A Migotsovanyano ya hina ya Muganga yi nyika wukustumunyu ga ntamu
1. Xana a mibuzo ya vaIsraeli yi wa va nyika a lungelo muni?
1 Xikhatini xi hunzileko, a vaIsraeli va wa tlhangana kasi ku maha mibuzo makhati manharu hi lembe. Hambu lezi ku nga hi vavanuna ntsena va nga fanele ku ya ti wonekelisa mahlweni ka Jehova, a kutala ka zikhati, a ziro zontlhe za ngango zonawu zi waya Jerusalema kasi zi ya ti buza hi migotsovanyano leyo yo tsakisa. (Deut. 16:15, 16) A mibuzo leyo yi wa va nyika lungelo ga ku ehleketa ni ku bhula hi timhaka ta lisima ta moya. Hi tihi a to kari ta timhaka leto ke? A yinwe ya tona hi leyi yaku Jehova Munyiki wo hana ni wa liranzo. (Deut. 15:4, 5) A yinwani hi leyi yaku hi nga tsutsumela kakwe kasi a hi vikela ni ku hi rangela. (Deut. 32:9, 10) Tlhatakumbiri, a vaIsraeli va wa ti nyika xikhati xa ku ehleketa lezaku, kota vanhu va yimelako vito ga Jehova, va wa fanele ku hanya hi milayo yakwe yo lulama. (Deut. 7:6, 11) Inyamutlha, a migotsovanyano ya hina ya muganga ya lembe ni lembe ya hi vunawo hi ndlela leyo.
2. Xana a gotsovanyano wu ta hi vunisa kuyini a ku zwisisa lisine?
2 A timhaka leti ti gonziwako ti woningela a lisine: Migotsovanyanweni ya hina ya muganga hi ti buza hi tikanelo, tidrama, mikombiso, ni kubhulisana. Zontlhe lezo zi hi vuna a ku zwisisa khwatsi a lisine la Biblia. (Joh. 17:17) Ku ta chikela nyamutlha, ku sina ku mahilwe zo tala xungetano hi gotsovanyano lowu wu tako. A hlengeletano ya Jehova yi longisela a mutlhangano lowu wu to vuna vamakabye misaveni yontlhe. (Mat. 24:45-47) Xana a wu zi doneli mari lezi zi to kanelwa ke?
3. Zini hi faneleko ku maha kasi hi vuneka hi mutlhangano?
3 Kunene, hi ta vuneka nguvu loku hiva kona ni loku hi demba ndleve ka masiku wontlhe ya manharu. Loku u nga se kombela a masiku ka mulungu wa wena, i chukwana u maha lezo zalezi. Humula u enelelwa siku ni siku kasi u nga khudzeheli hi xikhati xa mutlhangano. A votala va wona lezaku a ku tshama na va cuwuka a mukaneli ni ku tsala a timhaka leti va lavako ku ti tirisa za va vuna a ku tshama na va hanyanya. U nga tsiki a selulari ya wena kutani xilo xinwani xi ku hambukisa kupima kutani ku colopetela vanwani. U nga bhuli, u nga tsali mahungu hi selulari, ge hambu kuga na mutlhangano wu kari wu famba.
4. Xana a vapswali va nga vunisa kuyini a vana vabye lezaku va vuneka hi gotsovanyano?
4 Ka lembe ni lembe ga Sabado, a mingango ya ka Israeli yi wa tlhangana kasi kuzwa a Nayo na wu gonziwa Mibuzweni ya Mixaxa. Va wa nga siyi a “vanana” vabye ‘kasi va vonawu va fela kuzwa va gonza.’ (Deut. 31:12) A hi kutsakisa ka zona a ku wona mingango na yi tshamile zinwe mutlhanganweni, a vanana na va nga khudzeheli, kanilezi na va dembile tindleve va ingisela! Hi xikhati xa ni gambo, hikuyini mu nga vululiko a mikaderno ya nwina kasi ku bhula hi timhaka leti ti nga kanelwa gotsovanyanweni, leti mu ti tsakeleko nguvu ke? “A wupumbu gi namarela mbilwini ya nwanana,” hikwalaho, zi wa ta saseka loku a vapswali va wonelela a vanana vabye, a ku patsa ni lava va nga tangeni yo rama xikhatini xa ku humula ni loku va hi mitini leyi va nga rurelwa ka yona, wutshanwini ga ‘ku va tsika va ti fuma.’ — Mav. 22:15; 29:15.
