xo Khozela Hi Kutsaka
1. Xana a mibuzo ya Israeli yi wa fananisa kuyini ni migotsovanyano ya hina ya miganga ya nguva leyi?
1 Josefa, Maria, ni vana vabye, zinwe ni vanwani, xikhati ni xikhati va waya Jerusalema kasi va yava kona ka mibuzo ya lembe ni lembe. Hi zikhati lezo, vona zinwe ni vakhozeli vanwani va wa tsika a mitiro yabye ya siku ni siku zonake va yisa kupima ka zilo za lisima nguvu wutomini gabye, ku nga zilo za moya. A mibuzo yi wa va nyika xikhati xa ku ehleketa ni ku wulawula hi wunene ga Jehova ni ku gonza a Nayo wakwe. A migotsovanyano ya hina ya miganga leyi yi tako yi ta hi nyika a malungelo yo fana ni lawo kasi hi khozela Jehova hi kutsaka.
2. Xini hi faneleko ku maha lezaku hi ti longiselela a gotsovanyano wa muganga lowu wu tako?
2 Kulongisela Ku Lavekako: A ngango wa Jesu wu wa fanele ku famba a pfhuka wa xipimo xa 200 wa tikilometro kufamba ni kuwuya a ku suka hi Nazareta kala seyo. Hambu lezi hi nga zi tiviko lezaku Jesu i wa hi ni vamakabye vangani, ha zi kota ku alakanyela xungetano hi kulongisela zinwe ni kutikarata ku nga laveka ka Josefa na Maria. Xana u longisele zontlhe zi lavekako lezaku uva kona ka masiku wontlhe ya manharu ya gotsovanyano wa muganga lowu wu tako? Lezo zi nga ha lava lezaku u teka maferiya ntirweni kutani ku wulawula ni mutholi wa wena kutani mugonzisi wa vanana va wena xungetano hi ku kombela masiku. U mahile a malulamiselo ya ka ku tshama kona loku zi laveka? Xana wa alakanyela ku vuna wo kari laha bandleni a nga hiko na makotela yo famba ha yece lezaku a yava kona gotsovanyweni? — 1 Joh. 3:17, 18.
3. Xana a mibuzo ya Israeli yi wa nyikisa kuyini a malungelo ya ku a vanhu vava zinwe kasi va akana?
3 Kuva Zinwe Kasi Hi Akana: A mibuzo ya vaJuda hakunene yi wa vulula ndlela ya ku a vakhozeli-kulobye va hlengeletana kasi va akana! Handle ko kanakana a ngango wa Jesu wu wa xuva ku tlhela wu tlhangana ni vanghana va tiveneko navo a kaleloko. Va wa tsakiswa kambe hi kuva ni lungelo ga ku ti lavela vanghana vaswa xikari ka zidlemo za vaJuda ni vaproselita lava va nga wa tava kona seyo kutani ku ngha va enzela hambu ku wuya hi Jerusalema.
4. Hi nga kombisisa kuyini lezaku ha chela kota hi wumakabye ga hina ga wuKristu gi nga ni kubohana?
4 A xinwe xa zigelo za ku a nanza gi tsumbekileko ni go tlhariha gi maha malulamiselo ya kuva hi hlengeletana kasi hizwa tikanelo migotsovanyweni ya miganga, wutshanwini ga ku hi nyika mahungu yalawo hi ku ma gandla mava mabhuku, hi lezaku hi fanele ku tiyisana. (Maheb. 10:24, 25) Hikwalaho, maha makungo ya ku u chikela gotsovanyweni na ga ha hi mixo siku ni siku kasi uzwa kunanziha ka kuva zinwe ni vanwani na mukhomi wa nzima a nga se wula a magezu ya kusangula ka wucenje, gi kombako lezaku xikhati xa ku tshama hasi. Wutshanwini ga ku suka laha a gotsovanyano wu mahelwako kona ni hlikanhi kasi hi ya lava zakuga, hi kuciwa a kuta ni zifihlulo zo hehuka kasi hi tshama kwalaha gotsovanyweni hi tivana ni ku bhula ni lava va nga kusuhani na hina. A wumakabye ga hina ga wuKristu gi nga ni kubohana xinyikiwo xi tako hi ka Jehova lexi hi faneleko ku chela kota ha xona. — Mika. 2:12.
5. Xini xi to hi vuna a ku susa xivuno xo mbhelela ka longoloko?
5 Xikhati Xa Ku Gonza: Kusukela wunwananeni, Jesu i lo lonzowota a mibuzo lezaku a gonza xungetano hi Dadani wakwe wa le tilweni. (Luka 2:41-49) Xini xi to hi vuna lezaku hina ni mingango ya hina hi susa xivuno xo mbhelela ka tikanelo leti ti to vekiwa? U nga suka suki xikari ka zipanze, niku potsa ku wulawula na ku nga hi na xigelo. U nga vumeli lezaku a selulari ya wena kutani xitiro xinwani xi ku colopetela kutani ku colopetela vanwani. A mahlo ya wena ngha ma cuwuka a mukaneli u tlhela u tsala a timhaka leti u lavako ku ti tirisa. Tshamani hi ngango kasi mu tiyiseka lezaku a vanana va nwina vonawu va ingisela. Ni gambo, ti nyikeni xikhati xa ku bhulisana hi timhaka leti mu ti tsakeleko.
6. Zini hi faneleko ku tshama na hi zi alakanya xungetano hi kuambala ni kutisasekisa ka hina?
6 Kuambala Ni Kutisasekisa: A vaxavisi va matiko-wundle lava va nga hunza hi ruwa zi wa va olovela ku tiva a ngango wa Jesu ni vakhozeli vanwani va vaJuda lava va ngaya kutani ku wuya hi mibuzweni hi kota ya machakafula lomu magumo ya tinguwo tabye ni tingotana ta wukuxe ti nga bohelelwe hehla ka machakafula. (Mitse. 15:37-41) Hambu lezi a maKristu ma nga ambaliko a tinguwo to hlawuleka, hi tiviwa hi ku ambala hi ndlela yi kombisako xichawo ni kubasa. Hi fanele ku chela nguvu kota hi kucuwukeka ka hina a xikhati lexi hi yako kutani ku wuya hi gotsovanyweni ni loku hihi doropeni legi a gotsovanyano wu mahelwako ka gona. Hambu loku hi cica tinguwo anzhako ka gotsovanyano, hi fanele ku simama hi cuwukeka hi ndlela yo dzunzeka hi tlhela hi boha a makaraxa ya hina ya gotsovanyano. Hi ndlela leyi, hi ta wonekela xikari ka lava va nga hiko Timboni hi tlhela hi koka kupima ka lava va hi wonako.
7. Hikuyini hi faneleko ku alakanyela hi ku ti hendleleta kasi hi maha a ntiro wa kuziranza gotsovanyweni?
7 Ku Laveka Vatiri Va Kuziranza: Ku laveka vatiri vo tala kasi a gotsovanyano wu famba hi ndlela yi nene. Xana u nga ti hendleleta hi kuziranza kasi ku vunetela? (Tis. 110:3) A mitiro yi mahiwako migotsovanyweni xipanze xa ntiro wa hina wo basa niku yi nyika wukustumunyu gi nene. A murangeli wa wutshamu go kari ku mahelweko a gotsovanyano i hlamalisilwe nguvu hi vatiri va kuziranza lava va basisileko a wutshamu laha ka kuza a tsala lezi: “Nza mu bonga hi kota ya ximaho lexi xo hlamalisa ni xo hunza zontlhe nzi zi wonileko. Xikhati xontlhe nzi wazwa lezaku a Timboni ta Jehova vanhu vo hlawuleka va nga ni ndhuma yi nene kusukela kale laha ka wutshamu ga hina hi kuva xikhati xontlhe va gi siya na gi basile a ku hunza lezi va nga gi kumisa zona. Nwina ni hlengeletano ya nwina mu mahile lezaku a wutshamu legi giva go saseka xipanzeni lexi niku mu mahile lezo ni vanhu vo tsakisa nguvu lava cima hi nga kala hi nga sezwa a litsako la ku va tiva.”
8. Hi wahi malungelo ya ku nyika wukustumunyu ma tova kona doropeni legi a gotsovanyano wu mahelwako ka gona?
8 Malungelo Ya Ku Kustumunya: A votala doropeni legi a gotsovanyano wu mahelwako ka gona va ta wona vapfhumba va ambeleko khwatsi, vo basa na va bohile a makaraxa ya gotsovanyano, niku lezo zi nga va maha va lava ku tiva zo kari. Hi ku maha loko hi vululelwa tindlela to va bhulela hi gotsovanyano. Anzhako ka longoloko, a mufanyana wa mune wa malembe i loya restaurante ni bhuku gakwe ga giswa gi nga ha hi ku humesiwa a ya komba a wasati a nga tira ku phamela zakuga. Lezo zi vululile a ndlela ya ku a vapswali va mufanyana loyi va ramba a wasati loye lezaku aya gotsovanyweni.
9. Hi nga wu pimanyisisa kuyini a ngango wa Jesu xungetano hi ku kombisa kutsakela a malulamiselo ya Jehova ya moya?
9 A mibuzo ya xikhatini lexo yi wa hi zimaho zo tsakisa lezi a vaJuda va maalakanyo ya moya va nga zi langutela hi mahlo yo pswhuka. (Deut. 16:15) A ngango wa Jesu wu wa tsaka hi kutikarata kwihi ni kwihi loku va nga ku maha kasi ku yava kona ni ku tlhela va vuneka hi kumbhelela. Hi yi tsakelisa zalezo a migotsovanyano ya hina ya miganga, hi yi wona kota xinyikiwo xi tako hi ka Dadani wa hina wa liranzo wa le tilweni. (Jak. 1:17) Zalezi xikhati xa ku ti longiselela a ximaho lexi xa lembe ni lembe xa ku khozela Jehova hi kutsaka!