5. Xana a wumunhu ga hina gi li sasekisisa kuyini a lisine ke?
5 A wumunhu ga hina gi sasekisa a lisine: Loku hi kombisa wumunhu a xikhati lexi hi nga gotsovanyanweni hi sasekisa a lisine. (Tit. 2:10) A vanhu lava hi kumanako navo na hi famba ni ku wuya hi mutlhanganweni kutani ku ya xava zokari bazarini handle ko kanakana va gi wona a wumunhu ga hina. (Kol. 4:6)
6. Hi nga li sasekisisa kuyini a lisine hi mabohela ya hina loku hihi wutshanwini ga gotsovanyano ke?
6 A makaraxa ya hina a ma mahelwangi ku tivisa gotsovanyano ntsena ni ku komba vanwani lezaku hi Timboni, kanilezi ma nyika wukustumunyu ka lava va hi wonako. Lava va hi wonako na hi bohile hi xichawo, na hi khweketile a makaraxa ya gotsovanyano va ta zi wona lezaku hi hambene ni vanhu va tiko legi lava va bohako tinguwo ti vuxako a manyawunyawu ya masango. (1 Tim. 2:9, 10) Hikwalaho, ngha hi chela kota hi maambalela ya hina. A ku enza hi ximalowani ni xikhipa a zi kombi xichawo. Hambu loku a gotsovanyano wu mahelwa laha libalangeni, a tinguwo ta hina ti fanele ku kombisa xichawo. Loku hi cica tinguwo anzhako ka mutlhangano tonawu ti fanele ku kombisa xichawo.
7. Zini hi faneleko ku maha kasi hi ti buza khwatsi hi wumakabye ga hina ga wuKristu?
7 A mibuzo leyi a vaIsraeli va nga yi maha hi kukhanzakanya, yi wa va tlhanganisa ni malanza-kulobye ma ngata hi ka manwani matiko. Lezo zi wa tiyisa a kuzwanana kabye. (Miti. 2:1, 5) Xikhatini xa migotsovanyano, a kuzwanana ka hina kota maKristu ku woniwa hi vanhu vontlhe. Lezo za va hlamalisa lava va hi wonako. (Tis. 133:1) Hikwalaho, tana ni zakuganyana kasi uga na u hi zinwe ni vamakabye wutshanwini ga ku huma u yaga handle.
8. Hikuyini zi nga zi nene a ku ti hendleleta kasi hi maha mitiro loku a xiyimo xa hina xi hi vumelela?
8 A kutala ka zikhati, a vaakelani va hlamala hi ku wona a migotsovanyano ya hina yi longiselweko khwatsi, nguvunguvu a xikhati lexi va tivako lezaku a mitiro yontlhe yi mahiwa hi vanhu va ti hendleletileko ha voce. Makunu, xana u ta ti hendleleta lezaku u maha mitiro le gotsovanyanweni ke? (Tis. 110:3) A kutala ka zikhati, a ziro zontlhe za ngango zi ti hendleleta zi maha mitiro leyo kasi zi gonzisa a vana lezaku vonawu va fanele ku ti hendleleta. Loku u hi ni tingana, ti hendlelete u maha mitiro gotsovanyanweni kasi uva ni lungelo ga ku bhula ni vamakabye-kulobye. A makabye wo kari wa xisati i te ngalo: “Ahandle ka ziro za ngango wa mina ni vanghana va tsongwani ntsena, nzi wa nga tivi munhu. Kanilezi, a xikhati lexi nzi nga ti hendleleta lezaku nzi vunetela ku swiyela ni ku basisa, nzi lo tiva vamakabye vo tala va xinuna ni va xisati. A zi no ku tsakisa!” Loku hi ti karatela ku tiva vanhu vo tala hi ku maha mitiro gotsovanyanweni, hi tava ni litsako la hombe. (2 Kor. 6:12, 13) Loku ku hi lezaku a wu se tshuka u vunetela, wutisa madota lezi u faneleko ku maha.
9. Hlawutela lezi hi to va rambisa zona vanwani lezaku va famba na hina gotsovanyanweni.
9 Ramba vanwani lezaku va tazwa lisine: Kota lezi hi tolovelako ku maha, loku ku sele a maviki manharu kasi a gotsovanyano wa hina wu sangula, hi ta avela zirambo kasi hi nga ti buzi hoce. A mabandla ma fanele ku ti karatela a ku tlhanganyisa a xipanze xabye. (Wona kwadru, “Ndlela yo nyikela xirambo.”) Loku u nga zi koti ku mbheta zirambo za wena, famba nazo gotsovanyanweni. Zi ta tiriswa hi vanwani kasi ku nyika wukustumunyu ga xitshuketi.
10. Hlawutela matshango ma kombako lezaku a tsima ga hina ga lembe ni lembe ga bhinzula.
10 Xana a matsima ya hina ya ku ramba vanhu ma bhinzula ke? Ka gotsovanyano wo kari, a mukombeteli i vunile a patswa wo kari a ku kuma wutshamu. Anzhako ka gotsovanyano a patswa lowo wu mu byelile lezaku wu “kokilwe kupima” hi magezu lawa wu ma wonileko laha ka xirambo. Hikwalaho, va enzile a 320 wa tikilometro kasi va kota kuzwa gotsovanyano. A makabye munwani wa xisati i nyikele xirambo ka wanuna wo kari loyi a nga wonekisa ku khwatsi i lava ku tiva zokari xungetano hi gotsovanyano. Hikwalaho, i ti nyikile xikhati xa ku bhula ni wanuna loye. Kwale gotsovanyanweni, a makabye wa hina i lo wona a wanuna loye zinwe ni vanghana vakwe na va teka a mabhuku lawa ma nga humesiwa ka gotsovanyano lowo.
11. Hi lihi lisima la migotsovanyano ya hina ya muganga?
11 A mibuzo ya vaIsraeli yi wa hi lulamiselo ga Jehova ga liranzo legi gi nga va vuna a ku ‘mu khozela hi ku kholeka ni lisine.’ (Jox. 24:14) Hi kufanana, a kuya migotsovanyanweni ya hina i ndlela ya ku khozela Jehova. Ahandle ka lezo, zi hi vuna a ku simama ‘hi famba lisineni.’ (3 Joh. 3) Ngha Jehova a katekisa a mizamo ya vontlhe lava va ranzako lisine kasi va zi kota kuya gotsovanyanweni va ya vuneka!
[Tlhamuselo wa mifota ka phajina 4]
A wumunhu ga hina gi sasekisa a lisine
[Tlhamuselo wa mifota ka phajina 5]
Loku ku sele a maviki manharu kasi a gotsovanyano wa hina wu sangula, hi ta avela zirambo kasi hi nga ti buzi hoce
[Tlhamuselo wa mifota ka phajina 6]
Ndlela yo nyikela xirambo
Kasi hi tlhanganyisa a xipanze xa hina, hi nga lehisi mabhulo. Hi nga haku: “Gi cile. Nzi tela ku ta ku nyika a xirambo lexi lezaku uva kona ka mutlhangano wa hombe. U ta kuma manwani mahungu kwalaha.” Tlharihisa. Kumbheleni ka viki, u nga rivali ku nyikela marevista a xikhati lexi u nyikelako xirambo.